Umida — tajribali hamda muvaffaqiyatli ishbilarmon ayol, uchta go‘zallik salonining egasi va “Canella” qahvaxonasi hammuallifi, shuningdek, “Ishbilarmon ayollar klubi”ning asoschisi.
Tarjimonlik yo‘nalishida oliy ma’lumot olgan tadbirkor mutaxassisligi bo‘yicha ishlamagan. Keyinchalik vizajist va kosmetolog diplomini olgan, qandolatchilik kurslarida ham qatnashgan.
“20 yoshimda o‘zimning oshpazlik biznesimni boshladim — qizlarga qandolatchilik san’atini o‘rgatishni boshladim, o‘zim buyurtma olib tort pishirardim — bu mening sevimli mashg‘ulotim edi. Farzandlarim kichkina bo‘lgani uchun 8 yil davomida uyda ishlashda davom etdim. Keyinroq nimanidir o‘zgartirish kerak deb, boshqa yo‘nalishni tanlashga qaror qilib, qandolat sanoati bilan xayrlashdim. Bir dugonam o‘zi ochgan go‘zallik salonida ishlashni taklif qildi, u yerda nafaqat soch turmagi ustasi, balki menejer ham bo‘ldim. Shunga qaramay, qandolatchilik biznesini darhol tark eta olmadim, go‘zallik saloni uchun maxsus pishiriqlar tayyorladim. Shunday qilib, asta-sekin tajriba orttirdim, mijozlarim paydo bo‘ldi”, — deydi tadbirkor.
Umida 2017-yilda birinchi salonini ochgan. 2019-yilda yana bir, 2021-yilda esa uchinchi salon ish boshlagan.
