Barcha hududlarda xavfli chiqindilarni xatlovdan o‘tkazib, qayta ishlash va utilizatsiya qilish bo‘yicha kamida 1 tadan loyihani boshlash, yagona monitoring platformasini ishga tushirish ko‘zda tutilgan.
1-dekabr kuni Shavkat Mirziyoyev huzurida yig‘ilish o‘tkazilib, ekologik barqarorlik, shu jumladan chiqindilarni qayta ishlash masalalari ko‘rib chiqildi. Bu haqda prezident matbuot xizmati xabar berdi.
Toshkent shahrida ekologik vaziyatni yaxshilash bo‘yicha maxsus komissiyaning hisoboti tinglandi. Havo ifloslanishiga qarshi ko‘rilayotgan, ifloslanish manbalarini aniqlash va ularni bartaraf etish chora-tadbirlari muhokama qilindi.
Oxirgi kunlarda mamlakat hududi bo‘ylab sovuq antisiklon ta’siri kuchayib bormoqda. Natijada havo bosimi oshib, harorat pasaymoqda, inversiya hodisalari kuchaymoqda. Bunday sharoitda havodagi mayda zarrachalar yuqoriga ko‘tarilmay, pastki qatlamlarda to‘planib qolmoqda. Meteorologik sharoitlar tufayli havoning tabiiy tozalanish sur’ati sekinlashmoqda.
Prezident mazkur choralarni nafaqat poytaxtda, balki hududlarda ham tizimli davom ettirish, aniqlangan qonunbuzarliklarni tezkor bartaraf etish, havoga ta’sir ko‘rsatuvchi barcha omillarni qat’iy nazorat ostiga olishni topshirdi.
Maishiy chiqindilardan elektr energiyasi ishlab chiqarish bo‘yicha 6 ta hududda $933 mlnlik loyihalar boshlangani, boshqa viloyatlarda bu borada jiddiy harakat kuzatilmayotgani aytildi. Boshlangan loyihalarda ham investorlarni infratuzilma — yo‘l, elektr, suv bilan ta’minlash ishlari talab darajasida emasligi qayd etildi.
Viloyatlar hokimliklari va Ekologiya milliy qo‘mitasiga kamchiliklarni bartaraf etib, 2026-yilda qolgan hududlarda ham shunday loyihalarni boshlash topshirildi.
2030-yilgacha maishiy chiqindi poligonlarini 50% ga qisqartirish belgilangan. So‘nggi yillarda 47 ta poligon faoliyati tugatilib, rekultivatsiya qilindi, natijada 243 gektar yer tabiatga qaytarildi. Hozirda ishlayotgan 132 ta poligonning aksariyatida haligacha himoya devorlari, “yashil belbog‘”, suv ta’minoti va ekologik xavfsizlik inshootlari tashkil etilmagani ko‘rsatib o‘tildi.
Atrof-muhitga salbiy ta’sir ko‘rsatayotgani va aholi e’tirozlariga sabab bo‘layotgani uchun maishiy chiqindi poligonlarini ekologik xavfsiz hududga aylantirish zarurligi ta’kidlandi.
Mutasaddilarga 47 ta poligon yerini qayta foydalanishga kiritib, ularda “yashil maydon»lar barpo qilish, yangi investitsiya loyihalarini amalga oshirish kerakligi ko‘rsatib o‘tildi. Mavjud poligonlar atrofida “yashil belbog‘” yaratish, poligonlarning yarmida bahorda, qolgan yarmida kuzda daraxt va ko‘chat ekishni yakunlash vazifasi qo‘yildi.
2026-yildan buning uchun budjetdan har yili kamida 150 mlrd so‘m ajratib borilishi belgilandi.
Oxirgi ikki yilda avvallari qayta ishlanmagan sanoat va xavfli chiqindilarni qayta ishlash darajasi 4,5% ga olib chiqildi. Bu kamligi qayd etilib, sanoat va xavfli chiqindilar hosil bo‘layotgan va saqlanayotgan joylarni xatlovdan o‘tkazib, ularni qayta ishlash hamda utilizatsiya qilish bo‘yicha kamida 1 tadan loyihani boshlash zarurligi ta’kidlandi.
Xavfli chiqindilarni nazorat qilish bo‘yicha yagona axborot-monitoring platformasini ishga tushirish topshirildi.
Noyabr oyi oxirida prezident Toshkentda ekologik vaziyatni yaxshilash bo‘yicha chora-tadbirlarni tasdiqladi. Kechiktirib bo‘lmaydigan chora-tadbirlarni amalga oshirish bo‘yicha maxsus komissiya tuzildi.
