O‘zbekistonga bir oyda qariyb 1 mln nafar turist keldi, deb xabar berdi Milliy statistika qo‘mitasi.

Qayd etilishicha, yanvar oyida jami 950 278 nafar chet el fuqarolari turistik maqsadlarda O‘zbekistonga tashrif buyurgan. Mazkur ko‘rsatkich o‘tgan yilning mos davri bilan solishtirilganda 271,6 ming nafarga yoki 40%ga oshgan.

Sayyohlar tashrifi bo‘yicha Qirg‘iziston yetakchilik qilmoqda. Xususan, ushbu mamlakatdan 282 798 kishi kelgan.

Keyingi o‘rinlarni esa Tojikiston (244 373 nafar) va Qozog‘iston (207 858 nafar) egallagan.

Shuningdek, 69 ming nafardan ko‘proq kishi Rossiyadan, 43,5 ming kishi Afg‘onistondan tashrif buyurgan.

Keyingi o‘rinlar mos ravishda quyidagicha:

• Turkmaniston — 28 150 nafar;
• Xitoy — 25 666 nafar;
• Turkiya — 12 740 nafar;
• Hindiston — 6 095 nafar;
• Janubiy Koreya — 3 237 nafar.

Prezident 2026-yil uchun davlat dasturini tasdiqlagani haqida xabar berildi. Hujjat bilan, 2026−2027-o‘quv yilidan Qoraqalpog‘iston Respublikasi, Xorazm, Buxoro, Jizzax, Qashqadaryo, Samarqand va Farg‘ona viloyatlaridagi kasbiy mahorat texnikumlarida Kasblar shaharchalari tashkil etiladi.

Shaharchalarning asosiy vazifalari etib maktab o‘quvchilarini qurilish, xizmat ko‘rsatish, qishloq xo‘jaligi, sanoat, transport, “yashil” energetika kabi sohalardagi zamonaviy kasblarga yo‘naltirish belgilanadi.

U yerda maktab o‘quvchilari uchun ekskursiyalar tashkil etilib, amaliy harakatlar orqali kasblar bilan tanishish imkoniyati yaratiladi. O‘quvchilarda muayyan kasbga qiziqish moyilligini test va boshqa zamonaviy interaktiv usullar orqali aniqlash amaliyoti yo‘lga qo‘yiladi.

Shuningdek, 11-sinf bitiruvchilari orasida oliy taʼlimga qiziqishi past bo‘lgan o‘quvchilar aniqlanadi.

May-avgust oylarida maktablarda Kasb tanlash haftaligi tadbiri va kasbga yo‘naltirish ishlari tashkil qilinadi. Bunda o‘quvchilarni texnikumlarda o‘qitiladigan kasb va mutaxassisliklar bilan tanishtirish maqsad qilingan.

Natijada o‘qish istagida bo‘lgan yoshlar texnikumlarga qabul qilinadi. Yil yakunida 200 mingga yaqin o‘quvchilar kasbga o‘qitilishi kutilmoqda.

1-martdan texnikum o‘quvchilari va yoshlar o‘rtasida prezident sovrini uchun Yangi O‘zbekiston bunyodkorlari kasbiy mahorat milliy tanlovi o‘tkaziladi. Tanlov o‘tkaziladigan 10 ta kasb belgilanib, hududlar darajasida 700 nafar sovrindor saralab olinadi.

Respublika bosqichida esa 120 nafar sovrindor aniqlanadi. Tanlov g‘oliblari 4,9 mln so‘mdan 41,2 mln so‘mgacha miqdorda rag‘batlantiriladi. Respublika g‘oliblari xalqaro musobaqalarga tayyorlanadi va xalqaro musobaqa g‘oliblari 1 mlrd so‘mgacha rag‘batlantiriladi.

Avgustdan boshlab Xitoy tajribasi asosida 20 ta texnikumda O‘zbekiston — Xitoy ustaxonalari tashkil etiladi.

Germaniya, Shveysariya, Xitoy, Janubiy Koreya va Buyuk Britaniyaning xalqaro taʼlim dasturlari asosida kadrlar tayyorlaydigan texnikumlar ro‘yxati shakllantiriladi. Bunda 60 ta kasb bo‘yicha taʼlim dasturlari ishlab chiqiladi va joriy etiladi. Natijada 8 ming nafar o‘quvchi qamrab olinadi.

2026−2027-o‘quv yilidan boshlab dual taʼlimda tahsil olayotgan o‘quvchilarga stipendiya to‘lash amaliyoti yo‘lga qo‘yiladi. Jumladan, har bir o‘quvchiga BHMning 1 baravari (412 ming so‘m), fanlarni o‘zlashtirish ko‘rsatkichi 85%dan yuqori bo‘lgan o‘quvchilarga BHMning 3 baravari (1,236 mln so‘m) miqdorida stipendiya to‘lanadi.

Texnikum bitiruvchilarini ishga qabul qilgan tadbirkorlarga ish haqidan olinadigan ijtimoiy soliqning 1%lik stavkasi bo‘yicha to‘lash huquqini 2030-yilgacha uzaytirish to‘g‘risidagi qonun loyihasi ishlab chiqilib, Qonunchilik palatasiga kiritiladi.

Ilmiy faoliyat sohasidagi tashkilotlar laboratoriya uskunalari bilan taʼminlanadi. Bu bo‘yicha tegishli nizom hukumat qarori bilan nizom tasdiqlandi.

Hujjatga muvofiq, xarid uchun ariza masʼul shaxslar tomonidan rasmiylashtiriladi. Ilmiy loyihalarda arizani loyiha rahbari, ilmiy mavzularda esa ilmiy bo‘linma rahbari yoki tegishli mavzu rahbari taqdim etadi.

Dissertatsiya tadqiqotlarida ariza doktorantning ilmiy rahbari yoki kelishuv asosida ilmiy daraja va unvonga ega doktorantlardan biri tomonidan beriladi.

Arizada ilmiy faoliyat yo‘nalishlarini ko‘rsatgan holda markazlashgan davlat xaridi yoki mustaqil ravishda xarid usullaridan birini amalga oshirish ko‘rsatiladi.

Ariza, maxsus axborot tizimida maʼlum bir ilmiy faoliyat yo‘nalishidagi tadqiqotni bajarishga masʼul tashkilot rahbari tomonidan kelishilgach, yuboriladi.

Agentlik qabul qilingan arizalar bo‘yicha shakllantirilgan buyurtmalarni 10 ish kuni ichida belgilangan talablarga muvofiqligini ko‘rib chiqadi.

Ko‘rib chiqish natijalari bo‘yicha maʼqullangan arizalar maxsus axborot tizimi orqali Xarid komissiyasiga yuboriladi.

Soliq qo‘mitasi QQS va foyda solig‘i stavkalari pasaytirilishi mumkinligini istisno qilmadi. Bu haqda 17-fevral kuni qo‘mita raisi o‘rinbosari Jahongir Abdiyev soliq forumida ma’lum qildi, deya xabar bermoqda Spot muxbiri.

“Qisqa muddatli rejalarimizda, 2028-yilgacha qo‘shilgan qiymat solig‘i va foyda solig‘i bo‘yicha stavkalarni o‘zgartirish ko‘zda tutilmagan. Soliq qo‘mitasi sifatida biz bu stavkalarning kelgusida ham o‘zgarish rejalarini ko‘rmayapmiz”, — dedi u.

Soliq qo‘mitasi raisi o‘rinbosari QQS (hozir — 12%) va foyda solig‘i (15%) stavkalarini pasaytirish ehtimolini istisno etmadi. Uning ta’kidlashicha, bu yashirin iqtisodiyot hajmining pasayishi va yalpi ichki mahsulotda soliq tushumlari ulushining oshishi hisobiga amalga oshirilishi mumkin. “Shundagina stavkalarni faqat pasaytirish nuqtayi nazaridan ko‘rib chiqish mumkin bo‘ladi”, — dedi u.

Yangilangan “O‘zbekiston-2030” strategiyasi loyihasiga ko‘ra, besh yil ichida soliq tushumlarining YIMdagi ulushini 19,2% gacha oshirish rejalashtirilgan. Joriy yilda bu ko‘rsatkich 16% ga, 2027-yilda 17% ga, 2028-yilda 18% ga va 2029-yilda 18,7% ga yetishi kutilmoqda.

Shu tariqa, 2030-yilga kelib, mamlakat yalpi ichki mahsuloti $240 mlrddan oshishi sharti bilan soliq tushumlari $46 mlrddan oshishi prognoz qilinmoqda.