Nyu-Yorkdagi “Shoptiques” kompaniyasining asoschisi Olga Vidishcheva 2003-yilda 17 yoshida Qirg‘izistondan AQShga ko‘chib boradi. Dastlab yapon restoraniga ofitsiant sifatida ishga kiradi.
AQShga borgan vaqtida umuman ingliz tilini bilmagan Olga yarim yildan so‘ng TOEFL imtihoniga tayyorlanishni boshlaydi. Restoranda uch oy ishlab topgan 4000 dollarini o‘qish uchun sarflaydi.
Ikkinchi yilda Uellsli kollejida o‘qiydi va bir vaqtning o‘zida model sifatida ishlaydi. Iqtisodiyot va matematika sohasida diplomga ega bo‘lgach, “Goldman Sachs” kompaniyasida investitsiya tahlilchisi sifatida ishlay boshlaydi.
Keyinchalik Garvard biznes maktabida biznes boshqaruvi bo‘yicha o‘qiydi. 2009-yilda Olga internetda topib bo‘lmaydigan butiklarning buyumlarini sotish bo‘yicha loyiha ustida ishlay boshlaydi va 2011-yilga kelib o‘z loyihasini amalga oshirishga muvaffaq bo‘lib, hamma joyda ham topib bo‘lmaydigan buyumlarni sotuvchi saytni ishga tushiradi.
2013-yilda “Shoptiques”ning daromadlari 300 ming dollarni, 2014-yilda esa 3 million dollarni tashkil qiladi. 2017-yilda saytda o‘z buyumlarini sotuvchi butiklar soni Nyu-York va Bostondagi 25 tadan 12 ta mamlakatdagi 5000 taga oshadi.
