Rada — 2020-yilda xotin-qizlarni qo‘llab-quvvatlovchi “Wonder Women” xalqaro hamjamiyatini tashkil eta olgan muvaffaqiyatli tadbirkorlardan.
O‘zbekistonda tug‘ilgan va bolaligi shu yerda o‘tgan tadbirkor taqdir taqozosi bilan yuqori sinflarda oilasi bilan Rossiyaga ko‘chib, oliy maʼlumotli bo‘lgan.
“Kasb yo‘lim keng qamrovli sport tadbirlarini tashkil etish bilan bog‘liq edi. Keyinchalik esa “Ostona Ekspo-2017” tashkiliy qo‘mitasining taklifiga ko‘ra yashash va ishlash uchun Qozog‘istonga ko‘chib bordim. Jami 12 yil davomida korporativ sektorda ishlab, turli mamlakatlarda, turli darajalarda va turli sohalarda xotin-qizlarning martaba pog‘onasi qanday qurilishi bo‘yicha katta tajribaga ega bo‘ldim (ayniqsa ular his tuyg‘ularga to‘la, har doim o‘sish va rivojlanish istagi bilan yashasa)”, — deydi tadbirkor.
Uning aytishicha, hammasi ham doim yaxshi kechmagan. Imkoniyatlarni qo‘ldan boy bermaslik juda qiyin bo‘lgan, chunki ko‘pchilik ayol kishi ekanligi uchun unga ishonchsizlik bilan qaragan.
Shu bois o‘z tajribasi va bilimlari bilan qurollanib, “Opa-singillik va birlik” tamoyili negizida turli mamlakatlar ayollarini birlashtiradigan va ularga jamiyat ichida o‘sib, rivojlanib borishga imkon yaratadigan platformani tashkil qilishga qaror qilgan. Shu asnoda “Wonder Women” hamjamiyati paydo bo‘lgan.
“Bugungi kunda Wonder Women hamjamiyatimiz 40 ta mamlakat va 140 ta shahardan 10 mingdan ziyod xotin-qizlarni birlashtirdi va bunda asosiy eʼtibor Markaziy Osiyo mintaqasiga qaratildi”, — deydi Rada.
