Reglamentga muvofiq, 1-sinfga qabul jarayonlari 2 bosqichda amalga oshiriladi:

• 1-bosqich: 20-iyundan 31-iyulgacha mikro-hudud doirasida;
• 2-bosqich: 1-avgustdan 15-avgustgacha mikro-hududdan tashqarida.

1-sinfga qabul jarayonlari havoladagi tuman (shaharlarda) elektron shaklda davlat xizmatlari orqali amalga oshiriladi. Bunda ota-onalar 20-iyundan boshlab my.maktab.uz elektron platformasi orqali ro‘yxatdan o‘tib, ariza topshirishlari mumkin.

Davlat xizmatlari ko‘rsatilmaydigan hududlarda 1-sinfga qabul qilingan o‘quvchilar vazirlik elektron tizimi (adm.maktab.uz)ga kiritiladi

“Ta’lim to‘g‘risida»gi Qonunga muvofiq, bolalar 7 yoshga to‘ladigan yilda maktabga qabul qilinadi. Bu yil 1-sinfga 2017-yilning 31-dekabriga qadar tug‘ilgan bolalar qabul qilinadi.

May oyida O‘zbekistonning oltin-valyuta zaxiralari $1,5 mlrddan ortiqqa oshdi. Bu haqda Markaziy bank ma’lumotlarida keltirilgan. Joriy yilning 1-iyun holatiga ko‘ra, mamlakat zaxiralari bir oylik $1,52 mlrd o‘sish bilan, $36,6 mlrdni tashkil etdi.

Xorijiy valyutadagi aktivlar miqdori aprel oyidagi pasayishdan keyin $1,24 mlrdga oshib, $9,26 mlrdga yetdi.

Regulyator ilk bor zaxiralarga oid ma’lumotlar tarkibida qimmatli qog‘ozlar bo‘yicha statistikani taqdim etdi. Unga ko‘ra, qimmatli qog‘ozlar $35 mlnni tashkil etgan. Avvalroq Markaziy bank birinchi marta xorijiy davlat qimmatli qog‘ozlariga investitsiya kiritgandi.

Shuningdek, regulyatorning boshqa mamlakatlar markaziy banklari hamda XVJdagi depozitlari hajmi sezilarli oshib, $422,7 mlnni tashkil etdi.

Boshqa xorijiy moliya institutlarining hisobvaraqlaridagi mablag‘lar miqdori esa bir oy davomida $1,2 mlrdga oshdi. Natijada, ko‘rsatkich yil boshidagi $8,8 mlrdni qayd etdi.

Mayda mamlakat oltin zaxiralari biroz ($278,8 mln) o‘sib, $26,8 mlrdni tashkil etdi. Zaxiradagi oltinning fizik hajmi biroz pasaydi — 11,4 mln troy unsiya.

Shavkat Mirziyoyev va Turkiya prezidenti Rejep Tayyip Erdog‘an raisligida O‘zbekiston-Turkiya oliy darajadagi Strategik hamkorlik kengashining uchinchi yig‘ilishi bo‘lib o‘tdi.

So‘nggi yillarda o‘zaro savdo hajmi 1,5 barobarga, qo‘shma korxonalar soni 2 barobarga, O‘zbekiston iqtisodiyotiga turk investitsiyalari hajmi 2,5 barobarga oshdi.

Ikki davlatning yirik shaharlari o‘rtasida haftasiga 90ta parvoz amalga oshirilmoqda, Turkiyadan kelayotgan turistlar oqimi 3 barobarga ko‘paydi. Yaqin kelajakda ikki tomonlama savdo hajmini $5 mlrdga yetkazish maqsad qilingan. O‘zbekistonda turk kompaniyalari tomonidan 100dan ortiq loyiha muvaffaqiyatli amalga oshirilmoqda. Tashrif doirasida $10 mlrdlik yangi investitsiya loyihalari portfeli shakllantirildi.

Ikki tomonlama savdo-iqtisodiy hamkorlikni rivojlantirish maqsadida sanoat kooperatsiyasini kuchaytirish, yuqori qo‘shilgan qiymatga ega mahsulotlar ishlab chiqarishni mahalliylashtirish va birgalikda uchinchi davlatlar bozorlariga chiqish muhimligi ta’kidlandi.

Qishloq va suv xo‘jaligi, sog‘liqni saqlashni raqamlashtirish va tibbiyot klasterlarini tashkil etish sohalarida Turkiya tajribasi va DXSh mexanizmlarini joriy etishga talab borligiga e’tibor qaratildi. Ikki mamlakatning transport-logistika salohiyatini oshirish, shu jumladan, O‘rta koridor imkoniyatlaridan samarali foydalanish hamkorlikning muhim yo‘nalishi ekanligi ta’kidlandi.

Oliy, professional va texnik ta’lim sohasida hamkorlikni rivojlantirish, teatr festivallari, madaniyat haftaliklarini o‘tkazish, birgalikda tarixiy filmlar suratga olish va madaniy meros obyektlarini restavratsiya qilish sohalarida hamkorlikni kengaytirish ko‘rib chiqildi.

Shavkat Mirziyoyev va Rejep Tayyip Erdog‘an Keng qamrovli strategik sheriklikni chuqurlashtirish to‘g‘risida qo‘shma deklaratsiyani imzolashdi.

• Ilmiy almashinuv va yuqori texnologiyalar sohasida hamkorlik to‘g‘risida bitim;
• Hududiy rivojlanish sohasidagi hamkorlikni mustahkamlash to‘g‘risida bitim;
• Standartlashtirish sohasidagi hamkorlik to‘g‘risida bitim;
• O‘zbekistonning JSTga a’zo bo‘lishida texnik ko‘mak ko‘rsatish bo‘yicha hamkorlik to‘g‘risida bayonnoma;
• Kosmik fanlar, texnologiyalar va tadqiqotlar sohasida hamkorlik to‘g‘risida bayonnoma;
• Qishloq xo‘jaligi ta’limi sohasidagi hamkorlik to‘g‘risida bayonnoma;
• Energetik rivojlanish sohasidagi hamkorlik to‘g‘risida bayonnoma;
• Madaniyat sohasidagi hamkorlik to‘g‘risida bayonnoma;
• Axborot sohasidagi hamkorlik to‘g‘risida bayonnoma;
• Kadastr masalalari bo‘yicha hamkorlik to‘g‘risida bayonnoma;
• Turizm sohasidagi hamkorlik to‘g‘risida bayonnoma;
• Oila instituti va xotin-qizlarni qo‘llab-quvvatlash sohasidagi hamkorlik to‘g‘risida bayonnoma;
• Boshqaruv kadrlarini tayyorlash sohasidagi hamkorlik to‘g‘risida bayonnoma;
• Huquqiy sohada malaka oshirish bo‘yicha hamkorlik to‘g‘risida bayonnoma.

Shuningdek, imtiyozli savdo, energetika bozorini tartibga solishga oid ikki tomonlama hujjatlar hamda Qishloq xo‘jaligi sohasidagi hamkorlikni kengaytirish bo‘yicha chora-tadbirlar rejasi qabul qilindi.

Markaziy bank tarixda birinchi marta xorijiy davlat qimmatli qog‘ozlariga investitsiya kiritdi, deya xabar berdi regulyator matbuot xizmati.

Jahon banki missiyasi doirasida xalqaro zaxiralarni boshqarishda diversifikatsiyaning ahamiyati, jumladan, xorijiy davlat qimmatli qog‘ozlariga investitsiya qilish, risklarni baholash, shuningdek, Markaziy bankning tarkibiy tegishli bo‘linmalari ish jarayonini to‘g‘ri tashkil etish bo‘yicha maxsus treninglar o‘tkazildi.

Jahon banki ekspertlari regulyator xodimlarining qimmatli qog‘ozlarga investitsiya qilish, savdo va hisob-kitob operatsiyalarini amalga oshirish, buxgalteriya hisobi va muvofiqlikni o‘rnatishda risklarni boshqarish bo‘yicha malakasini oshirishga yordam berdi.

Markaziy bank oltin-valyuta zaxiralarini diversifikatsiya qilish maqsadida qimmatli qog‘ozlarga birlamchi investitsiyalar bo‘yicha operatsiyalarni amalga oshirdi va tegishli investitsiya portfellarini shakllantirdi.

Tashrif yakunlari bo‘yicha Jahon banki g‘aznachiligi ekspertlari xalqaro zaxiralarni boshqarish tizimi va regulyatorning tarkibiy bo‘linmalari faoliyatini takomillashtirish bo‘yicha tavsiyalar berdi.

Bundan tashqari, oltin-valyuta zaxiralari tarkibiga yangi moliyaviy vositalarni kiritish va Markaziy bank xodimlarining malakasini oshirish bo‘yicha kelgusidagi harakatlar to‘g‘risida kelishuvga erishildi.

1-may holatiga ko‘ra, O‘zbekistonning xalqaro zaxira aktivlari $35,1 mlrdni tashkil etdi, bu zaxiralarning to‘rtdan uch qismidan ko‘prog‘i oltin zaxiralariga to‘g‘ri keladi, ularning qiymati 2018-yildan beri eng yuqori ko‘rsatkichga yetdi.

Savdo-sanoat palatasi “Yosh tadbirkor” tanlovida ishtirok etish uchun arizalar qabuli boshlanganini e’lon qildi.

Tanlov Shavkat Mirziyoyev tomonidan e’lon qilingan “O‘zbekiston — 2030” strategiyasini “Yoshlar va biznesni qo‘llab-quvvatlash yili»da amalga oshirishga qaratilgan Davlat dasturi doirasida o‘tkazilmoqda.

Tadbir o‘zbekistonlik yoshlar o‘rtasida tadbirkorlikni rivojlantirish maqsadida tashkil etilmoqda. Tanlovda biznes-reja, innovatsion loyiha yoki startap g‘oyasi bo‘lgan 18 yoshdan 30 yoshgacha bo‘lgan fuqarolar ishtirok etishi mumkin. Tanlov to‘rt bosqichda o‘tkaziladi.

Birinchi bosqichda mahallalar bo‘yicha tanlovda ishtirok etish istagini bildirganlar ro‘yxati shakllantiriladi.

Platformaning ball tizimidan ijobiy baho olgan va hokim yordamchisining tavsiyasiga ega bo‘lgan nomzodlar moliyaviy savodxonlik testini topshirishga taklif qilinadi. Hududiy bosqichga yo‘llanma olish uchun kamida 60 ball to‘plash kerak bo‘ladi.

Keyin ishtirokchilar o‘z loyihalarini mutaxassislarga taqdim etishlari kerak. Har bir hududdan beshta eng yaxshi loyiha tanlovning respublika bosqichida yoshlar oromgohiga taklifnoma oladi.

Final ishtirokchilari tadbirkorlik asoslarini qamrab oluvchi ikki kunlik seminarda qatnashadilar. Shundan so‘ng, ular o‘z loyihalarini uchta eng yaxshi tashabbusni tanlab oladigan tanlov komissiyasiga taqdim etishlari kerak. Birinchi o‘rin uchun mukofot to‘lovlari miqdori 50 mln so‘m, ikkinchi va uchinchi o‘rinlar uchun mos ravishda 40 mln va 30 mln so‘mni tashkil etadi. G‘oliblarga malaka oshirish uchun xorijga sayohatlar ham taqdim etiladi.

Bundan tashqari, barcha finalchilar loyihani rivojlantirish uchun BHMning 1000 baravari (340 mln so‘m)gacha imtiyozli kredit olish bo‘yicha tavsiyanomalar oladi.