2026-yilda O‘zbekistonda kichik va o‘rta biznesni rivojlantirish uchun 140 trillion so‘m kredit mablag‘lari ajratish rejalashtirilgan. Bu haqda 23-yanvar kungi yig‘ilishda prezident Shavkat Mirziyoyev ma’lum qildi.
“Hozir banklar taklif qilayotgan kreditlar barcha tuman va shaharlar uchun bir xil. Endi o‘zingiz ayting, Olmazor bilan Bo‘zatovdagi imkoniyat va sharoitni taqqoslab bo‘ladimi? Lekin oilaviy tadbirkorlik uchun ikkala tumanga bir xil, 17,5 foizli kredit ajratilyapti. Endi 37 ta „og‘ir“ tumanda ushbu dastur doirasida kreditlar 12 foizdan beriladi”, — dedi prezident.
Barcha tumanlarda oilaviy biznes uchun imtiyozli kreditning maksimal miqdori 1,5 baravarga oshirilib, 50 million so‘mga yetkaziladi. Bunda:
- import qilingan va sertifikatli naslli chorva uchun 100 million so‘mgacha mablag‘ olish mumkin;
- uy mehmonxonalari, kichik hajmli muzlatgich, mahsulotlarni saqlash va qayta ishlash mini texnologiyasi uchun 150 million so‘mgacha garovsiz kredit mavjud.
Chegara va anklav hududda joylashgan 562 ta mahalladagi tadbirkorlik loyihalarining kredit miqdori 1 milliard so‘mgacha oshiriladi.
Buning uchun joriy yilda oilaviy tadbirkorlik dasturlariga reja qilingan 3,6 trillion so‘mga qo‘shimcha yana 2 trillion so‘m resurs yo‘naltirilishi belgilandi.
Bundan tashqari, mahallalar ixtisoslashuvini chuqurlashtirish uchun bu yil banklar 17 trillion so‘mlik kredit ajratadi. Bu jarayonda mahsulot yetishtirishga olingan kreditning 4 foizi, uni qayta ishlash loyihasida esa 6 foizi qoplab beriladi.
