Prezident Milliy kutubxona, ikkita universitet kampusi va 55 ming o‘rinli stadionni belgilangan muddatda hamda sifatli yakunlash bo‘yicha topshiriqlar berdi.

Shavkat Mirziyoyev 27-iyul kuni Yangi Toshkent shahrida amalga oshirilayotgan qurilish ishlari bilan tanishdi.

Davlat rahbari dastlab Yangi Toshkentni barpo etish direksiyasiga tashrif buyurib, shahar maketi va raqamli xaritasi asosida qurilishlarning umumiy borishi, yirik obyektlarning o‘zaro joylashuvi hamda keyingi rejalar bilan tanishdi.

Taqdimotda transport va muhandislik infratuzilmasini qurilishlar bilan uyg‘un rivojlantirish, yashil hududlar va jamoat makonlarini o‘zaro bog‘lash, Yangi Toshkentni amaldagi poytaxt hududi bilan uzviy integratsiya qilish masalalari muhokama qilindi.

Prezident barcha obyektlarni yagona shaharsozlik konsepsiyasi asosida, yuqori sifat va me’moriy uyg‘unlik asosida qurish zarurligini ta’kidladi.

Shundan so‘ng davlat rahbari Nizomiy nomidagi O‘zbekiston milliy pedagogika universitetining Yangi Toshkentda bunyod etilayotgan yangi kampusini ko‘zdan kechirdi. Yangi Toshkent qurilishining birinchi bosqichi doirasida barpo etilayotgan majmuaning rektorat va ayrim fakultetlar binolarida yakuniy qurilish hamda pardozlash ishlari olib borilmoqda.

Yangi kampus tarkibida o‘quv binolari, ilmiy laboratoriyalar, axborot-resurs markazi, elektron kutubxona, talabalar turar joylari, sport va madaniyat inshootlari joylashadi. Bu yerda ta’lim, ilmiy tadqiqot va talabalar hayotini yagona muhitda uyg‘unlashtirish rejalashtirilgan.

Universitetda xalqaro ta’lim standartlarini bosqichma-bosqich joriy etish va boshqaruv tizimini “Yangi O‘zbekiston” universiteti tajribasi asosida transformatsiya qilish ko‘zda tutilgan.

Prezident, shuningdek, Yangi Toshkentda qurilayotgan O‘zbekiston Milliy kutubxonasining yangi binosidagi ishlar bilan tanishdi. Ma’lum qilinishicha, qurilish va pardozlash ishlarining qariyb 90% yakunlangan bo‘lib, kutubxonani joriy yil foydalanishga topshirish rejalashtirilgan.

Maydoni 30 ming kvadrat metrdan ortiq bo‘lgan to‘rt qavatli kutubxona bir vaqtning o‘zida 1 420 nafar kitobxonga xizmat ko‘rsatish imkoniyatiga ega bo‘ladi. Unda kitob fondlarini saqlash va zararsizlantirish uchun naxsus texnologiyalar, xalqaro elektron kutubxona bazalaridan foydalanish imkoniyati, ko‘zi ojiz fuqarolar uchun maxsus o‘quv muhiti yaratiladi.

Shuningdek, 300 o‘rinli kafe, galereya va dam olish hududlari tashkil etiladi. Prezident qurilish, jihozlash va raqamli xizmatlarni sifatli yakunlash bo‘yicha topshiriqlar berdi.

Tashrif davomida Yangi O‘zbekiston universitetining yangi kampusi ham ko‘zdan kechirildi. 50 gektar maydonda qurilayotgan majmua 10 ming nafar talabaga mo‘ljallangan bo‘lib, unda fakultet va rektorat binolari, kutubxona, muzey, multimedia zallari, sport majmuasi, suzish havzasi hamda talabalar turar joylari barpo etiladi. Loyihada ta’lim, ilmiy tadqiqot va innovatsiya va talabalar hayotini yagona muhitda rivojlantirishga alohida e’tibor qaratilgan.

Prezident Yangi Toshkentda qurilayotgan 55 ming o‘rinli futbol stadioni qurilishini ham ko‘zdan kechirdi. Arena qurilishi 2025-yil noyabrida boshlangan bo‘lib, hozirga qadar ishlarning 65% bajarilgan.

Stadion 2027-yilda 20 yoshgacha bo‘lgan futbolchilar o‘rtasidagi jahon chempionatining asosiy arenasi sifatida foydalaniladi. Bu yerda musobaqaning yarim final va final uchrashuvlarini o‘tkazish rejalashtirilgan. 6 qavatli sport majmuasi FIFA talablariga muvofiq barpo etilmoqda. Unda sportchilar, muxlislar va OAV uchun sharoitlar yaratiladi.

Tomoshabinlarning qulay harakatlanishi uchun 10 dan ortiq eskalator o‘rnatiladi. Stadion hududida 3 ta mashg‘ulot maydoni va 5500 o‘rinli avtoturargoh, aena yaqinida metro bekati barpo qilinadi. Qurilishda “yashil energiya”, “aqlli boshqaruv” va ekologik barqarorlik tamoyillariga alohida e’tibor qaratilmoqda.

Davlat rahbari qurilish ishlarini belgilangan muddatda va yuqori sifat bilan yakunlash, stadionni transport tizimi hamda Yangi Toshkentning umumiy shaharsozlik muhiti bilan uyg‘unlashtirish bo‘yicha ko‘rsatmalar berdi.

Prezident raisligidagi yig‘ilishda yoz va qish mavsumida elektr tarmoqlaridagi avariyalar minglab iste‘molchilarni uzluksiz elektr ta‘minotisiz qoldirgani taʼkidlandi.

Shavkat Mirziyoyev raisligida yoqilg‘i-energetika tarmog‘ida kelgusidagi ustuvor vazifalar yuzasidan videoselektor yig‘ilishi boshlandi. Bu haqda prezident matbuot xizmati xabar berdi.

Davlat rahbari so‘nggi o‘n yilda energetika sohasida juda katta islohotlar amalga oshirilganini ta‘kidladi. Qonun va qarorlar qabul qilinib, sohada xususiy sektor va xorijiy investorlar uchun yo‘l ochildi.

Prezident investorlar bilan bir necha bor shaxsan uchrashib, ularning takliflarini eshitganini qayd etdi. Har bir yirik loyihani amalga oshirish uchun sharoit yaratilib, zarur kafolatlar berildi.

So‘nggi yillarda elektr va gaz tarmoqlari, podstansiyalar, transformatorlar va gaz taqsimlash qurilmalarini yangilash uchun 30 trln so‘m ajratildi. Bu oldingi 25 yilda yo‘naltirilgan mablag‘dan 6 karra ko‘p.

“Ochiq aytish kerak. Energetikada muammo mablag‘da emas, chunki qancha kerak bo‘lsa, topib beryapmiz. Muammo tizimning boshqaruvida!” — dedi prezident.

Barcha hududlarda deyarli bir xil tarmoq bo‘lgani bilan ayrim tumanlar yaxshi ishlayotgani, boshqalarida esa doim avariya sodir bo‘layotgani ko‘rsatib o‘tildi. Bu talab nazorat va intizomning har xilligi bilan bog‘liq.

Energetika vazirligi va uning quyi bo‘g‘inlaridagi rahbarlarda ijro va mas‘uliyat yetishmayotgani tanqid qilindi. Shu bois, odamlar ham, tadbirkorlar ham tizimga mas‘ul rahbarlarning hozirgi ishidan mutlaqo norozi.

“Takror aytaman: tizimdagi har bir rahbarning qilayotgan ishi, eng avvalo, odamlarning hayotida, turmush tarzida sezilishi, tadbirkorlarning mushkulini oson qilishi kerak”, — dedi davlat rahbari.

Har yili yoz va qishda o‘nlab podstansiyalarda avariya bo‘lib, yuzlab transformatorlar yonib ketmoqda. Iyun-iyul oylarining o‘zida 4 mingga yaqin avariya sodir bo‘lib, aholi va tadbirkorlar 8−10 soatgacha elektrsiz qolgan.

So‘nggi besh yilda Shirin shahri, Yangihayot, Yakkasaroy va Ohangaron tumanida elektr iste‘moli 2 karradan ziyod oshgan. Biroq mas‘ullar va hokimlar tarmoqlarning bunday yuklamani ko‘tara olmasligini oldindan hisobga olmagan.

Prezident har bir uzilish tadbirkorlar va iqtisodiyotga qancha zarar keltirgani hisoblab chiqilmaganini tanqid qildi. Hokimlar energiya iste‘moli balansini aniq bilmagani uchun milliardlab mablag‘ havoga ketayotganini ko‘rsatib o‘tdi.

Eski avtomobilni yangilashda avtokredit foizlarining bir qismi qoplab beriladi

Trade-in dasturi doirasida eski avtotransport vositasini topshirgan jismoniy va yuridik shaxslarga yangi avtomobil xarid qilish uchun olingan avtokredit foizining bir qismi qoplab beriladi.

Mazkur amaliyot aholiga qo‘shimcha qulaylik yaratish maqsadida joriy etiladi. Biroq, dasturning amalda ishga tushirilishi haqida hozircha ma’lumot yo‘q. Hukumat hali tizimning ish boshlashi haqida rasman xabar bermadi.

Banklardan shaxsni tasdiqlovchi hujjatlarsiz xorijiy valyuta sotib olish limiti oshiriladi

May oyi boshida Markaziy bank boshqaruvi va Bosh prokuratura huzuridagi iqtisodiy jinoyatlarga qarshi kurashish departamentining tegishli qarori Adliya vazirligida davlat ro‘yxatidan o‘tkazildi.

Ichki nazorat qoidalariga kiritilgan tegishli o‘zgartirishlarga ko‘ra, fuqarolar banklarda pasport, ID-karta yoki ularning o‘rnini bosuvchi boshqa hujjatni taqdim etmasdan $500 gacha naqd chet el valyutasini sotib olishi mumkin bo‘ladi.

Amalda bu limit $100 ni tashkil etardi. Yangi tartib esa 9-avgustdan boshlab kuchga kiradi.

O‘zbekistondagi ilk pulli yo‘l ishga tushadi

Shavkat Mirziyoyev Urganch va Xivani bog‘lovchi ilk pulli avtomobil yo‘li kelgusi oy foydalanishga topshirilishini ma’lum qildi. Prezidentning ta’kidlashicha, loyiha nafaqat viloyat aholisi, balki mahalliy va xorijiy sayyohlar uchun ham muhim infratuzilmaga aylanadi.

Avtomobil yo‘llari qo‘mitasi ma’lumotiga ko‘ra, 35 kilometrlik yo‘l qurilishining 80% yakunlangan. Loyiha doirasida 15 ta ko‘prik, bitta tonnel, beshta yerosti o‘tish yo‘lagi va 101 ta suv o‘tkazish inshooti barpo etilgan.

O‘zbekistonda qora metall aylanmasi E-lom orqali nazorat qilinadi

13-iyul kuni bo‘lib o‘tgan Shavkat Mirziyoyev raisligidagi qora metallurgiya sanoatini rivojlantirish bo‘yicha yig‘ilish Bekobod metallurgiya kombinati metall prokatning 40% ini ikkilamchi metaldan, 60% ini import hisobidan ishlab chiqarishi qayd etildi. Respublika bo‘yicha har yili 700 ming tonna qora metallolom kombinatga topshirilayotgan bo‘lsa-da, yana 500 ming tonna metallolom xufiyona aylanmada qolmoqda.

Shu bois, qora metall aylanmasi bilan bog‘liq barcha jarayonlar elektron platforma orqali real vaqt rejimida monitoring qilinishi ma’lum qilindi. Qora metallurgiya sanoatida sog‘lom raqobat muhiti va narx barqarorligini ta‘minlash, sohada ta‘sirchan nazorat mexanizmlarini o‘rnatish uchun Hukumatda alohida loyiha ofisi tashkil etiladi.

Ushbu ofis metall mahsulotlari bozorini kunlik tahlil qiladi, xomashyo va tayyor mahsulotga talab va taklifni shakllantiradi, mahsulot sifati, kelib chiqishi, fizik va kimyoviy tarkibi aks etadigan raqamli pasportni yuritadi.

Mutasaddilarga bir oyda loyiha ofisi faoliyatini yo‘lga qo‘yish, 1-avgustdan E-lom elektron platformasini ishga tushirib, qora metall aylanmasini nazoratga olish topshirildi.

Jarima maydonchasidan avtomobilni olib chiqishga ruxsat QR-kod orqali beriladi

1-avgustdan boshlab jarima maydonchasidan transport vositasini olib chiqishga ruxsat faqat Jarima maydonchasi axborot tizimi orqali QR-kod bilan elektron shaklda beriladi.

Ichki ishlar vazirligi Soliq qo‘mitasi va Raqamli texnologiyalar vazirligi bilan birgalikda ikki oy ichida mazkur tizimni soliq organlarining axborot tizimlari bilan integratsiya qiladi.

Natijada jarima maydonchasiga joylashtirilgan transport vositalari to‘g‘risidagi ma’lumotlar — transport markasi, davlat raqami, maydonchaga kiritilgan va chiqarilgan vaqti, undirilgan to‘lov va boshqalar soliq tizimida avtomatik shakllanadi.

Shuningdek, unga qonunbuzarlik uchun ushlangan transport vositalarini saqlash xizmatlarini ko‘rsatuvchi yuridik shaxslarning rekvizitlari ham kiritiladi.

Bankomatdagi muammolar uchun banklarga jarima qo‘llanadi

6-avgustdan bankomatlardan foydalanishda mijozlarga xizmat ko‘rsatish qoidalarini buzgan banklarga moliyaviy jarimalar qo‘llanadi. Bu Markaziy bank tayyorlagan yangi me’yoriy hujjatda nazarda tutilgan.

Regulyator banklardan to‘lov infratuzilmasi sifatini oshirishni hamda naqd pul yechib olishdagi nosozliklarni texnik muammo emas, balki iste’molchilar huquqlarining ehtimoliy buzilishi sifatida ko‘rib chiqishni talab qilmoqda.

2025-yilda bankomatlar bilan bog‘liq 291 mingta muammoli holat qayd etilgan bo‘lib, ularning qariyb 15 foizi banklar va to‘lov tizimlari operatorlari faoliyati bilan bog‘liq.

O‘zbekistonda mushuk va itlarni majburiy ro‘yxatdan o‘tkazish tizimi joriy etiladi

7-avgustdan O‘zbekistonda hayvonlarni majburiy identifikatsiya qilish va ro‘yxatdan o‘tkazish to‘g‘risidagi qonun kuchga kiradi. Ular quyidagi muddatlarda identifikatsiya qilinishi va ro‘yxatga olinishi kerak:

• qoramol, ko‘y, echki va tuyalar — tug‘ilganidan 14 kundan keyin;
• otlar — tug‘ilganidan 4 oydan keyin;
• cho‘chqalar tug‘ilganidan — 1 oydan keyin;
• itlar va mushuklar — tug‘ilganidan 3 oydan keyin.

Hayvonlar va ularning egalari haqidagi ma’lumotlar yagona elektron bazada saqlanadi.

Biroq hayvon egalarining ularni majburiy ro‘yxatdan o‘tkazish majburiyati hamda ro‘yxatdan o‘tmagan hayvonlarni saqlashni taqiqlovchi talablar faqat 2028-yil 1-yanvardan kuchga kiradi.

Baliqchilik xo‘jaliklariga quyosh panellari va uskunalar uchun subsidiya beriladi

1-avgustdan 2030-yil 1-avgustgacha baliqchilik xo‘jaliklarini moliyaviy qo‘llab-quvvatlashning yangi mexanizmlari ham joriy etiladi.

Xususan, quyosh panellarini xarid qilish va o‘rnatish uchun olingan kreditlar bo‘yicha foiz xarajatlarining bir qismi qoplab beriladi, 50 kVtgacha quvvatga ega quyosh panellarini o‘rnatish xarajatlarining 25%i subsidiya qilinadi hamda muqobil energiya manbalari bilan jihozlangan aeratorlarni xarid qilish xarajatlarining 50%i qoplanadi.

Bundan tashqari, naslli ona baliq importi, yopiq suv aylanma tizimi texnologiyasini joriy etish hamda intensiv usulda baliq yetishtirish uchun omuxta yem ishlab chiqarish uskunalarini xarid qilish xarajatlarining bir qismi qoplab beriladi.

Xorijdan jalb etilgan ixtiolog va baliq kasalliklari bo‘yicha mutaxassislar ish haqi xarajatlarining 50%i ham kompensatsiya qilinadi.

Baliqchilik korxonalariga kredit kompensatsiyasi va kafillik beriladi

2030-yil 31-avgustgacha baliqchilik sohasidagi tadbirkorlarga kredit foizlarining bir qismi kompensatsiya qilinadi, kreditlarning 50% gacha (10 mlrd so‘m ekvivalentigacha) kafillik beriladi.

Bundan tashqari, tijorat banklari xalqaro moliya institutlari mablag‘lari hisobidan baliqchilik korxonalariga 24 oygacha muddatga, 9 oygacha imtiyozli davr bilan yillik 18% stavkada kreditlar ajratadi.

Shuningdek, chorvachilik loyihalari uchun amal qilayotgan imtiyozli kreditlash tartibi naslli baliq yetishtirishni ham o‘z ichiga olgan baliqchilik loyihalariga tatbiq etiladi.

Sanoat bog‘lari uchun suv solig‘i stavkasi 1 so‘m etib belgilanadi

1-avgustdan boshlab suv tejovchi texnologiyalar joriy qilingan sanoatlashgan bog‘larda burg‘ilangan quduqlardan olingan suv resurslaridan foydalanganlik uchun soliq stavkasi 1 so‘m etib belgilanadi. Ushbu imtiyoz besh yil muddatga — 2031-yilning 1-avgustigacha amal qiladi.

Toshkent shahri va uning atrofidagi issiqxonalarda gaz ta’minoti to‘xtatiladi

Hukumat qarori bilan Toshkent shahri hamda Toshkent viloyatining Yuqori Chirchiq, Qibray, Yangiyo‘l, Zangiota va Toshkent tumanlarida atmosfera havosi sifatini yaxshilashga qaratilgan yangi cheklovlar belgilandi.

1-avgustdan esa amaldagi issiqxonalarga tabiiy gaz yetkazib berish to‘liq to‘xtatiladi, gaz ta’minoti shartnomalari bekor qilinadi. Issiqxonalar iste’mol qiladigan suv uchun to‘lovlar sanoat korxonalari uchun belgilangan eng yuqori tarifning 5 baravari miqdorida undiriladi.

Shuningdek, ko‘mir, shina, mazut, bitum, rezina, plyonka va shunga o‘xshash materiallarni yoqish oqibatida atrof-muhitni ifloslantirganlik uchun kompensatsiya to‘lovlari 20 baravarga oshiriladi. Bunday holatlarda ekologik ekspertiza xulosasi qayta ko‘rib chiqiladi.

Ekologik talablarga rioya etmaydigan issiqxona xo‘jaliklari ayrim davlat subsidiyalari, imtiyozlari va moliyaviy qo‘llab-quvvatlash choralaridan foydalana olmaydi. Shuningdek, ularga ekologik ekspertizaning ijobiy xulosasi berilmaydi yoki avval berilgan xulosaning amal qilishi vaqtincha to‘xtatiladi.

Bunda ta’lim va ilmiy-tadqiqot muassasalariga seleksiya, urug‘ va ko‘chatlarni ko‘paytirish hamda xorijiy navlarni mahalliy iqlimga moslashtirish kabi ilmiy maqsadlarda, ekologik talablarga rioya qilgan holda, istisno tariqasida mavjud issiqxonalardan foydalanishga ruxsat beriladi.

Birjaning ayrim savdo seksiyalarida suyultirilgan gaz xaridi litsenziya asosida amalga oshiriladi

O‘zenergoinspeksiya manfaatdor idoralar bilan birgalikda 1-avgustgacha avtomobillarga yoqilg‘i quyish va gaz to‘ldirish shoxobchalarida dispenserlardan ma’lumotlarni real vaqt rejimida yig‘ish va yuritishga qaratilgan axborot tizimini yaratish bo‘yicha takliflarni hukumatga kiritishi belgilangan.

Shuningdek, avgustgacha Respublika tovar-xom ashyo birjasining elektron savdo tizimi Litsenziya axborot tizimi bilan integratsiya qilinadi. Natijada alohida birja savdo seksiyalarida suyultirilgan gazni faqat uni sotish uchun amaldagi litsenziyaga ega xo‘jalik yurituvchilar xarid qilishi mumkin bo‘ladi.

Bunda texnologik jarayonlar yoki o‘z ehtiyojlari uchun suyultirilgan gazdan foydalanadigan, uni qabul qilish, saqlash va tarqatish uchun zarur moddiy-texnik bazaga ega korxonalar ham inspeksiya taqdim etadigan ro‘yxat asosida alohida savdo seksiyalarida gaz xarid qilish huquqiga ega bo‘ladi.

Meva-sabzavot eksportida yangi nazorat tizimi joriy etiladi

1-avgustdan ayrim tumanlarda meva-sabzavot eksportini rivojlantirish uchun jamoatchi fitosanitariya inspektorlari faoliyati yo‘lga qo‘yiladi.

Ular karantin inspektorlariga ichki fitosanitariya sertifikatlarini rasmiylashtirishda yordam beradi. Yangi tizim mahsulot sifatini oshirish, xavfsizlik talablariga moslashtirish va eksport jozibadorligini kuchaytirishga qaratilgan.

Shuningdek, avgust oyidan eksport qilinadigan meva-sabzavotlarning pestitsid va nitrat qoldiqlari bo‘yicha talablarga muvofiqligini tekshirishning yangi tartibi joriy etiladi. Buning uchun ikki usuldan birini qo‘llash mumkin bo‘ladi:

• ekin maydoni va hosil hajmidan kelib chiqib, akkreditatsiyadan o‘tgan laboratoriyada o‘tkazilgan tadqiqotlar natijalari bo‘yicha ijobiy xulosa;
• Agroko‘makchi xizmati orqali “dala daftari»ga yetishtirish davrida pestitsidlardan foydalanish to‘g‘risida muntazam kiritib borilgan ma‘lumotlar asosidagi hisob-kitob.

Soliq organlari mijozlarga yo‘naltirilganlik bo‘yicha baholanadi

1-avgustdan boshlab soliq organlarining mijozlarga yo‘naltirilganlik indeksi joriy etiladi.

Buning uchun Soliq qo‘mitasi ushbu indeksni aniqlash metodologiyasini ishlab chiqishi va tasdiqlashi kerak. Soliq organlarining mijozga yo‘naltirilganlik indeksini hisoblash natijalari rasmiy saytda e’lon qilib boriladi.

Unga ko‘ra, soliq to‘lovchilarga soliq xizmatlaridan foydalanish qulayligi, ko‘rsatilayotgan xizmatlar sifati, soliq majburiyatlarini bajarishga sarflanadigan vaqt hamda soliq organlari bilan hamkorlik darajasini baholash imkoniyati yaratiladi.

Xavfli ishlab chiqarish obyektlari haqidagi foto va videoxabarlar uchun mukofot beriladi

Xavfli ishlab chiqarish obyektlari va texnik qurilmalardan foydalanishdagi huquqbuzarliklar haqida foto yoki videomateriallar yuborish hamda bunday xabarlarni taqdim etgan fuqarolarni rag‘batlantirish tartibi joriy etiladi. Xabarlar Sanoat, radiatsiya va yadro xavfsizligi qo‘mitasiga yuboriladi.

Taqdim etilgan materiallarda huquqbuzarlikning mohiyati aniq ko‘rinishi, shuningdek, sodir etilgan joy, sana va vaqt haqidagi maʼlumotlar bo‘lishi lozim. Qo‘mitaning hududiy boshqarmasi masʼul xodimi axborot tizimi orqali kelib tushgan materiallarni 3 ish kuni ichida joyiga chiqqan holda o‘rganadi.

Shundan so‘ng, qonunchilikka muvofiq maʼmuriy ish qo‘zg‘atilib, dalillar rasmiylashtiriladi hamda tegishli qaror qabul qilinadi. Qoidabuzarlik haqida foto yoki video yuborgan shaxs undirilgan jarimaning qo‘mitaga o‘tkazilgan qismining 20% miqdorida pul mukofoti oladi.

Mehnat nizolarini ko‘ruvchi ixtisoslashgan sudyalar ish boshlaydi

Oliy sud rayosati qaroriga ko‘ra, ular fuqarolik ishlari bo‘yicha sudlarda amaldagi shtatlar doirasida faoliyat yuritadi. Ixtisoslashgan sudyalar Oliy sud, Qoraqalpog‘iston Respublikasi sudi, viloyatlar, Toshkent shahri hamda ayrim tumanlararo va shahar sudlarida ishlaydi.

1-avgustdan keyin sudga kelib tushadigan mehnat nizolari aynan ushbu sudyalar o‘rtasida taqsimlanadi, undan oldin qabul qilingan ishlar esa avvalgi tartibda ko‘rib chiqiladi.

Go‘shtni samolyotda tashish bo‘yicha imtiyoz yil oxirigacha uzaytiriladi

Prezident inflyatsiyani jilovlash bo‘yicha yig‘ilishda go‘sht narxining oshishi muhokama qilinib, go‘shtni samolyotda olib kelish xarajatlarini qoplash bo‘yicha imtiyoz yil yakunigacha uzaytirilishini ma’lum qildi.

Amalda bu 1-avgustgacha etib belgilangan bo‘lib, u go‘sht importi uchun havo tashuvi xarajatining 50%i (1 kg uchun $0,8 gacha), nasldor qoramol importiga 10% (har boshiga 4 mln so‘mgacha) miqdorida subsidiya berishni nazarda tutadi.

Shuningdek, chorvachilikni rivojlantirish uchun qo‘shimcha $50 mln ajratiladi. Mablag‘lar hisobidan chorva komplekslari va naslli qoramolchilik loyihalariga 10 yil muddatga, 10% stavkada imtiyozli kreditlar beriladi. Yil oxirigacha chetdan 100 ming bosh qoramol va 150 ming bosh qo‘y-echki olib kelish rejalashtirilgan.

Yosh fermerlarga ikki yil bepul buxgalteriya xizmati ko‘rsatiladi

Tuman fermerlari kengashlari huzuridagi Fermer xo‘jaliklarida buxgalteriya hisobi va hisobotini yuritish markazlari tomonidan boshlig‘i yoshlar bo‘lgan yangi tashkil etilgan fermer xo‘jaliklariga ikki yil davomida bepul xizmat ko‘rsatiladi.

Mazkur imtiyoz a’zolik badallari to‘langan hamda paxta va g‘alla yetishtirishidan qat’i nazar barcha fermerlarga tatbiq etiladi.

Tadbirkorlarni tekshirishda Biznes himoya QR-kodi joriy etiladi

1-avgustdan tadbirkorlarni tekshirish va ular bilan nazorat tadbiri hisoblanmaydigan muloqotlar “Yagona davlat nazorati” axborot tizimida hisobga olinadi. Buning uchun “Biznes himoya” QR-kodi joriy etiladi.

Shu sanadan boshlab tadbirkorlarni tekshiradigan yoki ular bilan muloqot qiladigan davlat xizmatchilari tizimning mobil ilovasidan foydalanishi majburiy bo‘ladi. Tekshiruvni boshlashdan oldin ular tadbirkordagi QR-kodni skanerlab, tekshiruvni tizimda ro‘yxatdan o‘tkazishi shart.

Bundan tashqari, tekshiruv huquqini beruvchi maxsus guvohnomalar faqat elektron shaklda yuritiladi, qog‘ozdagi tekshiruvlar kitobi bekor qilinadi. Agar tekshiruv yoki muloqot haqidagi ma’lumot tizimga kiritilmasa, tadbirkor davlat xizmatchisini o‘z hududiga kiritmaslik va u bilan muloqot qilmaslik huquqiga ega bo‘ladi.

Deputatlarga Tashabbusli budjetda qo‘shimcha g‘oliblarni tanlash vakolati beriladi

Prezidentning 29-iyundagi qaroriga ko‘ra, 1-avgustdan Tashabbusli budjet jarayonida deputatlarning loyihalarni qo‘shimcha ravishda g‘olib deb e’lon qilish imkoniyatlari kengaytiriladi.

Yangi tartibga muvofiq, har bir deputat “Ochiq budjet” axborot portalida o‘ziga ajratilgan mablag‘lar doirasida bir yoki bir nechta loyihani tanlab, ularni qo‘shimcha g‘olib sifatida belgilashi mumkin bo‘ladi.

Shuningdek, deputatning vakolati muddatidan oldin tugatilsa, uning saylov okrugidagi qo‘shimcha g‘olib loyihalar Tashabbusli budjet jarayonlarida parlament nazoratini amalga oshirish bo‘yicha komissiya qaroriga asosan boshqa deputatlar tomonidan aniqlanadi.

Davlat arxivlarining asosiy xizmatlari to‘liq raqamlashtiriladi

Davlat arxivlarining qator funksiyalari to‘liq raqamli shaklda amalga oshiriladi. Jumladan, Milliy arxiv fondi hujjatlarini davlat ro‘yxatidan o‘tkazish, yig‘majildlar ro‘yxatini tuzish va tasdiqlash, arxiv hujjatlarini qabul qilish hamda foydalanishga berish jarayonlari elektron shaklga o‘tkaziladi.

Shuningdek, tashkilotlar qayta tashkil etilganda arxiv hujjatlarini huquqiy vorisga topshirishni davlat arxivlari bilan kelishish hamda davlat arxivlariga hujjat topshirishi shart bo‘lgan davlat organlari va tashkilotlarining yagona ro‘yxatini shakllantirish ham raqamlashtiriladi.

Parrandachilik loyihalariga 10% stavkada 10 yilgacha imtiyozli kredit beriladi

1-avgustdan parrandachilik mahsulotlari ishlab chiqarish bo‘yicha yangi quvvatlarni ishga tushirish hamda “tayyor biznes” loyihalarini moliyalashtirish uchun tadbirkorlarga kreditlar ajratiladi.

Mablag‘lar Mikrokreditbank orqali yillik 10% stavkada, 4 yillik imtiyozli davr bilan 10 yilgacha beriladi.

Soliq organlari xodimlari har uch yilda kamida bir marta malaka oshiradi

Soliq qo‘mitasi huzuridagi Soliq oliy maktabida soliq organlari xodimlarining har uch yilda kamida bir marta malaka oshirishi tizimi joriy etiladi.

Toshkent va Izmir o‘rtasida to‘g‘ridan-to‘g‘ri reyslar yo‘lga qo‘yiladi

Turkiyaning SunExpress aviakompaniyasi 1-avgustdan Izmir-Toshkent-Izmir yo‘nalishida muntazam parvozlarni yo‘lga qo‘yadi. Reyslar haftasiga to‘rt marta Boeing 737−800 samolyotlarida amalga oshiriladi.

SunExpress O‘zbekistonga muntazam qatnovlarni yo‘lga qo‘ygan uchinchi Turkiya aviakompaniyasiga aylanadi hamda kelgusida Farg‘ona vodiysi aeroportlariga ham parvozlarni yo‘lga qo‘yishni rejalashtirmoqda.

Etihad Airways ham Abu-Dabi bilan Toshkentni bog‘laydi

Etihad Airways Abu-Dabi-Toshkent yo‘nalishidagi muntazam reyslarni 10-avgustdan yo‘lga qo‘yadi. Parvozlar har kuni Airbus A320 samolyotlarida amalga oshiriladi.

Aviakompaniya saytidagi ma‘lumotlarga ko‘ra, parvozlar quyidagi jadval asosida bajariladi:

• Abu-Dabidan uchib ketish — 21:10, Toshkentga qo‘nish — 1:35;
• Toshkentdan uchib ketish — 3:35, Abu-Dabiga qo‘nish — 6:25.

Abu-Dabidan bir tomonga chipta narxi 385 dirhamdan (hozirgi kurs bo‘yicha 1 259 242,6 so‘m), Toshkentdan esa 122 yevrodan (1 675 201,52 so‘m) boshlanadi.

Ipoteka kreditlari bo‘yicha subsidiyalar olish uchun arizalar qabuli boshlanadi. Bu haqda Iqtisodiyot va moliya vazirligi matbuot xizmati xabar bermoqda.

Arizalarni 27-iyul kuni soat 15:00 dan boshlab jo‘natish mumkin. Ular ipoteka kreditlari bo‘yicha subsidiya to‘lashning maqsadli ko‘rsatkichlari doirasida ilgari taqdim etilgan, biroq xabarnoma muddati davomida foydalanilmagan qism hisobidan qabul qilinadi.

Subsidiya olish uchun ariza beruvchi ijtimoiy mezonlar asosida baholash natijasiga ko‘ra kamida 30 ball to‘plashi, shuningdek, kredit tarixi dasturda ishtirok etuvchi tijorat banklaridan kamida birining ichki talablariga mos kelishi kerak.

Bundan tashqari, ariza beruvchining va uning turmush o‘rtog‘ining nomida mamlakatning barcha hududlari bo‘yicha mulk huquqi asosida turar joy bo‘lmasligi lozim. Ularning o‘rtacha oylik daromadi ham belgilangan ijtimoiy mezonlar doirasida quyidagicha bo‘lishi kerak:

• Qoraqalpog‘iston va viloyatlarda — MHTEKMning 2,7 baravardan 8 baravargacha (3,431 mln — 10,168 mln so‘m);
• Toshkent shahrida — MHTEKMning 2,7 baravardan 9,2 baravargacha (3,431 mln — 11,693 mln so‘m).
• Arizalarni Davlat xizmatlari markazlari orqali, shuningdek, myGov mobil ilovasi yoki Yagona portal (my.gov.uz) orqali topshirish mumkin.

Ariza topshirish jarayonida fuqarolar OneID tizimidagi shaxsiy ma’lumotlarni boshqarish paneli orqali banklarga kredit tarixini baholash uchun zarur ma’lumotlardan foydalanishga ruxsat berishi kerak. Shuningdek, kredit tarixini olishga vaqtinchalik cheklov o‘rnatilmagan bo‘lishi lozim. Aks holda, kredit tarixini o‘rganish imkoniyati cheklanib, ariza rad etilishi mumkin.

Harbiy tuzilmalar xodimlari esa subsidiyaga ariza topshirish uchun bevosita Davlat xizmatlari markazlariga murojaat qilishi mumkin.

Subsidiya olish jarayonida kredit tarixi baholanadigan banklar qatoriga Agrobank, Aloqabank, Asakabank, Asia Alliance Bank, Biznesni rivojlantirish banki, Hamkorbank, Ipak Yuli Bank, Ipoteka-bank, Mikrokreditbank, Orient Finans Bank, Trastbank, Turonbank, Xalq banki, O‘zmilliybank va O‘zsanoatqurilishbank kiradi.

Eng yuqori ish haqi Toshkentda, eng past ko‘rsatkich esa Qashqadaryo viloyatida qayd etildi.

2026-yilning yanvar-iyun oylarida O‘zbekistonda o‘rtacha oylik nominal hisoblangan ish haqi 7 mln 091,1 ming so‘mni tashkil etdi. Bu haqda Milliy statistika qo‘mitasi ma’lum qildi. Ko‘rsatkich 2025-yilning mos davriga nisbatan 18,4% ga o‘sgan.

Hududlar bo‘yicha ish haqining eng yuqori o‘sish sur’ati Jizzax viloyatiga to‘g‘ri keldi — bu yerda o‘rtacha ish haqi 20,4% ga oshib, 5,4 mln so‘mni tashkil etdi. Undan keyingi o‘rinlarda 19,4% bilan Namangan (5,2 mln so‘m) va 17,8% bilan Toshkent (6,676 mln so‘m) viloyatlari turibdi.

Birinchi yarim yillikda eng yuqori ish haqi Toshkent shahrida kuzatildi — 12 mln 13,9 ming so‘m (+18,2%).

Undan keyingi pog‘onadan Navoiy (8,723 mln so‘m) hamda Toshkent viloyatlari joy oldi. Eng kam oylik maosh esa Qashqadaryo viloyatida qayd etildi — 4,86 mln so‘m.

Hududlar bo‘yicha o‘rtacha oylik ish haqi:

Sohalar kesimida ish haqlari qanday bo‘ldi?

Yanvar-iyun oylarida sohalar kesimida oylik ish haqining eng yuqori o‘sishi (22,8%) tashish va saqlash yo‘nalishida kuzatildi, o‘rtacha oylik ish haqi esa 11,07 mln so‘mni tashkil etdi.

Bank, sug‘urta, lizing, kredit va vositachilik sohasi eng yuqori oylik maosh bo‘yicha yetakchi bo‘lib qolmoqda. Yarim yilda bu yo‘nalishda oylik ish haqi 19,1 mln so‘mni tashkil etdi (+17,5%). Undan keyin 17,417 mln so‘m bilan axborot va aloqa (+15,3%) sohasi joy oldi.

Eng past ish haqi sog‘liqni saqlash va ijtimoiy xizmatlar sohasida (4,44 mln so‘m) qayd etilib, o‘sish o‘tgan yilning mos davriga nisbatan 20,1% bo‘ldi.

Shu bilan birga, navbatdagi sohalarda ham ish haqi respublika o‘rtacha ko‘rsatkichidan (7 091,1 ming so‘m) sezilarli darajada past bo‘ldi: ta’lim — 4,977 mln so‘m, yashash va ovqatlanish — 5,19 mln so‘m, san’at va ko‘ngil ochish — 5,86 mln so‘m hamda qurilish — 7,03 mln so‘m.

Bundan tashqari, axborot va aloqa sohasida eng yuqori o‘rtacha maosh dasturlashtirish, maslahat berish va boshqa yordamchi xizmatlar yo‘nalishida qayd etildi — 22,23 mln so‘m. Bank va moliya sohasida eng yuqori oyliklar qayta sug‘urtalash (26,014 mln so‘m) hamda moliyaviy xizmatlar (24,89 mln so‘m) sohasida kuzatildi.

Ta’lim sohasida o‘rtacha maoshning eng yuqori ko‘rsatkichi oliy ta’limda qayd etildi — 12,05 mln so‘m. Eng past ish haqi esa maktabgacha ta’limga to‘g‘ri keladi — 2,72 mln so‘m. Texnik va professional ta’limda o‘rtacha maosh 5,37 mln so‘mni hamda umumiy o‘rta ta’limda 4,67 mln so‘mni tashkil etdi.

Qiymati qariyb $2,2 mlrd bo‘lgan loyiha doirasida 282 kilometrlik olti polosali yo‘l, 92 ta ko‘prik va 28 ta yo‘l o‘tkazgich barpo etiladi.

Shavkat Mirziyoyev O‘rta Chirchiq tumanida Toshkent — Samarqand yo‘nalishidagi yangi avtomobil yo‘li qurilishiga tamal toshi qo‘yish marosimida ishtirok etdi. Bu haqda prezident matbuot xizmati xabar berdi.

Prezident Toshkent — Samarqand yo‘nalishidagi yangi avtomobil yo‘li qurilishini mamlakatimiz transport infratuzilmasini rivojlantirishdagi navbatdagi ulkan tarixiy qadam, deb atadi.

So‘nggi 10 yilda 78 trln so‘m hisobidan jami 128 ming kilometr yo‘lda qurilish-ta‘mirlash ishlari bajarildi. Davlat rahbari bugun sohada tom ma‘noda yangi davr boshlanayotganini ta‘kidladi.

Qiymati qariyb $2,2 mlrd bo‘lgan olti polosali zamonaviy avtomagistralning umumiy uzunligi 282 kilometrni tashkil etadi. Loyiha doirasida 92 ta ko‘prik, 28 ta yo‘l o‘tkazgich va 60 ta tunnel tipidagi o‘tish joyi quriladi.

Yo‘lga og‘ir va yuqori tezlikda harakatlanadigan transport vositalari qatnoviga chidamli monolit beton qoplama yotqiziladi. Tekis hududlarda soatiga 150 kilometr tezlikda harakatlanish imkoni yaratiladi, zamonaviy xavfsizlik yechimlari va raqamli qulayliklar yo‘l-transport hodisalarini keskin kamaytiradi.

Yangi magistral ishga tushgach, Toshkentdan Samarqandga yetib borish vaqti 5 soatdan 2,5 soatga qisqaradi. Yo‘l sutkasiga 60 mingdan 80 mingtagacha transport vositasini o‘tkazadi, yuk tashish tannarxi esa 20−24% ga pasayishi kutilmoqda.

Toshkent — Samarqand yangi avtomobil yo‘li hududlarda iqtisodiy faollikni yangi bosqichga ko‘taradi. Jahon banki tahliliga ko‘ra, bunday loyihalarga sarflangan har bir dollar investitsiya iqtisodiyotga 5 barobargacha qaytadi.

Yangi magistral Toshkent shahri, Sirdaryo, Jizzax va Samarqand viloyatlari yalpi hududiy mahsulotining 3% ga ko‘payishiga turtki beradi. Yo‘l o‘tadigan aholisi 2 mlndan ziyod 13 ta tuman uchun minglab ish o‘rinlari va yangi daromad manbalari paydo bo‘ladi.

Yo‘l bo‘yida logistika markazlari, omborlar, sanoat va agrosanoat korxonalari, savdo-servis, mehmonxona va turizm obyektlari barpo etiladi. Qurilishda mahalliy xizmatlar va qurilish materiallaridan keng foydalanish tadbirkorlar uchun yirik buyurtmalar va yangi ishlab chiqarish quvvatlarini yaratadi.

Davlat rahbari Xiva-Urganch yo‘li qurilishi boshlangani, Toshkent-Andijon yo‘li bo‘yicha xalqaro tender yakunlanish arafasida ekani, Toshkentni Bo‘stonliq bilan bog‘laydigan yo‘lni loyihalash ishlari yakuniga yetkazilayotganini qayd etdi.

“Biz bugun Vatanimiz mustaqilligining o‘ttiz besh yillik to‘yi arafasida mamlakatimiz kelajagi, iqtisodiy barqarorligi va xalqimiz farovonligi uchun yana bir mustahkam poydevor qo‘ymoqdamiz”, — dedi prezident va kapsula qo‘yib, yangi avtomagistral qurilishini boshlab berdi.

Toshkent-Samarqand pulli yo‘li

2023-yilning iyulida Toshkent-Samarqand pulli yo‘li bo‘yicha texnik-iqtisodiy asoslashni ishlab chiqish borasida Turkiyaning Proyapi Mühendislik ve Müşavirlik A.Ş kompaniyasi jalb qilindi.

Yil yakunida loyiha Avstriyaning ILF Consulting Engineers Austria GmbH kompaniyasi tomonidan ishlab chiqildi. Loyihaning asosiy texnik-iqtisodiy asos hujjatini ishlab chiqishga YTTB tomonidan 1,5 mln yevro miqdoridagi mablag‘lar ajratilgan.

2024-yilning avgust oyida qabul qilingan prezident qarori bilan Toshkent-Samarqand yo‘li qurilishini 2024-yilning dekabrida boshlash belgilangandi. Uning umumiy uzunligi 305 kmni, qiymati esa $2,2 mlrdni tashkil etadi. Yo‘l Toshkent, Sirdaryo, Jizzax hamda Samarqand viloyatlarini qamrab oladi. Uning boshqaruvi 2028-yilning dekabrigacha DXSh asosida xususiy operatorga beriladi.

2025-yilning fevral oyida 6 tasmali Ilhom Mahkamov Toshkent-Samarqand pulli yo‘li qurilishi loyihasi bo‘yicha hujjat ishlari yakunlanib, tender ishlari amalga oshirilayotganini ma’lum qildi.

Martga kelib, xorijiy mutaxassislar ishtirokida uning texnik-iqtisodiy asoslari ishlab chiqilgani e’lon qilindi. Toshkent-Samarqand yo‘lining uzunligi 300 km atrofida bo‘ladi. Qatnov vaqti 4,5 soatdan 2,5 soatgacha qisqaradi. Mavjud yo‘lda tirbandlik ancha kamayadi.

Iyun oyida transport vaziri o‘rinbosari Jasurbek Choriyev Gazeta’ga bergan intervyusida Toshkent-Samarqand loyihasi bo‘yicha tender yanvar oyida e’lon qilingani, ishtirokchilardan dastlabki takliflar iyun oyi oxirida qabul qilinishi rejalashtirilganini bildirdi.

“Arizalar ko‘rib chiqilib, birinchi bosqichdan o‘tganimizdan so‘ng g‘oliblarni e’lon qilishni boshlaymiz”, — dedi u. Unga ko‘ra, mazkur yo‘lning smeta qiymati $2,6 mlrddan $2,2 mlrdga tushirilgan.

Noyabr oyida Transport vaziri o‘rinbosari Jasurbek Choriyev Toshkent-Samarqand pulli yo‘li loyihasi yakuniy bosqichda ekani, qurilish ishlari 2026-yilda boshlanishini aytgandi.

Joriy yilning martida prezident raisligida o‘tkazilgan yig‘ilishda Toshkent-Samarqand pulli yo‘li besh yilda qurilishi taʼkidlangandi. Trassaning 140 kmlik qismida tuproq mustahkamlanadi, loyiha doirasida 12 ta transport yechimi, 91 ta ko‘prik va 16 ta yo‘l o‘tkazgich qurilishi ko‘zda tutilgan.