Shavkat Mirziyoyev raisligida yoshlar siyosatiga bag‘ishlangan videoselektor yig‘ilishi hamda yoshlar bilan muloqot o‘tkazilmoqda.

Unda o‘tgan to‘rt yilda “Oilaviy tadbirkorlik” dasturlari doirasida 13,5 trln so‘m kredit ajratilib, 1 mln yosh band bo‘lgani, “Yoshlar daftari»dan 107 ming o‘g‘il-qizlarga 338 mlrd so‘m subsidiya berilgani qayd etildi.

Bundan tashqari, 205ta “Yoshlar sanoat zonasi»da 2,5 trln so‘mlik 1,2 ming loyiha ishga tushdi. Yaratilgan sharoitlar hisobiga, biznesini “nol»dan boshlab, hozirda aylanmasini million dollardan oshirgan 1,5 ming nafar yoshlar bor.

Yoshlar xorijiy oliygohlarda o‘qish uchun matematika, ingliz tili va ilmiy fikrlash bo‘yicha “SAT” imtihonini topshirmoqda.

Bu testlarda 75%dan yuqori natija ko‘rsatgan o‘quvchilar nufuzli xorijiy oliygohlarga grant qo‘lga kiritmoqda. Endi bunday yoshlar mamlakat oliygohlariga ham grantga qabul qilinishini qayd etdi prezident.

Nogironligi bo‘lgan yoshlarga chet tilidan imtihon topshirish yengillashadi. Jumladan, chet tili bo‘yicha milliy sertifikat (CEFR) olishda qo‘lda yozish imkoniyati bo‘lmaganlarga kompyuterda imtihon topshirish sharoiti yaratiladi.

Prezident maktablari agentligi qoshida “Olimpiadalarga tayyorlash markazi” ochilib, maxsus laboratoriyalar bilan jihozlanadi. Xalqaro olimpiadada qatnashuvchi terma jamoa reja asosida bu markazda tayyorgarlik ko‘radi. Endilikda oliygohlarning birinchi va ikkinchi kurslaridagi fanlar texnikumlar bilan uyg‘unlashadi. Texnikumning birinchi va ikkinchi yilini yaxshi o‘qigan yoshlarga xalqaro klassifikatorning tegishli darajasiga mos keluvchi diplom beriladi.

Ularga oliygohni ikkinchi yoki uchinchi kursidan o‘qishni kontrakt asosida davom ettirish imkoniyati beriladi.

Endi oliygoh, vazirlik va korxonalarga tegishli laboratoriyalarning yagona onlayn platformasi yaratiladi: qaysi laboratoriyada qanday uskuna bor, ular qanday sinovlar qila oladi va qanday quvvatlarda ishlayapti, degan savolga javob bo‘ladi.

Yosh olimlar tadqiqotlari uchun kerak bo‘lgan uskuna, butlovchi qism va kimyoviy vositalar bojdan ozod qilinadi.

Yig‘ilishda bugungi kunda IT-sohasida o‘zini o‘zi band qilgan yoshlar — frilanserlar soni 50 mingdan oshgani ma’lum qilindi.

Bunday yoshlar yiliga $50 ming, $100 ming, hatto $200 minggacha eksport qilmoqda. Biroq, mamlakatda ularni birlashtiradigan, muammolarini eshitib, huquqlarini himoya qiladigan tizim yo‘qligi ko‘rsatib o‘tildi.

Bundan tashqari, mazkur yoshlar 3 yil muddatga barcha soliqlardan ozod qilinadi. “IT Park” tomonidan IT-kompaniyalardagi kabi tibbiyot, sport va ofisdan foydalanishi uchun ularga “ijtimoiy karta” beriladi.

Shuningdek, yoshlarni ushbu sohaga jalb qilish bo‘yicha alohida dastur amalga oshiriladi.

May oyi oxirida “IT Park” rezidentlari uchun minimal eksport talablari belgilangandi. Joriy yilning 1-oktabridan eksport yirik rezidentlar umumiy daromadining kamida 10%ini tashkil etishi zarur. Bu miqdor bosqichma-bosqich oshirib boriladi.

Texnopark 101ta kompaniyani rezident maqomidan mahrum qildi. Bunga ularning o‘z majburiyatlarini bajarmaganligi sabab bo‘lgan.

“IT Park” rezidentlarining yagona reyestriga ko‘ra, ayni paytda bu maqomga ega 2187ta kompaniya mavjud.

Avvalroq yoshlarni xorijiy tillarga o‘qitish tizimi samaradorligini oshirish bo‘yicha prezident qarori qabul qilingani haqida xabar berilgandi.

Hujjat bilan, joriy yilning 1-oktabridan Yoshlar ishlari agentligi har yili xususiy o‘quv markazlarining Qoraqalpog‘iston Respublikasi, viloyatlar va Toshkent shahri kesimidagi reytingini tuzadi. Uning natijalari esa rasmiy agentlikning veb-saytida e’lon qilib boriladi.

Reyting natijalariga ko‘ra olis va chekka hududlarda faoliyat ko‘rsatuvchi eng yuqori ko‘rsatkichga ega 100ta xususiy o‘quv markazining ta’lim jarayonida foydalanadigan bino va inshootlar uchun ijara to‘lovi xarajatlarining bir qismi kompensatsiya qilinadi. 2024−2026 yillarda OTMlarning xorijiy til filologiyasi ta’lim yo‘nalishi bo‘yicha 3 va 4-kursda tahsil olayotgan hamda kamida C1 darajadagi sertifikatga ega talabalariga umumiy o‘rta, o‘rta maxsus va professional ta’lim tashkilotlarida o‘qituvchi sifatida ishlashlariga ruxsat etiladi.

2024−2025 o‘quv yilidan ota-onalar va o‘quvchilar talabidan kelib chiqib, ixtisoslashtirilgan maktablar va kasb-hunar maktablarida chet tili sifatida nemis, fransuz, koreys, xitoy va yapon tillarini o‘qitish yo‘lga qo‘yiladi.

Shuningdek, ularning xalqaro ta’lim standartlariga mos ta’lim dasturlari “Ibrat farzandlari” va “Ustoz” loyihalariga tatbiq etiladi.

Aynan “Ustoz” loyihasi doirasida 250 ming nafar yoshlar marketing, reklama, elektron savdo, IT-dizayner kabi 30ta kasbga o‘rgatilishi belgilangan.

Unga ko‘ra, Yoshlar ishlari agentligi zimmasiga quyidagi qo‘shimcha funksiyalar yuklandi:

• yoshlarni xorijiy tillarga o‘qitish jarayonlarini takomillashtirish, talab yuqori bo‘lgan chet tillarini mukammal o‘zlashtirish uchun sharoitlarni kengaytirish;
• xorijiy tillarni o‘qitish faoliyati bilan shug‘ullanuvchi YTTlar, o‘zini o‘zi band qilgan shaxslar hamda nodavlat ta’lim tashkilotlari (xususiy o‘quv markazlari), bu yo‘nalishda faoliyat yurituvchi boshqa NNTlarni rivojlantirish va qo‘llab-quvvatlash, sohadagi muammolarni muntazam ravishda tahlil qilish va ularning yechimi bo‘yicha takliflar tayyorlash;
• xususiy o‘quv markazlari reytingini shakllantirish hamda reytingda yuqori o‘rinni egallaganlarni rag‘batlantirish;
• yoshlar orasida kasb-hunar va xorijiy tillarni o‘rganishni targ‘ib qilish, bu yo‘nalishdagi ijtimoiy loyihalar, ko‘rik-tanlov va olimpiadalarni tashkil etish. Hujjat bilan, imtihon topshirish xarajati qoplanadigan xalqaro imtihon tizimlari bo‘yicha ingliz, nemis, fransuz, koreys, xitoy va yapon tillaridan kamida C1 yoki unga tenglashtirilgan mos darajadagi sertifikat olgan yoshlar moddiy rag‘batlantiriladi.

Ularga imtihon topshirish xarajatlarini kompensatsiya qilishga qo‘shimcha o‘qish xarajatlarini qoplash uchun BHMning 3 baravari — 1,02 mln so‘m miqdorida bir martalik moddiy yordam beriladi.

Shuningdek, umumiy o‘rta ta’lim muassasalarining sinf xonalarini ta’lim jarayonidan bo‘sh vaqtda tekin foydalanish huquqi bilan xususiy o‘quv markazlariga berishga ruxsat etiladi. Bunda o‘quv markazlari sinf xonalarini kasb-hunar va xorijiy tillarni o‘qitish faoliyatini amalga oshirish uchun to‘g‘ridan-to‘g‘ri shartnomalar asosida olishlari mumkin.

Shuningdek, tegishli maktablar ro‘yxati Maktabgacha va maktab ta’limi vazirligi tomonidan tasdiqlanadi.

Fevral oyida prezident ishtirokidagi yig‘ilishda joriy yil sertifikat olishdagi imtihon xarajati bilan birga, 6 oylik o‘qish puli ham to‘lab berilishi ma’lum qilingandi. Maktablardagi bo‘sh sinf xonalari chet tili repetitorlari va o‘quv markazlari uchun bepul ijaraga beriladi.

1-martdan boshlab xalqaro IT-sertifikatlar xarajatlarini qoplab berish miqdori oshirildi. Bunda IT-sertifikatlarga ega yoshlarning o‘qish hamda sertifikatlarni olish xarajatlarining 60%gacha qismi qoplab beriladi. Agar ingliz tili darajasi B2 va undan yuqori bo‘lsa, xarajatlar to‘liq qoplanadi.