2026-yildan maktab o‘quvchilari uchun milliy kitobxonlik harakati o‘tkaziladi. Tanlovning asosiy bosqichlari viloyat va respublika darajasida tashkil etiladi.
Har yili milliy kitobxonlik harakati o‘tkazilib, g‘oliblarga pul mukofoti beriladi. Bu bo‘yicha prezidentning tegishli farmoyishi qabul qilindi.
Unga ko‘ra, 2026-yildan har yili umumtaʼlim maktablarida o‘qiyotgan yoshlarning kitob o‘qishga qiziqishini qo‘llab-quvvatlashga qaratilgan milliy kitobxonlik harakati o‘tkaziladi.
Dastur har yili 3 bosqichda amalga oshiriladi.
1-bosqich kitobxonlikharakati.uz elektron platformasida ro‘yxatdan o‘tgan holda onlayn, 2- va 3-bosqichlar esa bevosita ishtirok etish formatida viloyat va respublika darajasida o‘tkaziladi.
Dasturda ishtirokchilar 3 ta yosh toifasida ishtirok etib, belgilangan tartibda saralanadi.
Har bir toifada 1-o‘rin sohiblariga $50 ming, 2-o‘rin sohiblariga $30 ming, 3-o‘rin sohiblariga esa $15 ming va diplom topshiriladi.
Shuningdek, 5 ta qo‘shimcha nominatsiya g‘oliblarining har biri $10 mingdan pul mukofoti oladi.
Barcha g‘olib va sovrindorlarga maxsus sertifikat va diplomlar ham beriladi.
Aprel oyida qabul qilingan prezident farmoni bilan oyiga 10 mingdan ortiq kitob sotgan tadbirkorlarga 1 mlrd so‘mgacha imtiyozli qarz berilishi belgilangandi. Joriy yildan boshlab DXSH asosida umummilliy yoshlar festivali o‘tkazib boriladi.
