Fyodor Ovchinnikov biznesni oddiy kitob do‘koni ochishdan boshlagan. U bankdan kredit olish uchun pulni uyini ta’mirlashga ishlataman deb aytgan, aslida esa do‘kon ochgan. U qilayotgan ishlarini blogda yozib borgan va shu orqali tezda mashhur bo‘lib ketgan.
2008-yilgi moliyaviy inqiroz paytida u biznesdagi o‘z ulushini yirik hamkorlarga sotishga majbur bo‘lgan. Shunday qilib, u birinchi biznesidan ayrilgan.
Keyin u butunlay boshqa soha — pitseriya ochishga qaror qilgan. Ko‘pchilik uni bu fikrdan qaytarmoqchi bo‘lgan. “Siktivkarda pitseriya yurmaydi”, “Yetkazib berish xizmatiga hech kim buyurtma bermaydi”, deyishgan. Ammo u o‘z g‘oyasiga ishongan va tavakkal qilgan.
Natijada kichik bir pitseriya keyinchalik xalqaro “Dodo Pizza” tarmog‘iga aylangan.
Ovchinnikovning muvaffaqiyati faqat pitseriya ochish bilan cheklanmaydi. U o‘zining maxsus axborot tizimini yaratgan. Bu tizim pitseriyalardagi barcha jarayonlarni nazorat qiladi va ishni samarali tashkil etishga yordam beradi. Bundan tashqari, u franshiza tizimini yo‘lga qo‘yib, boshqa tadbirkorlarga ham shu brend ostida ishlash imkonini bergan.
Qiziq fakt: 2017-yil yanvar oyida aynan birinchi ochilgan Siktivkardagi “Dodo Pizza” pitseriyasi 7 million rubl daromad qilgan.
Bu hikoya shuni ko‘rsatadiki, muvaffaqiyatga erishish uchun ba’zida hammasini qaytadan boshlashga to‘g‘ri keladi. Eng muhimi — qo‘rqmaslik va o‘z g‘oyangga ishonish.
