Endi xorijiy til va fanlar bo‘yicha milliy va xalqaro sertifikatlar ham davlat oliygohlariga o‘qishni ko‘chirishda hisobga olinadi.

Hukumat qarori bilan O‘zbekistonda xorijiy va nodavlat oliy ta’lim tashkilotlaridan talabalar o‘qishini davlat OTMlariga ko‘chirish bo‘yicha davlat xizmatini ko‘rsatishning ma’muriy reglamenti tasdiqlandi.

Unga ko‘ra, Bilim va malakalarni baholash agentligi sohada vakolatli davlat organi hisoblanadi. Arizalar har yili 15-iyuldan 5-avgustga qadar qabul qilinadi.

Talabalar Yagona interaktiv davlat xizmatlari portali (my.gov.uz), agentlikning elektron platformasi (my.uzbmb.uz) yoki Davlat xizmatlari markazlari orqali ariza topshirishlari mumkin. Buning uchun BHMning yarim baravari miqdorida to‘lov undiriladi.

Arizalar davlat OTMlari tomonidan ko‘rib chiqilib, qabul qilish yoki rad etish bo‘yicha qaror qabul qilinadi. Quyidagilar arizani rad etishga asos bo‘ladi:

• so‘rovnomada nazarda tutilgan hujjatlar yoki ma’lumotlar to‘liq taqdim etilmagani;
• so‘rovnomada noto‘g‘ri yoxud buzib ko‘rsatilgan ma’lumotlar aniqlangani;
• belgilangan miqdordagi to‘lov o‘z vaqtida amalga oshirilmagani.

Hujjatlari qabul qilingan talabgorlar mos ta’lim yo‘nalishlari bo‘yicha maxsus sinovlardan (test yoki kasbiy-ijodiy imtihon) o‘tadi.

Shuningdek, hujjat bilan chet tili va umumta’lim fanlari bo‘yicha milliy yoki xalqaro sertifikatga ega talabgorlar uchun tegishli fanlardan tabaqalashtirilgan yoki maksimal ball berish tartibini joriy etish rejalashtirilgan.

Sertifikatga ega bo‘lganlarga quyidagicha ball beriladi:

• B1 darajadagi sertifikat uchun — tegishli fan bo‘yicha belgilangan maksimal ballning 75%i;
• B2 va undan yuqori darajadagi sertifikat uchun — tegishli fan bo‘yicha maksimal ball.

Mazkur baholash mexanizmi abituriyentlar uchun amal qilayotgan sertifikatlarni baholash tartibi asosida qo‘llaniladi.

Xizmatdan Yagona portal orqali bepul foydalanish mumkin. Ijtimoiy himoyaga muhtoj yosh oilalarga har oy ijara to‘lovining 50%i qoplab beriladi.

Ijtimoiy himoyaga muhtoj yosh oilalar uchun ijara xarajatlarining bir qismini qoplash bo‘yicha onlayn xizmat ishga tushdi.

Endilikda “Ijtimoiy reyestr»ga kiritilgan oilalar ijara pulini qoplash uchun Yagona portal (my.gov.uz) orqali onlayn ariza topshirishlari mumkin.

Mablag‘lar 12 oygacha muddatga ajratilib, har oy ijara to‘lovining 50% gacha qoplanadi.

Toshkent shahri, Nukus shahri va viloyat markazlarida kompensatsiya miqdori BHMning 3 baravarigachani (1,236 mln so‘m), boshqa hududlarda esa 2 baravarigacha (824 ming so‘m) ni tashkil etadi.

Kompensatsiya puli har oy ariza beruvchining ijtimoiy kartasiga o‘tkazib beriladi. Agar uy egasi va ijarachi yaqin qarindosh bo‘lsa, kompensatsiya ajratish avtomatik ravishda rad etiladi.

Ijara xarajatlarini qaytarib oluvchi yosh oilalar bir yil davomida quyidagi ijtimoiy loyihalarda faol ishtirok etishlari lozim:

• volontyorlik loyihalarida qatnashish;
• “Mutolaa” loyihasi doirasida har oy kamida 1 ta kitob o‘qish;
• “Besh tashabbus olimpiadasi” doirasidagi kamida bitta tanlov yoki musobaqada ishtirok etish.

Xizmatdan foydalanish bepul bo‘lib, buning uchun hech qanday hujjat talab etilmaydi. Arizalar 8 ish kuni ichida ko‘rib chiqiladi.

Murojaat ma’muriy reglament talablariga javob bersa, arizachining doimiy yoki vaqtincha ro‘yxatga olingan joyidagi yoshlar yetakchisi orqali “Mahalla yettiligi»ga yuboriladi. Yettilik esa hujjatlarni o‘rganib chiqib, ijtimoiy yordam ajratish yoki arizani rad etish haqida qaror qabul qiladi.

Prezident huzurida yo‘l-transport hodisalarining oldini olish masalalariga ham alohida e’tibor qaratildi va takliflarni maʼqullandi.

Shavkat Mirziyoyev aholi salomatligi va millat genofondini giyohvandlikdan himoya qilish, shuningdek, yo‘l harakati ishtirokchilari xavfsizligini taʼminlashga qaratilgan qonunchilikni takomillashtirish yuzasidan taqdimot bilan tanishdi.

Taqimotda yo‘l-transport hodisalarining oldini olish masalalariga ham alohida e’tibor qaratildi.

Ayrim fuqarolar tomonidan voyaga yetmagan shaxslarga transport vositasini boshqarishga ruxsat berilayotgani, bu esa yo‘llarda o‘lim va jiddiy jarohat olish holatlariga sabab bo‘layotgani qayd etildi.

Shu bois, yangicha yondashuv asosida yo‘l harakati qoidalariga rioya etilishini ta’minlash, og‘ir oqibatli avariyalarning oldini olish, buning uchun javobgarlikni kuchaytirish zarurligi ta’kidlandi.

Bundan tashqari, giyohvandlik vositalari, psixotrop moddalar, ularning analoglari hamda kuchli taʼsir qiluvchi moddalarning qonunga xilof muomalasi uchun javobgarlikni kuchaytirishga qaratilgan qonun mazmun-mohiyati haqida maʼlumot berildi. Ushbu qonun parlament tomonidan qabul qilingan.

Qonun bilan Jinoyat kodeksiga “Aholi salomatligi va genofondiga qarshi jinoyatlar” nomli yangi bob kiritilib, narkolaboratoriya va bangixona tashkil etish, narkotiklar noqonuniy muomalasiga rahnamolik qilish kabi qilmishlar uchun alohida javobgarlik belgilanmoqda. Shuningdek, 10 dan ortiq qilmish bo‘yicha jazolar kuchaytiriladi.

Taqdimotda “Narkotiklar va kuchli taʼsir qiluvchi moddalar to‘g‘risida»gi qonun loyihasi ham ko‘rib chiqildi.

Unda narkojinoyatlarga qarshi kurash, internet orqali tarqatilayotgan sintetik narkotiklarga chek qo‘yish, profilaktika va reabilitatsiya tizimini takomillashtirish, shuningdek, moddalar muomalasi ustidan elektron nazoratni kuchaytirish nazarda tutilgan.

Prezident giyohvandlik va narkojinoyatlarga qarshi kurashishni zamon talablari asosida tashkil etish, yoshlar orasida mazkur illatning tarqalishiga qatʼiy chek qo‘yish, shuningdek, yo‘llarda inson hayoti va xavfsizligini taʼminlash bo‘yicha takliflarni maʼqulladi. Muhokama qilingan masalalar yuzasidan mutasaddilarga tegishli topshiriqlar berdi.

Mart oyi boshida O‘zbekistonda yo‘l kameralari “prava»si yo‘q haydovchilarni avtomatik aniqlashni boshladi. Bunday kameralar shaxsning yuzini aniqlash funksiyasiga ega bo‘lib, qoidabuzarliklarga nisbatan onlayn ravishda chora ko‘riladi.

Sanoat, radiatsiya va yadro xavfsizligi qo‘mitasi nazorat tadbirlarida bodi-kameralardan foydalanishni joriy etishi, xodimlari esa maxsus kiyimda xizmat olib borishi rejalashtirilmoqda.

O‘zbekistonda ayrim tadbirkorlar faoliyatini tekshirishda bodi-kameralardan foydalanilishi mumkin. Vazirlar Mahkamasi huzuridagi Sanoat, radiatsiya va yadro xavfsizligi qo‘mitasi bu bo‘yicha prezident farmoni loyihasini muhokamaga qo‘ydi.

Loyiha prezidentning ayrim hujjatlariga o‘zgartirish va qo‘shimchalar kiritishni nazarda tutib, qo‘mita tomonidan o‘tkaziladigan nazorat tadbirlarining shaffofligini oshirishga qaratilgan.

Xususan, 2027-yil 1-iyuldan boshlab tadbirkorlik subyektlarida olib boriladigan tekshiruvlarda bodi-kameradan foydalanishni joriy etish taklif qilinmoqda. Ushbu tartib 2028-yilga qadar bosqichma-bosqich yo‘lga qo‘yiladi.

Shu bilan birga, Sanoat, radiatsiya va yadro xavfsizligi qo‘mitasi va uning hududiy bo‘linmalari xodimlari xizmat vazifalarini idoraviy formali kiyimda amalga oshiradi.

Farmon loyihasi bo‘yicha muhokamalar 25-iyungacha davom etadi. Fikr-mulohazalarni havola orqali bildirish mumkin.

Barcha oliygohlarda Tadbirkorlik asoslari fani o‘qitiladi, karyera markazlari faoliyati baholanib, eng yaxshi 20 ta oliygohga 500 mln so‘mdan mablag‘ ajratiladi.

8-iyun kuni Shavkat Mirziyoyev mamlakat oliy ta’lim tashkilotlari bitiruvchilarining bandligini ta’minlash yuzasidan taqdimot bilan tanishdi.

2026-yilda respublika oliygohlarini 320 ming nafar talaba bitirishi kutilmoqda. So‘nggi yillarda mehnat bozoriga kirayotgan bitiruvchilar soni ortib bormoqda. Ularning bandligini ta’minlash uchun bo‘sh ish o‘rinlariga yo‘naltirish, tadbirkorlik tashabbuslarini qo‘llab-quvvatlash va oliygohlardagi karyera markazlari imkoniyatlaridan samarali foydalanish muhimligi qayd etildi.

Bitiruvchilarning tadbirkorlik loyihalarini imtiyozli shartlarda moliyalashtirish bo‘yicha Kelajakka qadam dasturi yo‘lga qo‘yilgan. Uning doirasida 2025-yilda 6 mingdan ortiq loyihalar uchun 378 mlrd so‘m mablag‘ ajratilib, 8 ming nafarga yaqin bitiruvchilarning bandligi ta’minlandi.

Taqdimotda 2026-yilda 8 mingdan ziyod loyihalarni moliyalashtirish uchun 500 mlrd so‘m mablag‘ yo‘naltirish, 10 mingga yaqin yoshlarni band qilish rejalashtirilgani ma’lum qilindi. Dasturni unda ishtirok etuvchi tadbirkorlarga qo‘shimcha moliyaviy imkoniyatlar taqdim etish orqali yanada kengaytirish taklif etildi.

Shuningdek, TalabaExpo-2026 kasb ko‘rgazmalarini ish beruvchi tashkilotlari va tadbirkorlarni faol jalb etgan holda respublikaning boshqa hududlarida ham samarali tashkil etish zarurligi ko‘rsatib o‘tildi.

Bitiruvchilar bandligini ta’minlashda vazirlik va idoralar, mahalliy hokimliklar, yirik xo‘jalik birlashmalari mas’uliyatini oshirish muhimligi qayd etildi. Barcha jarayonlar career.edu.uz platformasi orqali monitoring qilinib, bandlikni ta’minlash masalasi mahalliy hokimliklar darajasigacha tushiriladi. Natijada bitiruvchilar bilan ishlashning vertikal tizimi yo‘lga qo‘yiladi.

Shu bilan birga, talabalarni ish bilan band qilishda oliygoh darajasida ishlarni tizimli yo‘lga qo‘yish bo‘yicha yangi mexanizmlar taklif qilindi.

Barcha oliygohlarda karyera markazlari faoliyati to‘liq yo‘lga qo‘yilib, natijadorligiga qarab rag‘batlantirib boriladi. Markazlar faoliyati Bitiruvchi sifati indeksi orqali baholanib, eng yuqori natija ko‘rsatgan 20 ta oliygohning karyera markazlariga 500 mln so‘mdan ajratiladi.

Joriy yilda oliygoh miqyosida 360 ta, fakultetlar miqyosida 750 ta mehnat yarmarkalari hamda har bir yo‘nalish kesimida mingdan ortiq ish beruvchilar bilan uchrashuvlar (vorkshoplar) tashkil etiladi.

Shuningdek, 2026/2027-o‘quv yilidan boshlab talabalarda tadbirkorlik ko‘nikmalarini shakllantirish, ularni biznes yuritish uchun mavjud imkoniyatlar bilan tanishtirish maqsadida barcha oliygohlarda “Tadbirkorlik asoslari” fanini o‘qitish yo‘lga qo‘yiladi.

Shu bilan birga, oliygohlarda talabalarning startap loyihalarini qo‘llab-quvvatlash, tashkil etiladigan spin-off korxonalariga talabalarni jalb etish, kafedralarning tegishli tarmoq korxonalarida filiallarini ochish, bitiruv loyihalari himoyasini ish beruvchi korxonalarda o‘tkazishni kengaytirish chora-tadbirlari belgilandi.

Aniq buyurtma, moslashuvchan dasturlar asosida kadrlar tayyorlashga qaratilgan maqsadli dual ta’lim shaklini ham yo‘lga qo‘yish tashabbusi bildirildi.

Bunda talabgorlarni dasturga qabul qilish, to‘lov-kontrakt miqdorini belgilash ish beruvchi hamda oliygoh o‘rtasida o‘zaro kelishuvga ko‘ra amalga oshirilib, buyurtmachi talaba o‘qishni tamomlaganidan so‘ng uni ish bilan ta’minlashga kafolat beradi.

Taklif qilingan chora-tadbirlar ijrosini sifatli tashkil etishda oliygohlar rahbariyatining mas’uliyatini oshirish, ularning KPI ko‘rsatkichlarida bitiruvchi bandligining ta’minlanganini asosiy mezon sifatida belgilash zarurligi qayd etildi.

Prezident mutasaddilarga bitiruvchilar bilan ishlashni samarali tashkil etish, bildirilgan tashabbuslarni puxta ishlab chiqish, qo‘shimcha ish o‘rinlarini yaratishda barcha imkoniyatlarni safarbar etish yuzasidan topshiriqlar berdi.

Avvalroq OTMlarga hujjatlar qabuli boshlangani haqida xabar berilgandi.

Shuningdek, prezident xorijiy sarmoyadorlarga O‘zbekiston orqali qo‘shni bozorlarga chiqish imkoniyatini taklif etdi.

Shavkat Mirziyoyev Sankt-Peterburg xalqaro iqtisodiy forumidagi nutqida O‘zbekiston va Rossiya o‘rtasidagi hamkorlikni rivojlantirishga qaratilgan qator takliflarni ilgari surgani haqida xabar berilgandi. Xusuan, prezident O‘zbekiston va Rossiyaning qo‘shma raqamli ekotizimini shakllantirishni taklif qildi.

Shuningdek, prezident ta’lim va kadrlar tayyorlash sohasidagi hamkorlik muhimligini ta’kidladi. Uning so‘zlariga ko‘ra, mamlakat oldida yoshlarni zamonaviy bilimlar bilan ta’minlash va ilg‘or ko‘nikmalarni o‘zlashtirishga yordam beradigan shart-sharoitlarni yaratish vazifasi turibdi.

Hozir mamlakatda Rossiya oliy o‘quv yurtlarining 15 ta filiali faoliyat yuritmoqda, Toshkent va Olmaliqda qo‘shma muhandislik maktablari ochildi.

O‘zbekiston ta’lim, kasbiy tayyorgarlik va mehnat bozorini bog‘laydigan inson kapitalini rivojlantirishning qo‘shma onlayn platformasini yaratishni taklif qilmoqda.

Yangi tizim ta’lim, til va IT kurslari, yosh tadbirkorlarga yordam berish va ish beruvchilar bilan aloqalarni birlashtirishi mumkin. Prezident tashabbusning barcha manfaatdor tomonlar uchun afzalliklarini ta’kidladi:

• yoshlar uchun — “yangi iqtisodiyotga tushunarli yo‘nalish”;
• biznes uchun — malakali kadrlar bazasidan foydalanish imkoniyati;
• oliy o‘quv yurtlari va kollejlar uchun — bozor talablari bilan bog‘lanish;
• O‘zbekiston va Rossiya hukumatlari uchun — inson resurslariga uzoq muddatli sarmoya.

Bundan tashqari, O‘zbekiston rahbari Rossiya bilan sheriklikning gumanitar asosi sifatida turizmni ta’kidladi. 2025-yilda mamlakat 1 mlnga yaqin rossiyalik sayyohlarni qabul qildi, bu yil esa “yanada ko‘proq mehmonlarni qabul qilishga tayyor”. Shu bilan birga, 2030-yilga borib kreativ iqtisodiyotning yalpi ichki mahsulotdagi ulushini 5% ga yetkazish bo‘yicha chora-tadbirlar amalga oshirilmoqda.

Prezident san’at va kino festivallari, muzey ko‘rgazmalari, gastronomik va musiqiy tadbirlarni tashkil etgan holda “Samarqanddan Peterburggacha” kreativ turizm yo‘lagi loyihasini ishga tushirish taklifini ilgari surdi.

Shundan so‘ng Mirziyoyev investorlarni yuqori qo‘shilgan qiymatli sanoat zanjirlarini yaratishga chaqirdi. O‘zbekiston kompetensiyalar, ishlab chiqarish va ishlanmalarni chuqur mahalliylashtirish, injiniring va yangi eksport yo‘nalishlarini rivojlantirishni ustuvor vazifa deb biladi.

Energetika, aviatsiya, ta’lim, geologiya va boshqa sohalarda davlat-xususiy sheriklik loyihalarida hamkorlik salohiyati qayd etildi. Shuningdek, davlat rahbari “yangi iqtisodiyot shakllanayotgan” tarmoqlar — sanoat qayta ishlash, agrotexnologiyalar, biokimyo, robototexnika, raqamli yechimlar va sun’iy intellektni alohida ta’kidladi.

“Manfaatdor hamkorlarga nafaqat o‘sib borayotgan ichki bozor, balki qo‘shni mamlakatlar va mintaqalarga to‘g‘ridan-to‘g‘ri chiqish imkoniyatlaridan faolroq foydalanishni taklif qilamiz”, — deya qo‘shimcha qildi prezident.

Davlat rahbari barqaror moliyaviy va investitsiyaviy platforma sifatida e’tirof etilayotgan Toshkent xalqaro moliya markazini tashkil etish borasidagi ishlarni alohida ta’kidladi. Tadbir ishtirokchilarini Toshkent xalqaro investitsiya forumiga taklif etdi.