Indra Krishnamurti Nuyi — hind-amerikalik ishbilarmon ayol. 2006 yildan 2018-yilgacha dunyodagi ikkinchi yirik oziq-ovqat kompaniyasi “PepsiCo” direktorlar kengashi raisi va bosh direktori lavozimida ishlagan. AQSHning 45-prezidenti Donald Trampga iqtisodiy o‘sish, ish bilan bog‘liq masalalar bo‘yicha maslahat berib turgan Amerikaning 19 ta eng muvaffaqiyatli va obro‘li biznes rahbarlaridan iborat Prezidentlik forumi a‘zosi bo‘lgan.
Indra Hindistonning Chennay shahrida tug‘ilgan. Dastlab fizika, kimyo va matematika bo‘yicha bakalavr darajasini, keyinchalik Hindiston menejment institutida boshqaruv bo‘yicha diplom olgan. O‘z faoliyatini Hindistonda boshlagan Nuyi “Johnson & Johnson” va “Mettur Beardsell” to‘qimachilik firmasida mahsulot menejeri lavozimlarida ishlagan.
Keyinroq Yel universitetining menejment maktabiga o‘qishga kirib, davlat va xususiy boshqaruv bo‘yicha magistrlik darajasini olgan. Shundan so‘ng Boston konsalting guruhida ishlagan, keyinchalik “Motorola” va “Asea Braun Boveri” kompaniyalarida yuqori lavozimlarda ishlagan.
1994-yilda esa “PepsiCo” kompaniyasida ishlay boshlagan. 2001-yilda kompaniya prezidenti va bosh moliyaviy direktori bo‘lgan. O‘n yildan ortiq vaqt davomida “PepsiCo”ning global strategiyasini amalga oshirgan, kompaniyani qayta tuzgan. Nuyining tashabbusi bilan 1998-yilda “Tropicana”, 2001-yilda esa “Quaker Oats” kompaniyasi sotib olingan. 2007-yilda u “PepsiCo” kompaniyasining 44 yillik tarixidagi beshinchi bosh direktorga aylangan.
“BusinessWeek” ma‘lumotlariga ko‘ra, Nuyi 2000-yilda moliyaviy direktor bo‘lganidan buyon kompaniyaning yillik daromadi 72 foizga o‘sgan, sof daromad esa 2006 yilda 5,6 milliard dollarni tashkil etgan.
2007 va 2008-yillarda “The Wall Street Journal” Nuyini kuzatiluvchi 50 ta ayol roʻyxatiga kiritgan. “Time” uni dunyodagi eng nufuzli 100 kishi qatoriga qo‘shgan. 2008-yilda “Forbes” tomonidan dunyodagi uchinchi eng nufuzli ayol, “Fortune” tomonidan 2009 va 2010-yillarda biznesdagi eng qudratli ayol deb e’lon qilingan.
