Fargʻonalik hunarmand Sadoqat Mirzayeva 2016-yildan buyon ekologik toza, zamonaviy va milliy qoʻgʻirchoqlar tayyorlaydi. “Art house sadosh” MCHJ Qozogʻiston, Qirgʻiziston, Tojikiston, Yaponiyaga buyurtma asosida oʻyinchoqlar yetkazib beradi. Mahsulotlarini esa xalqaro onlayn savdo platformalari orqali xorijliklar sotib olishmoqda.
Yumshoq qoʻgʻirchoqlar zamonaviylik va milliylikni mujassamlashtirgan. Ularga “Sadosh” nomini berilgan. Internet orqali xorijdan, shuningdek, viloyatlardagi tadbirkorlardan yiliga 2 mingdan ortiq buyurtma tushadi.
“Dastlab qattiq qogʻozga qoʻgʻirchoqning andazasi chiziladi. Andaza mato ustiga qoʻyilib, oʻntadan yigirmatagacha bichim qirqib olinadi. Keyin chetlari tikilib, ichiga sintepon solinadi. Xaridor istagiga qarab, milliy matolarimizdan libos kiydiriladi. Mazkur mahsulotimiz arzon va sifatli. Bu bilan pulsiz ham biznes boshlash mumkinligini aytmoqchiman”, — deydi tadbirkor.
