Bunda ichki aviaparvozlar uchun ro‘yxatdan o‘tishda shaxsni tasdiqlovchi hujjatlarning elektron variantidan foydalanish mumkin bo‘ladi.

1-iyuldan boshlab O‘zbekiston aeroportlarida ichki reyslar uchun yangi tartib joriy etiladi. Bu haqda Uzbekistan Airports matbuot xizmati xabar berdi.

Unga ko‘ra, fuqarolar ichki aviaparvozlar uchun aeroportda ro‘yxatdan o‘tishda shaxsini tasdiqlovchi hujjatlarning elektron variantidan foydalanishlari mumkin bo‘ladi.

Aeroportda ro‘yxatdan o‘tishdan oldin yo‘lovchi Yagona portal sayti/mobil ilovasi yoki “Ijtimoiy karta” mobil ilovasidagi shaxsiy kabinetiga kirib, shaxsiy ma’lumotlar sahifasiga o‘tadi va elektron shaklda shaxsni tasdiqlovchi hujjatlarni ro‘yxatdan o‘tish joyidagi xodimga ko‘rsatadi.

Qayd etilishicha, faqat Yagona portal sayti/mobil ilovasi yoki “Ijtimoiy karta” mobil ilovasidagi joriy ma’lumotlar shaxsni tasdiqlovchi hujjat sifatida qabul qilinadi.

O‘tgan yilning dekabrida qabul qilingan hukumat qarorida 1-iyuldan O‘zbekistonda fuqarolik pasporti va boshqa hujjatlarning elektron nusxasi ham rasmiy kuchga ega bo‘lishi belgilab berilgandi.

“Raqamli hukumat” tizimi idoralararo integratsiyalashuv platformasi doirasida belgilangan hujjatlarning unifikatsiyalangan raqamli servislari joriy etiladi.

Yagona portal (my.gov.uz) va “Ijtimoiy karta” mobil ilovasida raqamli servislardan foydalanish imkoniyati yaratilib, ular O‘zbekiston hududida majburiy tartibda qabul qilinadi.

Bu ro‘yxatda quyidagi hujjatlar mavjud:

• Biometrik pasport;
• ID-karta;
• Haydovchilik guvohnomasi;
• Tug‘ilganlik haqida guvohnoma;
• Nikoh qayd etilganligi haqida guvohnoma;
• Nikohdan ajralganlik haqida guvohnoma;
• Avtomobil ro‘yxatdan o‘tkazilganligi to‘g‘risida guvohnoma (texnik pasport, texnik talon);
• Pensiya (nafaqa) guvohnomasi;
• Fuqaroligi bo‘lmagan shaxsning yashash guvohnomasi (ID-kartasi);
• Nogironlik to‘g‘risida ma’lumotnoma;
• Avtomobilning majburiy sug‘urtasi (fuqarolik javobgarligi) bo‘yicha sug‘urta polisi;
• Oliy, o‘rta maxsus, kasb-hunar va professional ta’lim olganlik to‘g‘risidagi rasmiy hujjat;
• Talabalik guvohnomasi;
• YTT sifatida ro‘yxatdan o‘tganlik to‘g‘risidagi guvohnoma;
• O‘zini o‘zi band qilgan shaxs sifatida ro‘yxatdan o‘tganligi to‘g‘risida ma’lumotnoma;
• Turar joy obyektlarining kadastr pasporti;
• Avtomobilni boshqarish huquqini beruvchi ishonchnoma.
• Bunda mazkur hujjatlarning qog‘oz nusxalari banklarda, notarial idoralarda, aeroportlarda ichki reyslarni ro‘yxatdan o‘tkazishda va O‘zbekiston hududidan o‘tuvchi poyezdlarga chiqishda talab etilmaydi.

Shu bilan birga, davlat, korporativ va boshqa xizmatlar, jumladan, elektron xizmat ko‘rsatish hamda fuqarolarni qabul qilishda tegishli hujjatlarni taqdim etishni talab qiladigan davlat organlari va boshqa tashkilotlarda ularni so‘rashga yo‘l qo‘yilmaydi.

2024-yilning may oyida Personallashtirish agentligining ma’lumotlar bazasida jismoniy shaxsni “Face ID” orqali identifikatsiya qilish tizimi joriy etildi. Davlat xizmatlari markazlari hamda notarial idoralarda Mobile-ID tizimida identifikatsiya va qayta identifikatsiyadan o‘tish bepul amalga oshiriladi.

Joriy yildan Aholining yagona elektron reyestri joriy etilishi belgilangan. U o‘z ichiga jismoniy shaxslarning fuqarolik holati va shaxsiga doir ma’lumotlarni oladi.

O‘qishga kira olmagan maktab bitiruvchilari hamda texnikum va oliygohlarni tugatayotgan talabalarni bandligini ta’minlash uchun ikkita bankka $300 mln ajratildi.\

Avvalroq 30-iyun — Yoshkar kuni munosabati bilan Shavkat Mirziyoyev yoshlar bilan uchrashuv o‘tkazayotgani haqida xabar berilgandi.

Unda startaplarni qo‘llab-quvvatlash bo‘yicha tizim yaratilib, ularni moliyalashtirishga $145 mln venchur sarmoya kiritildi. Prezident bu $1 mlrdga yetkazilishini aytdi.

Endi, bu ishlar maktabdan boshlanadi. O‘quvchilar uchun “mohirlik va biznes soati” kiritilib, ularning g‘oyasini startapga aylantirishga 100 mlrd so‘m grant ajratiladi.

Oliygohlar o‘rtasida ham startaplar bo‘yicha har yili “Eng yaxshi kreativ g‘oya” tanlovi o‘tkazilib, g‘oliblarga oliygoh jamg‘armasidan 300 mln so‘mgacha grant beriladi.

Startapni prototipga aylantirish va sinovdan o‘tkazish uchun Innovatsiya agentligi va IT Park “RnD” markazini ochadi. Eng yaxshi loyihalar bo‘yicha prototip yaratish xarajatining $50 minggacha qismi Yoshlar venchur jamg‘armasidan qoplanadi.

Uchrashuvda hozir tog‘-kon, agrosanoat, to‘qimachilik, kimyo, elektrotexnika, qurilish materiallari sohasida ishlayotgan yoshlar soni 1 mlnni tashkil etishi aytildi.

Endi sanoat, servis, tadbirkorlik va qishloq xo‘jaligida band yoshlarning kasbiy rivojlanishi bo‘yicha tizim yaratiladi. Har bir kasb yo‘nalishi bo‘yicha aynan yoshlar o‘rtasida respublika musobaqalari o‘tkazilib, unda davlat korxonalari va xususiy sektor vakillari tengma-teng ishtirok etadi.

Tarmoq rahbarlari har yili o‘z tizimidagi 100 nafar yoshni seleksiya qilib, xorijiy stajirovkaga yuborishni yo‘lga qo‘yadi. Buning uchun, har bir tarmoq 10 mlrd so‘mdan ajratadi. Bu mablag‘lar soliq solish bazasidan chegirib tashlanadi.

O‘qishga kira olmagan maktab bitiruvchilari hamda texnikum va oliygohlarni tugatayotgan talabalarni band etish bo‘yicha 2 ta alohida dastur qabul qilindi. Buning uchun Aloqabank va O‘zmilliybank’ka $300 mln ajratildi.

Ushbu banklar “Yoshlar biznesi” dasturi doirasida 100 ming yoshlarni, “Kelajakka qadam” orqali 140 ming oliygoh bitiruvchisini daromadli ish bilan ta’minlashga mas’ul bo‘ladi.

Bandlik vazirligi Savdo-sanoat palatasi O‘zmilliybank bilan birga oliygoh, texnikum, kasbiy ta’lim bitiruvchilarini ish beruvchilar bilan bog‘laydigan platformani ishga tushiradi. Shuningdek, vazirlik Maktab, Oliy ta’lim vazirliklari “Harakatda daromad” elektron tizimini yaratib, ta’tildagi 3 mln yoshlarni malaka talab qilmaydigan ishlar bilan band qiladi.

Har yili yuqori sinf o‘quvchilarini kasb tanlashga qiziqtirish va ko‘maklashish maqsadida “Mening kasbim” respublika tanlovi o‘tkaziladi.

May oyida qabul qilingan hukumat qarori bilan madaniyat va san’at sohasidagi startaplarga 37,5 mln so‘mgacha mablag‘ ajratilishi belgilandi. Sohada sun’iy intellektdan va texnologiyalardan foydalanish bo‘yicha Ijodiy texnolaboratoriya tashkil etiladi.

TBC Bank Group O‘zbekistondagi BILLZ startapidan $12 mlnga nazorat paketini sotib olishi haqida xabar berilgandi. TBC aksiyalarning 53%ini $9 mlnga xarid qildi hamda ikki yil ichida ulushini 60% ga oshiradi. Keyinchalik guruh qolgan 40% ni sotib olishi mumkin.

Prezident sun’iy intellektni rivojlantirish bo‘yicha bank-moliya, sog‘liqni saqlash, qishloq xo‘jaligi va energetika yo‘nalishlarida 100 ta loyiha amalga oshirilishini ma’lum qildi.

Avvalroq 30-iyun — Yoshkar kuni munosabati bilan Shavkat Mirziyoyev yoshlar bilan uchrashuv o‘tkazayotgani haqida xabar berilgandi.

Unda sun’iy intellektni rivojlantirish bo‘yicha bank-moliya, sog‘liqni saqlash, qishloq xo‘jaligi va energetikani ustuvor yo‘nalish sifatida belgilab, 100 ta loyiha amalga oshirilishi ma’lum qilindi.

Davlat rahbari qadriyatlar va madaniyatni o‘zida ifoda etadigan sun’iy intellektning milliy modelini ishlab chiqish boshlanganini e’lon qilindi.

“Bu boy tariximiz va zamonaviy yondashuvlarni o‘zida uyg‘unlashtirib, yoshlarning yangi kreativ g‘oyalarini shakllantirishga xizmat qiladi”, — dedi prezident. Tizim samaraligi uchun BAA bilan hamkorlikda “Bir million sun’iy intellekt yetakchilari” dasturi ishga tushirilmoqda.

Shu yilning o‘zida “AI study” platformasi orqali kamida 100 ming yoshlar sun’iy intellekt texnologiyalarini o‘rganishi ko‘zda tutilmoqda.

Hozir maktablarda 19 500 nafar informatika o‘qituvchisi bor. Maktabgacha va maktab ta’limi vazirligi Massachusets texnologiya institutining sun’iy intellekt ta’lim dasturi asosida o‘quv dasturlarini yangilashi qayd etildi.

Har bir viloyatdan 100 nafar informatika o‘qituvchisi joriy yilda Yangi O‘zbekiston universitetida bu dasturga o‘qitiladi. Ushbu mentor o‘qituvchilar o‘z hududidagi qolgan informatika o‘qituvchilarini ikki yil davomida kaskad usulida tayyorlaydi. Bu orqali besh yilda barcha maktab bitiruvchilari SI bo‘yicha yetarli bilim oladi.

“Raqamli avlod qizlari” tanlovida ta’lim, sun’iy intellekt, “yashil” iqtisodiyot, iqlim o‘zgarishi kabi sohalarda 7 ming o‘quvchi va talabaning 120 ta startap loyihasi tanlab olindi. Bu yil kamida 50 ming nafar qizlar “Raqamli avlod qizlari” loyihasi bilan qamrab olinadi.

10-iyun kuni Shavkat Mirziyoyev Toshkent investitsiya forumining yalpi majlisida O‘zbekistonda milliy “Bulutli texnologiyalar” platformasi hamda sun’iy intellekt modeli yaratilishini ma’lum qildi. Shu bilan birga, 20 ta data-markaz qurilishi va “Bir million sun’iy intellekt yetakchilari” loyihasi ishga tushirilishi qayd etildi.

Joriy yilda jami $118 mlrdlik loyihalarni amalga oshirish hamda 800 mingga yaqin ish o‘rinlarini yaratish rejalashtirilmoqda.

Endi banklar top-300 talik oliygohga kirganlarga imtiyozli ta’lim krediti ajratadi. Bu haqda 30-iyun kuni Shavkat Mirziyoyevning yoshlar bilan uchrashuvida ma’lum qilindi.

Joriy yil fevral oyida o‘tgan uchrashuvda yoshlar uchun 40 dan ziyod yangi tashabbuslar e’lon qilinib, qariyb $500 mln ajratildi. Bu yil $35 mlrdlik 8 300 ta loyiha ishga tushirilib, 292 mingta ish o‘rni yaratiladi. Yana 500 mingta ish o‘rni yaratadigan $83 mlrdlik loyihalar rejalashtirilgan.

Masalan, energetikada $20 mlrd, neft-gaz va kimyoda $11 mlrd, tog‘-konda $7 mlrd, elektrotexnika va avtomobilsozlikda $4,5 mlrdlik minglab korxonalar ishga tushadi.

Ishlar boshlanishi bilan “yashil” iqtisodiyot, “yashil” energiya, raqamli geologiya, texnologik minerallar, bio-injeneriya yo‘nalishlarida minglab mutaxassislarga talab oshishi kutilmoqda.

El-yurt umidi jamg‘armasining stipendiya tanlovi doirasida top-300 talik oliygohga kirganlar uchun o‘qish va yashash xarajatini qoplash tizimi yangi tartibda ishlay boshlaydi.

STEM yo‘nalishlari (ilm-fan, texnologiya, muhandislik va matematika), energetika, transport, urbanizatsiya, arxitektura, qurilish, qishloq va suv xo‘jaligi kabi drayver sohalar uchun kvotalar bir necha barobar oshiriladi.

Endilikda banklar top-300 talik oliygohga kirgan yoshlarga $20 minggacha imtiyozli ta’lim krediti beradi.

Bundan tashqari, “Garvardchilar” maktabi Beruniy nomidagi xalqaro maktab sifatida faoliyatini boshladi. Ushbu xalqaro maktabga bu yilgi 8-sinf bitiruvchilari orasidan 60 nafar o‘quvchi saralab olinadi va 3 ta yo‘nalishda o‘qitiladi. Kelgusida o‘quv o‘rinlari karrasiga ko‘paytiriladi.

Milliy dastur asosida har yili eng salohiyatli 3 ming o‘quvchi seleksiya qilinib, Garvard, Yel, Kolumbiya, Kornel kabi nufuzli oliygohlarga tayyorlanadi. Shundan kamida 300 nafari ehtiyojmand oila farzandlari bo‘ladi.

Abituriyentlar test sinovi uchun to‘lovni 26-iyun kuni soat 23:59 gacha amalga oshirishlari kerak.

2025/2026-o‘quv yili uchun oliy ta’lim muassasalarining bakalavriatiga abituriyentlarni onlayn ro‘yxatga olish yakunlandi. Bu haqda Bilimni baholash agentligi ma’lum qildi.

Qabul yakuniga ko‘ra onlayn ro‘yxatdan o‘tgan abituriyentlar soni 732 411 nafarni tashkil etdi. Bu o‘tgan yilga nisbatan 1,2 baravarga yoki 161,8 mingdan ortiqqa kamdir.

Ta’lim tili bo‘yicha abituriyentlarning 87% dan ortig‘i (644 027 nafar) o‘zbek tilini tanlagan. Yana 71 476 nafari rus tili, 14 959 nafari qoraqalpoq tili hamda 1 949 nafari boshqa tillarga to‘g‘ri keladi.

Oliy ta’lim, fan va innovatsiyalar vazirligi ro‘yxatdan o‘tgan abituriyentlar test sinovi uchun to‘lovni 26-iyun kuni soat 23:59 gacha amalga oshirishlari kerakligini eslatdi.

2025−2026-o‘quv yili uchun oliy va professional ta’lim muassasalariga qabul 5-iyundan boshlandi. Arizalar 25-iyungacha onlayb qabul qilinadi.

Amaldagi tartibga muvofiq, oliygohlar bakalavriatiga qabul jarayoni ikki bosqichda — “avval test, so‘ng tanlov” tamoyilida amalga oshiriladi. Imtihonlar iyul-avgust oylarida o‘tkaziladi.

Birinchi bosqichda abituriyentlar onlayn ro‘yxatdan o‘tib, test sinovi topshiriladigan fanlar majmuasi, ta’lim tili va test topshirish hududini tanlaydi.

Agar nomzodlar alohida iqtidor talab etiladigan ta’lim yo‘nalishlari bo‘yicha kasbiy/ijodiy imtihonlarda ishtirok etsa, ta’lim tili, test topshirish hududi, ta’lim yo‘nalishi hamda kasbiy (ijodiy) imtihon topshiriladigan oliygohni tanlashi kerak.

Ikkinchi bosqichda abituriyentlar kirish imtihonlari to‘liq yakunlangach, 15 kun ichida my.uzbmb.uz sayti orqali OTM, bakalavriat ta’lim yo‘nalishi, ta’lim shakli va tanlov ustuvorligini tanlaydi.

Abituriyent test sinovida to‘plagan ballarini imtihon o‘tkazilgan kunning ertasiga bilishi mumkin. Uning talabalikka tavsiya etilgan yoki etilmagani qabul jarayonining ikkinchi bosqichi to‘liq yakunlangandan keyin bir haftada Bilimni baholash agentligining saytida e’lon qilinadi.

Texnikumlarda o‘qish istagini bildirgan abituriyentlar oliygohlarga qabulning yakuniy natijasi e’lon qilinganidan so‘ng, agar oliygohga qabul qilinmagan bo‘lsa, 10 kun ichida texnikum, kasb va mutaxassislik hamda ta’lim shaklini tanlashlari mumkin bo‘ladi. Uning natijasi ham bir haftada agentlik saytida e’lon qilinadi.

Mart oyida 2025−2026 o‘quv yili qabuli uchun test sinovi topshiriladigan fanlar bo‘yicha topshiriqlar soni va baholash mezoni tasdiqlandi. Abituriyentlarga jami 5 ta fan bo‘yicha 90 ta test topshirig‘i beriladi hamda 189 ballgacha to‘plash mumkin.

Mablag‘lar kichik gidroenergetika sohasini rivojlantirish va mamlakat bo‘ylab elektr ta’minotini oshirishga qaratilgan yangi loyihani amalga oshirish uchun yo‘naltiriladi.

Jahon banki O‘zbekistonga $150 mln miqdorida imtiyozli kredit ajratishni ma’qulladi.

Mablag‘lar kichik gidroenergetika sohasini rivojlantirish va butun mamlakat bo‘ylab elektr ta’minoti ishonchliligini oshirishga qaratilgan yangi loyihani amalga oshirish uchun yo‘naltiriladi.

Loyiha xususiy sektor, jumladan, mahalliy kichik gidroelektr stansiyalari ishlab chiquvchilari va banklar ishtirokida amalga oshiriladi.

O‘zbekiston hukumati 3 mingga yaqin KGES qurilishiga sarmoya kiritishni va 2026-yilgacha ularning o‘rnatilgan quvvatini 160 MVtga yetkazishni rejalashtirmoqda. Bu 280 ming kishini qo‘shimcha elektr energiyasi bilan ta’minlash imkonini beradi.

Loyiha 2030-yilga borib umumiy o‘rnatilgan quvvati 150 MVt gacha bo‘lgan KGES qurilishini moliyalashtirish imkonini beradi.

Ularda yiliga 520 gigavatt-soatdan ziyod ekologik toza elektr energiyasi ishlab chiqarilishi kutilmoqda. Bundan tashqari, loyiha karbonat angidrid chiqindilarini yiliga 430 ming tonnagacha qisqartirishga yordam beradi.

Hozirgi kunda loyiha doirasida mamlakatning turli hududlaridagi mavjud sug‘orish kanallarida KGES qurish uchun 270 ga yaqin qulay maydonlar oldindan aniqlangan. Ularning aksariyati (93%) 100 dan 1000 kVt gacha quvvat imkoniyatiga ega.

Loyiha doirasida moliyalashtiriladigan KGESlarda ishlab chiqariladigan elektr energiyasi Hududiy elektr tarmoqlari tomonidan sotib olinadi.

U qayta tiklanadigan energiyaning ishonchli manbaiga aylanadi, energiya balansini diversifikatsiya qilish imkonini beradi, energiya bilan kam ta’minlangan hududlar va qishloq joylarda uy xo‘jaliklari va xususiy sektorning elektr ta’minotini yaxshilaydi.