Jahon iqtisodiyoti va diplomatiya universitetini tamomlagan Indira dastlab Toshkentdagi “LG Electronics” kompaniyasida ishlagan. Chet elda yashab ishlashini kutmagan. Ammo uning turmush o‘rtog‘i har doim AQSHga ko‘chib o‘tishni orzu qilgan va bu amalga oshgan.
Ko‘chib o‘tgandan so‘ng, fotografiya bilan shug‘ullanib, sevimli mashg‘ulotini kichik biznesga aylantirgan. Vaqt o‘tib mijozlar soni oshgan, biznes foyda keltira boshlagan.
“Ammo men katta kompaniyaning ofisida ishlashni orzu qilardim. Shuning uchun turli kompaniyalardagi lavozimlarga onlayn so‘rov qoldirdim. Ko‘p o‘tmay kichik mahalliy kompaniyada maʼmur sifatida ishlay boshlaganman. Keyinchalik esa Googleʼdagi faoliyatim boshlandi”, — deydi Indira.
Uning aytishicha, Googleʼda ish tajribasidan tashqari, nomzodning hayotiy tajribasi, o‘ziga xosligi, muammolarni hal qilishdagi nostandart yondashuvi, muloqot va jamoada ishlash qobiliyati qadrlanadi.
