Prezidentning “Qishloq xo‘jaligi ishlab chiqaruvchilari faoliyatini yanada qo‘llab-quvvatlashning qo‘shimcha chora-tadbirlari to‘g‘risida”gi qarori loyihasi e’lon qilindi.
2024 yildan boshlab bir yil davomida eksperiment tariqasida, Qoraqalpog‘iston Respublikasi qishloq xo‘jaligi korxonalari tomonidan paxta va g‘alla maydonlari lazerli qurilmaga ega tekislash agregatlari bilan tekislanganda har bir gektar yer maydonga O‘zbekiston respublika budjetidan 3 mln so‘mdan subsidiya mablag‘lari ajratiladi.
Bunda, respublika budjetidan lazer uskunali yer tekislagichlar bilan tekislash tadbirlarini amalga oshirish xarajatlarining bir qismini qoplash uchun subsidiya mablag‘lari har bir konturga faqat bir marta ajratiladi.
Iqtisodiyot va moliya vazirligi 2024 yildan boshlab davlat budjeti parametrlarini shakllantirishda Qoraqalpog‘iston Respublikasi qishloq xo‘jaligi korxonalari lazerli qurilmaga ega tekislash agregatlari bilan yerlarni tekislash tadbirlarini moliyalashtirish uchun Qishloq xo‘jaligi vazirligi budjetida tegishli mablag‘larni rejalashtiradi.
Qishloq xo‘jaligi vazirligi, Suv xo‘jaligi vazirligi va Iqtisodiyot va moliya vazirligi qishloq xo‘jaligi korxonalariga lazerli qurilmaga ega tekislash agregatlari bilan yerlar tekislanganda har bir gektar yer maydonga 3 mln so‘mdan subsidiya ajratish tartibini ishlab chiqib tasdiqlash uchun Vazirlar Mahkamasiga kiritadi.
Qoraqalpog‘iston Respublikasi Vazirlar Kengashi 2023 yil 1 noyabrga qadar lazer uskunali yer tekislagichlar bilan 2024 yilda amalga oshiriladigan qishloq xo‘jaligi korxonalari va yer maydonlarining manzilli ro‘yxatini tasdiqlaydi.
