Xitoyning Harbin shahrida o‘tayotgan musobaqada figurali uchish bo‘yicha terma jamoa a’zolari Dmitriy Chigirev hamda Yekaterina Geynish zafar quchdi.

O‘zbekiston delegatsiyasi 26 yillik tanaffusdan keyin qishki Osiyo o‘yinlarining oltin medaliga sazovor bo‘ldi. Bu haqda Milliy olimpiya qo‘mitasi xabar berdi.

Qayd qilinishicha, Xitoyning Harbin shahrida o‘tayotgan musobaqada figurali uchish bo‘yicha terma jamoa a’zolari Dmitriy Chigirev hamda Yekaterina Geynish juftligi 176,43 ball jamg‘arib, eng yaxshi natijaga erishdi va qishki Osiyo o‘yinlari chempioni bo‘ldi.

Ikkinchi o‘rinni KXDR vakillari Ryom Te Ok va Xan Kum Chol qo‘lga kiritdi. Yaponiyalik Yuna Nagaoka va Sumitada Moriguchi uchinchi bo‘ldi.

Bu O‘zbekiston sportchilarining ushbu Osiyo o‘yinlaridagi birinchi medali bo‘ldi. Umumjamoa hisobida Xitoy 31 oltin, 26 kumush va 22 bronza bilan peshqadamlik qilmoqda. O‘zbekistonliklar (1-0-0) Janubiy Koreya (12-13-12), Yaponiya (7-7-13) va Qozog‘istondan (3-7-5) keyin beshinchi o‘rinda bormoqda.

Harbin-2025 o‘yinlari 14 fevralda yakunlanadi.

O‘zbekiston sportchilari ilgari oltin medalni 1999 yilda Janubiy Koreyaning Kangvon shahrida o‘tgan Osiyo o‘yinlarida qo‘lga kiritgan. Figurali uchishda Tatyana Malinina yakkalik bahslarida birinchi bo‘lgan edi.

1-apreldan yoshlar, 1-sentabrdan esa ayollar daftarlari orqali beriladigan bir martalik moddiy yordamlar o‘rniga kam ta’minlangan oilalar uchun nazarda tutilgan nafaqalar to‘lanadi.

Aholini ijtimoiy himoya qilish tizimini moliyalashtirish tartibini yaxshilashga qaratilgan prezident farmoni qabul qilindi.

Hujjat bilan 2025-yilning 1-aprelidan “Yoshlar daftari” jamg‘armalari orqali, 1-sentabrdan esa “Ayollar daftari” jamg‘armalari orqali to‘lanadigan bir martalik moddiy yordamlar o‘rniga kam ta’minlangan oilalar uchun nazarda tutilgan nafaqalar to‘lanadi.

Joriy yilning 1-mayidan “Ijtimoiy daftarlar” jamg‘armalari hisobidan davolash va jarrohlik amaliyotini o‘tkazish xarajatlari Davlat tibbiy sug‘urtasi jamg‘armasi orqali moliyalashtiriladi.

1-maydan ozodlikdan mahrum etish joylaridan ozod qilingan shaxslarga BHMning 6 baravari miqdorida (2,25 mln so‘m) gi bir martalik nafaqa puli “Inson” ijtimoiy xizmatlar markazlari orqali to‘lanadi.

Shuningdek, tuman (shahar) hokimliklari huzurida “Infratuzilma va ijtimoiy barqarorlik” jamg‘armalari tashkil etiladi.

2024-yil yakuni bilan O‘zbekistonda kambag‘allik darajasi 11% dan 8,9% ga yoki 719 ming nafar aholiga kamaydi. Bunga aholi bandligini ta’minlash, ularni tadbirkorlikka jalb qilish, tomorqa va dehqonchilik uchun ajratilgan yerlardan foydalanishni oshirish choralari ta’sir qilgan.

Yanvarda 277 ming fuqaro ish bilan ta’minlandi. Shundan 91 ming nafari doimiy ishga joylashgan, 153 mingi esa tadbirkorlikka jalb qilingan. Iqtisodiyot va moliya vaziri Jamshid Qo‘chqorov o‘tgan oyda 21 mingdan ortiq oila kambag‘allikdan chiqarilganini ma’lum qildi.

“El-yurt umidi” jamg‘armasining stipendiya tanloviga ekologiya, atrof-muhitni muhofaza qilish va iqlim o‘zgarishi ta’lim dasturlari uchun 20 tagacha kvota ajratiladi.

Avvalroq prezident farmoni bilan 2025-yil uchun davlat dasturi qabul qilingani haqida xabar berilgandi.

Hujjat bilan Toshkentdagi “Green University” ekologiya, atrof-muhitni muhofaza qilish va iqlim o‘zgarishi kabi ta’lim yo‘nalishlari va mutaxassisliklari bo‘yicha yetakchi oliy ta’lim tashkiloti etib belgilanmoqda.

2025/2026 o‘quv yilidan mazkur oliygohda “sirkulyar iqtisodiyot” ta’lim yo‘nalishida kadrlar tayyorlash amaliyoti yo‘lga qo‘yiladi. Qoraqalpog‘iston, viloyatlar va Toshkent shahrida universitetga biriktiriladigan “yashil texnikumlar” tashkil etiladi.

Shuningdek, grant o‘rinlarini bosqichma-bosqich oshirish orqali aniq va tabiiy fanlar, muhandislik-texnika, xizmatlar, tibbiyot kabi sohalarda davlat buyurtmasi 25 mingtaga yetkaziladi.

“El-yurt umidi” jamg‘armasi tomonidan ekologiya, atrof-muhitni muhofaza qilish va iqlim o‘zgarishi ta’lim dasturlari asosida ta’lim olish uchun stipendiya tanloviga 20 tagacha kvota ajratib boriladi.

Mamlakatning har bir tuman yoki shahrida bosqichma-bosqich kamida bittadan umumta’lim maktabi faoliyati tashkil etiladi. U inklyuziv ta’lim talablariga javob berishi kerak.

Avvalroq keyingi o‘quv yilidan OTMlarda dual ta’lim tizimi yo‘lga qo‘yilishi haqida xabar berilgandi. Tizim birinchi bosqichda Toshkent to‘qimachilik va yengil sanoat institutining 3 va 4-kurs talabalari uchun joriy qilinadi.

Mamlakatda oltin ishlab chiqarish OKMK va NKMKda qazib olish hajmining oshishi hisobiga 8% ga o‘sdi.

2024-yilda oltinga bo‘lgan global talab rekord darajaga — 4 974 tonnaga yetdi, bu oldingi yilga nisbatan 1% ga ko‘pdir. Bu haqda Jahon oltin kengashi (World Gold Council) ning yillik hisobotida keltirilgan.

Markaziy banklarning faol xaridlari va investorlarning yuqori qiziqishi o‘sishning asosiy “drayveri” bo‘ldi. Kengash ma’lumotlariga ko‘ra, O‘zbekiston Markaziy bankining sof oltin xarid qilish hajmi 11 tonnani tashkil etdi. Bu ko‘rsatkich bilan mamlakat dunyoda to‘qqizinchi o‘rinda turibdi. Olmaliq va Navoiy kon-metallurgiya kombinatlaridagi yuqori qazib olish hisobiga O‘zbekistonda oltin ishlab chiqarish hajmi 8% ga oshdi.

Shuningdek, noyabr oyi yakunlariga ko‘ra, O‘zbekiston Markaziy banki Polsha bilan birgalikda dunyodagi ikkita asosiy oltin xaridorlaridan biriga aylandi. WGCda qayd etilishicha, noyabr oyida AQShdagi saylovlardan keyin qimmatbaho metallar narxining pasayishi ayrim markaziy banklarni qo‘shimcha xarid qilishga undagan bo‘lishi mumkin.

Asosiy trendlar

Markaziy banklar ketma-ket uchinchi yil 1 ming tonnadan ortiq oltin sotib oldi. Eng yirik xaridorlar uchligida Polsha (90 tonna), Turkiya (75 tonna) va Hindiston (73 tonna) turibdi.

Oltin qazib olishning umumiy hajmi 1% ga oshib, 3 661 tonnani tashkil etdi, oltinni qayta ishlash esa 11% ga oshib, 1 370 tonnani ko‘rsatdi. Qimmatbaho metallar taklifi 4 974,5 tonnaga (+1%), talab esa 4 553,7 tonnaga (+1%) oshdi.

2025-yil uchun kutilmalar

Mutaxassislar 2025-yilda oltinga bo‘lgan talab yuqori darajada qolishini kutmoqdalar. Markaziy banklar zaxiralarni ko‘paytirishda davom etadi, investorlar esa iqtisodiy beqarorlik sharoitida oltindan himoya aktivi sifatida foydalanadilar. Shu bilan birga, zargarlik buyumlariga bo‘lgan talab yuqori narxlar bosimi ostida qolishi mumkin.

O‘zbekistonda oltin bozoridagi vaziyat ichki makroiqtisodiy omillarga, jumladan, valyuta siyosati, inflyatsiya darajasi va eksport bozorlarining holatiga bog‘liq bo‘ladi. Oltin zaxiralarini mustahkamlash bo‘yicha global trend davom etayotgan sharoitda mamlakat ushbu aktivni jamg‘arish strategiyasini saqlab qolishi mumkin.