O‘zbekistonda 2026/27-o‘quv yilida 6 yoshli bolalar uchun alohida “nolinchi sinf” joriy etilmaydi, qabul amaldagi tartib asosida amalga oshiriladi. Bu haqda Maktabgacha va maktab ta’limi vazirligi tomonidan o‘tkazilgan brifingda ma’lum qilindi.
Unga ko‘ra, bolalar umumiy o‘rta ta’lim tashkilotining birinchi sinfiga ular yetti yoshga to‘ladigan yilda qabul qilinadi. Maktabga tayyorlov guruhlarida esa ta’lim-tarbiya jarayonlari davom ettiriladi.
Brifingda bir yillik maktabga tayyorlovdan o‘tganlikni tasdiqlovchi davlat namunasidagi elektron sertifikat joriy etilishi ham rejalashtirilayotgani bildirildi. Mazkur sertifikatni berish tartibi bo‘yicha barcha normativ-huquqiy hujjatlar ishlab chiqiladi.
2027/28-o‘quv yilidan boshlab tayyorlov guruhlarida tahsil olgan bolalarga ushbu elektron sertifikat beriladi. Shuningdek, bu ma’lumotlar umumiy o‘rta ta’lim to‘g‘risidagi shahodatnomada ham qayd etiladi.
Ma’lum qilinishicha, bir yillik maktabga tayyorlov guruhlarining ta’lim dasturi majburiy umumiy o‘rta ta’limning dastlabki bosqichi sifatida kiritiladi. Bu orqali bolalarning maktabga moslashuvi va boshlang‘ich sinflarga tayyorgarligi tizimli ravishda yo‘lga qo‘yiladi.
Dastur o‘quvchilarning yoshiga mos bilim va ko‘nikmalarni shakllantirishga qaratiladi. Shu bilan birga, sifat nazorati va monitoring mexanizmlari ham takomillashtiriladi.
Barcha 6 yoshli bolalarni qamrab olish maqsadida tayyorlov guruhlari maktabgacha ta’lim tashkilotlari, maktablar hamda ijtimoiy soha obyektlarida tashkil etiladi.
Nodavlat ta’lim tashkilotlariga ham bir yillik maktabga tayyorlov guruhlarini ochishga ruxsat beriladi. Vazirlik ushbu yo‘nalishda bosqichma-bosqich islohotlar davom ettirilishini ta’kidladi.
