Chegirma yuqori reytingdagi maktab, texnikum va OTM pedagoglariga yiliga bir marta taqdim etiladi.

Transport vazirligi pedagoglar uchun avia va temiryo‘l chiptalariga chegirma berishni nazarda tutuvchi hukumat qarori loyihasini jamoatchilik muhokamasiga qo‘ydi.

Loyihaga ko‘ra, 2026−2027 o‘quv yilidan boshlab respublika reytingida TOP-100 talikka kirgan maktab va bog‘chalar, TOP-20 talikdagi texnikumlar hamda TOP-10 talikdagi OTMlar pedagoglariga O‘zbekiston bo‘ylab sayohat qilish uchun chegirmalar taqdim etiladi.

Bunda samolyot hamda poyezd chiptalarining tarif qismiga 15% chegirmalar kalendar yili davomida bir marta beriladi.

Imtiyoz ekonom klassdagi aviachiptalar hamda plaskart va kupe vagonlari chiptalariga tatbiq etiladi. Yuqori tezlikda harakatlanuvchi poyezdlar bundan mustasno.

Bunda sayohat boshqa yo‘nalishlarga o‘tkazishsiz, to‘g‘ridan to‘g‘ri borish va qaytish shaklida amalga oshirilishi kerak bo‘ladi.

Chegirmali chiptalar temiryo‘l vokzallari, Uzbekistan Airways Sales filiali va respublika aeroportlari kassalarida rasmiylashtiriladi. Buning uchun ta‘lim muassasasining firma blankida tayyorlangan, rahbar imzosi va muhri bilan tasdiqlangan rasmiy xat hamda amaldagi ID-karta taqdim etilishi kerak bo‘ladi.

Aprel oyida shaharlararo poyezdlarda yo‘lkira mart oyiga nisbatan 1,4% ga oshgandi. Shuningdek, ichki reyslar uchun aviachiptalar narxi 2,6% ga, xalqaro reyslarniki esa 2,3% ga ko‘tarilgan.

Bu yil Qurbon hayiti 27-may — chorshanba kuniga to‘g‘ri kelishi kutilmoqda. Shu bois o‘zbekistonliklar ketma-ket 5 kun dam oladi.

O‘zbekistonliklar Qurbon hayiti munosabati bilan ketma-ket 5 kun dam olishi kutilmoqda.

O‘tgan yili dekabrda qabul qilingan prezident farmonida (PF-257-son) qo‘shimcha dam olish kunlari tasdiqlangan.

Unga ko‘ra, 28−29-may kunlari barcha xodimlar uchun qo‘shimcha dam olish kuni hisoblanadi. Haftasiga 6 kun ishlaydiganlar uchun esa 30-may — shanba kuni ham dam olish kuni etib belgilangan.

Joriy yilgi Qurbon hayiti bayrami esa 27-may kuniga to‘g‘ri kelishi kutilmoqda.

• 27-may, chorshanba — Qurbon hayiti;
• 28-may, payshanba — qo‘shimcha dam olish kuni;
• 29-may, juma — qo‘shimcha dam olish kuni;
• 30-may, shanba — 6 kunlik ish haftasi uchun dam olish kuni;
• 31-may, yakshanba — odatiy dam olish kuni.

Hozirda Qurbon hayitining aniq sanasi rasman tasdiqlanmagan.

Maʼlumot uchun, joriy yilgi Ramazon hayiti 20-mart kuni nishonlangandi. Unda 5 kunlik ish haftasidagi xodimlar 4 kun, 6 kunlik ish haftasidagi xodimlar esa 3 kun dam olgan edi.

O‘zbekistonda davlat OTMlarida o‘qiyotgan o‘qituvchilar farzandlari uchun kontraktga chegirma berish rejalashtirilmoqda. Oliy ta’lim, fan va innovatsiyalar vazirligi bu bo‘yicha hukumat qarori loyihasini muhokamaga qo‘ydi.

Chegirma kelasi o‘quv yilidan boshlab to‘lov-kontrakt summasining 30%i miqdorida qo‘llanilib, u o‘qishga qabul qilingan hamda o‘qiyotgan talabalarga tatbiq etiladi.

Bunda chegirma har o‘quv yili uchun bir marotaba berilib, faqat bazaviy kontrakt (stipendiyasiz) uchun amal qiladi.

Arizalar kontrakt.edu.uz platformasi orqali yuboriladi. Pedagog maqomi “Elektron hukumat” tizimi orqali avtomatik tekshiriladi. Ota yoki ona pedagog maqomini yo‘qotsa, keyingi o‘quv yilidan chegirma bekor qilinadi.

Hujjatlar mas’ul bo‘linma tomonidan ikki ish kuni ichida ko‘rib chiqiladi, agar ariza qabul qilinsa shartnoma shakllantiriladi, uni OTM va talaba tasdiqlashi kerak.

Talabgorlarga chegirmalar to‘g‘ri belgilanishini OTM rektori yoki filial direktori, mas’ul bo‘linma boshlig‘i, bosh buxgalteri va auditori doimiy nazorat qilib boradi. Agar chegirma noto‘g‘ri qo‘llansa, mas’ul bo‘linma hamda buxgalteriya mablag‘larni qaytarishi kerak.

Loyiha bilan batafsil bu yerda tanishish mumkin. Fikr-mulohazalar 29-maygacha qabul qilinadi.

O‘zbekiston va Turkiy davlatlar tashkilotiga a’zo mamlakatlar qo‘shma ilmiy sun’iy yo‘ldoshni 2027-yilda uchiradi. Bu haqda 13-may kuni bo‘lib o‘tgan matbuot anjumanida O‘zbekkosmos agentligi direktori o‘rinbosari Muhiddin Ibragimov ma’lum qildi, deya xabar berdi Spot muxbiri.

Uning so‘zlariga ko‘ra, hozirda TDT doirasida 12U OTS-Sat Cube sun’iy yo‘ldoshini ishlab chiqish jarayoni amalga oshirilmoqda. Asosiy ishlar Qozog‘iston poytaxti Ostonada joylashgan, kosmik texnologiyalar ishlab chiqarishga ixtisoslashgan Ghalam kompaniyasida olib borilmoqda. Loyiha doirasida O‘zbekiston sun’iy yo‘ldoshning elektr dvigatelini ishlab chiqmoqda, boshqa davlatlar esa uni yig‘ishda qatnashadi.

“Dvigatel kichik bo‘lishiga qaramay, sun’iy yo‘ldoshning eng muhim tarkibiy qismi hisoblanadi. U raketadan ajralgandan so‘ng yo‘ldoshni belgilangan orbitaga olib chiqish va manyovr qilish — chapga, o‘ngga yurish, tepaga, pastga tushishiga javob beradi. Bu bo‘yicha ishlar davom etyapti. Xudo xohlasa, joriy yil oxirigacha sun’iy yo‘ldoshni yig‘ish ishlari yakunlanishi kerak. Hozirda integratsiya jarayoni ketyapti. Sun’iy yo‘ldoshni kelgusi yil uchirishni reja qilganmiz”, — dedi Muhiddin Ibragimov.

Shu bilan birga, agentlik direktori o‘rinbosari o‘zbekistonlik mutaxassislar hozirda Qozog‘iston, Turkiya va Ozarbayjon mutaxassislari bilan birgalikda ishlayotganini qayd etdi. Uning ta’kidlashicha, yo‘ldoshni uchirish masalasi ko‘proq asosiy integratsiyaga javob beruvchi tomon — Qozog‘istonga bog‘liq. Ibragimov bu bo‘yicha yana qo‘shimcha ma’lumotlar berilishini bildirdi.

2025-yil boshida O‘zbekiston va Turkiy davlatlar tashkiloti 2026-yilda sun’iy yo‘ldosh uchirishi ma’lum bo‘lgandi. Joriy yilning mart oyi oxirida Toshkentda TDT mamlakatlari tomonidan ishlab chiqilgan birinchi texnologik sun’iy yo‘ldoshning prototipi taqdim etildi.

Kosmik apparat 12U XL nanosun’iy yo‘ldosh platformasi asosida qurilmoqda. O‘lchamlari 226,3×226,3×366 mm bo‘lib, taxminiy og‘irligi 16 kilogrammni tashkil etadi. Sun’iy yo‘ldosh 550 km balandlikdagi quyosh-sinxron orbitada ishlaydi va xizmat muddati ikki yil etib belgilangan. Ma’lumotlarni uzatish esa soniyasiga 50 Mbitgacha tezlikka ega X-band aloqa kanali orqali amalga oshiriladi.

Loyiha maqsadi TDT davlatlari uchun mintaqaviy Yer kuzatuvi, orbitadagi texnologiyalarni namoyish etish va kelgusi missiyalar uchun tajriba yaratishga qaratilgan. Tashkilotga ko‘ra, 2026-yil iyul oyida parvoz modeli sinovlarini o‘tkazish, 2027-yil iyul oyida esa sun’iy yo‘ldoshni uchirish rejalashtirilgan.

Kosmik apparat tarkibida to‘liq missiya uchun zarur bo‘lgan asosiy quyi tizimlar mavjud: foydali yuk, bort ma’lumotlarini boshqarish tizimi, oriyentatsiyani aniqlash va boshqarish tizimi, aloqa tizimi, elektr ta’minoti tizimi hamda harakatlantiruvchi qurilma.