Fuqaro aviatsiyasi, tog‘-kon sanoati, moliya va innovatsiyalar, kimyo, energetika kabi sohalarda kelishuvlarga erishilgan.

O‘zbekiston prezidenti 22-sentabr kuni AQSh prezidentining Janubiy va Markaziy Osiyo bo‘yicha maxsus vakili Serjio Gorni qabul qildi.

5-sentabr kuni ikki mamlakat yetakchilarining telefon orqali muloqotida erishilgan kelishuvlarni amalga oshirish nuqtai nazaridan O‘zbekiston-AQSh strategik sheriklik munosabatlarini yanada mustahkamlash masalalari muhokama qilindi.

Shu kunlarda Nyu-York shahrida AQShning yetakchi kompaniyalari bilan ko‘plab samarali uchrashuv va tadbirlar o‘tkazildi. Fuqaro aviatsiyasi, tog‘-kon sanoati, moliya va innovatsiyalar, kimyo, energetika va boshqa ustuvor yo‘nalishlarda umumiy qiymati $100 mlrddan ziyod bo‘lgan shartnomalar va istiqbolli loyihalar portfeli shakllantirildi.

Yangi loyihalarni qo‘llab-quvvatlash va ilgari surish uchun AQSh Eksimbanki va DFC jamg‘armasi imkoniyatlaridan foydalanish, ularni amalga oshirishni jadallashtirish uchun qo‘shma Muvofiqlashtiruvchi qo‘mita taʼsis etish muhimligi qayd etildi.

Xavfsizlik, terrorizm va noqonuniy migratsiyaga qarshi kurashish sohalaridagi hamkorlikka alohida eʼtibor qaratildi. Bo‘lajak tadbirlar rejasi ham ko‘rib chiqildi.

Moliyaviy mustaqillik berilgan davlat OTMlari to‘lov-kontrakt miqdorlarini mustaqil belgilashadi.

2025/2026-o‘quv yili uchun to‘lov-kontrakt miqdorlari tasdiqlandi. Bu haqda Oliy ta’lim, fan va innovatsiyalar vazirligi matbuot xizmati xabar bermoqda.

Bu bo‘yicha O‘zbekiston ta’lim tashkilotlariga qabul qilish bo‘yicha davlat komissiyasi majlisining tegishli bayoni qabul qilindi.

2025/2026-o‘quv yilidan boshlab mamlakat davlat OTMlarida bakalavriat ta’lim yo‘nalishlari (magistratura mutaxassisliklari) bo‘yicha bitta talabani bazaviy to‘lov-kontrakt shaklida bir yillik o‘qitish qiymati belgilandi.

Moliyaviy mustaqillik berilgan davlat oliy ta’lim muassasalari belgilangan tartibga muvofiq 2025/2026-o‘quv yilida qabul qilingan talabalar uchun to‘lov-kontrakt miqdorlarini mustaqil belgilash huquqiga ega.

Agentlik to‘qimachilik, charm-poyabzal, ipakchilik va gilamchilik sanoati sohalarida ustuvor yo‘nalishlarni ishlab chiqish va amalga oshirish bilan shug‘ullanadi.

Avgust oyida prezident raisligida o‘tkazilgan yig‘ilishda O‘zbekistonda Yengil sanoatni rivojlantirish agentligi tashkil etilishi haqida xabar berilgandi.

Bu haqdagi tegishli farmon prezident tomonidan imzolandi, deb xabar bermoqda Adliya vazirligining Huquqiy axborot kanali.

Farmonga ko‘ra, agentlik Vazirlar Mahkamasi huzurida tashkil etiladi. Tashkilot esa to‘qimachilik, charm-poyabzal, ipakchilik va gilamchilik sanoati sohalarida ustuvor yo‘nalishlarni ishlab chiqish va amalga oshirish bo‘yicha vakolatli davlat organi hisoblanadi.

Yengil sanoatni rivojlantirish agentligi qoshida Yengil sanoatni qo‘llab-quvvatlash jamg‘armasi tashkil etiladi. Unga $200 mln yo‘naltiriladi.

Agentlik tomonidan yengil sanoat sohasidagi korxonalarga 2025-yil 1-oktabrdan bir qator moliyaviy qo‘llab-quvvatlash choralari qo‘llaniladi. Jumladan:

• xalqaro brendlarni jalb qilish, standartlashtirish va sertifikatlashning xalqaro tizimlarini, moliyaviy hisobotlarning xalqaro standartlarini joriy etish;
• eksport shartnomalari bo‘yicha sug‘urtalashni moliyalashtirish xarajatlarini qoplash hamda mutaxassislarni o‘qitish uchun grantlar ajratish;
• xorijiy davlatlarda savdo uylarini ochish va saqlash, ofis, savdo va ombor binolarini ijaraga olish, reklama kampaniyalarini tashkil etish bilan bog‘liq chet eldagi xarajatlarining bir qismini qoplash.

Agentlikka investitsiyalar, sanoat va savdo vazirining birinchi o‘rinbosari Nozimjon Xolmurodov rahbarlik qiladi. Agentlik qoshida tajribali tadbirkorlardan iborat kengash tashkil qilinadi.

Shuningdek, ushbu chora tezlikni belgilangan cheklovdan 100 km/soat oshirib yuborishga ham qo‘llanilishi mumkin.

O‘zbekistonda yo‘l harakati qoidalarini qasddan va xavfli tarzda buzgan haydovchilar uchun javobgarlik kuchaytirilishi kutilmoqda. Bu haqdagi Ma’muriy javobgarlik to‘g‘risidagi kodeksga qo‘shimcha va o‘zgartirishlar kiritish to‘g‘risidagi qonun loyihasi Ichki ishlar vazirligi tomonidan jamoatchilik muhokamasiga qo‘yildi.

Taʼkidlanishicha, ayrim haydovchilar tomonidan yo‘l harakati qoidalariga rioya etmaslik, jumladan, transport vositasida qarama-qarshi harakatlanish, svetoforning taqiqlovchi chirog‘iga bo‘ysunmaslik yoki tezlikni me’yoridan oshirib boshqarish tufayli og‘ir oqibatli YTHlar soni ortib bormoqda.

Shuningdek, ayrim haydovchilar tomonidan yo‘l harakati qoidalariga bepisandlik bilan qarash, transportni boshqarish madaniyatiga amal qilmaslik, yo‘l harakatining boshqa ishtirokchilariga nisbatan hurmatsizlik qilish holatlari ko‘rsatkichi kundan-kunga oshib bormoqda.

Qonun loyihasiga ko‘ra, tezlikni 40 km/soatdan ortiq kattalikda oshirgan, qizil chiroqqa bo‘ysunmagan, qarama-qarshi harakatlangan yoki avariya holati yuzaga kelishiga sabab bo‘lgan haydovchilar bir oy davomida 10 marta shu ishni qilsa, 6 oyga haydovchilik guvohnomasidan mahrum qilinadi.

Tezligini soatiga 100 km/soatdan ortiqqa oshirgan haydovchilar transport vositalarini boshqarish huquqidan olti oy muddatga mahrum qilinib, ularga BHMning 20 baravari (8,24 mln so‘m) miqdorida jarima solinadi.

Yuk avtomobillarining yo‘l chetida to‘xtab turishi yohud tashlab ketishi BHMning 5 baravari (2,06 mln so‘m) miqdorida jarima solishga sabab bo‘ladi.

Qizil chiroqqa bo‘ysunmagan, qarama-qarshi harakatlangan yoki avariya holati yuzaga kelishiga sabab bo‘lgan haydovchilar ikki/besh marta jazo choralari qo‘llanilgandan keyin bir yil davomida sodir etilgan barcha yo‘l harakati qoidabuzarliklari uchun jarimani to‘liq to‘laydigan bo‘ladi, yaʼni 50% lik chegirmadan foydalana olmaydi.

Qonun loyihasining muhokamasi 25-sentabrga qadar davom etadi.

Bu kelasi yildan joriy etilib, pedagoglar kamida 15 yil stajga ega hamda oliy toifali bo‘lishlari kerak. Ipoteka krediti uchun boshlang‘ich to‘lovning 25% i qoplanadi.

Prezident pedagoglarni yana-da qo‘llab-quvvatlashga qaratilgan yangi tashabbuslarni ilgari surdi.

Jumladan, yangi yildan boshlab kamida 15 yil stajga ega bo‘lgan oliy toifali pedagoglarga ipoteka krediti boshlang‘ich badalining 25% i qoplab beriladi.

Shuningdek, kelgusi o‘quv yilida davlat oliygohlariga o‘qishga kirgan pedagoglar farzandlarining kontrakt summasiga 30% chegirma beriladi.

Shu bilan birga, o‘qituvchilar yangi taʼlim texnologiyalarini keng qo‘llashi uchun kompyuter xaridiga 10 mln so‘mgacha imtiyozli kredit ajratiladi.

Bundan tashqari, kelasi yildan pedagoglar uchun davlat xizmatlari to‘lovi 2 karra kamaytiriladi.

Fan o‘qituvchilari kabi boshlang‘ich taʼlim o‘qituvchilari uchun ham milliy sertifikat berish tizimi joriy qilinadi. Sertifikat olganlarga har oyda 15% ustama to‘lanadi.

Bakalavr bosqichini imtiyozli diplom bilan bitirib, maktabga ishga kirganlarga avtomatik ravishda 2-malaka toifasi, magistrlarga esa 1-malaka toifasi beriladi.

Dunyodagi TOP-300 talik oliygohlarga o‘qishga kirgan pedagoglarga 20 ming dollargacha imtiyozli taʼlim krediti ajratiladi.

Reytingda 100 talikka kirgan maktab va bog‘cha, 20 talikdagi texnikum, TOP-10 ta oliygoh pedagoglariga yiliga bir marta O‘zbekiston bo‘ylab sayohat qilish uchun samolyot va poyezdlar chipta narxlariga 15−20% chegirma beriladi.