3-fevral kuni Mark Sukerberg Meta aksiyalari pasayishi tufayli dunyoning eng boy 10 nafar kishisi roʻyxatidan tushib qoldi. Bu haqda Forbes xabar berdi.
Meta (sobiq Facebook) asoschisining boyligi 27,1 milliard AQSh dollariga (23,67 foizga) kamaygan va hozirda 87,4 mlrd. dollarni tashkil qilmoqda. Sukerberg Forbes talqiniga koʻra roʻyxatda 12-oʻrinni egallab turibdi.
Hisobot eʼlon qilinayotganida Meta aksiyalarining pasayishi tufayli Sukerberg oʻz kapitalining bir qismini yoʻqotgan. Joriy yilning 2-fevralidagi kengaytirilgan savdolar chog‘ida kompaniya qogʻozlari 23 foizga qisqargan. Meta toʻrtinchi chorakda Facebook’ning faol foydalanuvchilari soni nafaqat oʻsmagani, balki avvalgi uch oyga nisbatan kamaygani haqida bergan xabari investorlarning hafsalasini pir qilgan.
Bundan tashqari, kompaniyaning chorak yillik daromadi kutilganidan ancha past boʻlgani maʼlum qilingan. Meta’dan keyin Pinterest (deyarli 10 foiz), Snap (18 foizdan ortiq) va Twitter (taxminan 8 foiz) aksiyalari ham pasayishni boshlagan.
Shuningdek, 3-fevral kuni AQShdagi savdolar davomida Meta aksiyalari pasayishda davom etdi va 25,46 foizga qisqarib, 240,78 dollardan sotildi.
Bloomberg maʼlumotlariga koʻra, kapitalning bu qisqarishi tarixdagi bir kun ichida boylikning eng katta pasayishi boʻlgan.
Bunga qadar, yanvar oyida dunyoning eng badavlat odami Ilon Mask Tesla aksiyalari tushib ketishi tufayli 24,5 milliard dollar yoʻqotgan edi.
Qayd etish mumkin, 2021-yilning noyabr oyida esa u Twitter foydalanuvchilaridan kompaniya aksiyalarini sotish haqida soʻrov oʻtkazgach, 50 mlrd. dollardan koʻproq yoʻqotgan. Biroq, oʻshanda ham uning boyligi bir necha kun ichida pasaygandi.
