Germaniyalik mutaxassislarga O‘zbekistonda ishlashlari uchun imtiyozlar berish taklif qilinmoqda.
O‘zbekiston diplomlari Germaniyada tan olinishi mumkin. Bu haqda Investitsiyalar, sanoat va savdo vazirligi matbuot xizmati xabar berdi.
1-aprel kuni vazir o‘rinbosari Shohrux G‘ulamov Germaniyaning ta’lim va migratsiya sohasi mutaxassislaridan iborat delegatsiya bilan uchrashdi. Unda Germaniya hududiy savdo-sanoat palatalarining direktorlari hamda GP Günter Papenburg AG ta’sischi kompaniyasi tomonidan tashkil etilgan investitsiya kompaniyalari rahbarlari ishtirok etdi.
Uchrashuvda bir qator yo‘nalishlar bo‘yicha hamkorlik masalalari muhokama qilindi. Xususan, O‘zbekiston yoshlarini yangi texnologiyalarga o‘rgatish va keyinchalik ularni Germaniya korxonalariga ishga joylashtirish uchun qo‘shma loyihalarni amalga oshirish imkoniyati ko‘rib chiqildi. Tomonlar O‘zbekiston diplomlarining Germaniyada tan olinishi bo‘yicha ham muzokara olib bordi. Buning uchun O‘zbekistondagi oliy ta’lim muassasalari va kasb-hunar kollejlari Germaniya ta’lim vazirligining ANABIN axborot bazasiga kiritilishi mumkin.
Shu bilan birga, germaniyalik mutaxassislarga O‘zbekistonda mehnat faoliyatini amalga oshirish uchun imtiyozlar berish taklif qilinmoqda.
Joriy yilning mart oyi boshida prezident qarori bilan 2024-yilning sentabrida Germaniya kansleri Olaf Sholsning O‘zbekistonga tashrifi doirasida Samarqandda imzolangan O‘zbekiston va Germaniya hukumatlari o‘rtasida migratsiya va mobillik sohasida sheriklik to‘g‘risidagi bitim tasdiqlandi.
O‘sha vaqtdagi Kambag‘allikni qisqartirish va bandlik vaziri Bekzod Musayev kelishuv shaffof, tashkillashtirilgan migratsiya jarayonlarini yo‘lga qo‘yishdagi birinchi qadam bo‘lganini qayd etgandi.
