Xotin-qizlarga oliy ta’lim muassasalariga kirish uchun tavsiyanomaga arizalar qabuli boshlandi. Bu haqda Yagona interaktiv davlat xizmatlari portali rasmiy kanalida ma’lum qilindi.
Tavsiyanoma mutaxassisligi bo‘yicha 5 yil ish stajiga ega bo‘lgan ayollarga davlat OTMlarining bakalavriat ta’lim yo‘nalishlariga beriladi. Ular alohida qabul parametrlari doirasida tanlovda ishtirok etishlari mumkin.
Asosiy talablar:
- o‘rta maxsus yoki kasb-hunar ta’limi diplomiga;
- mutaxassisligi bo‘yicha kamida 5 yillik mehnat stajiga ega;
- oliy ta’lim olmagan (bakalavr diplomi yo‘q) bo‘lish.
- Tavsiyanomalar Oila va xotin-qizlar qo‘mitasi tomonidan taqdim etilib, unga ega bo‘lganlar uchun davlat OTMlariga alohida 500 ta kvota ajratiladi. Bunda nomzodlar imtihon topshirib, ballar ketma-ketligi bo‘yicha eng yuqori natija ko‘rsatgan 500 nafar xotin-qiz talabalikka qabul qilinadi.
Shuningdek, berilgan tavsiyanoma 3 yil muddatga amal qiladi va faqat bir marta o‘qishga kirish uchun foydalanish mumkin. Ya’ni bu yilgi qabulda nomzod o‘qishga kira olmasa, kelasi yilgi qabulda ham undan foydalana oladi.
Arizalar 1-iyunga qadar Yagona portal orqali qabul qilinadi. Xizmatdan havola orqali bepul foydalanish mumkin.
Imtiyoz xorijiy, nodavlat va harbiy ta’lim muassasalariga tatbiq etilmaydi.
