Viktoriya 1994-yilda Toshkentda tug‘ilgan. 2016-yilda Toshkent davlat sharqshunoslik institutini tamomlagan. Shundan so‘ng bir necha yil Janubiy Koreyadagi “KL Management” adabiy agentligida ishlagan, 2018-yilda esa O‘zbekistonga qaytib, shu yerda o‘zining nashriyot uyi — “Asian book house”ni ochgan.
Nashriyot biznesiga o‘tishdan oldin tajriba orttirgan, shaxsiy kiyim brendi ustida ishlagan, ammo bu foyda keltirmagach, olti oydan keyin biznesni yopgan. 2017-yilda Koreyaga borib, “KL Management” adabiy agentligida avval amaliyotchi, so‘ngra loyiha menejeri sifatida faoliyat yuritgan.
“Asian book house”ni ochish uchun hech qanday investitsiyalarni jalb qilmasdan, rivojlantirishga o‘z pulini kiritgan.
“Nashriyot biznesida kitobning mashhurligini va sotilish—sotilmasligini oldindan his qilish kerak bo‘ladi. Ha, bu qiyin. Lekin men bu ishni tanlaganman, shuning uchun chidashim va qadam tashlashda davom etishim kerak”, — deydi tadbirkor.
