Saida Mirziyoyeva Toshkentda amalga oshirilishi rejalashtirilayotgan yirik arxitektura loyihalari tashabbuskorlari bilan uchrashuv o‘tkazgani haqida yozgandi.
Unda ixtisoslashgan studiyalar va oliy ta’lim muassasalari mutaxassislari, shuningdek, mustaqil ekspertlar ishtirok etdi.
Uchrashuvda loyihalashtirilayotgan va amalga oshirish bosqichidagi bir nechta majmualar taqdim etildi. Jumladan, Silq Plaza Amir Temur xiyoboni yaqinidagi 2,44 gektarlik hududda — sobiq davlat kompaniyasi O‘zbekenergo binosi o‘rnida qurilishi rejalashtirilayotgan majmua loyihasini taqdim etdi.
Loyiha umumiy qiymati $400 mln bo‘lgan ko‘p qavatli mehmonxona va biznes markazi qurilishini nazarda tutadi. Moliyalashtirishni xorijiy investitsiyalar hisobidan ta’minlash rejalashtirilgan. Obyektlarning umumiy maydoni 201 ming kvadrat metrdan oshadi.
Taqdimotga ko‘ra, majmua 600−800 ga yaqin xonadonni o‘z ichiga oladi. Shuningdek, quruvchi O‘zbekenergo binosi yonida joylashgan favvora binosini qayta qurishni taklif qilmoqda.
Tadbirda Silq Plaza’ning ikki ta’sischisidan biri (uning ulushi 15,3%) va Tashkent City Mall boshqaruvchi direktori Dilyor Qayumov ishtirok etdi.
O‘zbekenergo’ning sobiq binosi
Poytaxt markazidagi O‘zbekenergo binosi 2019-yilda Energetika vazirligi tashkil etilganidan ko‘p o‘tmay ma’muriy bino sifatida foydalanishdan chiqarilgan.
Vazirlikni tashkil etish to‘g‘risidagi prezident qarorida bino va unga tutash hududni xorijiy investorlarni jalb qilgan holda mehmonxona majmuasi qurish uchun bo‘shatish ko‘zda tutilgan.
2020-yil boshida loyiha bo‘yicha qo‘shimcha tafsilotlar ma’lum bo‘ldi. Uch yillik investitsiya dasturiga ko‘ra, bino o‘rnida $50 mln qiymatdagi Yevropa brendi ostidagi 4 yoki 5 yulduzli mehmonxona qurilishi rejalashtirilgan. Ishlarni 2023-yilda yakunlash kutilgandi.
Davlat aktivlarini boshqarish agentligi 2020-yil iyulida binoni 85 mlrd so‘m boshlang‘ich narxda ochiq savdoga chiqarishni e’lon qilgan. Xaridor uning o‘rnida kamida 200 kishiga mo‘ljallangan mehmonxona, savdo va ko‘ngilochar markaz qurishi kerak edi.
