Mahallalarda aholi tomorqalarida amalga oshirilgan namunali va innovatsion loyihalar uchun 37,5 mln so‘mgacha grantlar ajratiladi.

Prezidentning 14-fevraldagi farmoni bilan Kambag‘allikni qisqartirish va bandlik vazirligiga qo‘shimcha vazifa va funksiyalar yuklandi.

Hujjat bilan O‘zbekiston fermer, dehqon xo‘jaliklari va tomorqa yer egalari kengashi O‘zbekiston fermerlari kengashi etib qayta nomlandi.

Bandlik vazirligiga aholi tomorqalari va dehqon xo‘jaliklaridagi yer maydonlarini to‘liq xatlovdan o‘tkazish va ularda yetishtirilayotgan mahsulotlar hisobini yuritish hamda “Online mahalla” platformasida aniq va batafsil ma’lumotlar bazasini shakllantirish vazifasi berildi.

Vazirlik tuman va mahallalarning ixtisoslashuv bo‘yicha salohiyat va imkoniyatlaridan kelib chiqib, tomorqalarda yuqori daromadli mahsulotlar yetishtirishni “yashil” va innovatsion yondashuvlar asosida tashkil etish orqali aholining yuqori daromadli mehnat bilan bandligini ta’minlash va ularni kambag‘allikdan chiqarishni amalga oshiradi. Tomorqa yer egalari va dehqon xo‘jaliklari faoliyatini rivojlantirish va qishloq xo‘jaligi mahsulotlari ishlab chiqarishni kengaytirish bo‘yicha kengash tuzildi.

Fermer xo‘jaliklarini qo‘llab-quvvatlash jamg‘armasi hamda Bandlik vazirligi huzurida Dehqon xo‘jaliklari va tomorqa yer egalari faoliyatini qo‘llab-quvvatlash jamg‘armasi tashkil etildi. Jamg‘arma mablag‘lari hisobidan moliyaviy yordam taqdim etiladi.

Har yili 500 ta mahallada bittadan aholi tomorqasida amalga oshirilgan eng namunali va innovatsion loyiha uchun grantlar ajratiladi. Bunda loyiha qiymati BHMning 100 baravari (37,5 mln so‘m) dan oshmasligi kerak.

Usta dehqonlar tomonidan qisqa muddatli o‘quv kurslarini tashkil etish bilan bog‘liq xarajatlarni qoplash uchun har bir kursga BHMning 15 baravari (5,625 mln so‘m) gacha subsidiya beriladi. Muayyan mahalladagi 50% xonadonlarning tomorqasida eksportbop mahsulot yetishtirishni yo‘lga qo‘ygan usta dehqonlarga 100 mln so‘mgacha subsidiya ajratiladi.

Tomorqa yer egalari va dehqon xo‘jaliklari hamda ularga xizmat ko‘rsatuvchilarga banklar orqali qishloq xo‘jaligi mahsulotlarini yetishtirish, ularni qayta ishlash, quritish, saqlash va qadoqlash loyihalari uchun kreditlar taqdim etiladi. Mablag‘lar 2 yillik imtiyozli davr bilan 7 yilgacha Markaziy bank asosiy stavkasidan 4 foizlik punkt yuqori stavkada (shundan 5 foiz bank marjasi) beriladi.

Shuningdek, aholi tomorqalari va ijara yerlarida ixcham muzlatkichli omborxonalar, qadoqlash, quritish va qayta ishlash uskunalari, tayyor holdagi issiqxonalar 24 oylik imtiyozli davr bilan 5 yilda bo‘lib to‘lash sharti asosida lizingga beriladi.

Yosh tadbirkorlarni qo‘llab-quvvatlash jamg‘armasi negizida Yoshlar tadbirkorligini rivojlantirish jamg‘armasi tashkil etiladi.

14-fevral kuni yoshlar tadbirkorligini hamda ularning bandligini ta’minlashga qaratilgan biznes loyihalarni qo‘llab-quvvatlash tizimini yaxshilash to‘g‘risidagi prezident qarori qabul qilindi.

Hujjat bilan Yosh tadbirkorlarni qo‘llab-quvvatlash jamg‘armasi negizida Yoshlar tadbirkorligini rivojlantirish davlat maqsadli jamg‘armasi tashkil etiladi. U Yoshlar ishlari agentligi huzurida bo‘ladi.

Jamg‘arma mablag‘lari belgilangan manbalar hisobidan $100 mln ekvivalentiga teng summaga yetkaziladi. Uning faoliyatining asosiy samaradorlik ko‘rsatkichi kamida 50 ming nafar yoshlarning bandligi ta’minlash va tadbirkorlikka jalb qilishdir.

Jamg‘arma huzurida ustav fondi $10 mln ekvivalentiga teng venchur jamg‘arma tashkil etiladi. U yoshlarning istiqbolli startap loyihalarini moliyalashtirib boradi. Venchur jamg‘arma inkubatsiya yoki akseleratsiya dasturini muvaffaqiyatli yakunlagan hamda startap loyihalarni qo‘llab-quvvatlash uchun o‘tkazilgan tanlovlarda g‘olib yoki sovrindor bo‘lgan loyihalarga 2 mlrd so‘mgacha investitsiya mablag‘larini ularning ustav fondiga ulush sifatida kiritish orqali ajratadi.

Mablag‘lar quyidagi yo‘nalishlar bo‘yicha taqdim etiladi:

• istiqbolda muvaffaqiyatga erishish salohiyati yuqori bo‘lgan namunaviy modelni ishlab chiqish jarayonidagi startap loyihaga — 500 mln so‘mgacha;
• O‘zbekiston bozorida muvaffaqiyatli joriy qilingan startap loyihaga — 1 mlrd so‘mgacha;
• xorijiy bozorga chiqish imkoniyatiga ega bo‘lgan startap loyihaga — 2 mlrd so‘mgacha.

Savdo-sanoat palatasi hamda joylardagi hokimliklar jamg‘arma tomonidan qo‘llab-quvvatlanadigan biznes loyihalarning rivojlanishiga ko‘maklashish uchun shaxsan mas’ul etib belgilanadi. Shuningdek, har chorakda yuqori qo‘shilgan qiymat yaratuvchi biznes loyihalarni moliyalashtirish uchun jamg‘armaga takliflar kiritib boradi.

14-fevral kuni Shavkat Mirziyoyevning yoshlar bilan o‘tkazilgan muloqotida Yoshlar tadbirkorligini rivojlantirish jamg‘armasi tashkil etilishi ma’lum qilingandi. Uning doirasida Tadbirkor yoshlarga 2,5 mlrd so‘mgacha imtiyozli kreditlar beriladi.

Mahalla bankirlari yangi kredit mahsulotlari orqali 250 ming nafar aholini daromadli qilishi belgilandi. Mahallalarda 378 mingta mikroloyiha amalga oshiriladi.

2025-yilda O‘zbekistonda yoshlar ishsizligiga barham berish ishlari yangi bosqichga ko‘tariladi. Bu haqda 14-fevral kuni Shavkat Mirziyoyevning Ko‘ksaroy qarorgohida o‘tkazilgan yoshlar bilan muloqotida ma’lum qilindi.

Rahbarlar yoshlar ishsizligining salbiy oqibatlaridan, o‘z vaqtida band bo‘lmagan yoshlar bilib-bilmay nomaqbul ishlarga qo‘l urishi, diniy radikalizm ta’siriga tushib qolishi, jinoyat ko‘chasiga kirishi mumkinligidan ogohlantirildi.

Prezident Yunusobod, Asaka, Sharof Rashidov, Chiroqchi, Pastdarg‘om tumanlari, Olmaliq va Buxoro shaharlarida bu boradagi ishlar qoniqarsizligini ko‘rsatib o‘tdi.

Texnologik jarayonlarni boshqarishda strategik qarorlar qabul qiladigan yoshlarni tayyorlash uchun texnika oliygohlari qoshida 8 ta muhandislik maktabi faoliyat boshladi.

Bu yil yana 17 ta shunday maktab ochiladi. O‘tgan yili yoshlarga ajratilgan 56 ming gektar yer o‘z samarasini berib, 153 ming nafar yoshlar dehqonchilik bilan shug‘ullanayotgani qayd etildi.

2025-yil Qoraqalpog‘istonda, shu bilan birga, Andijon, Jizzax, Farg‘ona va Toshkent viloyatlarida bo‘sh turgan 3 300 gektar yerni yangi tartibda ijaraga berish belgilangandi. Bu tartib asosida ilgari ajratilgan yerga mahsulot ekib, kamida 100 mln so‘m daromad olgan yoshlarga ham yer beriladi.

Yoshlar kooperatsiyalari tashkil qilinib, ularning qishloq xo‘jaligida bilim va ko‘nikma oshirishiga yordam beriladi. Yoshlar sanoat zonalarida sanoat ipotekasi orqali bino olayotgan tadbirkorlarga uskuna xaridi uchun $500 minggacha kredit ajratiladi. Ya’ni, tayyor ishlab chiqarish maydonini olgan yosh tadbirkorga imtiyozli shartlarda uskunalar ham olib beriladi.

Garov xatiga o‘zgartirishlar kiritilgan kelishuvlar Yagona portal orqali amalga oshiriladi.

12-fevral kuni qabul qilingan qonun bilan aholiga berilgan ipoteka kreditlarini takror moliyalashtirishning yangi mexanizmini yaratish belgilandi.

Qonun bilan bir qator qonun hujjatlariga ipoteka munosabatlariga elektron garov xatini joriy etish, ular bilan ta’minlangan majburiyatlarni bajarish hamda huquqlarni boshqa shaxsga o‘tkazish kabilarni belgilashni, talab qilish huquqlari hamda garov xati tugatish massasiga kiritilmasligini nazarda tutuvchi o‘zgartirish va qo‘shimchalar kiritilmoqda. “Ipoteka to‘g‘risida»gi qonunga kiritilgan qo‘shimcha bilan elektron garov xatiga o‘zgartirishlar kiritish garov xatining qonuniy egasi va garovga qo‘yuvchi tomonidan elektron garov xatiga o‘zgartirishlar kiritish to‘g‘risidagi kelishuv shaklini Yagona portalda to‘ldirish orqali amalga oshiriladi.

Elektron garov xatlari bo‘yicha huquqlarni boshqa shaxsga o‘tkazish depo hisobvarag‘iga tegishli yozuv kiritish orqali amalga oshiriladi.

Mazkur qonun loyihasi 2024-yilning sentabr oyida Oliy Majlis Qonunchilik palatasi tomonidan uchinchi o‘qishda qabul qilinib, Senat tomonidan dekabr oyida ma’qullangandi.