Tahlil uchun Xalqaro mehnat tashkilotining 2024-yilgi maʼlumotlaridan foydalanilgan. Bunda ish haqining oddiy nominal miqdori emas, balki xarid qobiliyati pariteti – yaʼni turli davlatlarda tovar va xizmatlar narxi qanchalik farq qilishi ham inobatga olingan.
Bu usul bir xil miqdordagi pul turli mamlakatlarda qancha tovar yoki xizmat xarid qilish imkonini berishini hisobga olishga yordam beradi. Shu sababli xarid qobiliyati pariteti boʻyicha taqqoslash aholining minimal ish haqi evaziga amalda qanday turmush darajasini taʼminlay olishini nisbatan aniqroq koʻrsatadi.
Reytingda eng yuqori koʻrsatkich Shveysariyada qayd etilgan. Mamlakatda xarid qobiliyati pariteti hisobga olingan minimal ish haqi oyiga 3 804 dollarga teng deb baholangan.
Shu bilan birga, Shveysariyada butun mamlakat uchun yagona qonun bilan belgilab qoʻyilgan minimal ish haqi mavjud emas. Eng kam mehnat haqini belgilash masalasi ayrim kantonlar darajasida tartibga solinadi.
Ikkinchi oʻrinni Germaniya egallagan – mamlakatda minimal oylik ish haqi xarid qobiliyati hisobida 2 928 dollarga teng boʻlgan. Uchinchi oʻrinda Buyuk Britaniya 2 902 dollarlik koʻrsatkich bilan qayd etilgan.
Eng yuqori minimal ish haqiga ega davlatlar oʻnligida asosan Yevropa mamlakatlari oʻrin olgan. Roʻyxatdagi Yevropa tashqarisidagi davlatlar qatorida Yangi Zelandiya ham bor. Avstriya esa reytingda beshinchi, Yangi Zelandiya sakkizinchi oʻrinni egallagan.
Reytingning eng quyi pogʻonasida Gambiya qayd etilgan. Bu mamlakatda xarid qobiliyati pariteti hisobida minimal oylik ish haqi atigi 67 dollarga teng boʻlgan.
Minimal ish haqi 150 dollardan kam boʻlgan yana bir qator davlatlar ham bor. Jumladan, Gvineya-Bisauda bu koʻrsatkich 83 dollar, Qirgʻizistonda 91 dollar, Ganada 100 dollar, Serra-Leoneda 121 dollar va Markaziy Afrika Respublikasida 133 dollarni tashkil etgan.
Sobiq SSSR mamlakatlari orasida ham sezilarli farq kuzatilgan. Rossiyada 2024-yilda minimal ish haqi xarid qobiliyati pariteti hisobida 662 dollarni tashkil qilgan. Belarusda bu koʻrsatkich yuqoriroq – 766 dollar boʻlgan.
Qozogʻistonda minimal ish haqi 483 dollar, Armanistonda esa 476 dollar darajasida qayd etilgan. Qirgʻizistondagi 91 dollarlik koʻrsatkich esa reytingdagi eng past natijalardan biri boʻlgan.
Shunday qilib, hatto xarid qobiliyati va mamlakatlardagi narx-navo farqi hisobga olinganda ham, dunyo davlatlarida minimal ish haqi darajasi oʻrtasida bir necha oʻn barobarlik tafovut saqlanib qolmoqda.
