Hujjat Toshkent shahri va viloyat markazlariga 1 kunda, boshqa joylarga esa 2 kunda yetkaziladi.

Prezident qarori bilan O‘zbekiston fuqarolariga xorijga chiqish biometrik pasportini berish tartibiga o‘zgartirishlar kiritildi. Qaror Lex.uz saytida e’lon qilindi.

Endi tayyor hujjatni uyga yetkazib berish bilan pochta orqali olish mumkin bo‘ladi. Buning uchun ariza beruvchi chet el pasportini berish uchun to‘ldiriladigan anketada tegishli bandni belgilashi kerak. Xizmat narxi pochta xizmati tomonidan belgilanadi va ariza beruvchi tomonidan to‘lanadi. Pasport so‘rovnomada ko‘rsatilgan manzilga yetkaziladi: Toshkent shahri va viloyat markazlariga 1 kunda, boshqa shahar va tumanlarga esa 2 kunda.

Agar ariza beruvchi yetkazib berish vaqtida ko‘rsatilgan manzilda bo‘lmasa, pasportni 10 ish kuni ichida pochta bo‘limidan olish mumkin bo‘ladi. Fuqaro o‘z shaxsini barmoq izi yoki Face ID orqali tasdiqlashi kerak bo‘ladi.

1-dekabrdan esa migratsiya, avtotransport vositalarini davlat ro‘yxatidan o‘tkazish hamda davlat raqami berish bo‘yicha davlat xizmatlari fuqarolar xohishi bilan yashash joyiga chiqish orqali amalga oshirilishi rejalashtirilgan edi.

2023-yil iyul oyida Vazirlar Mahkamasi ID-karta va chet el pasportlarini pochta orqali yetkazib berish to‘g‘risida qaror qabul qildi. Xizmatni o‘sha yilning 1-oktyabrigacha tashkil etish, dekabr oyidan boshlab esa migratsiya va avtotransportni ro‘yxatdan o‘tkazish sohalarida uyga chiqib xizmat ko‘rsatishni yo‘lga qo‘yish rejalashtirilgan edi.

Ariza beruvchi sayyor xizmatdan foydalanish kunini tanlash huquqiga ega. Odatdagi yig‘im va to‘lovlardan tashqari, transport xarajatlarini ham to‘lash talab etiladi — 10 km masofagacha BHMning 21,9%i (82 125 so‘m)dan 100 km masofagacha 83,2%i (312 ming so‘m)gacha.

Qayd etilishicha, tanlov g‘oliblari 37,5 mln so‘m miqdorida pul mukofoti bilan rag‘batlantiriladi.

Kambag‘allikni qisqartirish va bandlik vazirligi tadbirkorlar uchun “Eng yaxshi ish beruvchi” tanloviga arizalar qabul qilmoqda.

Unda mamlakatning istalgan tumani (shahar)dan faqat nogironligi bo‘lgan shaxslarni ishga qabul qilgan ish beruvchilar ishtirok etishlari mumkin. Bundan budjet tashkilotlari, davlat korxonalari, ustav kapitalida davlat ulushi 50% va undan ortiq bo‘lgan yuridik shaxslar mustasno.

Ish beruvchilardan kelib tushgan arizalarni ko‘rib chiqish, umumlashtirish va baholash vazirlikda tuzilgan komissiya tomonidan amalga oshiriladi.

Tanlovda ishtirok etish uchun arizalarni 20-noyabr soat 18:00gacha Bandlik vazirligining Toshkent shahri, Nukus ko‘chasi, 8-uy manziliga yoki info@bv.gov.uz elektron pochtasiga jo‘natish kerak.

Nomzodlar quyidagi hujjatlarni taqdim etilishlari kerak:

• ariza shakli;
• davlat ro‘yxatidan o‘tganlik haqidagi guvohnoma nusxasi;
• tashkilotda ishlovchi nogironligi bo‘lgan shaxslar haqida ma’lumot;
• ish o‘rinlari moslashtirilganligi haqida ish o‘rinlarini attestatsiyadan o‘tkazilganligi to‘g‘risida xulosa nusxasi va boshqalar.

Batafsil ma’lumotlarni vazirlikning +99871 203−01−40 (ichki raqam 749) telefon raqami orqali olish mumkin. Ariza shakli bu yerda.

O‘z navbatida, oltin qiymati ham rekord ko‘rsatkichini yangiladi — $33,36 mlrd.

Oktabr oyida O‘zbekistonning oltin-valyuta zaxiralari yana rekord darajaga yetdi. Bu haqda Markaziy bank ma’lumotlarida keltirilgan. Joriy yilning 1-noyabr holatiga ko‘ra, mamlakat zaxiralari bir oyda $2 mlrddan ortiqqa oshib, $43,14 mlrdni tashkil etdi. Bu ma’lumotlar e’lon qilina boshlanganidan keyingi davr uchun eng yuqori ko‘rsatkichdir.

Buning asosiy sababi oltin zaxiralarining davom etayotgan o‘sishi bilan bog‘liq bo‘ldi. O‘z navbatida, uning qiymati ham rekord ko‘rsatkichini yangiladi — $33,36 mlrd yoki o‘tgan oyga nisbatan $1,5 mlrdga ko‘p.

Shu bilan birga, zaxiralarning sof hajmi oldingi daraja — 12 mln troya unsiyada (373 tonnadan ortiq) o‘zgarishsiz qoldi. Erkin konvertatsiya qilinuvchi valyutadagi aktivlar hajmi sezilarli darajada oshib, oktabr oyi oxirida $9,22 mlrdni tashkil etdi. Markaziy bankning xorijiy hisobvaraqlaridagi naqd valyuta hajmi $445,5 mlnga oshib, $9,11 mlrdga yetdi. Shundan $414,4 mlni boshqa Markaziy banklar va XVFda, qolgan $8,67 mlrdi esa boshqa xorijiy moliya institutlarida saqlanadi.

Bundan tashqari, Markaziy bank tomonidan sotib olingan qimmatli qog‘ozlar narxi bir oy ichida deyarli uch baravar oshib, $100 mlndan oshdi.

Seminar hududlardagi 10ta Ishga marhamat monomarkazlarida o‘tkazilib, xotin-qizlarga moliyaviy savodxonlik va elektron tijorat borasida bilim va ko‘nikma beriladi.

Bandlik vazirligi xotin-qizlar uchun tadbirkorlik bo‘yicha o‘quv seminariga qabul boshlanganini e’lon qildi.

Unda o‘z biznesini boshlash va mamlakat bo‘ylab xaridorlarni topish istagida bo‘lgan xotin-qizlar ishtirok etishlari mumkin. Dastur vazirlik, BMTTD, Ijtimoiy himoya milliy agentligi hamda “Uzum Academy” tomonidan amalga oshirilmoqda hamda o‘z ichiga moliyaviy savodxonlik va elektron tijorat bo‘yicha bepul o‘quv seminarlarini qamrab oladi.

Seminarlar har bir hududdagi “Ishga marhamat” monomarkazlarida quyidagi belgilangan muddatlarda tashkil etiladi:

• 12−13 noyabr — Qarshi shahri;
• 14−15 noyabr — Angor tumani;
• 19−20 noyabr — Samarqand shahri;
• 21−22 noyabr — Jizzax shahri;
• 25−26 noyabr — Farg‘ona shahri;
• 27−28 noyabr — Andijon shahri;
• 29−30 noyabr — Namangan shahri;
• 2−3 dekabr — Navoiy shahri;
• 5−6 dekabr — Guliston shahri;
• 9−10 dekabr — Toshkent viloyati Oqqo‘rg‘on tumani.

O‘quv seminarida ishtirok etishni xohlovchi xotin-qizlar mazkur monomarkazlarga tashrif buyurishlari mumkin.

Monomarkazlar manzillari va telefon raqamlari bilan havola orqali tanishish mumkin.

Shu bilan birga, TDT doirasida tashishlarda elektron hujjat aylanishiga o‘tish va o‘zaro tan olish bo‘yicha kelishuv imzolash tashabbusini bildirdi.

Shavkat Mirziyoyev 6-noyabr kuni Bishkek shahrida Turkiy davlatlar tashkiloti Davlat rahbarlari kengashining navbatdagi majlisida ishtirok etdi. Bu haqda prezident matbuot xizmati xabar berdi.

Davlat rahbari o‘z nutqida yetakchi davlatlar o‘rtasidagi raqobat va ishonchsizlik muhiti keskin kuchayayotgani, ziddiyatlar sabab turli xavf-xatarlar ortayotgani savdo, investitsiya, transport, energetika kabi sohalardagi qo‘shma reja va loyihalarga to‘siq bo‘layotganini qayd etdi.

Turkiy dunyo xartiyasining qabul qilinishi qardosh davlatlar va xalqlar o‘rtasida kuchayayotgan hamkorlik misoli ekani ta’kidlandi. Sammit kun tartibidan kelib chiqib, prezident bir qator ustuvor masalalarga to‘xtalib o‘tdi. Xususan, tashkilotning shartnomaviy-huquqiy bazasini kengaytirish va mustahkamlash muhimligi ta’kidlandi. Bunda Turkiy davlatlarning strategik sheriklik, abadiy do‘stlik va qardoshlik to‘g‘risidagi shartnomasini qabul qilish taklif etildi.

Tashkilot doirasida yangi iqtisodiy imkoniyatlar makonini yaratish uchun quyidagi yo‘nalishlarda aniq bitim va kelishuvlarni ishlab chiqish tashabbusi ilgari surildi:

• tarif va notarif to‘siqlarni bartaraf etish;
• savdo-bojxona tartib-qoidalarini yengillashtirish;
• elektron tijorat platformalarini rivojlantirish.

Savdo sohasidagi salohiyatni kengaytirishga qaratilgan chuqur tadqiqotlar olib borish uchun yaqin istiqbolda Toshkentda yetakchi tahlil markazlarining anjumanini o‘tkazish taklif qilindi.

Mintaqaviy ahamiyatga ega loyihalarga xalqaro moliya institutlari va xorijiy investitsiya kompaniyalarini jalb qilish maqsadida Turkiy investitsiya forumini tashkil etish va uning birinchi yig‘ilishini O‘zbekistonda o‘tkazish taklif qilindi.

Transport yo‘laklaridan samarali foydalanish, O‘rta yo‘lak bo‘yicha tranzit tariflarini maqbullashtirish, chegaralarni kesib o‘tish jarayonlarini soddalashtirish, yangi logistika tizimlari va qo‘shma operatorlarni yaratish masalalari belgilandi. Prezident “Raqamli turkiy dunyo” konsepsiyasini ishlab chiqishni taklif qildi. U kelajak iqtisodiyotini joriy etish, IT-sohasida bilimlarni almashish, innovatsiyalar, infratuzilma va ilm-fanning raqamli tizimlarini, yirik ma’lumotlar markazlarini yaratishga qaratilgan.

Shuningdek, tashkilot doirasida tashishlarda elektron hujjat aylanishiga o‘tish va ularni o‘zaro tan olish bo‘yicha ko‘p tomonlama bitimni imzolash tashabbusi ilgari surildi. Buning uchun Turkiy davlatlar logistika markazlari va yuk tashuvchilar alyansi bilan Xalqaro logistika konferensiyasini o‘tkazish kerakligi qayd etildi.

Sammit yakunida Bishkek deklaratsiyasi, Turkiy dunyo xartiyasi, shuningdek, hamkorlikning ustuvor yo‘nalishlari bo‘yicha qator kelishuvlar qabul qilindi.

Markaziy bank uch yilga mo‘ljallangan uchta — asosiy, muqobil va xatarli ssenariyni taqdim etdi.

Markaziy bank boshqaruvi 31-oktabrdagi yig‘ilishida “Pul-kredit siyosatining 2025-yil va 2026−2027 yillar davriga mo‘ljallangan asosiy yo‘nalishlari»ning konseptual loyihasini ma’qulladi. Bu haqda regulyator matbuot xizmati xabar berdi.

Tashqi va ichki sharoitlarning o‘rta muddatli istiqboldagi o‘zgarish trayektoriyalari, mavjud noaniqliklar va xatarlarning inflyatsiyaga ehtimoliy ta’sirlari asosida pul-kredit siyosatining kelgusi yillarga mo‘ljallangan asosiy yo‘nalishlari makroiqtisodiy rivojlanishning asosiy va muqobil ssenariylari asosida ishlab chiqildi.

Shu bilan birga, ehtimoli doim mavjud bo‘lgan inflyatsion xatarlarning kuchayishiga asoslangan xatarli ssenariy ham ko‘rib chiqildi.

Asosiy ssenariy

Asosiy ssenariyni ishlab chiqishda ichki va tashqi sharoitlar joriy sur’atlarda rivojlanishda davom etishining quyidagi shartlari inobatga olingan:

• global inflyatsiyaning pasayib borishi;
• jahonda iqtisodiy o‘sish sur’atlarining ijobiy va xalqaro bozorlarda xomashyo narxlarining nisbatan yuqori darajada saqlanib qolishi;
• mamlakatda investitsion talabning oshib borishi;
• tarkibiy o‘zgarishlar va islohotlarning faol davom ettirilishi.

Mazkur ssenariy doirasida YIMning real o‘sishi nisbatan qat’iy pul-kredit sharoitlari va fiskal konsolidatsiya ta’sirida 2025-yilda 5,5−6%, 2026-yilda 5,5−6,5%, 2027-yilda esa 6−6,5% atrofida bo‘lishi prognoz qilinmoqda.

Kelgusi yilda tartibga solinadigan narxlarning oshirilishi hamda oziq-ovqat inflyatsiyasining 2024-yildagi past baza ta’sirlari hisobiga inflyatsiyaning 5%lik target darajasigacha pasayishi 2026-yilning ikkinchi yarmida sodir bo‘lishi bo‘yicha asoslar yuzaga kelmoqda.

Targetga erishish muddatining uzaytirilishi joriy sharoitlar va inflyatsion omillar asosida umumiy makroiqtisodiy barqarorlikka salbiy ta’sir ko‘rsatmagan holda inflyatsiyaning bosqichma-bosqich pasaytirib borilishini anglatadi.

Shu bilan birga, inflyatsiyaning monetar omillarini kamaytirishga va bazaviy inflyatsiyaning barqaror pasayuvchi trayektoriyasini ta’minlashga qaratilgan pul-kredit siyosati va makroprudensial siyosatining o‘zaro uyg‘un choralari kuchaytiriladi.

Muqobil ssenariy

Muqobil ssenariyni ishlab chiqishda joriy ichki sharoitlarning saqlanib qolishi va tashqi xatarlarning ortishi, jumladan quyidagilar inobatga olingan:

• global inflyatsiyaning uzoqroq muddat yuqori darajada shakllanishi;
• ayrim yirik iqtisodiyotlarda iqtisodiy faollikning sezilarli pasayishi;
• jahon iqtisodiyoti fragmentatsiyasining kuchayishi bo‘yicha xatarlarning ichki iqtisodiyotga salbiy ta’sirlari.

Bunda, tashqi xatarlarning iqtisodiy o‘sishga salbiy ta’sirlari yuqori bo‘lib, tashqi talabning pasayishidan ko‘riladigan iqtisodiy rivojlanishdagi yo‘qotishlarni kamaytirish va ichki talabni qo‘llab-quvvatlash asosan fiskal rag‘batlantirishlar hisobiga amalga oshirilishi nazarda tutildi.

Buning natijasida, iqtisodiy o‘sish sur’ati 2025-yilda 5−5,5%, 2026-yilda 5−6% doirasida shakllanishi, 2027-yilda esa 5,5−6,5%gacha tiklanishi taxmin qilinmoqda.

Muqobil ssenariyda iqtisodiy faollikning ma’lum darajada pasayishi va nisbatan qat’iy pul-kredit sharoitlarining saqlab qolinishi fonida umumiy inflyatsiya 2025-yilda 7−8%ga, 2026-yilda 6%ga yaqin bo‘lishi va 2027-yilning birinchi yarmida 5%lik targetigacha pasayishi kutilmoqda.

Ushbu ssenariy shartlari yuzaga kelgan taqdirda pul-kredit sharoitlarini asosiy ssenariyga nisbatan qat’iyroq shakllantirish, xususan, asosiy stavkani oshirish imkoniyatlari ham ko‘rib chiqiladi.

Xatarli ssenariy

Mazkur ssenariyda quyidagilar inobatga olingan:

• mintaqadagi iqlim o‘zgarishining ishlab chiqarish ko‘rsatkichlariga salbiy ta’siri;
• ishlab chiqarishning cheklanganligi sharoitida fiskal rag‘batlantirishlarning kuchaytirilishi;
• energiya resurslari taklifining talabga nomutanosib bo‘lishi hisobiga inflyatsiyani oshiruvchi taklif tomondan xatarlar ehtimolligi.
• Mazkur xatarlar ta’sirida umumiy inflyatsiya 2025-yilda 8−9%, 2026-yilda 7−8% atrofida shakllanishi va 5%lik targetga 2027-yilning oxirida yetishi kutilmoqda.

Bunda inflyatsion bosimlarni pasaytirish maqsadida Markaziy bankning asosiy stavkasi oshiriladi va pul-kredit sharoitlari qat’iylashtiriladi. Hukumat bilan inflyatsiyaga nomonetar omillar ta’sirini kamaytirish choralari faollashtiriladi.

Makroiqtisodiy rivojlanishning har qanday ssenariysi sharoitida ham pul-kredit siyosati choralari regulyatorning asosiy maqsadi bo‘lgan narxlar barqarorligini ta’minlashga, xususan, inflyatsiyani 5%lik targetigacha pasaytirish va ushbu darajada barqaror shakllanishiga qaratiladi, deya ta’kidlanadi xabarda.

Shu bilan birga, kelgusi yillarda pul-kredit siyosati choralari ta’sirchanligini oshirishda quyidagilar asosiy yo‘nalishlar hisoblanadi:

• pul-kredit siyosati qarorlarini iqtisodiyotga samarali transmissiyasini ta’minlash maqsadida operatsion mexanizm va banklararo pul bozorlari takomillashtirilsdi;
• qisqa muddatli prognozlash modellari qatori kengaytiriladi, o‘rta muddatli prognoz modellari parametrlari ko‘rib chiqiladi va joriy iqtisodiy reallikka muvofiqlashtiriladi;
• kreditlash faolligini muvozanatlashtirishda pul-kredit va makroprudensial siyosat choralarini o‘zaro muvofiqlikda qo‘llash faol davom ettiriladi;
• shaffof pul-kredit siyosati kommunikatsiyasini amalga oshirishda davom etadi hamda muloqot kanallarini kengaytirish va statistik ma’lumotlar ko‘lamini oshiradi.

Mazkur loyiha 20-noyabrgacha Markaziy bankning rasmiy sahifalarida e’lon qilinib, keng jamoatchilik muhokamasiga qo‘yiladi.