O‘zbekistonda ishsizlik darajasi 5% dan pasaydi, deya xabar berdi Kambag‘allikni qisqartirish va bandlik vazirligi matbuot xizmati.

Joriy yilning iyul-sentabr oylari yakunlariga ko‘ra, ishsizlik darajasi 4,9% ni tashkil etdi. Bu 2024-yilning uchinchi choragiga nisbatan 0,8 punktga kam.

37,8 mln aholi tarkibida mehnat resurslari 20,35 mln kishini tashkil etib, bu ko‘rsatkich o‘tgan yilga nisbatan 1,9% ga yuqori bo‘ldi. Iqtisodiy faol aholi soni 15,57 mln kishiga yetdi, shundan 14,81 mln kishi ish bilan ta’minlangan bo‘lib, bu 4,1% lik o‘sishni ko‘rsatdi.

Shunday qilib, ishsizlar soni taxminan 760 ming kishini — iqtisodiy faol aholining qariyb 4,9%ini tashkil etadi.

Bandlik vazirligi matbuot xizmatining Spot’ga ma’lum qilishicha, ishsizlik darajasi oxirgi marta 2013-yilda (4,9%) 5% dan pastga tushgan. 2010-yildan 2017-yilgacha O‘zbekistonda ishsizlik 5−6% darajasida saqlanib qolgan.

2018-yildan so‘ng bu ko‘rsatkich tez sur’atlar bilan o‘sishni boshladi va pandemiya yilida, ya’ni 2020-yilda eng yuqori darajaga — 10,5% ga yetdi. Keyingi yillarda ishsizlik izchil ravishda pasayib bordi: 2021-yilda 9,6%ni, 2022-yilda 8,9%ni, 2023-yilda 6,8%ni, 2024-yilda esa 5,5%ni tashkil etdi.

Birinchi yarim yillikda ishsizlik darajasi o‘tgan yilgi 5,5% dan 5,1% gacha pasaydi. Iyun oyi yakuniga ko‘ra, mamlakatda 781,6 mingdan ortiq ishsiz mavjud edi. 8 mln nafardan ziyod kishi (jami bandlarning 55%i) rasmiy sektorda, 4,8 mln nafari (33%i) esa norasmiy sektorda mehnat qilgan. Bundan tashqari, 1,8 mln o‘zbekistonlik (12%) chet ellarda ish bilan band bo‘lgan.

Osiyo taraqqiyot banki (OTB) O‘zbekistonda, jumladan kichik korxonalar uchun ham moliyalashtirish imkoniyatlarini kengaytirish maqsadida $300 mln ajratishni ma’qulladi. Bu haqda bankning rasmiy saytida e’lon qilindi.

OTB tomonidan tasdiqlangan kreditning $100 mlni imtiyozli shartlarda ajratiladi. Moliyalashtirish mikro, kichik va o‘rta korxonalar (MKO), xususan ayollar boshqaradigan korxonalar uchun moliyalashtirish imkoniyatlarini kengaytirish va mikromoliya sektorini mustahkamlash bo‘yicha hukumat sa’y-harakatlarini qo‘llab-quvvatlashga mo‘ljallangan.

Ushbu siyosatga asoslangan mablag‘ inklyuziv iqtisodiy o‘sishni rag‘batlantirish va tadbirkorlikni rivojlantirishga qaratilgan.

Rejalashtirilgan chora-tadbirlar orasida mikrokreditlarning maksimal miqdorini oshirish, mikromoliyalash sohasidagi normativ hujjatlarni takomillashtirish, Tadbirkor ayollarni moliyalashtirish xalqaro kodeksiga qo‘shilish, shuningdek, islomiy mikromoliyalash uchun normativ bazani ishlab chiqish kabilar bor.

Ushbu qadamlar aholining zaif qatlamlari uchun moliyaviy imkoniyatlarni kengaytirish va sohaning barqaror rivojlanishini qo‘llab-quvvatlashga qaratilgan.

“OTB O‘zbekistonning yanada inklyuziv va bozorga yo‘naltirilgan moliya tizimiga o‘tishini qo‘llab-quvvatlayotganidan faxrlanadi”, — dedi bankning O‘zbekistondagi doimiy vakolatxonasi direktori Kanokpan Lao-Araya.

Uning qayd etishicha, dasturning amalga oshirilishi o‘zini o‘zi band qilganlar va mikro tadbirkorlar uchun moliyalashtirishdan foydalanish imkoniyatini ochadi, gender tengligini rag‘batlantirishga yordam beradi va moliya sektorida iste’molchilar huquqlarini himoya qilishni kuchaytiradi.

O‘zbekistonda 2025-yil oxirigacha Coursera onlayn ta‘lim platformasi kurslari o‘zbek tiliga tarjima qilinishi rejalashtirilmoqda. Bu haqda Raqamli texnologiyalar vazirligi xabar berdi.

Sherzod Shermatov AQShning yirik onlayn ta‘lim platformalaridan biri Coursera kompaniyasi rahbariyati bilan uchrashuv o‘tkazdi.

Unda O‘zbekiston va Coursera o‘rtasida AT-ta‘limni rivojlantirish, xalqaro standartlarga mos sertifikatlash tizimini joriy etish hamda global ta‘lim resurslariga kirish imkoniyatlarini kengaytirish masalalari muhokama qilindi.

Uchrashuvda Coursera tomonidan 2025-yil oxirigacha 3000 ta kursni o‘zbek tiliga tarjima qilish orqali xalqaro sifatli ta‘lim resurslariga kengroq kirish imkonini yaratish masalasiga e‘tibor qaratildi.

Muzokaralar davomida bitiruvchilarni ish bilan ta‘minlashni qo‘llab-quvvatlash va sanoat bilan hamkorlikni kengaytirish orqali AT-ta‘lim jarayonini takomillashtirish muhimligi ta‘kidlandi.

Hozirda Coursera platformasida 1,5 mlndan ortiq o‘zbekistonlik o‘rganuvchilar onlayn ta‘lim olmoqda. Platforma Google, AWS, Nvidia, Meta va Microsoft kabi jahon miqyosidagi yetakchi texnologiya kompaniyalari bilan o‘quv dasturlarni yaratish bo‘yicha hamkorlik o‘rnatgan.

2023-yili O‘zbekistonda Coursera bilan onlayn kurslarning yangi mahalliy platformasi ishga tushirilgandi.

Joriy yilning aprelidan Coursera masofaviy ta’lim platformasi O‘zbekistonda soliq to‘lovchi sifatida ro‘yxatdan o‘tgandi.