AQSH Green Card (Diversity Visa) dasturiga ariza berishda yangi qoidalar joriy etiladi.

Davlat departamenti tomonidan 11-mart kuni e’lon qilingan yangi qoidaga ko‘ra, DV dasturiga ariza topshirish tartibiga bir qator yangi talablar kiritilishi taklif qilingan.

Endilikdan ariza topshirayotgan shaxs amal qiluvchi, muddati tugamagan pasport ma’lumotlarini kiritishi majbur bo‘ladi. Shuningdek, elektron ariza formasiga pasportning biografik va imzo sahifasining skaneri yuklanishi talab qilinadi.

Qoidalar til jihatdan ham yangilanadi: masalan, “gender” o‘rniga “sex” (jins), “age” o‘rniga “date of birth” (tug‘ilgan sana) ishlatiladi.

O‘zgarishlardan asosiy maqsad — soxtakorlik va firibgarlikka qarshi kurashish hamda ariza beruvchilarning shaxsini yaxshiroq aniqlash orqali DV dasturining ishonchliligini oshirishga qaratilgan.

Qayd etilishicha, bu qoidalar 2026‑yil 10‑apreldan kuchga kiradi va 2027‑yilgi DV dasturiga tatbiq etiladi.

AQSHning Forbes jurnali dunyodagi milliarderlarning 40-yillik reytingini eʼlon qildi.

Bu yil ro‘yxatga 3428 nafar milliarder kirdi — bu o‘tgan yilgi rekorddan 400 nafarga ko‘p, shuningdek 1987-yilda ro‘yxat tuzila boshlaganidan beri eng yuqori ko‘rsatkich hisoblanadi.

Dunyoning eng boy insonlarining umumiy boyligi rekord darajadagi $20,1 trlnni tashkil etdi. Taqqoslash uchun, 2025-yilda bu ko‘rsatkich $16,1 trln edi.

Bundan tashqari, dunyo bo‘yicha rekord darajada — 20 nafar insonning boyligi 12 xonali ($100 mlrddan ortiq) darajaga yetdi.

Tesla, SpaceX asoschisi va X ijtimoiy tarmog‘i egasining boyligi $839 mlrdga baholanmoqda.

Mask fevral oyi boshida SpaceX kompaniyasining o‘z xAI startapi bilan birlashishidan so‘ng boyligi $800 mlrdlik dovondan oshgan ilk insonga aylandi.

Ikkinchi o‘rinni $257 mlrd bilan Google hammuassisi Larri Peyj egalladi, undan keyingi o‘rinda $237 mlrd boylik bilan Google’ning yana bir asoschisi Sergey Brin turibdi.

$224 mlrd boylik bilan Amazon asoschisi Jeff Bezos to‘rtinchi o‘rinni egallagan bo‘lsa, kuchli beshlikni Meta egasi Mark Sukerberg $222 mlrd bilan yakunlab bergan.

10-mart kuni Shavkat Mirziyoyev Qashqadaryo viloyatida amalga oshirilayotgan islohotlar samaradorligi va kelgusidagi ustuvor vazifalar yuzasidan yig‘ilish o‘tkazdi.

Yig‘ilishda turizm salohiyatidan to‘liq foydalanish uchun, har yili 1 mln turistni jalb qilayotgan Miraki shaharchasi tajribasi asosida yangi loyihalarni boshqa hududlarda ham kengaytirish zarurligi qayd etildi. Jumladan:

• Qamashi tumanida “Maydanak” baland tog‘ turizm markazini tashkil etish;
• Shahrisabz tumanida 13 ming sayyohga mo‘ljallangan “G‘elon” xalqaro umummavsumiy kurortini barpo etish;
• Yakkabog‘ tumani Tatar qishlog‘ida turizmni rivojlantirish;
• Hazrati Sulton cho‘qqisi hududida treking yo‘nalishlari va chodirli uylar oromgohini tashkil etish loyihalari rejalashtirilgan.

Umuman olganda, joriy yilda 45 ta mehmonxona va mehmon uylari ochish hamda 1130 ta qo‘shimcha joy yaratish rejalashtirilgan.

“Yangi O‘zbekiston” qiyofasidagi 2 ta tuman va 46 ta mahallada, shuningdek, og‘ir toifadagi 3 ta tuman va 108 ta mahallada ichki yo‘llar, suv taʼminoti, sug‘orish infratuzilmasi hamda elektr tarmoqlarini yaxshilash uchun jami 864 mlrd so‘m yo‘naltirilishi rejalashtirilgan.

Ijtimoiy sohada oilalar va ayollarni qo‘llab-quvvatlash, shuningdek sog‘liqni saqlash tizimini rivojlantirish bo‘yicha choralar belgilandi. Xususan:

• yangi davlat va xususiy bog‘chalar hamda maktablar tashkil etish;
• 120 ming nafar ayolni ish bilan ta’minlash;
• 21 ming nafar ayolni kasb va tadbirkorlik ko‘nikmalariga o‘qitish;
• “Ayollar daftari” dasturi doirasida 102 ming nafar ayolga yordam ko‘rsatish rejalashtirilgan.

Shuningdek, Germaniya bilan hamkorlikda tartibli mehnat migratsiyasini yo‘lga qo‘yish va kasbiy tayyorgarlikni tashkil etish bo‘yicha yangi tashabbuslar taqdim etildi.

Rejaga ko‘ra, 2026-yilda 3000 nafar, 2027-yilda 5000 nafar yoshni Germaniyaga ishga yo‘naltirish, ularni o‘qitish uchun Qarshi shahrida Taʼlim va texnologiyalar markazini ochish rejalashtirilgan.

Yig‘ilish yakunida prezident mas’ullarga belgilangan vazifalar ijrosi ustidan qat’iy nazorat o‘rnatish, yangi ish o‘rinlari yaratish hamda aholi turmush darajasini oshirish bo‘yicha aniq topshiriqlar berdi.

O‘zbekistonda pillachilik sohasini rivojlantirish va aholining daromadini oshirish maqsadida kambag‘al oilalarni qo‘llab-quvvatlashga qaratilgan yangi tartib joriy etiladi. Bu prezidentning “Ipakchilik sohasini yangi tizim asosida rivojlantirish hamda oziqa bazasini mustahkamlashga doir qo‘shimcha chora-tadbirlar to‘g‘risida”gi qarorida belgilangan.

Qarorga ko‘ra, 2026-yil 1-apreldan boshlab Kambag‘allikni qisqartirish davlat maqsadli jamg‘armasi mablag‘lari hisobidan pillachilik kooperativlariga a’zo bo‘lgan kambag‘al oilalarga subsidiya ajratiladi. Bunda bitta oilaning bir nafar a’zosiga bir martalik tarzda 4 million so‘mdan mablag‘ berilishi ko‘zda tutilgan.

Mazkur subsidiya tutzorlar tashkil etiladigan yer maydonlarida pilla kooperativlarini tuzish va aholining pillachilik faoliyatiga kengroq jalb qilinishini qo‘llab-quvvatlashga qaratilgan. Ushbu mexanizm orqali kambag‘al oilalar uchun qo‘shimcha daromad manbalarini yaratish hamda ularning bandligini oshirish maqsad qilingan.

Hujjatda, shuningdek, pillachilik sohasini rivojlantirish uchun qator moliyaviy va tashkiliy choralar ham belgilangan. Jumladan, tutzorlar maydonini kengaytirish, pilla yetishtirish hajmini oshirish, xom ipakni chuqur qayta ishlashni rivojlantirish hamda soha korxonalarining eksport salohiyatini kuchaytirish rejalashtirilgan.

Shavkat Mirziyoyev rahbarligidagi 17-fevral kungi yig‘ilishda kam daromadli, ijtimoiy reyestrga kiritilgan oilalarni pillachilikka jalb etish va ularni qo‘llab-quvvatlashga alohida eʼtibor qaratilishi ma’lum qilingandi. Pillachilikda sanoat usulini kengaytirish muhim vazifa sifatida belgilangan.

Hozirda pillaning asosiy qismi xonadon sharoitida yetishtirilayotgani qayd etilar ekan, maxsus qurtxonalar tashkil etish orqali hajm va sifat barqarorligini taʼminlash mumkinligi taʼkidlangan. Klasterlar tomonidan qurtxonalarni qurish va ishga tushirishni rag‘batlantirish, shu jumladan, qurtxonalarni yer va mol-mulk solig‘idan 2029-yil 1-yanvarga qadar ozod qilish taklif qilingan.

Koʻksaroy qarorgohida Prezident Shavkat Mirziyoyev ishtirokida 8-mart – Xalqaro xotin-qizlar kuni munosabati bilan bayram tadbiri boʻlib oʻtdi.

Davlatimiz rahbari marosimda nutq soʻzlab, barcha muhtarama onaxonlar, qadrli opa-singillarni samimiy tabrikladi.

– Inson hayotini, jamiyat taraqqiyotini xotin-qizlarsiz, ularning ezgu fazilatlarisiz tasavvur etib boʻlmaydi.

Biz sizlarning timsolingizda Uchinchi Renessans bunyodkori boʻlib maydonga chiqayotgan 22 millionlik yosh avlodni onalik mehri bilan tarbiyalab, voyaga yetkazgan buyuk bir kuchni koʻramiz.

Sizlar tadbirkor, olim, muallim, shifokor, muhandis, davlat va jamoat arbobi, bir soʻz bilan xonadonlarimiz farishtasi, oila va jamiyat tayanchi, desak, ayni haqiqatni aytgan boʻlamiz, – dedi Prezidentimiz.

Mamlakatimizda soʻnggi yillarda xotin-qizlarning huquq va manfaatlarini taʼminlash, ularning jamiyat hayotidagi rolini oshirish boʻyicha mutlaqo yangi tizim shakllantirilgani taʼkidlandi. Qabul qilinayotgan qonun va qarorlarda gender tengligi masalalariga alohida eʼtibor qaratilib, xotin-qizlar manfaatlariga taʼsiri baholanmasdan turib, hech bir qonun qabul qilinmasligi belgilangan.

Mazkur siyosat natijasida faol tadbirkor ayollar qatlami shakllanib, bugungi kunda ularning soni 230 ming nafarga yaqinlashdi. Qishloq xoʻjaligida 12 ming nafardan ortiq fermer ayollar mehnat qilmoqda, ilm-fan sohasida esa 6 mingdan ziyod olimalar faoliyat yuritmoqda.

Qizlarimiz xalqaro sport musobaqalarida yurtimiz sharafini munosib himoya qilmoqda. Xususan, oʻtgan yilda ular jahon arenalarida 167 ta oltin, 193 ta kumush va 243 ta bronza medalini qoʻlga kiritdi.

Xotin-qizlarimiz hayotidagi bunday ijobiy oʻzgarishlar xalqaro maydonda ham eʼtirof etilmoqda. Jumladan, Oʻzbekiston Parlamentlararo ittifoqning “Parlamentdagi ayollar” reytingida 92 pogʻona yuqorilab, 36-oʻrinni egalladi. “Gender tenglik va boshqaruv” indeksida mamlakatimiz 103-oʻrindan 52-oʻringa koʻtarildi. Jahon bankining “Ayollar, biznes va qonun” indeksida esa 43 pogʻonaga yaxshilanib, 48-oʻrinni egalladi.

Davlatimiz rahbari turli sohalardagi mehnati, isteʼdodi va aql-zakovati bilan Yangi Oʻzbekistonni barpo etishga munosib hissa qoʻshib kelayotgan ayollarimizga, xalqaro maydonlarda Vatanimizni dunyoga tarannum etayotgan qizlarimizga, ularning ota-onalari, ustoz va murabbiylariga samimiy minnatdorchilik bildirdi.

Xotin-qizlarni ish bilan taʼminlash va ularni tadbirkorlikka jalb etish masalalariga alohida eʼtibor qaratildi. Oʻtgan yili bu maqsadlar uchun 23,5 trillion soʻm kredit ajratilib, buning natijasida 425 mingdan ortiq ayollar tadbirkor boʻldi.

Bu yil ham xotin-qizlarning iqtisodiy faolligini oshirish boʻyicha keng koʻlamli dasturlar amalga oshiriladi. Xususan, 166 ming xotin-qizlar zamonaviy kasb va tadbirkorlikka, yana 100 ming nafari axborot texnologiyalari sohasiga oʻqitiladi.

Shuningdek, “Daromadli ayol” dasturi yoʻlga qoʻyilib, kasanachilik, hunarmandchilik, parrandachilik, asalarichilik va tomorqachilik kabi yoʻnalishlarda 50 ming ayolning bandligi taʼminlanadi. “Hamroh” dasturi doirasida xotin-qizlarning 3 mingta biznes loyihasiga 1 trillion soʻm ajratilishi belgilangan.

Umuman, joriy yilda 1,5 million xotin-qizni daromadli qilish, shundan 400 ming nafarini tadbirkorlikka jalb etish maqsad qilingan. Bu ishlar uchun 25 trillion soʻmdan ziyod resurs yoʻnaltiriladi.

Prezidentimiz mamlakatimizda qizlarning taʼlim olishi uchun yaratilayotgan imkoniyatlarga ham toʻxtalib oʻtdi. Bugun oliygohlarda tahsil olayotgan qizlar soni 904 ming nafardan oshib, jami talabalarning 54 foizini tashkil etmoqda. Stajyor-tadqiqotchilar va doktoranturada tahsil olayotganlarning ham 61 foizini xotin-qizlar tashkil etayotgani alohida taʼkidlandi.

Yangi oʻquv yilidan boshlab ehtiyojmand oilalardagi qizlar uchun davlat granti kvotasi ikki barobarga oshirilib, 4 mingtaga yetkaziladi. Shuningdek, dunyodagi yetakchi oliygohlar bilan qoʻshma taʼlim asosida magistraturada tahsil olayotgan talaba-qizlarning kontrakt toʻlovlari ham davlat tomonidan qoplab beriladi.

Yosh xotin-qizlarning innovatsion gʻoyalarini qoʻllab-quvvatlash maqsadida har yili kamida 10 ta yoʻnalish boʻyicha startap tanlovlari oʻtkazilib, har bir gʻolibga Innovatsiya jamgʻarmasidan 500 million soʻmgacha grant ajratiladi.

Tadbirda ayollar va bolalarga nisbatan tazyiq va zoʻravonlikka qarshi kurashish davlat siyosatining muhim ustuvor yoʻnalishlaridan biri ekani taʼkidlandi.

Yaqinda xotin-qizlar va bolalarni har qanday zoʻravonlikdan himoya qilishga qaratilgan yangi Prezident farmoni imzolandi. Endilikda xotin-qizlar va bolalarga nisbatan har qanday zoʻravonlik, tazyiq holatlariga qarshi qatʼiy tizim asosida kurash olib boriladi.

Shuningdek, jazoni ijro etish muassasalarida jazo oʻtayotgan ayollarni jamiyatga qayta integratsiya qilish maqsadida “Yangi hayot” dasturi amalga oshirilishi belgilandi. Unga koʻra, mahkumalar 3-6 oylik kasbga oʻqitish dasturlari orqali hunar egallaydi, oliy taʼlim muassasalariga kirish va masofaviy taʼlim olish imkoniyatiga ega boʻladi.

– Biz oʻz oldimizga, avvalo, inson baxti, inson qadri uchun xizmat qiladigan ulkan maqsadlar qoʻyganmiz. Chunki inson baxti oiladan boshlanadi, oila esa ayol bilan mustahkam. Hech shubhasiz, bu borada qizlarimizning maʼnaviy tarbiyasi hal qiluvchi oʻrin tutadi, – dedi davlatimiz rahbari.

Dunyodagi vaziyat tahlikali boʻlib borayotgan bir paytda yurtimizdagi tinchlik va osoyishtalik ulugʻ neʼmat ekanini yanada chuqur his etmoqdamiz. Duogoʻy buvijonlar, moʻtabar onaxonlar oilalarda bu neʼmatning qadriga yetish, uni asrab-avaylash va farzandlar, nabiralarga shukronalik tuygʻusini singdirishda namuna boʻlishlariga ishonch bildirildi.

Tadbirda mamlakatimiz taraqqiyotiga munosib hissa qoʻshayotgan bir guruh ayollarga davlatimizning yuksak unvon, orden va medallari, shuningdek, ilm-fan, taʼlim, madaniyat va jamoat ishlarida faol boʻlgan 28 nafar iqtidorli qizga Zulfiya nomidagi davlat mukofoti tantanali tarzda topshirildi.

– Yangi Oʻzbekistonni ayollari hayotdan rozi boʻlib, baxtli-saodatli yashaydigan mamlakatga aylantirish – mening eng katta niyatim. Ishonchim komil, sizdek fidoyi, shijoatli, mehnatkash ayollarimiz, butun xalqimiz bilan birga ezgu maqsadlarimizga, albatta, erishamiz! – dedi davlatimiz rahbari.