O‘zbekistonda 13–14-mart kunlari “Yurt obodligi, avvalo, mahalladan boshlanadi!” shiori ostida umumxalq xayriya hashari o‘tkaziladi. Bu haqda hukumatning 28-fevraldagi farmoyishida belgilandi.

Hujjatga ko‘ra, umumxalq xayriya hashari davomida mahallalar, aholi punktlari, ko‘p qavatli turar joylar, hovlilar atrofi, guzarlar, ziyoratgohlar, qabristonlar, ko‘cha va yo‘laklar hamda bolalar maydonchalari tartibga keltiriladi, daraxtlarni oqlash va butash ishlari tashkil etiladi.  “Yashil makon” umummilliy loyihasi doirasida mahallalar va aholi xonadonlari atrofiga mevali va manzarali daraxt ko‘chatlari ekiladi.

2026-yilda Amir Temur tavalludining 690 yilligi keng nishonlanishi munosabati bilan Toshkent, Samarqand, Shahrisabz shaharlarida Amir Temur haykallari o‘rnatilgan maydonlar atrofida, uning nomi berilgan ko‘plab ko‘chalarda obodonlashtirish ishlari amalga oshiriladi.

Shuningdek, ijtimoiy himoyaga muhtoj aholi qatlamlari, ayniqsa ehtiyojmand, mehr-muruvvatga muhtoj, boquvchisiz qolgan keksa va nogironligi bo‘lgan fuqarolarning uy-joy sharoitlarini yaxshilashga ko‘maklashiladi.

Obodonlashtirish tadbiri ishtirokchilariga zarur texnika vositalari va anjomlar beriladi. Joylarda obodonlashtirish ishlarini o‘tkazish jarayonida to‘plangan chiqindilar mahalliy ijro etuvchi hokimiyat organlari va boshqa mutasaddi tashkilotlar tomonidan alohida belgilangan joylarga olib chiqilishi ta’minlanadi.

Umumxalq xayriya hashari davomida avtomobil yo‘llari, harakatlanish tig‘iz bo‘lgan ko‘chalar, suv obyektlari, qirg‘oqlar, hududlar, qurilish maydonlari, bino va inshootlar tomlari, xavfli ishlab chiqarish obyektlari, shuningdek, insonlarning hayoti yoki sog‘lig‘iga xavf tug‘dirishi mumkin bo‘lgan boshqa joylarda ixtiyoriy hasharlarga tadbirlar va boshqa ishlarni amalga oshirish taqiqlangani qat’iy nazoratga olinadi.

Prezidentning Qoraqalpog‘iston Respublikasini 2026-yilda ijtimoiy-iqtisodiy rivojlantirish va kelgusi yillar uchun mo‘ljallangan dasturlarni tasdiqlash bo‘yicha qarori qabul qilindi.

Hujjat bilan ko‘ra, 2026-yil yakunigacha yalpi hududiy mahsulot hajmini 8,1%ga, sanoat mahsulotlari ishlab chiqarish hajmini 8%ga oshirish belgilandi.

Shuningdek, ishsizlik darajasi 4,2%gacha, kambag‘allik darajasi 3,2%gacha pasaytiriladi. Nukus shahri, Qo‘ng‘irot va Chimboy tumanlari hamda 109 ta mahalla ishsizlik va kambag‘allikdan xoli hududga aylantiriladi.

2030-yilga qadar yalpi hududiy mahsulot hajmi 102,4 trln so‘mga, qishloq xo‘jaligi ishlab chiqarishi 28,9 trln so‘mga yetkaziladi.

Qoraqalpog‘iston Respublikasi Vazirlar Kengashi raisining Ekologiya va Orolbo‘yi hududini rivojlantirish masalalari bo‘yicha birinchi o‘rinbosari lavozimi tugatiladi. O‘rniga raisning yaylovlardan samarali foydalanishni tashkil etish, chorva ozuqa bazasini mustahkamlash va chorvachilikni rivojlantirish masalalari bo‘yicha birinchi o‘rinbosari lavozimi kiritiladi.

Qarorga ko‘ra, Qo‘ng‘irot, Chimboy, Beruniy, Bo‘zatov va Qonliko‘l tumanlarida chorva ozuqasi yetishtiriladi. Saqlash, qadoqlash quvvatlari ishga tushirilib, aholiga yetkazib berish tizimi yo‘lga qo‘yiladi.

2026-yil yakunigacha Beruniy tumanida yillik quvvati 36 ming tonna bo‘lgan chorva va baliq ozuqasini ishlab chiqarishga mo‘ljallangan zamonaviy Agromajmua loyihasi ishga tushiriladi. 2026−2028-yillarda Qoraqalpog‘istonda 10 ming gektar yer maydonlarida chorva ozuqasi yetishtirish choralari ko‘riladi.

Nukusda tirbandliklarni kamaytirish maqsadida Nukus shahri va Taxiatosh tumanini bog‘lovchi 2,2 km avtomobil yo‘li, 1 ta ko‘prik hamda Nukus-Chimboy-Taxtako‘pir avtomobil yo‘lining 4 km qismida yangidan yo‘l o‘tkazgich quriladi.

Amudaryo tumanida 6 ta mahalla fuqarolar yig‘iniga 107,1 km ichimlik suv tarmog‘i yangidan quriladi. Umumfoydalanishdagi avtomobil yo‘llarining 110,5 km qismi, 1 ta nasos stansiyasi hamda tuman markazidagi mavjud lokal oqova suv tozalash inshooti rekonstruksiya qilinadi.

Shumanay tumanida umumfoydalanishdagi avtomobil yo‘lining 31 km qismi rekonstruksiya qilinadi.

Jahon banki Markaziy Osiyo mamlakatlarida elektr energiyasi bozorini rivojlantirishni qo‘llab-quvvatlash uchun $3,2 mln miqdorida grant ajratadi.

Ushbu mablag‘ mintaqaviy elektr energiyasi bozorini yaratish bo‘yicha dastlabki qadamlarni amalga oshirishga yo‘naltiriladi.

Grant shartnomasi Jahon banki, “Energiya” muvofiqlashtiruvchi dispetcherlik markazi (MDM), Yevropa Ittifoqi delegatsiyasi hamda Buyuk Britaniya va Shveytsariyaning Toshkentdagi elchixonalari vakillari ishtirokida imzolandi.

2026-yil yanvar oyida Jahon banki Markaziy Osiyoda elektr energiyasi bozorini rivojlantirish va tizimlarni integratsiya qilish (REMIT) dasturini tasdiqladi va uni amalga oshirish uchun $1 mlrddan ortiq moliyalashtirishni ma’qulladi.

2035-yilgacha mo‘ljallangan ushbu dastur mintaqa mamlakatlari o‘rtasida energetik bog‘liqlikni mustahkamlashga qaratilgan. Dastur doirasida mintaqaviy bozor yaratish, transchegaraviy savdo hajmini oshirish, elektr uzatish tarmoqlarining o‘tkazuvchanligini kengaytirish va qayta tiklanuvchi energiya manbalarini tizimlarga integratsiya qilish kabi tadbirlar amalga oshiriladi.

Grant REMIT dasturi maqsadlariga erishishga xizmat qiladi va “Energiya” MDM rahbarligida pilot loyihalarni moliyalashtirilib, mintaqaviy bozor operatori funksiyasini yo‘lga qo‘yiladi.