Biznes tarixi: Faks orqali pitsa yetkazib berishdan “Google»gacha yo‘l

Tomonidan

10:31 | 26-Fevral, 2025

“Spot” bu safar “Google»ning bosib o‘tgan yo‘li, ikki do‘stlarning uchrashib qolishi-yu, Brinning pitsa yetkazib berish g‘oyasi nima sababdan muvaffaqiyatsiz yakun topgani haqida hikoya qiladi.

“Google” kompaniyasi “Gmail”, “Google Maps”, “Google Play”, “Chrome”, “YouTube” va “Android” operatsion tizimini yaratgan, sotib olgan. Hozirda u “Alphabet” xoldingining sho‘ba korxonasi hisoblanadi. 2024-yil oktabr oyi ma’lumotlariga ko‘ra, xoldingning kapitallashuvi $2 trlndan oshib ketgan.

Bugungi kunda kompaniyaning 50 dan ortiq davlatda 200 mingga yaqin xodimi mavjud. Kompaniya chorak asr oldin, 1998-yilda, Stenford universitetining ikki aspiranti tomonidan asos solingan va ro‘yxatdan o‘tkazilgan.

“Google” tarixi kichik garajdan boshlangani haqida ko‘pchilik ma’lumotga ega. Lekin Sergey Brin va Larri Peyj nima sababdan qidiruv tizimini yaratishga urinishgani, garajni ijaraga bergan odam keyinchalik “Google»ning vitse-prezidenti bo‘lgani-yu, Brinning pitsa yetkazib berish g‘oyasi nima sababdan muvaffaqiyatsiz yakun topgani haqida ko‘p joyda hikoya qilinmaydi.

Brinning pitsa yetkazib berish biznesi

90-yillar boshlarida AQShda pitsalarni uyga yetkazib berish xizmatlari ommalashgandi. Buyurtmalarning katta qismi telefon orqali qabul qilinardi. Bu esa muloqot qilishni yoqtirmaydigan insonlar uchun noqulayliklarni keltirib chiqargan.

Aynan shunday paytda Stenford oliygohining talabasi Sergey Brin “faks” orqali pitsalarga onlayn buyurtma berish imkonini beradigan tizim yaratish ustida bosh qotira boshlaydi.

Biroz muddatdan so‘ng g‘oya amaliyotda tatbiq qilinib, telefonda buyurtma berishni istamaydigan odamlar “faks” orqali o‘zlarining sevimli yeguliklariga buyurtma berishni boshlashdi.

O‘sha kezlarda, “faks” orqali xabarlarni qabul qilish ommalashgan bo‘lsa-da, buyurtma berish xizmatida bunday usuldan foydalanish muvaffaqiyatsiz yakunlanadi.

Sababi, buyurtma oluvchi pitsaxonalar “faks»dan kelgan xabarlarni ko‘pincha e’tiborsiz qoldirishardi.

E’tiborsizlik natijasida buyurtmachilar pitsasiz qolishdi va bu usuldagi buyurtmadan foydalanmay qo‘yishdi. Oqibatda, Brin “faks” g‘oyasidan voz kechdi.

Tarixning boshlanishi: ikki do‘stning qidiruv g‘oyasi

Bu paytda, Stenford oliygohining yana bir talabasi Larri Peyj dissertatsiya yozish ustida bosh qotirayotgandi. Tadqiqot mavzusi sifatda internet qidiruv tizimini tanlagan. Shu paytda Larriga matematika bo‘yicha kuchli mutaxassis kerak bo‘ladi. Bu jabhada unga pitsa yetkazib berish biznesida muvaffaqiyatsiz tajribaga ega, lekin matematikada malakali bilim sohibi universitetning yana bir talabasi Brin yordamga keladi. Larri dastlab ilmiy loyihasiga “BackRub” deb nom bergan.

Shundan so‘ng ular qidiruv tizimi ustida hamkorlikda ish boshlashadi va 1996-yil bahorining oxirlarida tizimining birinchi versiyasi ishga tushiriladi. Oradan bir yil o‘tib esa loyiha nomi “Google»ga o‘zgaradi.

Chap tomonda Larri Peyj, o‘ng tomondagi Sergey Brin. “Google” nomi yuzta nolli 1 raqamini bildiruvchi “gugol” so‘zidan kelib chiqqan. Kundalik hayotda tobora ko‘p qo‘llanilib borayotgan “to google” fe’li 2006-yilda Oksfordning ingliz tili lug‘atiga kiritilgan.

Dastlab “Google” qidiruv tizimi Stanford universiteti saytida “google.stanford.edu” manzili orqali joylashtirilgan. Endi do‘stlarni startapning logotip ko‘rinishi o‘ylantira boshlaydi.

Ilovada yaratilgan logotip

Dastlab, logotip “BackRub” nomiga moslab qilingan. Unda qo‘l tasviri tushirilgan bo‘lib, qizil harflar bilan loyiha nomi yozilgan.

Qidiruv tizimining nomi “Google»ga o‘zgarganidan so‘ng, oddiy harflar bilan nom to‘liq yozilib, turli ranglar bilan qorishtirilgan. Birinchi dizayn kimga tegishli bo‘lgani xususida qarashlar farqlanadi. Ba’zilar birinchi logotipni Brin bepul “GIMP” dasturi yordamida ishlab chiqqan deb hisoblaydi.

Oradan vaqt o‘tib, Brin Stanford universiteti professori Rut Kedardan “Google” logotipini yaratishda yordam so‘raydi. Dizayner do‘stlarga bir nechta namunalarni taqdim etadi. Unda logotip birinchisiga o‘xshash faqat harflar shrifti sodda va o‘qishga oson qilib ishlab chiqilgan.

Logotiplarning o‘zgarib borishi. Foto: Lindeal

Bir necha bor muhokama qilinib, eskizlar qayta ishlangandan so‘ng “Google” logotipining sakkizinchi variantidagi dizayni ma’qullandi. Atigi bir necha yil ichida bu timsol “Nike” belgisi singari taniqli bo‘lishga ulguradi. Rut ko‘ngilochar va bir qarashda oddiy ko‘rinadigan logotip yaratgan.

“Google” hali hamon fasllar, oylardagi muhim kunlarga moslab logotipini o‘zgartirib boradi.

Qidiruv tizimining ishga tushishi

Logotip bilan ishlar bir maromda yo‘lga qo‘yilgandan so‘ng 1997-yil 15-sentyabrda Peyj va Brin zamonamizning eng mashhur kompaniyasiga asos bo‘lgan “google.com” domen nomini ro‘yxatdan o‘tkazishadi.

Yangi firma uchun ofis sifatida hamkorlar talabalar yotoqxonasi yaqinidagi uydan garaj va uchta xonani ijaraga olishdi. Sababi, Stenfordda allaqachon o‘z xonasini kompyuterlar bilan to‘ldirib, tez-tez mahalliy tarmoqlar yuklamasini haddan tashqari oshirgani tufayli ikki talabaga norozilik bildira boshlangandi.

Shundan so‘ng, ular Stenford oliygohining yana bir talabasi Syuzan Vojitskining garajini ijaraga olishadi. Keyinchalik, Syuzan “AdSense” va “AdWords” ustida ishlaydi, “Google” kompaniyasining katta vitse-prezidenti lavozimini egallab, “YouTube” ijtimoiy tarmog‘i uchun javobgar etib belgilanadi.

1998-yil 4-sentyabr sanasida esa Bextolshteymdan $100 ming miqdoridagi sarmoyani olgan do‘stlar o‘z kompaniyalarini rasman ochishadi. To‘rt oydan so‘ng “Google” qidiruv tizimi taxminan 60 mln internet sahifasini indeksatsiya qiladi. Bu esa uning o‘sha paytdagi raqobatchilaridan sezilarli ustunligini ko‘rsatgan.

Garchi kompaniya geometrik progressiyada o‘sib borayotgan bo‘lsa-da, ular o‘z salohiyatini to‘liq ochish uchun loyihaga “kattalar nazorati” kerak degan qarorga kelishdi. Shu sababli 2001-yilda “Google»ni boshqarish uchun “Novell«ning sobiq bosh direktori Erik Shmidtni yollashadi. O‘zining tajribasi va iste’dodi tufayli Shmidt tez orada direktorlar kengashiga kirdi va 2001-yil mart oyida kompaniya direktorlar kengashi raisi bo‘ldi.

Bir yil o‘tgach, sakkiz kishidan iborat kompaniya Palo-Altoga ko‘chib o‘tdi. 2001-yil oktyabr oyiga kelib “Google” qidiruv tizimi foyda keltira boshlaydi.

2004-yilda Google aksiyalari birjada paydo bo‘lib, “Gmail”, “Google Docs” va “Google Drive” kabi bir nechta mashhur mahsulotlarni ommaga taqdim etadi. IPO prospektida kompaniya o‘zining mustahkam o‘rnashib qolgan “Don’t be evil” (Yomon bo‘lma) shiori bilan potensial aksiyadorlarni jalb qilishga intildi.

“Google»dagi “Yoshka” kuchugi

Kompaniya joylashgan ko‘cha “Google street” deb nomlanadi. Yoshka esa “Google” kompaniyasining birinchi asosiy kuchugi hisoblanadi. Kompaniyaning yangi ofisi “Googleplex»ga ko‘chib o‘tgan paytida Yoshka jamoaga qo‘shilgan. Bundan tashqari, u kompaniyaning rasmiy xodimi hisoblanadi.

Yoshka kompaniya ofisida paydo bo‘lganidan beri u yerdagi muhit va kayfiyat tubdan o‘zgargan. Biroq, oyog‘idan jarohat olgan so‘ng ofisida yugura olmay qolgan. Shundan so‘ng, kompaniya o‘z ofislarini itlar uchun qulay qilishga qaror qilib, xodimlarga uy hayvonlarini tez-tez ishga olib kelishini rag‘batlantirib borgan.

2011-yilda Yoshka vafot etgach, kompaniya o‘zining asosiy kuchugi sharafiga qahvaxona qurgan. Hozirda u “Yoshka’s Cafe” deb nomlanib, u yerda kichik muzey ham tashkil etilgan.

“Alphabet»ning tashkil etilishi

Kompaniya tarixidagi navbatdagi muhim bosqich 2015-yil 10-avgustda, hamkorlar “Alphabet” xoldingini ta’sis etganlari bilan boshlandi. Sergey Brin prezidentlik lavozimiga tayinlandi, Larri Peyj esa yangi tashkilotning bosh direktori vazifasini o‘z zimmasiga oldi.

“Google” to‘g‘ridan-to‘g‘ri “Alphabet»ning sho‘ba korxonasiga aylandi. Xolding tarkibiga, shuningdek, kontekstli reklama xizmati, “YouTube” video-xostingi, “Android” mobil operatsion tizimi va boshqa loyihalar kiritildi. “Google” qimmatli qog‘ozlari endi “Alphabet»ga tegishli bo‘ldi. Bosh direktor lavozimiga hamkorlar Sundar Pichaini tayinlashdi. Bu keng ko‘lamli qayta tashkil etishning yakuniy nuqtasi bo‘ldi.

2024-yil oktabr oyiga ko‘ra, xoldingning kapitallashuvi $2 trlndan oshib ketgan. Quyida “Google»ning 2002−2024-yilgacha bo‘lgan yillik aylanmasi aks etgan:

Tadbirkorlar tomonidan tavsiya etilgan kitoblar

Tomonidan

YKJ ADMIN

10:20 | 26-Fevral, 2025

Ro‘yxatga badiiy adabiyotlar, avtobiografiyalar va shaxsiy o‘sish hamda biznesni rivojlantirishga oid kitoblar kiritilgan.

Yil davomida tadbirkorlar va top-menejerlar o‘zlarining shaxsiy hayot va bizneslariga ta’sir ko‘rsatgan hamda sevib o‘qiydigan kitoblari bilan o‘rtoqlashdilar. “Spot” ular tavsiya qilgan asarlardan asosiylarini saralab oldi. Ro‘yxatdan, shuningdek, iqtisodiyot bo‘yicha Nobel mukofoti sovrindorlari va “Microsoft” kompaniyasi asoschisi Bill Geyts tomonidan tavsiya qilingan kitoblar o‘rin olgan.

“Sapiens: insoniyatning qisqacha tarixi”, Yuval Noy Harari

“Profi University” asoschisi Bektosh Hatamovning fikricha, asar dunyoqarashni kengaytiradi, insoniyat tarixidagi muvaffaqiyat va xatolarni chuqurroq anglashga yordam beradi. Bu orqali o‘quvchi o‘z hayoti va jamiyat rivoji uchun foydali bo‘lgan xulosalarni chiqara olishi mumkin.

Bundan tashqari, muallif murakkab savollarni, jumladan, kelajakda texnologik taraqqiyot va genetika yordamida insoniyatni qanday o‘zgarishlar kutayotganiga oid savollarni ham o‘rtaga tashlagan, deydi “Profi University” asoschisi.

“Legalmax” boshqaruvchi hamkori Muxammadali Maxmudov ham kitobxonlarga aynan shu asar mutolaasini tavsiya qilgan. Asar ko‘plab qarashlarimni qayta ko‘rib chiqishga majbur qildi, jumladan, din va inson tabiati haqida chuqur tushunchalarni anglashga yordam berdi, deydi tadbirkor.

Bu asar men uchun ilhomlantiruvchi mutolaa bo‘lib, inson motivlari va xatti-harakatlarini chuqurroq tushunishga ko‘maklashdi, deydi Muxammadali Maxmudov.

“Qanday qilib xato qilmaslik mumkin. Matematik fikrlash kuchi”, Jordan Ellenberg

EPAM direktori Renat Axtyamov tomonidan tavsiya qilingan bu kitob matematika nuqtayi nazaridan, sirli va hayratlanarli ko‘rinadigan ko‘pgina voqealarni tushuntirib, bu yordamida xatolarni topish mumkin.

Axtyamovning fikricha, bu kitob ko‘p narsaga nafaqat odatiy nuqtayi nazardan, balki matematik fikrlash prizmasidan ham qarash imkonini beradi, bu esa ko‘proq asosli qarorlar qabul qilishga yordam beradi.

“Yuqumli saxiylik”, Kris Anderson

Kitob “Microsoft” kompaniyasi asoschisi Bill Geyts tomonidan tavsiya qilingan. Asar orqali muallif faqat pul berish haqida emas, saxiylik tushunchasini kengaytirishimiz kerakligini ta’kidlaydi.

Agar siz yanada adolatli dunyoni yaratishga yordam berishni istasangiz, lekin qayerdan boshlashni bilmasangiz, bu kitob siz uchun, deydi mashhur biznesmen.

“Mukammal rahbar”, Isxak Kalderon Adizes

Bu kitob “Thompson school” asoschisi Shahzod Bahodirov tomonidan tavsiya qilingan bo‘lib, asar kompaniya samaradorligi uchun bir-birini to‘ldiruvchi boshqaruv uslublariga ega menejerlarni tanlash tamoyili, ular sifatli qarorlar qabul qilishda hatto ziddiyatlardan foydalanishlari uchun aloqani qanday qurishlari kerak, degan ko‘plab savollarga javob beradi.

Boshqaruv sohasida ta’lim olayotgan, ishlayotgan va o‘z biznesida haqiqiy lider bo‘lish ishtiyoqidagi har bir inson o‘qishi shart bo‘lgan kitoblardan biri deb bilaman, deydi yosh tadbirkor.

“Sistemologiya”, Devid Jenins

Bektosh Hatamov tomonidan tavsiya qilingan bu kitob biznes tizimlarini yaratish, jarayonlarni samarali boshqarish va tashkilot ichidagi muammolarni hal qilish usullari haqida bo‘lib, bu orqali barqarorlikka erishish, vaqt va resurslarni tejash imkoniyatinini o‘rganib olish mumkin.

Jenins yondashuvi, ayniqsa, kichik va o‘rta biznes uchun foydali bo‘lib, ularga oddiy va samarali tizimlarni yaratishni o‘rgatadi. U tartib o‘rnatishga, xaosni kamaytirishga va muhim xodimlarga qaramlikni kamaytirishga yordam beradi, deydi tadbirkor.

“Jamoaning ideal o‘yinchisi”, Patrik Lensioni

EPAM direktori Renat Axtyamovning fikricha bu kitob “EPAM” doirasida e’tiborga tushib ulgurgan. Kitob xodimlarni uchta asosiy mezon va ularning kombinatsiyasi asosida tasniflashning ko‘plab tizimlaridan birini taklif qiladi.

“Och”, “Kamtar”, “Aqlli” kabi jihatlarning muvozanatiga ega bo‘lish juda muhim, chunki ulardan birining mavjud emasligi xodimning karyera cho‘qqisini zabt etishiga va jamoada muvaffaqiyatli muloqotni o‘rnatishiga to‘sqinlik qiladi, deydi EPAM direktori.

“Boburnoma”, Zahiriddin Muhammad Bobur

Kitob O‘zbekiston Milliy kutubxonasi direktori Umida Teshaboyeva tomonidan mutolaaga tavsiya etilgan bo’lib, unda Osiyoning ko‘plab tog‘lari, daryolari, o‘rmon va cho‘llari, iqlimi, aholisi, ijtimoiy, iqtisodiy, siyosiy ahvoli haqidagi maʼlumotlar, Boburning kechinmalari o‘rin olgan.

Asar o‘qib borar ekansiz, tarixga bo‘lgan qiziqishingiz ham oshib boradi. O‘sha davrdagi jonli muhitga tushib qolgandek bo‘lasiz. Asardagi voqealar ketma-ketligi aniq, hayotiy va ta’sirchan yozilgan, deydi Teshaboyeva.

“Bir varaqli marketing reja”, Allan Dib

“Thompson school” asoschisi Shahzod Bahodirov tomonidan tavsiya qilingan kitob tadbirkor va marketolog Allan Dib marketing rejasini qanday qilib oson va tez bitkazishni o‘rgatadi. Bu esa, o‘z o‘rnida, murakkab marketing rejani tuzib, boshlovchidan soha ustasiga aylanishga yordam beradi.

Marketing sohasiga qiziqadigan va biznesida ushbu bo‘limni rivojlantirishga harakat qilayotgan har bir inson uchun tavsiya qilaman, deydi tadbirkor.

“Tor yo‘lak”, Daron Ajemog‘lu va Jeyms Robinson

Iqtisodiyot bo‘yicha Nobel mukofotini qo‘lga kiritgan Daron Ajemog‘lu va Jeyms Robinsonning bu kitobida mamlakatlar qanday rivojlanib, fuqarolarga erkinlik berishlarini, boshqalari esa mustabidlik yoki qonunsizlikka tushib qolishlari tadqiq etilgan.

Bundan tashqari, aynan shu ikki yozuvchi qalamiga mansub “Mamlakatlar tanazzuli sabablari”, “Diktatura va demokratiyaning iqtisodiy manbalari” asarlari ham mutolaachini jamiyatda sodir bo‘layotgan voqealarga chuqurroq nazar tashlashga undaydi.

Yana bir Nobel mukofoti sovrindori Saymon Jonson va Daron Ajemog‘luning “Hokimiyat va taraqqiyot” kitobi ham omma e’tiboriga tushib ulgurgan. Asar texnologiyalar jamiyat tomonidan qayta yo‘naltirilishi zarurligini ko‘rsatadi.

“Yangi dadil so‘zlar”, Salman Xon

Bill Geyts tomonidan tavsiya qilingan bu kitob, sun’iy intellektning ta’limni qanday yaxshilashi haqidagi “yangi dadil so‘zlar»dan iborat.

Hech kim ta’limning kelajagi haqida Salmandan ko‘ra aniqroq tushunchaga ega emas va men “Ajib yangi so‘zlar»ni tavsiya qilishdan boshqa ilojim yo‘q, deydi tadbirkor.

Eng yaxshi biznes kitoblar

“Forbes»ning 2023-yilning eng yaxshi biznes kitoblar ro‘yxatiga kirgan Gloriya Markning “Diqqat oralig‘i” asari inson e’tibori hamda miyani iloji boricha samarali ishlashi, uning imkoniyati buzmasligi uchun nima kerakligi haqida hikoya qiladi.

Navbatdagi kitob Anil Kumar Setning “O‘zingda bo‘l. Yangi ong nazariyasi” asari bo‘lib, unda muallif o‘zining asosiy va qisman shov-shuvli g‘oyasini shakllantiradi: bizning ongimiz aslida boshqariladigan gallyutsinatsiya.

Jozef Xenrikning “Dunyodagi eng g‘alati odamlar” kitobi ham eng yaxshi kitoblar ro‘yxatiga kiritilib, unda muallif tomonidan biz bilgan zamonaviy dunyoni shakllantirgan g‘arb madaniyati vakillarining xususiyatlari keng ko‘lamli o‘rganilib, ochib berilgan.

Eng yaxshi kitoblar ketma-ketligini Dan Uillingemning “Professional kabi o‘rganing” asari davom ettiradi. Bu Kognitiv psixologiya professori Dan Uillingemning o‘quv jarayonida miya faoliyatining o‘ziga xos xususiyatlarini o‘rganuvchi kitobi bo‘lib, u har qanday materialni o‘zlashtirishni osonlashtirish va uni yanada samarali taqdim etish uchun yetarlicha sodda va ishlaydigan vositalarni taklif etadi.

Ro‘yxatning eng so‘ngi kitobi Alvi Rey Smitning “Piksel. Bir nuqta hikoyasi” bo‘lib, asar texnologiya biznesi bilan shug‘ullanuvchi tadbirkorlar va ilm-fan tarixi va inson ongining imkoniyatlariga qiziqqan har bir kishi uchun qiziqarli bo‘ladi.

Kichik biznesga ayrim sug‘urtalash va sertifikatlash xarajatlarining bir qismi qoplab beriladi

Tomonidan

YKJ ADMIN

10:13 | 26-Fevral, 2025

Mazkur tartib joriy yil oxirigacha amal qilib, uning doirasida import qilinadigan asbob-uskunalar xarajatlari uchun 11,25 mln so‘mgacha kompensatsiya olish mumkin.

Hukumatning 24-fevral kuni qabul qilingan qarori bilan kichik biznesga ko‘maklashish markazlari yordamida ishlab chiqilgan loyihalar bo‘yicha xarajatlarni qoplash to‘g‘risidagi vaqtinchalik nizom tasdiqlandi. Unga ko‘ra, import qilinadigan asbob-uskunalarni sug‘urtalash hamda xomashyo va materiallarni sertifikatlash xarajatlarining 50% gacha qismi, biroq BHMning 30 baravari (11,25 mln so‘m) dan oshmagan miqdori qoplab beriladi.

Buning uchun arizalar Biznes portal orqali elektron tarzda qabul qilinadi Unda ariza va buyurtmanoma to‘ldirish hamda belgilangan hujjatlarni ilova qil qilish kerak.

Arizalarni Kichik biznesga ko‘maklashish markazi 5 ish kuni ichida ko‘rib chiqadi. Undan keyin xarajatlarning bir qismini qoplash yoki qoplab berishni rad etish to‘g‘risida xulosa chiqariladi hamda talabgor xabardor qilinadi. Xulosani portal orqali elektron taqdim etiladi.

Qabul qilinigan arizalar yuzasidan markaz xulosalarni ilova qilgan holda, hafta yakuni bo‘yicha keyingi haftaning birinchi ish kunida Kambag‘allikni qisqartirish davlat maqsadli jamg‘armasiga buyurtmanoma yuboradi.

Jamg‘arma taqdim etilgan buyurtmanoma asosida 3 ish kuni davomida xulosada ko‘rsatilgan talabgorning bank hisobvarag‘iga tegishli mablag‘larni o‘tkazib beradi. Mazkur tartib joriy yil yakunigacha amal qiladi.

Ipoteka kreditlari uchun subsidiya olishga arizalar qabuli boshlanmoqda

Tomonidan

YKJ ADMIN

12:38 | 25-Fevral, 2025

Arizalarni 3-martdan boshlab Davlat xizmatlari markazlari yoki Yagona portal orqali bepul jo‘natish mumkin.

Avvalroq prezident farmoni bilan uy-joy va ipoteka bozorini rivojlantirish bo‘yicha qo‘shimcha chora-tadbirlar belgilangani haqida xabar berilgandi.

Hujjat bilan, joriy yilning 3-martidan ipoteka kreditlari uchun subsidiya olishga arizalar qabuli boshlanadi. Bu haqda Iqtisodiyot va moliya vazirligi matbuot xizmati ma’lum qildi. Ipoteka kreditlari bo‘yicha subsidiyalar to‘lashning tasdiqlangan maqsadli ko‘rsatkichlari doirasida arizalarni 3-mart kuni soat 09:00 da boshlab jo‘natish mumkin.

Arizalarni Davlat xizmatlari markazlari yoki Yagona portal (my.gov.uz) orqali topshirish mumkin. Bunda ariza beruvchi xohishi bilan uning daromadlari hisob-kitobiga yaqin qarindoshlarining ham daromadlari kiritilishi mumkin

Shuningdek, arizachi yoki uning turmush o‘rtog‘ining (shu jumladan, kafil sifatida keltirgan yaqin qarindoshlari) o‘rtacha daromadi quyidagicha bo‘lishi kerak:

Qoraqalpog‘iston va viloyatlarda — mehnatga haq to‘lashning eng kam miqdorining 2,7 baravaridan 8 baravarigacha (3,11 mln — 9,24 mln so‘m);
Toshkent shahrida — MHTEKMning 2,7−9,2 baravari (3,11 mln so‘m — 10,62 mln so‘m).

Subsidiya nima beradi?

Subsidiya uy-joy sotib olish uchun ipoteka krediti bo‘yicha boshlang‘ich to‘lov va foizlarning bir qismi budjetdan qoplanishini nazarda tutadi.

Joriy yilgi dastur doirasida 30 ming nafar talabgorga subsidiya ajratish belgilanmoqda. Kreditlar bo‘yicha foiz to‘lovlarining bir qismini qoplash uchun subsidiyalar 2025-yilgi dastur doirasida Markaziy bankning asosiy stavkasidan oshgan qismiga to‘lab beriladi.

Birlamchi uy-joy bozoridagi kvartiralarni sotib olish uchun ajratilgan ipoteka kreditlari bo‘yicha boshlang‘ich to‘lovni qoplashga qat’iy belgilangan 30 mln so‘m ajratiladi.

Ariza qanday jo‘natiladi?

Ipoteka subsidiyasi uchun arizalarni Davlat xizmatlari markazlariga bevosita borgan holda yoki Yagona portal (my.gov.uz) orqali mustaqil ravishda onlayn jo‘natish mumkin.

Onlayn ariza topshirishda portalga kirgach, qidiruv tizimiga “ipoteka krediti” kalit so‘zlarini kiritish zarur. Undan so‘ng kerakli sahifa paydo bo‘ladi hamda “Xizmatdan foydalanish” tugmasini bosish orqali jarayon boshlanadi. Xizmatdan foydalanishda hech qanday hujjat talab etilmaydi va arizachi haqidagi ma’lumotlar portalda avtomatik ravishda shakllanadi.

Birinchi qadamda ariza yuboruvchi tanlanadi. Agar nomzod o‘z nomidan ariza topshirmoqchi bo‘lsa, “arizachining o‘zi” toifasini tanlashi kerak.

OTM bitiruvchilarining ishga joylashishiga ko‘maklashuvchi dastur ishga tushiriladi

Tomonidan

YKJ ADMIN

11:52 | 21-Fevral, 2025

Buning uchun “O‘zmilliybank»ka $100 mln miqdorida moliyaviy resurs beriladi. Mablag‘lar bitiruvchilar tashabbus va g‘oyalarini loyihalashtirishga yo‘naltiriladi.

OTM bitiruvchilarining ishga joylashishiga ko‘maklashuvchi “Kelajakka qadam” dasturi amalga oshiriladi. Bu bo‘yicha davlat rahbari 14-fevral kuni tegishli qarorni imzoladi.

Dastur “O‘zmilliybank” tomonidan amalga oshirilib, buning uchun hududlarda autsorsing asosida “Kelajakka qadam” markazlari tashkil etiladi. Buning uchun bankka Tiklanish va taraqqiyot jamg‘armasidan $80 mln ekvivalentida 10 yilga, jumladan, 3 yillik imtiyozli davri bilan Markaziy bankning asosiy stavkasiga teng foizda mablag‘ ajratiladi.

Shu bilan birga, $20 mln ekvivalenti miqdorida beg‘araz mablag‘ taqdim etiladi. Bu pullar talabalarni kasbga tayyorlash va ularning kasbiy amaliyot o‘tash xarajatlarini moliyalashtirishga yo‘naltiriladi.

Dastur doirasida o‘z biznes g‘oyalarini joriy etish istagidagi bitiruvchilarga g‘oyadan tayyor loyihagacha olib chiqishda hamrohlik qilish, shu jumladan, qulay shartlarda moliyalashtirishga ko‘maklashiladi.

Shu bilan birga, OTM bitiruvchi va quyi bosqich talabalari o‘rtasida sohalar bo‘yicha ochiq tanlovlar o‘tkazish va g‘oliblarni ish bilan ta’minlashga yordam beriladi. Bunda salohiyatli ish beruvchi tashkilotlar, shu jumladan yirik korxonalarning oliy ma’lumotli mutaxassislarga ehtiyojini aniqlash va mutaxassislarga qo‘yiladigan talablarni shakllantirish amaliyoti yo‘lga qo‘yiladi.

Tanlov g‘oliblarini salohiyatli ish beruvchi tashkilotlar buyurtmasiga ko‘ra individual kasbiy ta’lim dasturlari asosida kasbga dastlabki tayyorlash tadbirlari moliyalashtiriladi.

Individual kasbiy ta’lim dasturlarida ishlab chiqarish obyektlarida amaliyot o‘tash va chet eldagi oliy ta’lim tashkilotlarida qisqa muddatli o‘quv kurslarida qatnashish imkoniyati yaratiladi.

Barcha OTMlar dasturda ishtirok etishlari mumkin, buning uchun markazlar bilan hamkorlik kelishuvlarini tuzishlari kerak.

14-fevral kuni Ko‘ksaroy qarorgohida o‘tkazilgan Shavkat Mirziyoyevning yoshlar bilan muloqotida oliygohlarni tugatayotgan 90 ming bitiruvchi mutaxassisligi bo‘yicha ish topishda qiynalayotgani qayd etilgandi.

Kuvayt kompaniyasi O‘zbekiston farmatsevtika sanoatiga $260 mln investitsiya kiritadi

Tomonidan

YKJ ADMIN

10:47 | 20-Fevral, 2025

“Gulf Care” beshta hududda ishlab chiqarishni yo‘lga qo‘yadi hamda diagnostika markazlari va laboratoriyalarni ochadi.

O‘zbekiston Kuvaytning uchta farmatsevtika kompaniyasi bilan muzokaralar o‘tkazdi. Bu haqda Farmatsevtika tarmog‘ini rivojlantirish agentligi direktori Abdulla Azizov “O‘zbekiston 24” telekanaliga bergan intervyusida aytib o‘tdi.

Kuvaytning “Al Imtiaz Investment Group” kompaniyasi mamlakatda shartnovamiy ishlab chiqarishni yo‘lga qo‘yishni rejalashtirmoqda.

Vakillari Toshkentga tashrif buyurgan “Gulf Care General Trading” kompaniyasi bilan to‘rtta yo‘nalish bo‘yicha $260 mlnlik “o‘zaro manfaatli shartnomalar” imzolash bo‘yicha kelishuvga erishildi. “Birinchisi — hududlarda diagnostika markazlarini tashkil etish, ikkinchisi — mamlakatning beshta hududida farmatsevtika mahsulotlari ishlab chiqarishni yo‘lga qo‘yish, uchinchi yo‘nalish — ta’lim sohasi, jumladan, kadrlarni xorijda o‘qitish va ishga joylashtirish va to‘rtinchi yo‘nalish — diagnostika xizmatini yaxshilashga e’tibor qaratgan holda laboratoriyalar yaratish”, — dedi Abdulla Azizov.

Farmatsevtika agentligi direktori, shuningdek, O‘zbekiston bilan hamkorlik qilishga qiziqish bildirgan “Kuwait Saudi Pharmaceutical Industries” kompaniyasi bilan uchrashuv o‘tkazganini ma’lum qildi. Tomonlar shartnomaviy ishlab chiqarishni joriy etish orqali MDH mamlakatlarga eksport qilish imkoniyatlarini ko‘rib chiqdi. Kuvayt kompaniyasi vakillarining “yaqin 2−3 oy ichida” mamlakatga tashrifi kutilmoqda.

“Gulf Care General Trading” rahbari Iyad as-Solih O‘zbekiston sog‘liqni saqlash sohasiga birinchi bosqichda $260 mln sarmoya kiritish rejalari haqida so‘z yuritdi. Mablag‘lar Toshkent, Farg‘ona, Buxoro, Sirdaryo va boshqa hududlarda “yirik loyihalar»ni amalga oshirish imkonini beradi.

1...626364...221 221 ta dan 63 chisi

Brinning pitsa yetkazib berish biznesi

Tarixning boshlanishi: ikki do‘stning qidiruv g‘oyasi

Ilovada yaratilgan logotip

Qidiruv tizimining ishga tushishi

“Google»dagi “Yoshka” kuchugi

“Alphabet»ning tashkil etilishi

Subsidiya nima beradi?

Ariza qanday jo‘natiladi?

Biz ijtimoiy tarmoqlarda