1-fevralgacha tuman banklari filiallarida mahallabay ishlash bo‘limlari tashkil etilib, ularga “mahalla bankirlari” tayinlanadi. Har bir mahallada ularning “yordamchi-agentlari” tayinlanadi.

3-yanvar kuni Shavkat Mirziyoyevga banklar ishtirokida mahallalarda aholi bandligini ta’minlash va daromadli qilish chora-tadbirlari bo‘yicha axborot berildi. Bu haqda prezident matbuot xizmati xabar berdi.

16-dekabr kuni o‘tkazilgan videoselektor yig‘ilishida davlat rahbari tegishli topshiriqlarni bergandi. Shundan kelib chiqib, 2025-yilda jami 5,2 mln nafar, jumladan, banklar tomonidan 3 mln nafardan ziyod aholini band qilish rejalashtirildi.

Buning uchun 208ta tuman va shaharlar hokimlari hamda banklar rahbarlari tomonidan aholi bandligini ta’minlash va daromadini oshirish bo‘yicha hamkorlik shartnomalari imzolanib, tomonlarning aniq huquq va majburiyatlari ko‘rsatib o‘tildi. Har bir mahalla bo‘yicha maqsadli ko‘rsatkichlar belgilandi. Aholi bandligini ta’minlashga qaratilgan “mahalla loyihasi” dasturi doirasida ajratiladigan $1 mlrd kredit resurslari banklar va hududlar kesimida taqsimlandi.

Loyiha ishlab chiqish, kredit ajratish, aholi bandligini ta’minlash bo‘yicha tuman banki rahbariga oyma-oy samaradorlik ko‘rsatkichi qo‘yildi.

Hududiy banklar hamda tuman hokimlari aholini tayyor biznes loyihalari bilan tanishtirib boradi, ularni amalga oshirish ko‘nikmalari o‘rgatiladi.

Shuningdek, “online-mahalla.uz”, “bank-kredit.uz” va “soliq.uz” axborot tizimlari integratsiya qilinib, mas’ullarga yuklatilgan vazifalar ijrosi kunlik tahlil qilib boriladi. Faoliyati qoniqarsiz bo‘lgan rahbarlarga chora ko‘riladi.

Mazkur yo‘nalishda yiliga 15 mln tonna yuk tashish, kelgusida yo‘lovchi poyezdlarini yo‘lga qo‘yish rejalashtirilgan.

27-dekabr kuni Xitoy-Qirg‘iziston-O‘zbekiston temir yo‘li qurilishi boshlandi, deb xabar qildi Qirg‘iziston prezidenti Sadir Japarov matbuot xizmati.

Tamal toshini qo‘yish marosimi Jalolobod viloyatining Tosh-Qutchu qishlog‘ida bo‘lib o‘tdi. Unda Qirg‘iziston rahbaridan tashqari, Xitoy taraqqiyot va islohotlar davlat qo‘mitasi raisi Chjen Shansze va O‘zbekiston bosh vaziri o‘rinbosari Jamshid Xo‘jayev ham ishtirok etdi. Japarov tarmoq qurilishini “tarixiy voqea” va “transport infratuzilmasini rivojlantirishda yangi davr»ning boshlanishi deb atadi. Bo‘lajak magistral Sharq va G‘arb o‘rtasidagi “strategik ko‘prik” bo‘ladi, dedi u.

“Uning yaratilishi Xitoy, Yaqin Sharq, Turkiya va Yevropa Ittifoqi o‘rtasidagi transport yo‘nalishlarini diversifikatsiya qilish imkonini beradi, shuningdek, Markaziy Osiyoning logistika raqobatbardoshligini oshiradi”, dedi — Japarov. Loyihaning Qirg‘iziston uchun ahamiyati alohida ta’kidlandi.

Xo‘jayev Shavkat Mirziyoyevning ishtirokchilarga murojaatini o‘qib eshittirdi. O‘zbekiston prezidenti bo‘lajak filial Markaziy Osiyodan Xitoyga eng qisqa yo‘l bo‘lishini va Yevropa Ittifoqiga yuklarni yetkazib berishni taxminan bir haftaga tezlashtirishini ta’kidladi. Magistral bo‘ylab yuk tashishning yillik hisob-kitob hajmi 15 mln tonnani tashkil etadi. Istiqbolda liniyada muntazam yo‘lovchi tashishni tashkil etish, shuningdek, uni Transafg‘on yo‘lagi bilan bog‘lash rejalashtirilgan.

Temir yo‘l Qoshg‘ar-Torugart-Makmal-Jalolobod-Andijon yo‘nalishi bo‘ylab o‘tadi. Loyiha doirasida 20ta stansiya, 42ta ko‘prik, 25ta tunnel, tranzit-logistika terminallari va omborlar qurish rejalashtirilgan bo‘lib, bu o‘n minglab ish o‘rinlarini yaratish imkonini beradi.

“Bo‘lajak temir yo‘l uch mamlakat o‘rtasidagi yuk va odamlar oqimini oshiradi”, — dedi Chjen Shansze. U tarmoqning tashkil etilishi sanoatni rivojlantirish, investitsiyalar va savdoning o‘sishiga xizmat qilishiga ishonch bildirdi.

Uch tomonlama temir yo‘l loyihasi

Xitoy-Qirg‘iziston-O‘zbekiston temir yo‘li qurilishiga tayyorgarlik 2022-yilda boshlangan. Uch tomonlama kelishuv bilan loyihaning texnik-iqtisodiy asoslarini ishlab chiqish bo‘yicha ishlarni yakunlash belgilandi.

Temir yo‘l qurilishi bo‘yicha loyihaning asosiy kelishuvlari hal qilingan, uning qiymati taxminan $5,1 mlrdni tashkil qiladi. Uzunligi hozirgacha 454 km bo‘lishi mumkin. Joriy yilning iyun oyida temir yo‘l qurilishi bo‘yicha strategik loyihani amalga oshirish to‘g‘risidagi bitim imzolandi.

Iyulda Shavkat Mirziyoyev loyihani amalga oshirish bo‘yicha bitimni tasdiqladi. Hujjat bilan loyihani amalga oshiruvchi kompaniyaning ustav kapitaliga $255 mln ajratish topshirilgan. Shundan $14 mlni joriy yil oxirigacha o‘tkazilishi kerak.

Oktabr oyi boshida Bishkekda loyiha idorasi ochildi. Aqilbek Japarov mazkur temir yo‘lning qurilish ishlari o‘z vaqtida yakunlanishini aytdi. Noyabrga kelib, Qirg‘iziston hukumati loyiha kompaniyasiga $14 mln ajratishni tasdiqladi.

YTTB Xitoy-Qirg‘iziston-O‘zbekiston temir yo‘li qurilishini moliyalashtirishi mumkin. Bank O‘zbekiston Transport vazirligi bilan loyiha doirasidagi hamkorlik yo‘nalishlarini muhokama qildi.

Mazkur temir yo‘li qurilishi 2024-yilning 27-dekabrida boshlanishi ma’lum qilindi. Qirg‘iziston Vazirlar Mahkamasi va qo‘shma loyiha kompaniyasi investitsiya shartnomasini imzoladilar.

Oilaviy shifokorlarga ularning ish samaradorligiga qarab, ustama to‘lab boriladi. Oltita hududda davlat tibbiy sug‘urtasi amaliyotlari joriy etiladi.

Shavkat Mirziyoyev huzurida sog‘liqni saqlash sohasida qilingan ishlar va 2025-yilga mo‘ljallangan ustuvor vazifalar ko‘rib chiqildi. Bu haqda prezident matbuot xizmati xabar berdi.

Birlamchi bo‘g‘inda 18 mingdan ziyod tibbiy brigada tashkil qilingan. Ixtisoslashgan tibbiy xizmatda diagnostika usullari 500dan, davolash usullari esa 800dan oshdi.

2024-yilda sohaga o‘tgan yilga nisbatan 25%ga ko‘p mablag‘ — 36 trln so‘m ajratildi. Birlamchi bo‘g‘inda 6 turdagi skrining tekshiruvi yo‘lga qo‘yildi. 106 ming odamda qandli diabet, 194 ming nafarida yurak qon-tomir, 2 mingdan ziyod ayolda saraton, mingga yaqin bolalarda onkogematologik kasallik erta bosqichda aniqlandi.

Davlat rahbari bu sohadagi asosiy vazifa — birlamchi bo‘g‘inda tibbiyot sifatini oshirish ekanini ta’kidladi. Buning uchun vazirlik vertikalini hududlarda to‘g‘ri ishlatish, ayniqsa, chekka va og‘ir tumanlarga e’tiborni kuchaytirish vazifasi qo‘yildi.

Turkiyalik ekspertlar 6ta hududdagi tibbiyot muassasalari faoliyati va ulardagi ko‘rsatilayotgan tibbiy xizmatlarni o‘rganib, aholiga ko‘rsatilayotgan birlamchi tibbiy-sanitariya yordami xizmatlarini isloh qilish bo‘yicha takliflar ishlab chiqilmoqda. Mutasaddilarga bu masalani chuqur tahlil qilib, birlamchi bo‘g‘in transformatsiyasi bo‘yicha qaror loyihasi tayyorlash topshirildi.

Yo‘nalish xodimlarining malaka oshirish dasturi takomillashtiriladi. Nazariy bilim va ko‘nikmalarni egallashdan kompetensiyalarni rivojlantirishga bosqichma-bosqich o‘tiladi.  Kelgusi yil tibbiyot xodimlarining oylik lavozim maoshlari oshiriladi. Oilaviy shifokorlarning mehnat samaradorligi asosida ustama to‘lash tartibi joriy qilinadi.

Qoraqalpog‘iston, Navoiy, Samarqand, Buxoro, Xorazm, Qashqadaryoda davlat tibbiy sug‘urtasi amaliyotlari joriy etiladi. Markazlashgan laboratoriya xizmatlari kengaytiriladi. “Xaridlar markazi” va uning 13ta hududiy filiali tashkil etilib, tibbiy jihozlardan foydalanish elektron tizim orqali nazorat qilinadi.

Yana 35ta yo‘nalishdagi 400ta milliy klinik protokollar ishlab chiqiladi. 7ta ixtisoslashgan markaz va 2ta OTM xalqaro akkreditatsiyadan o‘tkaziladi.

Yig‘ilishda kadrlar masalasida tibbiy o‘quv yurtlarida ta’lim sifatini oshirish, uni amaliyot bilan o‘zaro bog‘lash, bitiruvchilarning birlamchi bo‘g‘inda tajriba orttirishini tashkil etish muhimligi ta’kidlandi.

Hujjatda poytaxtning qaysi hududlarida rekonstruksiya yoki renovatsiya ishlari rejalashtirilganligi ko‘rsatilgan.

Vazirlar Mahkamasi Toshkent shahrining 2045-yilgacha bo‘lgan bosh rejasini tasdiqladi. Qaror Lex.uz saytida e’lon qilindi.

Hujjatga ko‘ra, poytaxtning ma’muriy chegaralaridagi maydoni 43 873 gektarni tashkil etadi. Yaqin 20 yil ichida aholi soni qariyb 2,5 barobar — 3 mlndan 7,4 mlnnga o‘sishi kutilmoqda. Shahar hududi konservatsiya, rekonstruksiya va renovatsiya zonalariga ajratiladi. Zonalardan foydalanish talablari shaharsozlik kadastrining geoaxborot tizimida mavjud bo‘ladi.

Konservatsiya zonalarida madaniy meros, yashil hududlar, suv havzalari va qirg‘oqlarni muhofaza qilishga alohida e’tibor qaratiladi. Ushbu hududlarda yangi bino va inshootlar qurish taqiqlanadi.

1. Oxirgi 5 yil ichida qurilishi yakunlangan, aholi dam olishi uchun sharoit yaratilgan va yaxshilashga ehtiyoj sezilmayotgan hududlar shakllangan hisoblanadi. Toshkent hokimiyati jamoatchilik fikrini inobatga olgan holda bunday joylarda qayta qurish ishlariga ruxsat berishi mumkin.
2. Yaxshilanishni talab qiladigan hududlarda qo‘shimcha ijtimoiy va infratuzilma inshootlari qurilishiga ruxsat beriladi, shuningdek, binolarning tashqi ko‘rinishini yangilash, ochiq maydonlar va jamoat joylarini obodonlashtirish ishlari ham amalga oshirilishi mumkin.
3. Zichlashtirish talab etiladigan hududlar infratuzilmani inobatga olgan holda ijtimoiy-iqtisodiy vaziyatni yaxshilash zaruriyatini nazarda tutadi. Bunday joylarda ko‘p qavatli uylar qurish ruxsat beriladi.

Renovatsiya zonalari, o‘z navbatida, ikkita kichik turga ega:

1. reformatsiya hududlari — atrof-muhitga salbiy ta’sir ko‘rsatadigan bo‘sh yerlar, sanoat zonalari yoki master-rejaga muvofiq yangi binolar qurilishiga yo‘l qo‘yiladigan eskirgan uy-joyli hududlar.
2. kengaytirish hududlari — yangi binolar va inshootlar qurish uchun ajratiladigan, ular bilan ilgari o‘zlashtirilgan hududlar o‘rtasidagi uzilishni qisqartirish sharti bilan yangidan o‘zlashtiriladigan hududlar.

Funksional jihatdan 5 toifadagi hudud toifasi — turar-joy, jamoat, sanoat, transport va dam olish hududlari ajratiladi. O‘z navbatida, turar-joy hududlari ko‘p kvartirali binolar, yakka tartibdagi uy-joylar va vaqtinchalik yashash joylarini (mehmonxonalar, yotoqxonalar, tibbiyot muassasalari) o‘z ichiga oladi. Bosh rejaga ko‘ra, Toshkent shahrida yashil hududlar maydoni 7120 gektarni tashkil etadi, ularga yana 10 ming gektar qo‘shiladi. Shuningdek, poytaxtda 836 km yo‘llar mavjud bo‘lib, ularga qo‘shimcha ravishda yana 647 km yo‘l qurilishi rejalashtirilgan.

Prezident oktabr oyida Toshkent shahrining bosh rejasi loyihasi bilan tanishgandi. Loyihaga ko‘ra, Toshkent shahri 2045-yilgacha 7,5 mln aholiga mo‘ljallangan megapolisga aylantiriladi

Shuningdek, bosh reja bilan poytaxtni aglomeratsiya asosida rivojlantirish hamda uchta zonaga ajratish rejalashtirilmoqda.

Bayramda olti kunlik ish haftasida ishlaydiganlar 5 kun, besh kunlik ish haftasida ishlaydiganlar 6 kun dam oladi.

24-dekabr kuni “Yangi yil bayramini nishonlash davrida qo‘shimcha ishlanmaydigan kunni belgilash va dam olish kunini ko‘chirish to‘g‘risida»gi prezident qarori qabul qilindi. Bu haqda Bandlik vazirligi matbuot xizmati xabar berdi. Hujjat bilan 2025-yilda 5 kunlik ish haftasida ishlaydigan xodimlar uchun dam olish kuni 4-yanvar — shanba kunidan 2-yanvar — payshanba kuniga ko‘chirildi hamda 6 kunlik ish haftasida ishlaydigan xodimlar uchun 2-yanvar — payshanba qo‘shimcha dam olish kuni etib belgilandi.

Dam olish kunlari quyidagicha:

• 28-dekabr, shanba — 6 kunliklar uchun ish kuni, 5 kunliklar uchun dam olish kuni;
• 29-dekabr, yakshanba — barcha uchun odatiy dam olish kuni;
• 30-dekabr, dushanba — 6 kunliklar uchun qo‘shimcha dam olish kuni, 5 kunliklar uchun 14-dekabr (shanba) kunidan ko‘chirilgan dam olish kuni;
• 31-dekabr, seshanba — barcha uchun qo‘shimcha dam olish kuni;
• 1-yanvar, chorshanba — Yangi yil bayrami;
• 2-yanvar, payshanba — 6 kunliklar uchun dam olish kuni, 5 kunliklar uchun 4-yanvar (shanba) kunidan ko‘chirilgan dam olish kuni.

Bayram munosabati bilan poytaxtdagi 12ta bozorda arzonlashtirilgan mahsulotlar savdosi tashkil etildi. Toshkent shahar hokimligi mazkur savdo yarmarkalari orqali fuqarolar arzon narxlarda mahsulotlarni xarid qilishlari mumkinligini qayd etdi.