2025-yildan kam ta’minlangan oilalar bolalari uchun nafaqa va moddiy yordam berishning talablari o‘zgartiriladi.

23-sentabr kuni “Kambag‘allikni qisqartirish va aholi turmush farovonligini oshirish borasidagi chora-tadbirlarni yangi bosqichga olib chiqish to‘g‘risida»gi prezident farmoni qabul qilindi.

Unga ko‘ra, 2024-yilning qolgan davrida 500 ming, 2025-yilda 1 mln nafar aholini kambag‘allikdan chiqarish davlat ijtimoiy-iqtisodiy siyosatining hamda barcha darajadagi davlat organlari va tashkilotlarining birinchi darajali vazifasi etib belgilandi. Kambag‘allikni qisqartirish sohasida erishilgan ijobiy natijalar va to‘plangan milliy tajriba hamda xalqaro amaliyot asosida “Kambag‘allikdan farovonlik sari” dasturi amalga oshiriladi hamda bu bo‘yicha respublika komissiyasi tashkil etiladi.

Dastur har bir fuqaroni o‘zi va farzandlari kelajagi uchun mas’uliyat bilan yondashishga va salohiyatini ro‘yobga chiqarish uchun imkoniyat yaratishga qaratilgan. U 2024-yilning 1-noyabridan quyidagilarni nazarda tutuvchi “Kambag‘al oilalar uchun yettita imkoniyat va mas’uliyat” tamoyili asosida amalga oshiriladi:

• barqaror bandlik va yuqori daromad topishga erishish;
• ta’lim olish va kasb-hunar o‘rganish;
• kafolatlangan davlat tibbiy xizmatidan foydalanish;
• ijtimoiy xizmatlardan foydalanish;
• yashash sharoitlarini yaxshilash;
• davlat tomonidan mahallalar infratuzilmasini rivojlantirish;
• davlat organlari xodimlari bilan to‘g‘ridan to‘g‘ri muloqot qilish.
• 1-dekabrdan Ijtimoiy himoya milliy agentligi tomonidan Kambag‘al oilalar reyestri shakllantiriladi. Reyestr “mahalla yettiligi” tomonidan kambag‘al oilalarning ijtimoiy sharoiti va kambag‘allikka tushish sabablarini o‘rganish orqali tuziladi.

2025-yildan kam ta’minlangan oilalar bolalari uchun nafaqa va moddiy yordam olayotgan oilalarning rasmiy band bo‘lmagan a’zolari ishga joylashsa, o‘zini o‘zi band qilsa yoki tadbirkorlik faoliyatini yo‘lga qo‘ysa, bu nafaqa va moddiy yordamni ularning muddati tugagungacha, biroq 6 oydan ko‘p bo‘lmagan muddatga to‘lash davom ettiriladi.

Kambag‘al oilalarga ko‘mak choralari quyidagi shartlar inobatga olingan holda ko‘rsatiladi:

• ijtimoiy shartnoma asosida mehnatga layoqatli oila a’zolarining bandligini ta’minlash;
• o‘z tomorqasidan samarali foydalanish (ekin ekish);
• oila a’zolari, shu jumladan, farzandlarining bilim olishi, kasb-hunar va xorijiy tillarni o‘rganishi hamda sog‘lig‘ini nazoratga olishi;
• uy-joyini ozoda tutishi kabilar.

11-sentabr kuni Shavkat Mirziyoyev raisligida kambag‘allikni qisqartirish tizimini yaxshilashga qaratilgan videoselektor yig‘ilishi o‘tkazilgandi. Unda Bosh prokurorga kambag‘al oilalarni o‘rganish uchun alohida o‘rinbosar tayinlanishi qayd etilgandi. Prokuratura kambag‘allikni qisqartirishda qonunchilik ijrosini nazorat qiladi.

Mamlakatda kelgusi uch yilda kambag‘allik darajasini 11%dan 7%ga qisqartirish rejalashtirilgan. Tizimda kambag‘al oilani tanlashda aniqlik, mablag‘ ajratishda yaxlitlik yetishmasligi aytilgandi.

Endi uy-joy olmoqchi bo‘lgan fuqarolar pulini quruvchiga emas, to‘g‘ridan to‘g‘ri bankka topshiradi.

Avvalroq Shavkat Mirziyoyev raisligida qurilish industriyasi va qurilish materiallari ishlab chiqarishni rivojlantirishga qaratilgan yig‘ilish o‘tkazilayotgani haqida xabar berilgandi.

Unda prezident har bir viloyatda tashkil qilingan Shaharsozlik kengashlari faoliyati bo‘yicha ham e’tirozlar ko‘pligini ta’kidladi.

Kengashga kiritilgan loyihalarni ko‘rib chiqish va kelishish 6 oygacha cho‘zilmoqda. Loyihalar Shaharsozlik kengashiga kiritilishdan oldin tumandagi Sanepidnazorat va yong‘in xavfsizligi bilan kelishiladi. Vaholanki, ularning rahbarlari kengash tarkibida o‘tiribdi.

Kengashda rad qilingan loyihani qayta kiritish uchun “SES” va yong‘in xavfsizligi bilan boshqatdan kelishish majburiy. Oqibatda quruvchi va loyihachilar bunga 2 karra pul to‘lab, yana 2−3 oy yo‘qotayapti. Endilikda Shaharsozlik kengashlari faoliyati bilan bog‘liq jarayonlar to‘liq raqamlashtiriladi. Bunda barcha loyihalar kengashga “Shaffof qurilish” platformasi orqali elektron kiritiladi.

Shuningdek, loyiha hujjatlari bo‘yicha “SES” va yong‘in xavfsizligi tuman bo‘limidan alohida xulosa olish bekor qilinadi.

Kengash a’zolari loyihani quyi tizimi bilan shu platformada elektron kelishadi, loyihani ko‘rib chiqish muddati 15 kundan oshmasligi zarurligi ta’kidlandi.

Ushbu tartibni 1-dekabrdan Toshkent shahrida, kelgusi yilning 1-aprelidan qolgan viloyatlarda joriy qilish topshirildi.

Yig‘ilishda uy-joy qurib berishni va’da qilgan quruvchi va bunga pul tikkan aholi o‘rtasida nizolar ko‘payib borayotgani qayd etildi.

Bunday noinsof quruvchilarga aldanib, odamlar ham uysiz, ham pulsiz qolmoqda. Shu bois prezident topshirig‘iga asosan qurilish vaziri boshchiligidagi ishchi guruhi xorijiy tajribani o‘rgandi. Endilikda uy-joy sotib olish bo‘yicha kafolatli eskrou tizimi joriy qilinadi. Bunda developerlar o‘zlari qurayotgan uylar sotuvini tashkil qilish bo‘yicha banklar bilan shartnoma tuzadi, bu uylarni olmoqchi bo‘lgan odamlar pulini quruvchiga emas, to‘g‘ridan to‘g‘ri bankka topshiradi.

Banklar esa yig‘ilgan pulni quruvchiga resurs sifatida beradi. Shunda banklar quruvchi va xaridor o‘rtasida ko‘prik bo‘lib, uy-joyni o‘z vaqtida va sifatli qurib, egasiga topshirishga kafil bo‘ladi.

Yangi tizim Samarqand shahri, Yangihayot va Sergeli tumanlarida bir yil davomida tajribadan o‘tkazilishi belgilandi.

Maktab kurslarida istalgan kishi, bepul o‘qishi mumkin bo‘lib, mashg‘ulotlar o‘zbek va rus tillarida olib boriladi.

O‘zbekistonda bepul elektron tijorat maktabi ish boshladi. Bu haqda Investitsiyalar, sanoat va savdo vazirligi xabar berdi. Elektron tijorat maktabi kichik va o‘rta biznes vakillariga digital-vositalar bilan ishlashni o‘rgatadi.

Maktab — kichik va o‘rta biznesni qo‘llab-quvvatlash uchun ishga tushirilgan notijorat loyihasi hisoblanadi.

Notijorat loyihasi “Mastercard” kompaniyasi tomonidan, O‘zbekiston Investitsiyalar, sanoat va savdo vazirligi ko‘magida amalga oshirilmoqda.

Ta’lim tadbirkorlarga digital-vositalar yordamida biznesni kengaytirish va o‘z ishlarida ko‘proq pul topish imkonini beradi. Elektron tijorat onlayn-maktabi doirasida tadbirkorlar targetlangan reklamani ishga tushirish, ijtimoiy tarmoqlarda sahifa yuritish, internet-do‘kon ochish, xalqaro onlayn-maydonchalarda tovar sotish, onlayn-to‘lovlarni ulash va kiberxavfsizlikni ta’minlash kabi ko‘nikmalarga ega bo‘ladilar.

Maktab kurslarida istalgan kishi, mutlaqo bepul o‘qishi mumkin bo‘lib, mashg‘ulotlar o‘zbek va rus tillarida olib boriladi.

Ushbu havola orqali elektron tijorat maktabi dasturi bilan tanishish va o‘qishni boshlash mumkin.

Bunda ta’lim krediti uchun arizalarni Yagona portal hamda Ta’lim krediti tizimi orqali jo‘natish mumkin bo‘ladi.

Vazirlar Mahkamasining 16-sentabrda qabul qilingan qarori bilan ta’lim krediti berish tartibiga o‘zgartirish kiritildi. Bu haqda “Ta’lim nazorati” “Telegram” kanali xabar berdi.

Hujjat bilan, oliy va professional ta’lim tashkilotlarida tahsil olish uchun ta’lim krediti faqat kunduzgi ta’lim shaklida o‘qiyotgan talaba va o‘quvchilarga ajratiladi. 2024/2025 o‘quv yilidan ta’lim krediti ikkinchi va undan yuqori bosqich talabalari uchun fanlarni o‘zlashtirishning o‘rtacha ko‘rsatkichi (GPA) “3” dan past bo‘lsa, to‘lov-kontrakt summasining ko‘pi bilan 80%i miqdorida ajratiladi. Bunda kredit to‘lov-kontrakt summasining dastlabki 20%i talaba tomonidan to‘langandan keyin beriladi.

Talaba baholari “3” va undan yuqori yoki “Ijtimoiy himoya yagona reyestri»ga kiritilgan oila a’zosi bo‘lsa, ta’lim krediti to‘lov-kontrakt summasi miqdorida ajratiladi.

Kredit oluvchi tomonidan ta’lim kreditini olish uchun to‘g‘ridan to‘g‘ri bankga murojaat qilinganda, bank ular uchun ochilgan “Ta’lim krediti” (talim-krediti.mf.uz) axborot tizimidagi shaxsiy kabinet orqali ta’lim krediti olish to‘g‘risidagi arizani shakllantiradi.

Joriy yilning may oyida ta’lim kreditini ajratish tartibini yaxshilashga qaratilgan prezident farmoni qabul qilingandi. Unda “Ta’lim krediti” axborot tizimi Oliy ta’lim, fan va innovatsiyalar vazirligining tegishli axborot tizimlari bilan integratsiya qilinishi belgilangan.