Shuningdek, ular mini-texnika, urug‘ va ko‘chat xaridi uchun 5 mln so‘mdan subsidiya hamda 33 mln so‘mgacha kredit olishlari mumkin.
Joriy yilning fevral oyida prezident ishtirokida o‘tkazilgan yig‘ilishda yoshlarga yer ajratish bo‘yicha yangi tartib joriy etilishi ma’lum qilingandi.
5-aprel kuni yoshlarga yer ajratish orqali ularning daromadlarini oshirish va bandligini ta’minlash, hamda yangi yer maydonlarini o‘zlashtirishga qaratilgan prezident qarori qabul qilindi.
Unga ko‘ra, tuman hokimliklari zaxirasidagi 60 ming gektar yer maydoni elektron onlayn auksion savdolariga qo‘yilib, dehqon xo‘jaliklarini tashkil etish uchun yoshlarga ijaraga beriladi. Yer maydonini ijaraga berish bo‘yicha onlayn auksion “E-auksion” platformasi orqali talabgorlar o‘rtasida o‘tkaziladi. Bunda nomzodlar “mahalla yettiligi»ning tavsiyasi asosida ro‘yxatga kiritilgan bo‘lishi kerak.
Onlayn auksion savdolari g‘oliblariga yer uchastkasi narxini 10 yil muddatga teng ulushlarda foizsiz bo‘lib-bo‘lib to‘lashga ruxsat beriladi. Zakalat puli BHMning 1 baravari (340 ming so‘m) miqdorida belgilanadi.
Talabgorlarga 30 yil muddatgacha kichik lotlarda “bir massiv — bir mahsulot” tamoyili asosida quyidagilar ijaraga beriladi:
- sabzavot, kartoshka, poliz ekinlari, gul, ko‘katlar, makkajo‘xori doni, dukkakli va moyli ekinlar yetishtirishga sug‘oriladigan ekin maydonlari;
- bog‘dorchilik-uzumchilik yo‘nalishlari uchun ko‘p yillik daraxtzorlar yoki samarasiz bog‘lar yer maydonlari;
- dorivor o‘simliklar, chorvachilik yo‘nalishlari uchun chorva ozuqasi ekinlarini yetishtirishga mo‘ljallangan, lalmi, bo‘z, yaylov va yangi o‘zlashtirilgan yer maydonlari.
Talabgorlarga ajratiladigan yer maydonlari o‘lchamlari “mahalla yettiligi” taklifiga ko‘ra aniqlanadi.
Yoshlar “Temir daftar”, “Ayollar daftari”, “Yoshlar daftari»dan chiqarilmaydi va ular uchun qonunchilikda belgilangan barcha imtiyoz va preferensiyalar saqlab qolinadi.
Yer maydonlarida yetishtiriladigan ekin turlari va ular miqdorining doimiy monitoringi Yoshlar ishlari agentligining “Yosh fermerlar” platformasi orqali amalga oshiriladi.
joylardagi 167 ta “Agromarkazlar” orqali xususiy sektorni jalb etgan holda urug‘, ko‘chat yetkazish, mineral o‘g‘it berish, mini-texnika va agronom xizmatlari yo‘lga qo‘yiladi hamda yetishtirilgan mahsulotni xarid qilishga qayta ishlovchilar va eksport qiluvchilar biriktiriladi.
Joriy yilning 1-martidan yoshlarga xalqaro IT-sertifikatlar xarajatlarini qoplab berish miqdori oshirildi. Endi IT-sertifikat xarajatlarining 60%gacha qismi, agar ingliz tilidan sertifikat mavjud bo‘lsa, 100%i qoplab beriladi.
