Toshkentda Islom sivilizatsiyasi markazi ochildi

Tomonidan

13:25 | 18-Mart, 2026

Shavkat Mirziyoyev 17-mart kuni jamoatchilik vakillari bilan birgalikda O‘zbekistondagi Islom sivilizatsiyasi markaziga tashrif buyurdi. Bu haqda prezident matbuot xizmati xabar berdi.

Markaz Toshkentning Hazrati Imom majmuasi hududidagi 10 gektar maydonda barpo etilgan. Bino uch qavatdan iborat bo‘lib, uzunligi 161 metr, eni 118 metrni tashkil etadi. Majmua 1,8 gektar maydonda qad rostlagan, gumbazining balandligi 65 metr, umumiy foydalanish hududi esa 42 ming kvadrat metrdan ziyod.

Markazga to‘rt tomondan — to‘rt asosiy portal orqali kirish mumkin. Ushbu portallar va binoning tashqi ravoqlari ilm-maʼrifat, bag‘rikenglik, insoniylik va ota-onaga hurmat mazmunidagi Qurʼon oyatlari hamda hadislar bilan bezatilgan.

Quyi qavatda bolalar uchun maxsus platforma, restavratsiya hamda elektron nusxa olish laboratoriyasi, muzey eksponatlari va nodir qo‘lyozmalarni saqlash fondlari, zamonaviy kafeteriy va muzey vestibyullari joylashgan.

Birinchi qavatdan qariyb 8350 kvadrat metrlik ko‘rgazma zaliga ega muzey va 550 o‘rinli anjumanlar zali o‘rin olgan. Ikkinchi qavatda esa qo‘lyozma va toshbosma manbalar, bosma va elektron adabiyotlar fondiga ega kutubxona, o‘quv zallari, shuningdek, xalqaro tashkilotlar va ilmiy muassasalar uchun sharoit yaratilgan.

Tashrif chog‘ida davlat rahbari dastlab Qurʼoni karim zaliga kirib, mazkur maskanda yaratilgan maʼnaviy muhit va noyob ekspozitsiyalarni ko‘zdan kechirdi. Bu yerda Usmon Musʼhafi bilan bir qatorda mamlakatga tegishli bo‘lgan, turli sulolalar davrida yaratilgan 114 ta nodir Qurʼon qo‘lyozmasi jamlangan.

Prezidentga ekspozitsiyadan o‘rin olgan ayrim alohida qimmatli qo‘lyozmalar haqida ham maʼlumot berildi. Shuningdek, muzeyga tashrif buyuruvchi mehmonlarga yuqori sifatli xizmat ko‘rsatishni tashkil etish ishlari taqdimot qilindi.

Taqdimotda “Har kim uchun ochiq muzey” konsepsiyasi asosida markazni ijtimoiy integratsiya maydoniga aylantirish masalasiga ham alohida eʼtibor qaratildi. Kelgusida barcha eksponatlarga maxsus elektron chiplar o‘rnatish, ko‘zi ojiz insonlar eksponatga yaqinlashganda audiogid orqali maʼlumotni avtomatik eshitish tizimini joriy etish, Bluetooth mayoqchalari yordamida bino ichida mustaqil harakatlanish imkoniyatini yaratish rejalashtirilgan.

Dastlabki hisob-kitoblarga ko‘ra, markazga bir kunda o‘rtacha 5 ming nafarga yaqin tashrif buyuruvchi kelishi kutilmoqda.

Shundan keyin davlat rahbari markaz binosining ikkinchi qavatida O‘zbekiston musulmonlari idorasi faoliyati uchun yaratilgan sharoitlar va markaz kutubxonasini ko‘zdan kechirdi.

Kutubxonaning umumiy maydoni 3105 kvadrat metrni tashkil etadi. Hozirgi vaqtda uning fondi 45 150 tadan ziyod adabiyotni qamrab olgan bo‘lib, shundan 2609 tasi nodir nashrlardan iborat. Bundan tashqari, kutubxonada 350 mingta elektron adabiyot mavjud.

Kutubxonada imkoniyati cheklangan foydalanuvchilar uchun ham alohida sharoit yaratilgani haqida axborot berildi. Xususan, ko‘rish qobiliyati cheklangan yoki zaif ko‘ruvchi insonlar uchun maxsus xonalar, ixtisoslashgan dasturlar, printer va qurilmalar o‘rnatilgan, ular uchun Brayl yozuvidagi 1000 dan ortiq adabiyot keltirilgan.

Shundan keyin prezident markaz huzurida tashkil etilgan xalqaro ilmiy-maʼrifiy platforma faoliyati bilan tanishdi.

Tashrif davomida davlat rahbari markazga hadya etilgan va xorijdan xarid qilingan qimmatbaho tarixiy artefaktlar ko‘rgazmasi bilan ham tanishdi.

“Bugun o‘zligimizni anglash yo‘lida katta tantana bo‘ldi. Ming shukrki, to‘qqiz yil davomida niyat qilib, izlanib, harakat qilib, xalqimizning kimligini, tariximizni haqqoniy aks ettiradigan majmuani barpo etdik. Bu yerga kelgan har bir inson, ayniqsa yoshlarimiz, qanday ajdodlar avlodi ekanimizni bilishi, anglashi kerak.

Bu ulkan loyiha oddiy bir chizma emas. Uni yurak chizgan, mehr chizgan, orzu va armonlar chizgan. Qur‘oni karim saqlanadigan muqaddas zal ham shunchaki yaratilgan emas. U yurakdan tug‘ilgan, xalqimizning orzu-intilishlari va buyukligini namoyon etish istagidan paydo bo‘lgan maskandir. Bu loyiha buyuk xalqimizning asl qiyofasini ro‘yobga chiqarishga qaratilgan ezgu niyatlar mahsulidir», — dedi prezident.

Tashrif yakunida davlat rahbari Islom sivilizatsiyasi markazining Faxriy mehmonlar kitobiga dastxat qoldirdi.

52 km masofa 35 daqiqada va tirbandliklardan holi: Toshkent-Chorvoq pulli yo‘li 3 yilda quriladi

Tomonidan

admin

10:21 | 17-Mart, 2026

Toshkent-Chorvoq pulli avtomobil yo‘lining qurilishi yo‘lga ketadigan vaqtni ikki barobarga qisqartirish imkonini beradi. Bu haqda Transport vazirligi huzuridagi Avtomobil yo‘llari qo‘mitasining Avtoyo‘linvest agentligi direktori Asliddin Isayev O‘zbekiston24 telekanaliga bergan intervyusida ma‘lum qildi.

Avtomobil magistralining umumiy uzunligi 52 kmni tashkil etadi. Loyihani 3 yilda foydalanishga topshirish rejalashtirilmoqda. Agar loyiha joriy yilda boshlansa, uning yakunlanishi 2029-yildan oldin kutilmayapti.

“Qatarning Protocol Group va Koreyaning Korea Expressway Corporation kompaniyalari bilan dastlabki kelishuvlarga erishildi. Bugungi kunda kompaniyalar loyihalashtirish ishlarini amalga oshirish uchun xalqaro konsalting firmalarini jalb qilgan”, — dedi u.

Ayni paytda Toshkentdan Chorvoqqacha bo‘lgan o‘rtacha qatnov vaqti 80 daqiqani tashkil etadi. Pulli yo‘l qurilishi natijasida bu vaqt ikki barobardan ko‘proqqa — 35 daqiqagacha qisqarishi kutilmoqda.

Asliddin Isayevning ta‘kidlashicha, loyiha Bo‘stonliq tumaniga sayyohlar oqimini to‘liq qamrab olish va tirbandliklarni bartaraf etish imkonini beradi.

2025-yil avgust oyida transport vaziri Ilhom Mahkamov prezident Toshkent-Chorvoq yangi avtotrassasini davlat-xususiy sheriklik shartlari asosida qurish to‘g‘risida qaror qabul qilganini ma‘lum qilgandi. Loyihani amalga oshirish uchun yetakchi kompaniyalar jalb etiladi.

O‘sha yilning noyabrida transport vaziri o‘rinbosari Jasurbek Choriyev pulli yo‘l qurilishi kelasi yilning oxirida boshlanishi rejalashtirilganini aytgandi. Trassadagi maksimal tezlik 150 km/soat, yillik transport oqimi esa 250 ming avtomobil darajasida bo‘lishi prognoz qilinmoqda.

5-mart kuni Shavkat Mirziyoyev yirik loyihalar doirasida transport infratuzilmasini modernizatsiya qilish borasidagi ishlar jarayoni taqdimoti bilan tanishdi. Prezidentga moliyalashtirishning ishlab chiqilayotgan manbalari va xorijiy investorlarni jalb etish bo‘yicha muzokaralarning borishi haqida axborot berildi.

Avtomobil yo‘llari qo‘mitasi raisi Jamshid Tursunovning ma‘lum qilishicha, 2026-yilda DXSH asosida Toshkent-Samarqand, Toshkent-Andijon, Toshkent-Chorvoq va Urganch-Xiva yo‘nalishlarida to‘rtta pullik avtomagistral qurilishi rejalashtirilgan.

Uning so‘zlariga ko‘ra, Toshkent-Chorvoq pullik yo‘li bo‘yicha texnik-iqtisodiy asosnoma tasdiqlangan. Loyihani amalga oshirish joriy yildanoq boshlanadi.

“Urganch-Xiva trassasidagi ishlar allaqachon boshlangan — uni respublikadagi birinchi pulli yo‘l sifatida joriy yilning o‘zida foydalanishga topshirish rejalashtirilmoqda. Qolgan uchta pulli avtomobil yo‘li bo‘yicha ham qurilish ishlari [2026-yilda] boshlanadi”, — degan Avtomobil yo‘llari qo‘mitasi rahbari.

O‘zbekistonda sunʼiy intellektdan foydalanish bo‘yicha etika qoidalari tasdiqlandi

Tomonidan

admin

12:32 | 16-Mart, 2026

Sunʼiy intellektni yaratish, joriy qilish va foydalanish bo‘yicha etika qoidalari tasdiqlandi. Bu bo‘yicha tegishli hujjat (3787-son) Adliya vazirligi tomonidan davlat ro‘yxatidan o‘tkazildi.

Ushbu qoidalar sunʼiy intellektga asoslangan yechimlarni yaratish, joriy qilish va foydalanish bo‘yicha tamoyillar va talablarni, shuningdek sunʼiy intellekt ishtirokchilarining huquq va majburiyatlarini belgilaydi.

Sunʼiy intellekt ishtirokchilari texnologiya va tizimlardan foydalanishda bir qator tamoyillarga rioya qilishlari lozim. Jumladan, qonuniylik, tushunarlilik, ochiqlik va shaffoflik taʼminlanishi kerak.

Shuningdek, adolatlilik va kamsitishga yo‘l qo‘ymaslik, maʼlumotlar himoyasi hamda ishonchlilik va xavfsizlikka amal qilinishi talab etiladi. Bunda shaxs, jamiyat va davlat manfaatlarini hamda atrof-tabiiy muhitni himoya qilish ustuvor hisoblanadi.

Mazkur tamoyilga ko‘ra, sunʼiy intellekt texnologiya va tizimlaridan foydalanishda inson huquq va erkinliklari, qonuniy manfaatlari hamda shaxsiy hayot daxlsizligi taʼminlanishi lozim.

Fuqarolarning hayoti, sog‘lig‘i, shaʼni va qadr-qimmati himoya qilinishi kerak. Bunday texnologiyalar davlat va jamoat xavfsizligiga salbiy taʼsir ko‘rsatmasligi, shuningdek ijtimoiy-iqtisodiy va ekologik barqarorlikka zarar yetkazmasligi lozim.

SI texnologiya va tizimlari tomonidan qabul qilingan qarorlar yoki amalga oshirilgan harakatlar ishtirokchilar uchun tushunarli bo‘lishi kerak. Bunda ishlash mantig‘i, asosiy algoritmik mezonlar, qaror qabul qilish jarayonlari va maʼlumot manbalari ochiq va izohlanadigan bo‘lishi lozim.

Foydalanuvchilar sunʼiy intellektdan foydalanish qoidalari, undan qanday maqsadlarda foydalanish mumkin yoki taqiqlanishi haqida xabardor qilinishi kerak. Ularga sunʼiy intellektga asoslangan yechimlar yoki qarorlar har doim ham to‘g‘ri bo‘lmasligi va natijalaridan tavsiyaviy yoki maʼlumot sifatida foydalanish mumkinligi tushuntiriladi.

Hujjat bilan ayrim qarorlarni qabul qilishda faqat sunʼiy intellekt texnologiyalari asosida ishlaydigan axborot tizimlari xulosalariga tayanish mumkin emasligi belgilanmoqda. Xususan, inson huquq va erkinliklariga aloqador yuridik ahamiyatga ega qarorlar bunda mustasno emas.

Bundan tashqari, sog‘liqni saqlash sohasida, jumladan kasalliklarni tashxislash va davolash usullarini belgilash kabi qarorlarda ham faqat sunʼiy intellekt xulosalariga tayanishga yo‘l qo‘yilmaydi.

Sunʼiy intellekt texnologiya va tizimlarini ishlab chiquvchi hamda joriy etuvchilar algoritmlarning shaffof va tushunarli bo‘lishini taʼminlashi kerak. Algoritmlarda ehtimoliy tarafkashlikning oldini olishi talab etiladi.

Shaxsga doir maʼlumotlar hamda foydalanilishi cheklangan maʼlumotlar himoyasi taʼminlanishi lozim. Ishlab chiquvchilar sunʼiy intellekt texnologiya va tizimlarining imkoniyatlari, cheklovlari va ehtimoliy xavflari haqida ochiq maʼlumot berishi kerak.

Foydalanuvchilarni ulardan foydalanish qoidalari bilan tanishtirish, qanday maqsadlarda foydalanish mumkin yoki taqiqlanishi haqida xabardor qilish lozim. SI texnologiya va tizimlari dasturiy taʼminotining xavfsizligi taʼminlanishi kerak.

SI texnologiya va tizimlari inson nazorati ostida bo‘lishi, ular inson tomonidan qayta ko‘rib chiqilishi va yakuniy qaror inson tomonidan qabul qilinishi taʼminlanishi lozim.

Bundan tashqari, SI texnologiya va tizimlaridan qonunchilikka zid yoki shaxs, jamiyat, davlat hamda atrof-tabiiy muhitga zarar yetkazishi mumkin bo‘lgan maqsadlarda foydalanmaslik talab etiladi. Shuningdek, foydalanuvchilar uchun sunʼiy intellekt texnologiya va tizimlaridan foydalanish bo‘yicha qo‘llanma ishlab chiqilib joylashtirilishi kerak.

TimeCup asoschisi Andrey Fedorov: «Qahva toshib ketishidan charchab, texnologik qahva qaynatkich yaratdim»

Tomonidan

admin

11:32 | 13-Mart, 2026

— Menda bir hobbi bor — hayot uchun foydali narsalar ixtiro qilishni yaxshi ko‘raman. Bir kuni qahva idishidan (turkadan) toshib ketgan qahva izlarini plitadan artishdan charchab, noodatiy qahva qaynatkich loyihasini ishlab chiqdim. Bu qurilma qahvani xuddi oddiy mis idishlardek tayyorlaydi, lekin qahva qaynab toshib ketishidan oldin avtomatik ravishda o‘zi o‘chadi.

TimeCup qahva qaynatkichlarining birinchi namunasidan tortib, ishlab chiqarishga tushirishgacha roppa-rosa bir yil vaqt ketdi. Hamma butlovchi qismlarni yetkazib beruvchilardan sotib olamiz, xodimlarimiz esa ularni birlashtiradi, yopishtiradi, tekshiradi va qadoqlaydi.

Qahva qaynatkichlar bozorida raqobat juda kuchli, shuning uchun bizga «mukammal» qurilma kerak edi. TimeCup’ning ichki stakani keramikadan qilingan, shuning uchun qahvadan plastik hidi kelmaydi. Maxsus isitgichlar esa qahvani qaynatib yubormasdan pishiradi. Bundan tashqari, uning xotirasiga 7 xil retseptni saqlab qo‘yish mumkin. Barcha sozlamalar Bluetooth orqali telefondagi ilovadan boshqariladi. Dunyoda turkcha qahva pishiradigan bunday funksional qurilma hali yo‘q. Aynan mana shu o‘ziga xoslik mahsulotimizga bo‘lgan talabni doimiy qilib turibdi.

Biz boshidanoq bir nasrani tushungandik: bizning ishimiz — ishlab chiqarish, qolgan hamma narsani (saqlash, qadoqlash va yetkazib berish) marketpleysga (masalan, Yandex Market) topshirgan ma’qul. Shuning uchun Yandex Marketda savdo qilishni boshladik. U yerga ulanish juda oson ekan, bor-yo‘g‘i bir hafta vaqt ketdi. Har bir qadam ko‘rsatmalarda aniq yozilgan.

Biz darhol FBY modelini (marketpleys omboridan sotish) tanladik. Agar mahsulotingiz tez sotiladigan bo‘lsa, bu model juda qulay. Marketpleys buyurtmalarni qabul qilishdan tortib, mijozga yetkazib berishgacha bo‘lgan barcha ishlarni o‘z bo‘yniga oladi. Sizga esa faqat vaqti-vaqti bilan omborga mahsulot yetkazib turish qoladi. Agar mahsulot 45 kun ichida sotilsa, omborda saqlangani uchun haq to‘lanmaydi.

Agar siz endi ish boshlayotgan bo‘lsangiz va talabni tekshirib ko‘rmoqchi bo‘lsangiz, FBS modelini tanlashni maslahat beraman. Bunda mahsulot sizning o‘z omboringizda turadi, marketpleys esa faqat yetkazib berish bilan shug‘ullanadi.

Narxlar va reklamani o‘zimiz boshqaramiz. Bu o‘z onlayn-do‘koningizni yuritishdan ko‘ra ancha arzon va oson. Chunki mijoz qidirish, yetkazib berish kabi tashvishlar marketpleysning zimmasida bo‘ladi.

Marketpleysdagi mijozlar fikridan (otzivlar) bildikki, xaridorlarimizning 60 foizi — 50 yoshdan oshgan insonlar. Ular yoshligidan turkcha qahva ichishga odatlanishgan. 30–40 yoshlilar orasida ham talab yaxshi, lekin yoshlar ko‘proq zamonaviy qahva mashinalarini (kofemashina) afzal ko‘rishmoqda.

Xaridorlarning 30 foizi TimeCup-ni sovg‘a sifatida sotib olishadi. Ko‘pincha ota-onalarga yoki rahbarlarga sovg‘a qilishadi. Bunday paytda yetkazib berish tezligi juda muhim. Marketpleysning 1–2 soat ichida yetkazib berish (ekspress) xizmati juda qo‘l keladi. Hozirda umumiy sotuvlarimizning 30 foizi aynan Yandex Market hissasiga to‘g‘ri kelyapti.

Toshkentdagi Amity universiteti rektori Shuhrat Sattorov tavsiya qilgan 5 kitob

Tomonidan

admin

11:21 | 13-Mart, 2026

Shuhrat Sattorov — rahbar, jurnalist va tarjimon bo‘lib, ta’lim sohasida turli lavozimlarda ishlagan. Hozir u Toshkentdagi Amity universiteti rektori sifatida faoliyat yuritadi. Uning kutubxonasida 200 ga yaqin kitob bo‘lib, o‘qigan kitoblari soni esa 300 dan oshadi.

U bugungi kunda elektron kitoblardan foydalanishiga qaramay, qog‘oz kitoblarni alohida qadrlaydi, chunki ular unga ish bosimidan chalg‘ish va ichki muvozanatni tiklash imkonini beradi.

“Muhimi suhbatdoshni to‘g‘ri tanlash. Shunda u sizni o‘ziga tortadi va fikringizni band qiladi”, — deydi Sattorov, va bu fikri uning kitob tanlash odatlariga ham tegishli. U ta’lim, menejment, psixologiya va ilmiy izlanishlarga oid kitoblarni ko‘proq o‘qisa-da, ish stolida har doim badiiy asar mavjud, bu esa uning kundalik hayotiga rang va ilhom qo‘shadi.

Shuhrat tarjimon sifatidagi faoliyatini 2009-yilda Paulo Koeloning “Portobello jodugari” romanini tarjima qilish bilan boshlagan va hozirga kelib o‘nga yaqin kitobni tarjima qilgan. Ulardan ba’zilari — Epikurning “Menokevsga maktub»i, “Yunon donishmandlari” va “Mahatma Gandi: aforizm va dono fikrlar” kabi mashhur asarlar.

Shu bilan birga, u “Biz g‘alaba qozonamiz” nomli motivatsion kitobning muallifi bo‘lib, unda shaxsiy rivojlanish, iroda va mas’uliyat hamda milliy o‘sish mavzulari yoritilgan. Shuhrat Sattorov Spot’ga sevimli kitoblari va ularning hayotidagi o‘rni haqida gapirib berdi.

“Inqirozdan chiqish”, Eduards Deming

Ushbu asar boshqaruv va menejment yo‘nalishidagi yuqori reytingli kitoblardan biri bo‘lib, tizimli fikrlashni shakllantirishda fundamental qo‘llanma hisoblanadi. U davlat tashkilotlari, xususiy sektor va yirik kompaniyalar uchun birdek mos keladi.

Kitobning bosh g‘oyasi tizimdagi ma’lumotlarning barcha uchun ochiqligidir. Ya’ni, farroshdan tortib top-menejerlargacha muassasa qayerga qarab ketayotgani, uning strategik maqsadlari va yillik vazifalaridan to‘liq xabardor bo‘lishi lozim. Har bir bo‘g‘in xodimi umumiy strategiyani aniq-tiniq tushunishi ish samaradorligining asosiy shartidir.

Asarning yana bir inqilobiy jihati shundaki, agar tashkilotda samaradorlik past bo‘lsa, bu xodimning aybi emas, balki tizimsizlik natijasidir. Tizim uchun esa doimo rahbariyat javobgar hisoblanadi. Holatlarning 85−90%ida muvaffaqiyatsizlikka aynan tizimli kamchiliklar sabab bo‘lishi kitobda asosiy konsseptsiya sifatida ilgari surilgan.

Bu kitobni o‘qib, tizimli fikrlash va samarali boshqaruv bo‘yicha qarashlarim qanday o‘zgarganini sezdim. Ushbu yondashuv menga shuni ko‘rsatdiki, tashkilotning muvaffaqiyati ko‘pincha xodimlarning emas, balki tizimning o‘zida yashirinadi. Har bir bo‘g‘in xodimi umumiy strategiyani to‘liq tushunsa, ish samaradorligi sezilarli darajada oshadi.

Shuningdek, kitob qisqa muddatli foyda ortidan quvmaslik va uzoq muddatli rejalarga tayanish zarurligini aniq tushuntirdi. Menejmentda har bir insonga adolat bilan munosabatda bo‘lish faqat tamoyil emas, balki samarali tizimning poydevori ekanini his qildim. Shu sabablarga ko‘ra, bu asar men uchun nafaqat nazariy bilim, balki amaliy hayotimga tatbiq qilinadigan foydali qo‘llanma bo‘ldi.

“Emotsional intellekt”, Daniel Goleman

Muvaffaqiyat formulasi faqatgina IQ bilan o‘lchanadigan davrlar ortda qoldi. Ushbu asar insonning kasbiy va shaxsiy hayotidagi yutuqlari uning hissiy aqli, ya’ni o‘z tuyg‘ularini boshqara olish qobiliyatiga qanchalik bog‘liqligini ilmiy va amaliy jihatdan isbotlab beradi.

Kitobning asosiy g‘oyasi shundan iboratki, 20-asr o‘rtalarigacha inson yutug‘i ko‘proq qoidalarni yodlash, formulalar bilan ishlash va mantiqiy tahlilga bog‘liq, deb qaralgan. Daniel Goleman tadqiqotlari esa haqiqiy baxt va uzoq muddatli muvaffaqiyatning asosi emotsional intellekt ekanligini ko‘rsatadi. Bu nafaqat o‘z hissiyotlarini anglash, balki boshqalar bilan mustahkam munosabatlar o‘rnatish va ijtimoiy ko‘nikmalarni rivojlantirishni ham anglatadi.

Bugungi sun’iy intellekt va robotlar asrida kitobning ahamiyati yanada ortgan. Bugungi texnologiyalar istalgancha ma’lumotni yodlashi va tahlil qilishi mumkin, biroq ular hech qachon “hissiy qaror” qabul qila olmaydi. Bu asarni o‘qib, hissiy intellektning hayotdagi roli haqida ko‘p narsalarni angladim. Shu fikr menga shuni eslatdi: faqat bilim va texnik ko‘nikmalar yetarli emas, haqiqiy muvaffaqiyat hissiy ong va boshqalar bilan munosabatlarni boshqarish qobiliyatiga bog‘liq.

Shuningdek, kitob rahbar sifatida jamoani ilhomlantirish va ish muhitini baxtli qilish uchun faqat quruq hisob-kitob yetarli emasligini ko‘rsatdi. Insoniy munosabatlar, empatiya va hissiy bog‘liqlik jamoani samarali boshqarishning asosiy omillari ekanini his qildim. Shu sababli, bu asar nafaqat nazariy bilim, balki amaliy hayotimda qo‘llashim mumkin bo‘lgan foydali qo‘llanma bo‘ldi.

“Yuqori samarali odamlarning yetti odati”, Stiven Kovi

Daniel Goleman hissiyotlar olamiga urg‘u bergan bo‘lsa, Stiven Kovi o‘z asarida amaliyotga e’tibor qaratib, muvaffaqiyatga erishish uchun tizimli odatlarning ahamiyatini ko‘rsatadi. Kitob hayot tarzi va ish uslubini tubdan o‘zgartirishni istaganlar uchun dastur sifatida tuzilgan.

Asarda inson o‘z hayoti va qarorlari uchun javobgarlikni olishi, vaqtni to‘g‘ri taqsimlashi, strategik maqsadlarga e’tibor qaratishi va jamoaviy muvaffaqiyatni ko‘zlovchi fikrlashni shakllantirishi zarurligi misollar bilan tushuntiriladi.

Asar menga har bir kunni samarali o‘tkazish va o‘z ustida ishlashning amaliy jihatlarini ko‘rsatdi. Tizimli yondashuv va odatlarni ongli ravishda shakllantirish muvaffaqiyatga erishishning asosiy yo‘li ekanini yanada aniqroq angladim.

“Muhim narsalarni o‘lchang”, Jon Dor

Jon Dorning ushbu asari bugungi kunda zamonaviy boshqaruvning asosi hisoblangan OKR tizimi haqidagi eng mukammal yo‘riqnomadir. Kitobning asosiy g‘oyasi shundaki, har qanday samarali faoliyat negizida maqsadni to‘g‘ri belgilash san’ati yotadi.

Muallif shaxsiy yoki professional sohada bo‘lishidan qat’i nazar, maqsad qo‘yishda uchta mezonga e’tibor berishni tavsiya qiladi: maqsad aniq bo‘lishi, ich-ichidan ilhomlantirishi va natija o‘lchanuvchan bo‘lishi kerak.

Birinchidan, belgilangan maqsad mutlaqo aniq bo‘lishi, ikkinchidan, u insonni ich-ichidan ilhomlantira olishi, uchinchidan esa, natija albatta o‘lchanuvchan bo‘lishi lozim. Agar qo‘yilgan maqsad mana shu uch mezonning birortasiga javob bermasa, u shunchaki quruq istak bo‘lib qoladi. Aynan mana shu tamoyilga amal qilish orqali inson o‘z vaqtini bekorga sarflamayotganini va har bir harakati aniq natija sari xizmat qilayotganini his qiladi.

Kitobda keltirilgan Google, Alphabet va Intel kabi yirik kompaniyalar tajribasi esa, nazariyani amaliyot bilan bog‘lash imkonini berdi va o‘z loyihalarimni muvaffaqiyatga olib chiqishda qimmatli yo‘riqnoma bo‘ldi.

“Baxt yetkazish”, Toni Shey

Kitobda muallif o‘z hayoti va kasbiy muvaffaqiyatini juda chiroyli bog‘laydi. Ota-onaning roli, ta’lim va shaxsiy e’tiqodning ahamiyati aniq ko‘rinadi. Toni Sheyning boshqaruv falsafasi “baxt zanjiri” g‘oyasiga asoslangan: kimdir tabassum ulashsa, u boshqasiga ham ijobiy ta’sir qiladi. Shu kabi oddiy odatlar jamoada iliq va samarali muhit yaratadi, bu esa yirik kompaniyalar uchun muhimdir.

Shuningdek, muallifning do‘stlariga bo‘lgan sadoqati alohida e’tibor qozonadi — katta mablag‘ga ega bo‘lsa ham, u do‘stlari uchun maxsus uchrashuv joylarini tashkil qiladi. Bu esa insoniy fazilatlarning biznesdagi o‘rnini yanada yaqqol ko‘rsatadi.

Kitobni o‘qish orqali muvaffaqiyat va yirik kompaniya qurishning oddiy qadamlardan boshlanishini angladim va bu har birimiz uchun amaliy va erishish mumkin ekaniga ishonch hosil qildim.

Mazkur besh kitobdan iborat to‘plam kitobxonni nafaqat samarali rahbar, balki maqsadli va baxtli shaxs sifatida yangi bosqichga olib chiqadi. Ular shaxsiy va professional rivojlanishim uchun qo‘llanma bo‘la oldi, hayotdagi harakatlarimni yanada maqsadli va ongli qilishga yordam berdi.

O‘zbekistonda sutkalik elektr energiyasi iste‘moli bo‘yicha rekord yangilandi

Tomonidan

admin

11:19 | 13-Mart, 2026

O‘zbekistonda mart oyida elektr energiyasi iste’moli bo‘yicha yangi rekord qayd etildi, deya xabar berdi Energetika vazirligi.

Xususan, 11-mart kuni mamlakat bo‘yicha sutkalik elektr energiyasi iste’moli 267 mln kVt/soatni tashkil etgan.

Qayd etilishicha, iste’mol hajmo o‘tgan yilning shu davridagi ko‘rsatkichdan 14 mln kVt/soatga ko‘pni tashkil qildi.

Shuningdek, kechki yuqori iste’mol soatlarida energetika tizimidagi eng katta yuklama soat 18:12 da 12 680 MVtga yetdi, bu esa avvalgi mart oyi ko‘rsatkichidan 480 MVtga yuqori bo‘ldi.

Bu kunda elektr stansiyalarda jami 272 mln kVt/soat elektr energiyasi ishlab chiqarildi, ya’ni o‘tgan yil mart oyidagi ishlab chiqarishga nisbatan 12 mln kVt/soatga ko‘p.

Ta’kidlanishicha, qayta tiklanuvchi energiya manbalari hissasi oshib bormoqda. Kun davomida ishlab chiqarilgan elektr energiyasining 20,9%i qayta tiklanuvchi energiya manbalari hissasiga to‘g‘ri keldi.

Shundan quyosh va shamol elektr stansiyalari ulushi 14,3%ni tashkil qildi. Kunduzgi soatlarda elektr energiyasi balansini ta’minlashda quyosh va shamol stansiyalarining hissasi 35% gacha yetdi.

1...456...221 221 ta dan 5 chisi

Biz ijtimoiy tarmoqlarda