Prezident sunʼiy intellekt texnologiyalarini yana-da rivojlantirish bo‘yicha farmonni imzoladi.

Hujjat bilan, Sun‘iy intellekt alyansi nodavlat notijorat tashkiloti tashkil etiladi. U davlat organlari, xususiy sektor va ilmiy jamoatchilik sa‘y-harakatlarini birlashtirish, xalqaro hamkorlik va PR-kampaniyalarni amalga oshirish bilan shug‘ullanadi.

Shuningdek, yoshlarning sun‘iy intellekt texnologiyalariga qiziqishini oshirish va startap ekotizimini yana-da qo‘llab-quvvatlash maqsadida Umummilliy sun‘iy intellekt xakatoni yo‘lga qo‘yiladi.

2026-yil 1-martga qadar sun‘iy intellektni qo‘llagan holda ob-havoni oldindan prognoz qilish tizimi joriy qilinadi. Shu bilan birga, 2026-yil yakuniga qadar kamida 15 mlrd parametrni o‘z ichiga olgan O‘zbek tili korpusi yaratiladi hamda u kamida 5 ta ochiq katta til modellariga joriy etiladi.

Umumiy o‘rta ta‘lim tashkilotlarining o‘quvchilarini sun‘iy intellekt bo‘yicha o‘qitish, bilim va ko‘nikmalarini oshirishga qaratilgan Sun‘iy intellekt kuni milliy dasturi joriy etiladi. Dastur doirasida o‘quvchilar darsliklari va o‘qituvchilar uchun qo‘llanmalar ishlab chiqiladi.

Bir mln sun‘iy intellekt yetakchilari loyihasi kengaytiriladi va yil yakunlari bo‘yicha eng yuqori natija ko‘rsatgan yoshlar, o‘qituvchilar hamda ta‘lim tashkilotlarini taqdirlash bo‘yicha milliy tanlov o‘tkaziladi.

2026-yil 1-martga qadar Yangi O‘zbekiston universiteti bazasida homiylik mablag‘lari hisobidan Sun‘iy intellekt klasteri tashkil etiladi.

Qoraqalpog‘iston Respublikasi Vazirlar Kengashi, viloyatlar va Toshkent shahri hamda tuman (shahar) hokimliklarida raqamli texnologiyalar hamda sun‘iy intellekt texnologiyalarini rivojlantirishga mas‘ul bo‘lgan maslahatchi lavozimi joriy etiladi.

O‘zbekiston OpenAI kompaniyasi bilan birgalikda sun’iy intellekt sohasida bir nechta loyihalarni amalga oshirmoqda. Bu haqda Prezident Administratsiyasi Moliyaviy texnologiyalar, sun’iy intellekt va raqamlashtirish departamenti rahbari o‘rinbosari Hikmatilla Ubaydullayev ma’lum qildi.

Tomonlar o‘tgan hafta oxirida bo‘lib o‘tgan onlayn uchrashuvda hamkorlik imkoniyatlari va istiqbollarini muhokama qildilar. Muzokaralarda OpenAI nomidan kompaniyaning ta’lim va hamkorlik yo‘nalishlari rahbarlari Valeri Fokke, Dips Patel, Shaig Ali va Karlotta Serrano ishtirok etdi.

Asosiy mavzulardan biri O‘zbekistonda ChatGPT Edu ta’lim platformasining ishga tushirilishi bo‘ldi. Tizim o‘qituvchilar va talabalarga til modellari bilan ishlash uchun himoyalangan muhit, sun’iy intellekt yordamchilari va o‘quv materiallarini yaratish imkoniyatini beradi.

Shuningdek, tomonlar sun’iy intellektga asoslangan shaxsiylashtirilgan ta’limni joriy etish masalalariga to‘xtaldilar. Bu sun’iy intellekt har bir o‘quvchining ehtiyojlari, sur’ati, bilim darajasi va qiziqishlariga moslashtiriladigan yondashuvdir. Tizim individual topshiriqlar berishni soddalashtiradi, ishlarni tekshirishni avtomatlashtiradi va o‘qituvchilar uchun byurokratiyani kamaytiradi.

“Bu bolaga dasturda belgilangan narsalarni emas, balki u haqiqatan ham tushunishi kerak bo‘lgan narsalarni tushuntirish tizimiga yo‘l ochadi. Kasrlarni bilmaydiganlar uchun endi logarifmlar yo‘q”, — dedi Ubaydullayev.

OpenAI kurslari va ekspertizasi One Million AI Leaders milliy tashabbusiga qo‘shimcha bo‘lib xizmat qiladi. Ular yordamida o‘zbekistonlik o‘quvchilar, talabalar va o‘qituvchilar jahon standartlari bo‘yicha sun’iy intellekt bilan ishlashni o‘rganishlari mumkin.

Bundan tashqari, til modellarini mahalliy sharoitga moslashtirish uchun o‘zbek tilida ma’lumotlar korpusini yaratish mavzusiga ham to‘xtalib o‘tildi. OpenAI vakillari o‘z modellari “o‘zbek tilini ishonch bilan tushunishini” ta’kidlab, bu yo‘nalishda hamkorlikda ishlashga qiziqish bildirdi.

Tomonlar uchta yo‘nalish bo‘yicha yo‘l xaritasini ishlab chiqishga kelishib oldilar:

• O‘zbekiston oliy ta’lim muassasalarida ChatGPT Edu dasturini joriy etish;
• ommaviy sun’iy intellekt ta’limini rivojlantirish;
• startap loyihalar va xakatonlarni qo‘llab-quvvatlash.

Shavkat Mirziyoyev 27-oktabr kuni geologiya sohasiga ilg‘or xalqaro tajriba va kompetensiyalarni joriy etish yuzasidan taqdimot bilan tanishdi. Bu haqda prezident matbuot xizmati xabar berdi.

Yig‘ilishda mamlakat geologiya tizimini zamonaviy ilmiy va texnologik asosda rivojlantirish, qazilma boyliklar bo‘yicha resurs bazasini kengaytirish hamda mineral xomashyoni chuqur qayta ishlashni ta‘minlash dolzarb vazifa ekani ta‘kidlandi.

Dunyo tajribasi geologiya-qidiruv ishlarini o‘tkazish murakkab bo‘lgan hududlarda ham sun‘iy intellekt yordamida yangi konlarni aniqlash mumkinligini ko‘rsatyapti. Bu borada regional tadqiqotlarni kengaytirish va zamonaviy geofizik usullardan foydalanish qo‘l keladi.

Shu maqsadda mutasaddilar xalqaro hamkorlar, jumladan, kon-geologiya sohasida dunyoda ilg‘or bo‘lgan AQShning Kolorado konchilik maktabi bilan birgalikda ilmiy tadqiqot va amaliy ishlanmalarni birlashtiruvchi Kompetensiyalar markazini tashkil etish loyihasi to‘g‘risida axborot berdi.

Markaz vazifasi qidiruv ishlariga raqamli yechimlar, sun‘iy intellekt va aerogeofizik texnologiyalarni joriy etishdan iborat bo‘ladi. Ilg‘or xorijiy tajribaga asoslanib, ma‘lumotlarni raqamli shaklda tahlil qilish, geokimyoviy va kosmogeologik tadqiqotlar natijalarini integratsiyalash hamda istiqbolli konlarni aniqlashni tezlashtiradi.

Davlat rahbari takliflarni ma‘qullab, tarmoqda xalqaro hamkorlikni mustahkamlash va zamonaviy texnologiyalarni keng joriy etish orqali istiqbolli maydonlarni aniqlash hamda o‘zlashtirishni tashkil etish yuzasidan qator topshiriqlar berdi.

“Kambagʻal oilalar reyestri”ga kiritilgan oilalarning farzandlari uchun nodavlat bogʻchalarida ota-onalar toʻlovining bir qismini Davlat byudjetidan qoplab beriladi. Bu haqda Adliya vazirligi xabar qildi.

Qayd etilishicha, toʻlovning bir qismi qoplab beriladigan oila bolalari roʻyxati axborot tizimi orqali avtomatik ravishda shakllantiriladi.

Bunda oilaviy MTTga kompensatsiya tegishli hududda 9 soatlik ish rejimidagi umumiy tipdagi davlat maktabgacha taʼlim tashkilotlari uchun belgilangan ota-onalar toʻlovining 40 foizi miqdorida ajratiladi.

Pullar bogʻchaga haqiqatda qatnayotgan ehtiyojmand oila farzandlari sonidan kelib chiqib, MTT uchun belgilangan oʻrinlarning 15 foizidan koʻp boʻlmagan qismiga ajratiladi.