Davlat organlarining fuqarolar murojaatlari bilan ishlash faoliyati baholanadi. Bu bo‘yicha hukumat qarori qabul qilindi.

Hujjat bilan Vazirlar Mahkamasining ayrim qarorlariga o‘zgartirish va qo‘shimchalar kiritildi.

Jumladan, 341-son qarorga kiritilgan qo‘shimchalarga ko‘ra, “Davlat organlari, davlat muassasalari va davlat ishtirokidagi tashkilotlar hamda ularning mansabdor shaxslarining jismoniy va yuridik shaxslarning murojaatlari bilan ishlash faoliyatini baholash va toifalash to‘g‘risida»gi nizom tasdiqlandi.

Davlat organlarining murojaatlar bilan ishlash faoliyati kelib tushgan murojaatlar soniga qarab turli toifalarga ajratiladi. Ularga ro‘yxatga olingan, qanoatlantirilgan va rad etilgan murojaatlar, shuningdek ijro muddatlari buzilgan hamda takroriy murojaatlar kiradi.

Murojaatlar bilan ishlash faoliyati tahlil natijalariga ko‘ra uch toifaga ajratiladi: yuqori natijadorlikka ega — yashil toifa, o‘rta natijadorlikka ega — sariq toifa hamda past natijadorlikka ega — qizil toifa.

Baholash natijalariga asosan davlat organlari mansabdor shaxslarining KPI ko‘rsatkichlari belgilanadi.

Yashil toifaga kiritilgan holatlarda KPI 100%ni tashkil etadi. Sariq toifa uchun KPI 50% darajasida belgilanadi. Qizil toifaga kirgan holatlarda esa KPI ko‘rsatkichi 10%ni tashkil etadi.

Qizil toifaga kiritilgan davlat organlarining rahbarlari yoki ularning tegishli o‘rinbosarlariga nisbatan intizomiy taʼsir choralari ko‘rilishi mumkin.

Senatorlar “O‘zbekiston Respublikasining ayrim qonun hujjatlariga O‘zbekistonda islomiy bank faoliyatini joriy etishga qaratilgan qo‘shimcha va o‘zgartirishlar kiritish to‘g‘risida»gi qonunni maʼqulladi. Bu haqda yuqori palata matbuot xizmati xabar berdi.

Hujjat bilan 2 ta kodeks hamda 7 ta qonunga islomiy bank faoliyatini amalga oshirishning huquqiy asoslarini belgilovchi yangi normalar kiritilmoqda.

Xususan, islomiy bank faoliyatini amalga oshirish huquqini beruvchi litsenziya turi joriy qilinib, unga oid talablar belgilanmoqda.

Jumladan, mazkur litsenziya bilan banklar tomonidan to‘liq islomiy bank faoliyatini amalga oshirish yoki bir vaqtning o‘zida ham anʼanaviy, ham islomiy bank faoliyatini amalga oshirish imkoniyati paydo bo‘ladi.

Shuningdek, islomiy moliya faoliyati bilan bog‘liq masalalarni muvofiqlashtirish maqsadida Markaziy bank va islomiy bank faoliyatini amalga oshiruvchi banklarda islomiy moliya kengashini tashkil etish hamda uning faoliyatiga doir talablar belgilanmoqda.

Bundan tashqari, Soliq kodeksi ga islomiy moliya operatsiyalarini soliqqa tortish tartibini belgilovchi alohida bob kiritilmoqda.

Senatorlarning fikricha, ushbu qonun bank-moliya sohasiga yangi strategik investorlarning kirib kelishiga xizmat qiladi.

O‘zbekiston va Pokiston transport sohasida qator kelishuvlarga erishdi. Bu haqda O‘zbekiston Transport vazirligi matbuot xizmati xabar berdi.

Transport vaziri o‘rinbosari Mamanbiy Omarov boshchiligidagi delegatsiya Shavkat Mirziyoyevning avvalroq e’lon qilingan tashrifi arafasida Pokistonga bordi. Unda Pokiston tomoni bilan tranzit va infratuzilma tashabbuslari bo‘yicha muzokaralar o‘tkazildi.

Dengiz ishlari bo‘yicha vazir o‘rinbosari Umar Zafar Shayx va Karachi porti raisi Shahid Ahmad Omarov bilan Pokiston dengiz portlari orqali yuk tashish uchun qulay sharoitlar yaratish masalasini muhokama qildilar. O‘zbekistonlik investorlarga bir qator imtiyozlar berish rejalashtirilmoqda.

Uchrashuv yakunida tomonlar Karachida O‘zbekiston tovarlari uchun omborlar tashkil etishga kelishib oldilar.

Shuningdek, mehmonlar Pokiston temir yo‘l vaziri o‘rinbosari Mazhar Ali Shoh bilan uchrashdi. Loyihalashtirilayotgan O‘zbekiston-Afg‘oniston-Pokiston (Trans-afg‘on magistrali) temir yo‘lining texnik-iqtisodiy asoslarini ishlab chiqish doirasida dala tadqiqotlarini boshlash bo‘yicha kelishuv asosiy natija bo‘ldi.

Bundan tashqari, O‘zbekiston delegatsiyasi aloqa vaziri o‘rinbosari Ali Shoh Mas’ud bilan Pokiston-Xitoy-Qirg‘iziston-O‘zbekiston transport yo‘lagini yaratish bo‘yicha muzokaralar o‘tkazdi. U bo‘yicha pilot tashuvlar shu oyning oxirigacha rejalashtirilgan.

Prezident maktabgacha taʼlim va tarbiya tizimini yana-da takomillashtirish yuzasidan takliflar taqdimoti bilan tanishdi. Yig‘ilishda maktabgacha taʼlim sohasida xususiy sektorni qo‘llab-quvvatlashga qaratilgan yangi imtiyozlar ham muhokama qilindi.

Maktabgacha taʼlim sohasida xususiy sektor ishtirokini kengaytirish maqsadida qamrov darajasi 80%dan past bo‘lgan tuman va shaharlarda (Toshkent shahri bundan mustasno) tadbirkorlar uchun qator qo‘llab-quvvatlash choralari joriy etiladi.

Jumladan, maktab va bog‘chalar hududidagi bo‘sh yer maydonlarida DXSH asosida bog‘chalar tashkil etilganda, ijara to‘lovlari 30 yilgacha undirilmaydi.

Shuningdek, har bir tarbiyalanuvchi uchun davlat bog‘chalarida bir bolaga to‘g‘ri keladigan xarajatning 50%i miqdorida subsidiya ajratiladi. Ushbu tartib 2024-yildan tashkil etilgan nodavlat bog‘chalarga ham tatbiq etiladi.

Shu bilan birga, tarbiyachilarga oylik ish haqi to‘lash xarajatlari davlat bog‘chalarida belgilangan meʼyorlar asosida uch yil davomida qoplab beriladi. Har 30 nafar bolaga bir nafar tarbiyachi shtati hisoblanadi.

Mazkur imtiyozlar yangi ko‘p kvartirali uylarning birinchi qavatida tashkil etiladigan xususiy bog‘chalarga ham tatbiq etiladi.

Bundan tashqari, 2030-yil 1-yanvarga qadar quvvati 150 o‘rindan kam bo‘lmagan nodavlat bog‘chalar tashkil etgan tadbirkorlar uchun ijtimoiy soliq stavkasi bo‘yicha yengilliklar beriladi.

Davlat rahbari taqdim etilgan takliflarni har tomonlama puxta ishlab chiqish, ularni bosqichma-bosqich joriy etish hamda maktabgacha taʼlim sifatini oshirish orqali bolalarning har tomonlama rivojlanishi uchun mustahkam asos yaratish muhimligini taʼkidladi. Mutasaddilarga tegishli topshiriqlar berildi.