Liboslar — har bir xalq tarixi bilan uzviy bog‘liq bo‘lib, u milliy o‘ziga xoslikni aks ettiradi. Mintaqamizdagi iqlim, shart-sharoit va ko‘p yillik tarixga ega e’tiqodimiz asosida o‘ziga xos milliy liboslarimiz shakllanib kelgan. Milliy liboslarimiz nafaqat millatimiz ko‘rkini, balki ma’naviy mafkuralarimizni va dunyo tamaddunida tutgan o‘rnimizni ham namoyon etadi. Bugungi kunda mana shu uzoq tarixni bosib o‘tgan, ajdodlarimiz mafkurasi va dunyoqarashi haqida so‘zlaydigan milliy liboslarimizni saqlab qolish va targ‘ib etish milliyligimizni saqlab qolish demakdir. Bu borada Prezident Shavkat Mirziyoyevning “Agar jamiyat hayotining tanasi iqtisodiyot bo‘lsa, uning joni va ruhi ma’naviyatdir. Biz yangi O‘zbekistonni barpo etishga qaror qilgan ekanmiz, ikkita mustahkam ustunga tayanamiz. Birinchisi — bozor tamoyillariga asoslangan kuchli iqtisodiyot. Ikkinchisi — ajdodlarimizning boy merosi va milliy qadriyatlarga asoslangan kuchli ma’naviyat”, degan so‘zlarini alohida ta’kidlash o‘rinli.
Ushbu vazifalar ijrosini ta’minlash, xususan, yoshlar o‘rtasida milliy liboslarni ommalashtirish maqsadida O‘zbekiston yoshlar ittifoqi Yoshlar ijod saroyida O‘zbek milliy modasining jozibasi, zamonaviy tendensiyalar va an’anaviy uslublarning o‘zaro uyg‘unligi namoyon bo‘lgan “Milliy Fashion Show” modalar namoyishi bo‘lib o‘tdi. Tadbir milliy liboslarimizni keng targ‘ib qilish, yosh dizaynerlarni qo‘llab-quvvatlash hamda xalqimizning o‘z an’ana va qadriyatlariga bo‘lgan hurmatini yana bir bor yuksaltirish maqsadida tashkil etildi. Namoyishda nafis va betakror milliy liboslar taqdim etilib, an’anaviy bezaklar zamonaviy moda uslublari bilan uyg‘unlashgan holda moda ixlosmandlariga havola qilindi.
Tadbir davomida san’atkorlarning jonli chiqishlari bayramona ruh bag‘ishlab, tadbirga yanada ko‘tarinkilik baxsh etdi. Shuningdek, milliy hunarmandlar ko‘rgazmasi ham tashkil etilib, unda respublikamizning turli hududlaridan kelgan mohir ustalar tomonidan yaratilgan nafis hunarmandchilik buyumlari taqdim etildi. Mehmonlar Milliy zardo‘zchilik, Milliy o‘yinchoqlar, Oddiy metallardan milliy uslubda tayyorlangan taqinchoqlar, kandakorlik, misgarlik buyumlari, kulolchilik, zargarlik va yog‘och o‘ymakorligi kabi san’at turlarining eng sara namunalari bilan yaqindan tanishish imkoniga ega bo‘lishdi. Modalar namoyishi mehmonlarga zamonaviy dizaynerlar tomonidan tayyorlangan eksklyuziv milliy kolleksiyalar, ipak va atlas matolar jozibasi, nafis kashtalar hamda milliy modaning eng yangi yo‘nalishlari bilan tanishish imkonini berdi.
Mazkur muhim madaniy tadbir O‘zbekiston yoshlar ittifoqi, “Yoshlar — kelajagimiz” jamg‘armasi va Toshkent to‘qimachilik va yengil sanoat instituti tomonidan tashkil etilib, milliy merosimizga bo‘lgan e’tiborning yana bir yorqin namunasiga aylandi.
