Yangi yo‘riqnoma tibbiy jihozlarni davlat ro‘yxatidan o‘tkazish uchun taqdim etiladigan hujjatlar va ularning markirovkasiga qo‘yiladigan yagona talablarni belgilaydi.
Tibbiy jihozlarni davlat ro‘yxatidan o‘tkazish hujjatlariga qo‘yiladigan talablar belgilandi. Bu bo‘yicha tegishli yo‘riqnoma davlat ro‘yxatidan o‘tkazildi.
Unga ko‘ra, tibbiy jihozlarni davlat ro‘yxatidan o‘tkazish uchun hukumatning 738-son qaroriga asosan taqdim etiladigan hujjatlarni rasmiylashtirish bo‘yicha yagona talablar belgilandi.
Hujjatlar elektron axborot tizimi orqali taqdim etilayotganda umumiy tartibda, tan olish orqali yoki ro‘yxatga olish maʼlumotlariga o‘zgartirish kiritish va guvohnoma muddatini uzaytirish holatlarida ekanligi belgilanadi.
Tibbiy jihozlarni davlat ro‘yxatidan o‘tkazish jarayonini xalqaro talablar (IMDRF va GHWP) bilan uyg‘unlashtirish nazarda tutildi. Jihoz markirovkasida uning nomi, tovar belgisi (agar mavjud bo‘lsa) hamda to‘plam tarkibi ko‘rsatilishi shart.
Unda ishlab chiqaruvchining nomi, yuridik manzili, tovar belgisi (agar mavjud bo‘lsa) va ishlab chiqaruvchi davlat haqidagi ma‘lumotlar bo‘lishi lozim.
Markirovkada ishlab chiqarilgan sana, yaroqlilik muddati, saqlash sharoitlari hamda partiya yoki seriya raqami ham ko‘rsatiladi.
Steril tibbiy jihozlarda STERIL ogohlantiruvchi yozuvi, sterilizatsiya usuli va muvofiqlik belgisi bo‘lishi kerak. Agar tibbiy jihoz faqat bir marta foydalanish uchun mo‘ljallangan bo‘lsa, bu haqda alohida qayd kiritiladi.
Shuningdek, markirovkada tibbiy jihozni qo‘llashga doir cheklovlar ham aks ettirilishi lozim.
