2027-yilda jarimalar to‘g‘risidagi qarorlar reyestri ishga tushirilishi, shuningdek, soliq to‘lovchining shaxsiy kabinetida ular ustidan shikoyat qilish imkoniyati yaratiladi.

Shavkat Mirziyoyev 15-aprel kuni moliyaviy jarimalarni qo‘llash tartibini yanada liberallashtirish va sud nazorati samaradorligini oshirish bo‘yicha qo‘shimcha choralar to‘g‘risidagi qarorni imzoladi. Bu haqda Adliya vazirligining Huquqiy axborot kanali xabar berdi.

Hujjatda ikki kun avval davlat rahbari huzurida o‘tkazilgan taqdimotda belgilangan chora-tadbirlar mustahkamlangan. Ular moliyaviy sanksiyalarning biznesga ta’sirini yumshatish, shuningdek, ushbu sohada sud nazorati samaradorligini oshirish maqsadini ko‘zlaydi.

Unga ko‘ra, 2026-yil 1-oktabrdan vakolatli organlarning moliyaviy jarimani qo‘llash to‘g‘risidagi qarori tadbirkorning tanloviga ko‘ra quyidagi shakllardan birida ixtiyoriy ijro etilishi mumkin.

Shuningdek, vakolatli organning moliyaviy jarimani qo‘llash to‘g‘risidagi qarori topshirilgan kundan boshlab 1 oy muddatda jarima miqdorining 50%ini ixtiyoriy ravishda to‘lash sharti bilan jarimaning qolgan qismini to‘lashdan ozod etiladi.

Qaror bilan qo‘llangan moliyaviy jarima summasini 6 oy davomida teng miqdorlarda bo‘lib-bo‘lib to‘lash imkoni beriladi.

Belgilangan muddatda qaytarilmagan summaga nisbatan qaytarish muddati buzilgan har bir kalendar kun uchun Markaziy bank asosiy stavkasining 300 dan biriga teng miqdorida foiz to‘lanadi.

2027-yil 1-yanvardan Tadbirkorlik subyektlarining huquqlari va qonuniy manfaatlarini himoya qilish bo‘yicha vakil tomonidan yuritiladigan “Yagona davlat nazorati” axborot tizimida tadbirkorlarga nisbatan qo‘llangan moliyaviy jarimalarning elektron reyestri joriy etiladi.

Bunda vakolatli organlarning moliyaviy jarimalarni qo‘llash to‘g‘risidagi qarorlari ular qabul qilinganidan so‘ng 3 ish kunida majburiy tartibda ushbu elektron reyestrga elektron raqamli imzo bilan tasdiqlanishi kerak.

Mazkur jarayon to‘liq raqamlashtirilgan hollarda esa bunday qarorlar o‘zaro integratsiyalashgan axborot tizimlari orqali avtomatik ravishda kiritiladi.

Elektron reyestrga kiritilmagan va elektron raqamli imzo bilan tasdiqlanmagan qarorlar haqiqiy emas deb hisoblanadi va ular asosida moliyaviy jarima undirilmaydi.

Shuningdek, elektron reyestrda tadbirkor tomonidan sodir etilgan qilmishning takroriyligiga oid ma’lumotlar bazasi yuritiladi va xavfni boshqarish tizimi yordamida tahlil qilib boriladi.

2027-yil 1-aprelga qadar soliq to‘lovchi — tadbirkorning shaxsiy kabineti orqali vakolatli organlarning moliyaviy jarimani qo‘llash to‘g‘risidagi qarorlari ustidan sudga onlayn shikoyat berish imkoniyati yaratiladi.

Bunda ish yurituvga qabul qilingan shikoyatlar bo‘yicha qarorlarning ijrosini to‘xtatib turish haqida sud tomonidan manfaatdor vazirlik va idoralar avtomatik ravishda xabardor qilinadi.

Prezident Shavkat Mirziyoyev Xalqaro shaxmat federatsiyasining Nomzodlar turniri g‘olibi Javohir Sindorov bilan telefon orqali muloqot qildi.

Davlatimiz rahbari yosh grossmeysterimizni O‘zbekiston shaxmat tarixida birinchi marta mazkur nufuzli musobaqada zafar qozonib, tom ma’nodagi tarixiy g‘alabaga erishgani bilan samimiy tabrikladi.

Suhbatda Javohir Sindorov ushbu turnirda ilgari hech kim yeta olmagan yuksak marrani zabt etgani, 13 ta o‘yinda 6 marotaba g‘alaba qozongani sport olamida kamdan kam uchraydigan noyob hodisa ekani alohida ta’kidlandi.

Davlatimiz rahbari yosh grossmeyster dunyoning eng dongdor shaxmatchilariga qarshi har bir bahsda katta jasorat va mahorat bilan dona surib, kuchli iroda, yuksak intellektual salohiyat va qat’iyat fazilatlarini namoyon etganini qayd etdi.

Prezidentimiz endi Javohir Sindorov oldida jahon toji uchun hal qiluvchi va sharafli bellashuv turganini qayd etib, bo‘lajak o‘yinlarda unga yanada ulkan omad, kuch-g‘ayrat va yangi zafarlar tiladi.

Suhbatda joriy yil Samarqand shahrida o‘tadigan 46-Butunjahon shaxmat olimpiadasida Javohir Sindorovning ishtiroki, shubhasiz, jamoamizga katta ruh va ishonch bag‘ishlashi qayd etildi.

Fursatdan foydalanib, davlatimiz rahbari Javohir Sindorovning ota-onasi, yaqinlari, ustoz va murabbiylarini ham ushbu tarixiy g‘alaba bilan chin yurakdan tabrikladi.

Javohir Sindorov yuksak e’tibor, samimiy qutlov va bildirilgan ishonch uchun Prezidentimizga chuqur minnatdorlik bildirdi.

Shavkat Mirziyoyev tadbirkorlarga jarimalarni bir oy muddatda to‘lagan taqdirda 50% lik chegirma berish taklifini ma’qulladi.

Avvalroq Spot Shavkat Mirziyoyev 13-aprel kuni tadbirkorlik subyektlariga nisbatan moliyaviy jarimalarni qo‘llash tartibini yanada liberallashtirish, bu borada ortiqcha byurokratik to‘siqlarni qisqartirish hamda davlat organlari va mansabdor shaxslar faoliyati ustidan sud nazorati samaradorligini oshirishga qaratilgan takliflar taqdimoti bilan tanishgani haqida yozgandi.

Prezident huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil Abdumannop Bo‘riyev O‘zbekiston 24 telekanaliga bergan intervyusida prezident tadbirkorlar bilan ochiq muloqotda biznesga nisbatan ta’sir choralarining nomutanosibligi bo‘yicha topshiriqlar berganini aytdi.

Shundan so‘ng, Biznes-ombudsman tomonidan hududlarda tadbirkorlar, shuningdek, tekshiruv o‘tkazilgan subyektlar bilan uchrashuvlar o‘tkazilib, tegishli takliflar tayyorlandi.

“So‘nggi vaqtlarda faoliyat yuritmayotgan tadbirkorlik subyektlari bo‘yicha o‘tkazilgan tahlilimiz shuni ko‘rsatdiki, ularning qariyb 3 mingtasi tekshiruv yakunlari bo‘yicha moliyaviy jarima qo‘llanilgandan so‘ng faoliyatini to‘xtata boshlagan”, — dedi u.

Abdumannop Bo‘riyev ishlab chiqilgan takliflarning joriy etilishi biznesga ortiqcha bosimning oldini olib, ularga erkin tadbirkorlik faoliyatini yuritish imkonini berishiga ishonch bildirdi.

“Bugungi kunda har bir tekshiruv biznes-ombudsman tomonidan nazorat qilinmoqda. Xususan, kim va qachon tekshiruv o‘tkazganligi, to‘g‘ri bajarilganligi tahlil qilinadi. Biroq, afsuski, soha raqamlashtirilmagani sababli qo‘llanilayotgan moliyaviy jarimalarning asosli yoki asossizligi haqida bizda ma’lumot yo‘q edi. Prezident bu muammoni hal qildi, shuningdek, biznes-ombudsmanga moliyaviy jarimalarni „Yagona davlat nazorati“ axborot tizimi orqali tahlil qilish va ular qo‘llanilgan paytdan boshlab himoya qilishga kirishish bo‘yicha topshiriq berdi,” — dedi Bo‘riyev.

Bundan tashqari, sudlar tomonidan asossiz moliyaviy jarimalar bekor qilinganda, biznes turli sabablarga ko‘ra jarayonni cho‘zayotgan nazorat organlaridan mablag‘larni qaytarishda muammolarga duch kelmoqda.

Prezident qarori loyihasi undirilgan mablag‘larni 15 kun ichida qaytarish mexanizmini o‘z ichiga oladi. Agar ushbu muddat buzilsa, biznes har bir kechiktirilgan kun uchun kompensatsiya olishi mumkin.

Kiprda bo‘lib o‘tayotgan nufuzli “Nomzodlar turniri”da hamyurtimiz, iqtidorli yosh grossmeyster Javohir Sindarov muddatidan avval g‘oliblikni qo‘lga kiritib, barchamizni xushnud etdi.

Hal qiluvchi uchrashuvda u eng yaqin ta’qibchisi bo‘lgan Anish Giri bilan durang o‘ynadi va shaxmat bo‘yicha jahon toji uchun kuch sinashish imkoniyatiga ega bo‘ldi.

Endi yosh va umidli shaxmatchimiz joriy yilning oxirida amaldagi jahon chempioni, hindistonlik Gukeshga qarshi dona suradi.

Javohir Sindarovni ushbu yuksak natija bilan chin dildan muborakbod etamiz va Jahon toji yo‘lidagi hal qiluvchi bahslarda ham ulkan zafarlar tilaymiz!