Spot “Biznes gʻoya” rukni ostida oʻz daromadli faoliyatini boshlamoqchi boʻlganlar uchun zamonaviy biznes gʻoyalarni berdi.

Tadbirkorlikni boshlamoqchi boʻlgan insonlarning aksariyat qismida umumiy ovqatlanish yoʻnalishiga qiziqish katta boʻladi. Bir tomondan bugungi kunda restoran ochish juda qimmat va xavflidek koʻrinsa ham, mazkur yoʻnalishga boʻlgan talab har doim aktual hisoblanadi. Bozorda esa qanchalik raqobatchilar koʻp boʻlmasin, oʻz oʻrningizni topishga har doim imkon bor. Agar kattaroq kafe yoki tamaddixona ochishga mablagʻ boʻlmasa, eng yaxshi yechim bu — keytering.

Eʼtibor bering: Keltirib oʻtilayotgan narxlar oʻrtacha qiymatdan olingan boʻlib, real narxlar bilan farqlanishi mumkin.

Xarajat va foyda

Keytering kompaniyasining ishi ikki yoʻl bilan amalga oshirilishi mumkin:

1. Oʻz oshxonasi va oshpazlariga ega shoxobcha shakli
2. Restoran va mijozlar oʻrtasidagi vositachilik.

Birinchi holda ish oshxonani jihozlash va sanitariya-epidemiologiya meʼyorlariga muvofiqligi bilan bogʻliq. Ikkinchi variant esa kichik sarmoyalar bilan biznesni boshlash niyyatidagilar uchun koʻproq mos keladi. Spot ham ikkinchi usulni koʻrib chiqadi.

Loyihaga dastlabki sarmoyalar taxminan $2800 ni tashkil etadi. Sof foyda — $700 dan iborat.

Boshlangʻich xarajatlar

Oylik xarajatlar

Keytering korxonasida kamida ikkita bino boʻlishi kerak. Asosiy talab shaharning transport tuzilmasiga yaqinligi. Ofis jihozlari uchun asbob-uskunalarni masalasida pulingizni tejashingiz mumkin, boshlanishiga buyurtmalarni restoran va kafelarning oshxonalaridan bajarib turasiz. Bu kam miqdordagi kapital bilan biznes boshlash uchun yoʻl hisoblanadi. Minimal ravishda, ushbu jihozlarni olish tavsiya etiladi:

• kompyuter
• printer va boshqa ofis uskunalari
• telefon
• xodimlar va mijozlar uchun mebel.

Xaridorning buyurtma manziliga oziq-ovqat va xizmat koʻrsatuvchi xodimlarni oʻz vaqtida yetkazib berish uchun Sizga avtomobil kerak boʻladi. Shaxsiy avtomashina boʻlmasa, uni ijaraga olishni tavsiya etamiz. Siz transport kompaniyasi bilan xizmatlar koʻrsatish uchun doimiy shartnoma tuzishingiz mumkin.

Narx va tariflar

Bu eng qiziqarli nuqta. Turli xil narx segmentlari uchun takliflar tuzib chiqing: masalan, premium, biznes-klass, ekonom klass va boshqalar.

Shuningdek, turli tadbirlar uchun: toʻy, bolalar, korporativ va boshqa menyularni tayyorlab qoʻyish kerak. Har bir taklifning byudjeti asosida ushbu toifadagi ovqatni tayyorlaydigan shoxobchalar bilan bogʻlaning. Hamkorlarni topish oson boʻlmaydi, ammo doimiy shartnomaviy munosabatlar sizning umumiy keytering ishingizda muvaffaqiyat garovidir.

Xodimlar

Kompaniyaning xodimlari uning koʻlamiga bogʻliq. Sizga kamida quyidagi ishchilar kerak:

1. menejer (koordinator)
2. buxgalter
3. ofitsiantlar va xizmat koʻrsatuvchilar (kamida 4 ta)
4. haydovchi.

Odatda, ofitsiantlar soni maʼlum bir tadbirda mehmonlar soniga bogʻliq boʻladi. Kompaniya egasi boshlanishiga mijozlarni qidirish, shartnomalar tuzish va butun jarayonni muvofiqlashtirishni oʻz zimmasiga olishi kerak. Kelajakda sizga qoʻshimcha xodimlar, shuningdek, yurist yordami kerak boʻlishi mumkin.

Reklama kampaniyasini tashkil etish

Keytering xizmatlarini reklama qilish uchun minimal darajada sizga quyidagi tadbirlar kerak:

• mijozlarga chegirmalar berish tizimi
• veb-sayt, ijtimoiy tarmoqlarda sahifangizni ishlab chiqish va targʻib qilish
• qoʻshimcha chegirma uchun mijozlar fikri tizimi
• bosma reklamarni tashkilotlarga tarqatish.

Xulosa

Barqaror buyurtmalar soni bilan doimiy xizmat koʻrsatish guruhini shakllantirish sizga foydali boʻladi. Logotip va korporativ qoidalarni ishlab chiqish, xodimlar uchun markali idishlar va libos buyurtma qilish lozim. Ushbu usullarning barchasi kompaniyaning imidjini yaratadi.

Eng muhimi — boshlab koʻrishdan qoʻrqmaslik kerak. Agar Sizda mazkur yoʻnalishga qiziqish uygʻongan boʻlsa, oʻzingizni sinab koʻrishni tavsiya etamiz.

Spot Yaran konsalting hammuassisi Yevgeniya Son bilan birgalikda kompaniyani ro‘yxatdan o‘tkazish uchun zarur bo‘lgan yettita bosqich bilan bo‘lishadi.

Yevgeniya Son,

auditor, Yaran Consulting buxgalterlik kompaniyasi hammuassisi.

Kompaniyalarni ro‘yxatdan o‘tkazish an’anaviy ravishda huquq va buxgalteriya firmalari tomonidan amalga oshiriladi. Biroq, endi ushbu protsedura sezilarli darajada soddalashtirildi va siz kompaniyani o‘zingiz ro‘yxatdan o‘tkazishingiz mumkin.

Biz 2010-yildan beri kompaniyalarni ro‘yxatdan o‘tkazishga yordam beramiz. Ro‘yxatga olish tez va to‘g‘ri o‘tishi va tadbirkorlikni endi boshlayotganlarga qo‘shimcha muammolarni keltirib chiqarmasligi uchun nazorat ro‘yxatini tuzdik.

Kompaniyani ro‘yxatdan o‘tkazish jarayonini ikki bosqichga bo‘lish mumkin:

• ma’lumotlarni dastlabki yig‘ish;
• davlat ro‘yxatidan o‘tkazish tartibi.

Ma’lumotlarni dastlabki yig‘ish

1. Faoliyatni tanlash

Tadbirkorlik faoliyati uchun qonun hujjatlariga zid bo‘lmagan har qanday faoliyat turiga yo‘l qo‘yiladi. Ammo ularning ba’zilari litsenziya va ruxsatnomalarni talab qiladi. Masalan, kasb-hunar ta’limi xizmatlarini ko‘rsatuvchi kompaniya ochish uchun litsenziya, ommaviy tadbirlar o‘tkazish uchun esa ruxsatnoma olish kerak. Batafsil bu yerda o‘qish mumkin.

2. Huquqiy-tashkiliy shaklni tanlash

Eng dolzarb tashkiliy-huquqiy shakllar — bu o‘zini o‘zi band qilganlik, yakka tartibdagi tadbirkorlik (YaTT) va mas’uliyati cheklangan jamiyat (MChJ).

Ro‘yxatdan o‘tishdan oldin har bir shaklning barcha ijobiy va salbiy tomonlari bilan tanishish kerak. Masalan, yakka tartibdagi tadbirkor xodimlarni yollay olmaydi va agar siz sherik bilan biznes ochishni rejalashtirayotgan bo‘lsangiz, u holda YaTT mos kelmaydi.

Faoliyat turi shaklni tanlashga ham ta’sir qilishi mumkin, o‘zini o‘zi band qilganlik, YaTT uchun cheklangan faoliyat ro‘yxati taqdim etiladi. Bu haqda ko‘proq ma’lumotni bu yerdan va bu yerda olish mumkin.

Misol uchun, hozirda ijtimoiy tarmoqlar faol rivojlanmoqda, shu sabab internet-marketolog, kopirayter, targetolog kabi kasblar talabgir hisoblanadi. Agar siz mustaqil ravishda ishlasangiz, o‘zini o‘zi band qilganlikni ochish ancha foydali: minimal soliqlar va hisobot.

Ehtimol, sizda 2−3 kishidan iborat kichik jamoa bor bo‘lib, jismoniy shaxslarda ta’mirlash ishlarini amalga oshiryapsiz, bu holda yakka tartibdagi tadbirkorlik shakli mos keladi. Negaki buyurtmalar har doim ham barqaror emas va YaTTning texnik xizmat ko‘rsatish xarajatlari (buxgalteriya xizmatlari, soliqlar, ijara to‘lovlari va boshqalar) MChJga qaraganda ancha past.

3. Soliq tizimini tanlash

Kichik biznes uchun soliqqa tortish tizimini tanlash imkoniyati mavjud: umumbelgilangan yoki soddalashtirilgan. Faoliyat turiga qarab, ikkalasi ham kompaniya uchun foydali bo‘lishi mumkin. Hisob-kitoblarni amalga oshirish va ular asosida qaror qabul qilish kerak. (Bu haqda keyingi maqolada batafsil so‘z yuritamiz)

4. Ta’sis hujjatlarini tayyorlash

MChJ uchun ta’sis hujjatlarining standart to‘plami o’z ichiga ustav va ta’sis shartnomasini oladi. Ustav jamiyat faoliyatining asosiy shartlari — faoliyat turlari, ustav fondi hajmi, jamiyat ishtirokchilarining huquq va majburiyatlarini belgilaydi.

Ta’sis shartnomasi muassislarning birgalikdagi faoliyati, foydani taqsimlash, ta’sischilarning kirish va chiqish shartlarini belgilaydi.

“Mas’uliyati cheklangan hamda qo‘shimcha mas’uliyatli jamiyatlar to‘g‘risida»gi qonunda ustav va ta’sis shartnomasining asosiy qoidalari tasdiqlandi, ta’sischilar ustav va ta’sis shartnomasiga mustaqil ravishda alohida kelishuv va shartlar kiritishi mumkin.

E’tibor qarating, ta’sis hujjatlari va ustav fondi MChJni ochgandagina kerak bo‘ladi. YaTT va o‘zini o‘zi band qilganlik uchun ta’sis hujjatlari va ustav fondi taqdim etilmaydi.

5. Yuridik manzilni olish

Kompaniyani ro‘yxatdan o‘tkazish uchun zarur shart — bu noturar joydagi yuridik manzildir. Yuridik manzil — ta’sis hujjatlarida ko‘rsatilgan kompaniya faoliyatini amalda amalga oshirish joyi hisoblanadi.

YaTT va o‘zini o‘zi band qilganlik uchun standart yuridik manzil “propiska” bo‘yicha manzil hisoblanadi.

E’tibor qarating, yuridik manzilni o‘zgartirganda, kompaniya qayta ro‘yxatdan o‘tish tartibini amalga oshirishi shart.

Shuning uchun ro‘yxatdan o‘tishdan oldin bino egasidan ijara maydonini taqdim etish bo‘yicha kafolat xatini olishingizni tavsiya qilamiz.

Davlat ro‘yxatidan o‘tish

6. YaTT va MChJni ro‘yxatdan o‘tkazish

Davlat ro‘yxatidan o‘tkazish tartib-qoidalarini har qanday tuman Davlat xizmatlari markazlarida, shuningdek, davlat xizmatlari saytida onlayn ravishda o‘tish mumkin.

Onlayn ro‘yxatdan o‘tish uchun elektron raqamli imzo (ERI) olish kerak. Shuningdek, uni har qanday tumandagi davlat xizmatlari markazida oflayn tarzda pasport va flesh-karta bilan borib olish mumkin. Shuningdek, ERI’ni E-imzo saytida onlayn tarzda olish mumkin.

ERIni olganingizdan va davlat xizmatlari veb-saytida ro‘yxatdan o‘tganingizdan so‘ng, bosqichma-bosqich ro‘yxatdan o‘tish jarayonini boshlashingiz mumkin. Bu juda oddiy, matnli ko‘rsatma mavjud.

Roʻyxatdan oʻtish toʻlovi:

• yakka tartibdagi tadbirkorlar va MChJlar uchun oflayn rejimda — 1 BHM (maqola chop etilgan vaqtda 300 ming so‘m)
• onlayn — BMHning 90%i (270 ming so‘m)

O‘zini o‘zi band qilganlarni ro‘yxatdan o‘tkazish. Buning uchun “Soliq” mobil ilovasi yoki my.soliq.uz veb-saytidagi shaxsiy kabinet orqali davlat soliq xizmati organlarida hisobga olinadi.

Ro‘yxatidan o‘tkazish uchun davlat boji olinmaydi.

7. Dastlabki hujjatlarni ro‘yxatdan o‘tkazish

Kompaniyani ro‘yxatdan o‘tkazgandan so‘ng, dastlabki bir nechta hujjatlarni rasmiylashtirish kerak:

• yuridik shaxsning muhrini olish (YaTTlar va o‘zini o‘zi band qilganlar uchun shart emas);
• direktorni yollash, ya’ni ta’sischilar yig‘ilishini o‘tkazish, direktorni tayinlash to‘g‘risida bayonnoma, buyruq tuzish (YaTTlar va o‘zini o‘zi band qilganlar uchun shart emas, chunki ular o‘z bizneslarining vakillaridir);
• bank hisobini ochish.

Siz bitta yoki bir nechta bankda milliy va xorijiy valyutada hisob ochishingiz mumkin. Bankni tanlashda xizmat ko‘rsatish narxiga, kredit siyosatiga va xizmat ko‘rsatishning umumiy darajasiga e’tibor bering.

Barcha 7 bosqichni 1−2 kun ichida bajarish mumkin.