Majidxon Islomov — “Urgut sanoat servis” korxonasi rahbari bo‘lib, “URGUTINI” brendi ostida erkaklar va o‘smirlar ko‘ylagi ishlab chiqarib aholiga yetkazish va o‘zbek brendi ostida ishlab chiqarilgan tovarlarni eksport qilish faoliyati bilan shug‘ullanadi.
Tadbirkor 1989-yilda Samarqand viloyatining Urgut tumanida tavallud topgan. O‘rta maxsus ta‘limni tugatgach, o‘zini bir nechta sohalarda sinab ko‘rgan va o‘z faoliyatini tadbirkorlik sohasida boshlashga qaror qilgan. 2012–2016-yillarda savdo, ishlab chiqarish yo‘nalishlarida ishlab kerakli tajriba to‘plagan Majidxon 2016-yilda o‘z korxonasiga asos solgan.
Faoliyatini yanada kengaytirish maqsadida tekstil sohasida yetakchi bo‘lgan Xitoy, Turkiya davlatlarida bo‘lib tajriba orttirgan Majidxon Islomov faoliyatida Yaponiya tajribasini qo‘llab keladi. Yoshlarni tadbirkorlikka, tekstil sohasiga o‘qitish maqsadida xorijlik malakali mutaxassislarni jalb qilib, bepul o‘quv kusrlarni tashkil qilgan.
Majidxon islomov 2021-yilda o‘tkazilgan “Tashabbus-2021” ko‘rik-tanlovi Respublika bosqichining “Eng yaxshi yosh tadbirkor” nominatsiyasi sohibi, 2021-yilda Prezident farmoniga ko‘ra, «Shuhrat» medali bilan taqdirlangan.
