Prezident Shavkat Mirziyoyevning 14-fevral kuni yoshlar bilan bo‘lib o‘tgan yig‘ilishda yoshlarni ish bilan ta’minlash, ularning tadbirkorlik va ta’lim olishlari uchun yangi imkoniyatlar taqdim etilishi haqida ma’lum qilingandi. Ushbu yig‘ilish doirasida belgilab berilgan ustuvor vazifalar doirasida Yoshlar ishlari agentligi, “Yoshlar — kelajagimiz” jamg‘armasi, O‘zbekiston yoshlar ittifoqi hamda MFaktor hamkorligida 2025-yil 27-fevral kuni Qoraqalpog‘istonda yoshlar uchun biznesni boshlashga oid muhim tadbir — “Biznes Marafon” o‘tkazildi. Tadbirning maqsadi yoshlarni tadbirkorlikka keng jalb qilish, ularni zamonaviy biznes ko‘nikmalari bilan tanishtirish va yangi biznes g‘oyalarini amalga oshirishda qo‘llab-quvvatlashdir.
Nukus shahridagi tarixiy majmuada — Ginnesning rekordlar kitobiga kiritilgan “Oq qush” me’morchilik kompleksida barpo etilgan dunyodagi eng katta diametrli Oʻtovda bo‘lib o‘tgan tadbirda yosh tadbirkorlar, innovatorlar va biznesni boshlash istagidagi yoshlar, yurtimizning tajribali biznesmenlari, muvaffaqiyatli startaplar egalari hamda soha mutaxassislari ishtirok etishdi.
Uchrashuv davomida tadbirkorlikni boshlash uchun zarur bilimlar berildi, innovatsion texnologiyalar va zamonaviy biznes yondoshuvlar o‘rgatildi, dunyo tajribasi, shuningdek, yoshlar tadbirkorligini qo‘llab-quvvatlash, ta’lim kabi sohalarda mavjud imkoniyatlar haqida ma’lumotlar berildi.
