Og‘ir yuk avtomobillari, kon va shaxtalarda foydalaniladigan maxsus transportlar, yo‘nalishsiz taksilar hamda antikvar avtomobillar uchun alohida davlat raqamlari joriy etiladi.

Yo‘l harakati xavfsizligini taʼminlash sohasi raqamlashtiriladi. Bu bo‘yicha hukumatning tegishli qarori qabul qilindi.

Hujjat ko‘ra, Jamoat xavfsizligi departamenti Yo‘l harakati xavfsizligi xizmati axborot tizimi Ma‘muriy amaliyot moduli masʼul vazirlik va idoralarning axborot tizimlariga integratsiya qilinadi.

2026-yil 1-fevraldan umumiy vazni (yuki bilan) 44 tonnadan ortiq yuk avtomobillari, kon, shaxta va karyerlarda qo‘llaniladigan maxsus transport vositalari uchun alohida seriyali ro‘yxatdan o‘tkazish davlat raqamlari joriy etiladi.

Shuningdek, yuridik shaxslarga tegishli yo‘nalishsiz taksilar hamda “antikvar” avtomototransport vositalari uchun ham maxsus seriyali davlat raqam belgilari belgilanadi.

Avtomototransport ro‘yxatdan o‘tkazilganligi to‘g‘risidagi guvohnomada mulkdorning manzilini ko‘rsatish talabi bekor qilinadi.

Avtomototransportni davlat ro‘yxatidan o‘tkazishda zarur hujjatlarni vakolatli organlardan idoralararo elektron hamkorlik orqali olish tizimi joriy etiladi. Bunda avtomototransport oldi-sotdi shartnomasi, Elektron onlayn auksionlarni tashkil etish aksiyadorlik jamiyati tomonidan berilgan auksion bayonnomalari elektron tarzda qabul qilinadi.

Davlat ulushi mavjud korxonalar ishlab chiqargan avtomototransportlarga oid elektron hisob-maʼlumotlar ham olinadi.

Avtomototransport vositasi mulkdorining maʼlumotlari ham mazkur tizim orqali avtomatik ravishda shakllantiriladi.

O‘tgan yilning oktabrida Ichki ishlar vazirligi ushbu qaror loyihasini muhokamaga qo‘ygandi. U bilan chiqqaniga 50 yil va undan ortiq bo‘lgan avtomototransport vositalaridan foydalanish, ularni qayta ro‘yxatga olish taqiqlanadi hamda ular davlat ro‘yxatidan chiqarish taklif qilingandi.

Qayd etilishicha, bunday avtotransport vositalari xavfsizlik talablariga javob bermaydi va ekologik me’yorlarga (Yevro-4, Yevro-5) mos emas, 30% ko‘proq zararli gaz ajratadi hamda eski transport vositalari davlat raqam belgisini noqonuniy taqib yurish (139 ta holat aniqlangan) holatlari oshmoqda.

Loyihada antikvar avtomobillar uchun alohida davlat raqami qanday ko‘rinishda bo‘lishi ilova qilingandi. Xususan:

• I-6 va III-3 tip — ro‘yxatdan o‘tkazish davlat raqami belgilari yuridik hamda jismoniy shaxslarga;
• IA-4 tip va IIIA-3 tip — ikki qatorli ro‘yxatdan o‘tkazish davlat raqami belgilari yuridik ham jismoniy shaxslarning “antikvar” turidagi yuk avtomobillari va avtobuslarga, shuningdek, mahkamlash joyi I-tipdagi va III-tipdagi ro‘yxatdan o‘tkazish davlat raqami gabaritlariga muvofiq bo‘lmagan “antikvar” yengil avtomobillariga orqa tomonga mahkamlash uchun;
• XI-4 tip — “antikvar” mototsikllar va elektromototsillar uchun ikki qatorli ro‘yxatdan o‘tkazish davlat raqami belgilari.

Ro‘yxatdan o‘tkazish davlat raqami belgilarining foni olovli rangda, chetki qismi, raqam va harflari qora rangda tasvirlanadi. Shuningdek, hudud kodi, O‘zbekiston bayrog‘i va UZ harflari mavjud bo‘ladi.

Qonun bilan SIdan foydalanib shaxsga doir maʼlumotlarga ishlov berish yoki ularni internetda tarqatish uchun javobgarlik belgilandi.

Sunʼiy intellekt yordamida shaxsga doir maʼlumotlarga noqonuniy ishlov berganlik uchun javobgarlik belgilandi. Bu haqdagi tegishli qonun qabul qilindi.

Hujjat bilan “Axborotlashtirish to‘g‘risida»gi qonun ga bir qator qo‘shimcha va o‘zgartirishlar kiritildi.

Jumladan, sunʼiy intellekt texnologiyalaridan foydalanishning umumiy asoslari belgilandi. Ushbu sohadagi vakolatli davlat organining vakolatlari aniqlashtirildi.

Unga ko‘ra, sunʼiy intellekt — insonning bilim va ko‘nikmalariga taqlid qilish, mustaqil o‘rganish, yechimlarni izlash va aniq vazifalarni bajarishda inson aqliy faoliyati natijalari bilan taqqoslanadigan natijalarni olish imkonini beruvchi texnologik yechimlar majmui.

Sunʼiy intellektdan foydalanib shaxsga doir maʼlumotlarga qonunga xilof ravishda ishlov berish yoki ularni OAV, telekommunikatsiya tarmoqlari yoki internetda tarqatish maʼmuriy javobgarlikka sabab bo‘ladi.

Bunda huquqbuzarlik qurollari musodara qilinib, BHMning 50−100 baravarigacha, yaʼni 41,2 mln so‘mgacha jarima solinadi.

Qonun rasmiy eʼlon qilingan kundan eʼtiboran kuchga kiradi.

2025-yilning noyabrida Senat sunʼiy intellektdan foydalanishni tartibga soluvchi qonunni maʼqullagandi. Hujjat SIdan foydalanish qoidalarini, maxsus vakolatli organning vazifalarini taʼminlash tartibini belgilaydi.

Jismoniy shaxslarga ID-karta birinchi bor rasmiylashtirilganda uning chipiga kiritiladigan elektron raqamli imzo sertifikati bepul beriladi hamda fuqaro Elektron hukumat tizimida avtomatik ro‘yxatdan o‘tkaziladi.

19-yanvar kuni ichki ishlar organlarining migratsiya va personallashtirish sohasidagi faoliyatini raqamlashtirish orqali sifatini yaxshilash chora-tadbirlari to‘g‘risidagi prezident qarori (PQ-14-son) qabul qilindi.

Hujjat bilan, 2026-yil 1-fevraldan boshlab jismoniy shaxslarga identifikatsiyalovchi ID-kartalar birinchi marotaba rasmiylashtirilganda uning chipiga kiritiladigan elektron raqamli imzo sertifikati bepul beriladi.

Shu bilan birga, fuqaroni “Elektron hukumat” tizimi foydalanuvchilari identifikatsiyalash yagona axborot tizimida avtomatik tarzda bepul ro‘yxatdan o‘tkaziladi.

Bundan tashqari, Ichki ishlar vazirligi huzuridagi Migratsiya va personallashtirish departamenti jismoniy shaxslarning markaziy ma’lumotlar bazalarini shakllantirish va doimiy yangilab borish bo‘yicha vakolatli organ hisoblanadi.

• chet el fuqarolari va fuqaroligi bo‘lmagan shaxslarning, shuningdek, O‘zbekiston fuqarolarining yashash va turgan joyi bo‘yicha ro‘yxatga olingan manzili to‘g‘risidagi ma’lumotlar;
• ID-karta seriyasi, raqami, berilgan joyi hamda berilgan va tugash sanasi to‘g‘risidagi ma’lumotlar;
• O‘zbekiston fuqaroligi to‘g‘risidagi ma’lumotlar;
• O‘zbekiston fuqarolari, mamlakatda doimiy yashovchi chet el fuqarolari va fuqaroligi bo‘lmaganlar to‘g‘risidagi ma’lumotlar;
• O‘zbekistonga taklif qilingan chet el fuqarolari va fuqaroligi bo‘lmaganlar hamda ularning viza muddati uzaytirilganligi to‘g‘risidagi ma’lumotlar.

2025-yilning 1-iyulidan MyGov ilovasida ayrim hujjatlarning elektron shakllari joriy etildi. Ularni banklar, notarial idoralar, ichki avia hamda temir yo‘l qatnovlarida, shuningdek, davlat va korporativ xizmatlardan foydalanishda qog‘oz shaklining o‘rniga taqdim etish mumkin.

1-noyabrdan Yagona portalda jismoniy shaxslarning tegishli maʼlumotlari ularning qog‘oz shakliga tenglashtirilib, MyGov orqali ko‘rsatilganda davlat organlari va tashkilotlar qog‘oz shaklini talab qilish taqiqlandi.

BYD Uzbekistan Factory va ADM Jizzakh kompaniyalari UzAuto Motors hisobidan o‘z bozor ulushlarini ko‘paytirdilar.

2025-yil davomida mahalliy va import ishlab chiqarilgan yangi yengil avtomobillar savdosi 5,2%ga oshib, qariyb 370 ming donani tashkil etdi. Bu haqda Iqtisodiy tadqiqotlar va islohotlar markazi tahlilida keltirilgan.

Hududiy kesimda eng yuqori faollik Sirdaryo (45%), Toshkent (36%), Namangan (26%) va Qashqadaryo (21%) viloyatida qayd etildi.

Shu bilan birga, yil davomida yangi yengil avtomobillar realizatsiyasi hajmi Toshkent shahrida, Navoiy va Xorazm viloyatlarida kamaygani kuzatildi.

O‘tgan yil davomida mahalliy ishlab chiqarilgan yangi avtomobillar segmentidagi savdo hajmi 315 ming donanidan oshdi.

O‘tgan yil davomida yangi elektromobillar sotuvi 35%ga oshib, 40,7 ming donani tashkil etdi. Bu ko‘rsatkich bozor o‘sishini ta’minlagan asosiy drayverlardan biri bo‘ldi.

Hududiy kesimda tahlil mazkur segmentda faollikning yuqori darajada jamlanganini tasdiqlaydi. Elektromobillar sotuvining asosiy qismi Toshkent shahriga to‘g‘ri kelib, bu yerda 29 mingta yangi elektromobil realizatsiya qilingan, ya’ni umumiy hajmning 71%i.

Keyingi o‘rinlarda Samarqand viloyati, Toshkent viloyati hamda Qashqadaryo viloyati qayd etildi.

Brendlar va modellar

2025-yilda yangi avtomobillar (yengil tijorat transporti bilan birga) savdosi 427 097 donani tashkil etdi, bu o‘tgan yilga nisbatan 6,1% ko‘p. Ishlab chiqaruvchilar orasida yetakchilikni UzAuto Motors saqlab qoldi — 355,3 ming dona avtomobil yoki bozorning 83,2%i.

ADM Jizzakh (Kia, Chery, Haval, Hyundai, Changan) ulushi 10,8% gacha, BYD Uzbekistan Factory ulushi esa 5,6% gacha oshdi. Qolgan kompaniyalar — Asaka Motors, SamAuto, Alyans Auto — jami savdoning 0,4%iga to‘g‘ri keladi.

Eng mashhur model hanuz Cobalt bo‘lib qolmoqda: yil davomida 128,5 ming dona (30%) sotilgan. Ikkinchi o‘rinda Damas — 108,8 ming dona (25,5%), uchinchi o‘rinda Tracker krossoveri — 45,4 ming dona (10,6%). Shuningdek, o‘zbekistonliklar 37,37 ming dona Labo va 33 ming dona Onix xarid qilgan.

Savdo hajmi bo‘yicha eng katta o‘sish Labo va Tracker modellarida qayd etildi — mos ravishda +47,6% va +20%. Damasga talab 2,7%ga, Cobaltniki 1%ga oshgan, Onix savdosi esa 1,9%ga kamaygan.

Boshqa ishlab chiqaruvchilarning top-10 talikka kirgan modellari:

• Kia Sonet — 19,6 ming dona (2,5 barobar ko‘p);
• BYD Song Plus DM-i Champion — 7 305 dona (+12,7%);
• BYD Yuan Up — 6 242 dona (16,4 barobar ko‘p);
• BYD Chazor Champion — 5 087 dona;
• Haval M6 — 4 769 dona (2,45 barobar ko‘p).

Prezident Shvetsiya, Daniya va Norvegiya bilan kelishuvga erishib, joriy yilda 5 ming, 2027-yilda esa kamida 10 ming aholini yuqori daromadli ishlarga yuborishni topshirdi.

Avvalroq 15-yanvar kuni Shavkat Mirziyoyev raisligida Tashqi ishlar vazirligi va xorijdagi diplomatik vakolatxonalar faoliyati yuzasidan videoselektor yig‘ilishi o‘tkazilgani haqida xabar berilgandi.

Prezident fuqarolarga xorijda yuqori daromadli ish o‘rinlarini topib berish masalasiga to‘xtalib, igari aholi asosan ikki-uchta davlatga borib ishlagan bo‘lsa, hozirda tashkiliy migratsiya asosida 30 dan ortiq davlatda mehnat qilayotganini qayd etdi.

Tahlillar Shvetsiya, Daniya va Norvegiyada 300 ming ishchilarga ehtiyoj mavjudligini ko‘rsatgan. Norvegiyalik ish beruvchilar bu yilning o‘zida 3 ming fuqaroni o‘zlari o‘qitib, ularga Yevropa standartlari asosida sertifikat berishga hamda kamida 2,5−3 ming yevrolik ish bilan ta’minlashga tayyorligi ta’kidlandi. Shvetsiya esa grant asosida ijtimoiy xodimlarni tayyorlab, 2026-yilning o‘zida 500 nafarini ishga olish taklifini bermoqda.

“Umuman, Nordik davlatlar — Shvetsiya, Norvegiya, Daniya, Finlandiya, Islandiya tashqi mehnat migratsiyasida biz uchun yangi yo‘nalish va kamida 500 mln yevrolik mehnat bozori bo‘ladi”, — dedi Shavkat Mirziyoyev.

Shundan kelib chiqib, Behzod Musayev, Rahmatulla Nurimbetov hamda Latviyadagi elchi Timur Rahmonovga bir oy muddatda dastur ishlab chiqish vazifasi berildi. Ular 2030-yilgacha 50 ming aholini Nordik davlatlarga ishga yuborish bo‘yicha mas’ul etib belgilandi.

Yig‘ilishda ayrim mamlakatlardagi elchilar tashkiliy tarzda o‘zbekistonliklarni ishga jalb qilish tajribasini boshqa davlatlar bilan yo‘lga qo‘yish bo‘yicha tashabbus ko‘rsatmayotgani tanqid qilindi. Chetdan ishchi kuchini faol jalb etayotgan Avstriya, Fransiya, Ispaniya, Italiya, Chexiya, Saudiya Arabistonidagi elchilarning bu yo‘nalishdagi ishlari qoniqarsiz ekani ko‘rsatib o‘tildi.

Ishlarni samarali tashkil qilish uchun elchixonalarga qo‘shimcha mablag‘ beriladi. Shuningdek, O‘zbekistonda xizmat ko‘rsatgan diplomat faxriy unvoni ta‘sis etiladi.

Avvalroq prezident raisligida Tashqi ishlar vazirligi va xorijdagi diplomatik vakolatxonalar faoliyati yuzasidan videoselektor yig‘ilishi o‘tkazilayotgani haqida xabar berilgandi.

Yig‘ilishda jahondagi geosiyosiy o‘zgarishlar, xalqaro munosabatlardagi beqarorlik va mintaqaviy qarama-qarshiliklar haqida so‘z bordi.

Global iqtisodiy transformatsiyalar har bir davlatdan tashqi siyosatni doimiy ravishda qayta ko‘rib chiqib, uni milliy manfaatlar va zamon talablariga moslashtirib borishni talab qilayotgani taʼkidlandi.

Davlat rahbari so‘nggi yillardagi ochiq, pragmatik va muvozanatli tashqi siyosat natijasida O‘zbekistonning xalqaro maydondagi o‘rni va nufuzi oshib borayotganini qayd etdi.

Shu munosabat bilan O‘zbekistonning Tashqi siyosat faoliyati konsepsiyasini yangilab, uning ustuvor yo‘nalishlarini qayta ko‘rib chiqish, milliy manfaatlarni himoya qilish va xalqaro maydonda mamlakatning o‘rnini mustahkamlashga qaratilgan aniq vazifalarni belgilab olish zarurligi ta‘kidlandi.

“Yangi konsepsiya mamlakatimizning uzoq muddatli strategik maqsadlarini, ichki islohotlarimiz mantig‘ini, iqtisodiy diplomatiya, xavfsizlik, investitsiya, eksport, transport-logistika, suv va iqlim masalalaridagi milliy manfaatlarimizni yaxlit va o‘zaro bog‘liq holda aks ettirishi lozim”, — dedi davlat rahbari.

Ishlarni samarali tashkil qilish uchun elchixonalarning har biriga qo‘shimcha mablag‘ berilishi belgilandi.

Diplomatlarning xizmatlarini munosib e‘tirof etish maqsadida “O‘zbekiston Respublikasida xizmat ko‘rsatgan diplomat” faxriy unvonini ta‘sis etish taklif etildi.