1-martdan boshlab 37 ta “og‘ir” toifadagi tumanda oilaviy tadbirkorlik dasturlari doirasidagi ajratiladigan kreditlar foizi yillik 12 foizgacha pasaytiriladi. Bu prezidentning hududlarni yangicha yondashuvlar asosida rivojlantirish orqali aholi daromadini oshirish, barqaror ish o‘rinlarini yaratish hamda kambag‘allikni qisqartirishga qaratilgan qarorida ko‘zda tutilgan.
Hujjatda oilaviy tadbirkorlik dasturlari doirasida mahalla darajasidagi biznes loyihalarni moliyalashtirishni oshirish ko‘zda tutilgan. Kreditlarning eng yuqori miqdorlari oshiriladi, ularning hisobidan tovarlar va xizmatlarni oldindan yetkazib berish talabi bekor qilinadi.
Mahallalarda tadbirkorlik faoliyatini yo‘lga qo‘yish istagida bo‘lgan (o‘zini o‘zi band qilgan) shaxslarga garov ta’minotisiz ajratiladigan kreditlar miqdori 50 mln so‘mgacha oshiriladi.
Chegara va anklav hududlardagi 563 ta mahallada turizm va xizmat ko‘rsatish sohasida faoliyat yuritayotgan tadbirkorlar o‘z faoliyatini kengaytirish uchun 1 mlrd so‘mgacha mablag‘ olishlari mumkin bo‘ladi. Bunda ular har 200 mln so‘m uchun kamida bitta ish o‘rni yaratish talabi mavjud.
Turizm salohiyati yuqori bo‘lgan mahallalarda mehmon uylarini tashkil etish, shuningdek, ixtisoslashuvi 50 foizdan yuqori mahallalarda mahsulotlarni saqlash va qayta ishlash bo‘yicha kichik majmualar tashkil etish uchun 150 mln so‘mgacha garovsiz kreditlar beriladi. Bundan tashqari, naslli qoramol va tuya sotib olish uchun 100 mln so‘mgacha mablag‘ ajratiladi.
1-martdan “mahalla loyihasi” dasturlari doirasida mahallalarning ixtisoslashuvini chuqurlashtirish maqsadida ajratilgan kreditlar bo‘yicha foiz to‘lovlarining bir qismini kompensatsiya qilish uchun Tadbirkorlikni rivojlantirish kompaniyasiga 1,2 trln so‘m ajratiladi hamda kompensatsiya quyidagi tartibda amalga oshiriladi:
- qishloq xo‘jaligi mahsulotlari yetishtirish loyihalari bo‘yicha kreditlar uchun — 4 foizli band;
- qo‘shilgan qiymat yaratishga yo‘naltirilgan qayta ishlash loyihalari bo‘yicha kreditlar uchun — 6 foizli band.
Tajribali dehqonlar o‘z mahallasidagi 10 ta xonadonni yuqori daromadli mahsulot yetishtirishga ixtisoslashtirgani uchun 2 mln so‘m subsidiya oladi. 30 foiz xonadon ixtisoslashsa, qo‘shimcha 75 mln so‘m beriladi.
Suv ta’minoti qiyin bo‘lgan hududlardagi dehqonlarga tomorqa va ijaraga olingan yerlarni sug‘orish uchun quduq qazish, shuningdek, kamida 10 kVt/soat quvvatga ega quyosh panellarini o‘rnatish xarajatlarining 70 foiz (200 mln so‘mdan oshmagan) qismi qoplab beriladi.
Shuningdek, bog‘lar barpo etish va qayta qurish uchun subsidiyalarning yangi turlari joriy etilmoqda. Tomchilatib sug‘orishni joriy etish va har bir sotixdan yomg‘ir suvini yig‘ish uchun to‘lov 160 ming so‘mgacha bo‘ladi.
Bundan tashqari, sertifikatlangan mevali daraxt ko‘chatlari va ularga tirgovuchlar xarajatining 50 foizi dehqonlarga qoplab beriladi. Meva turiga qarab, bitta ko‘chat uchun eng ko‘p subsidiya 30 ming so‘m va tirgovuch uchun 70 ming so‘mni tashkil etadi.
