XX asr boshlarida AQShda shokolad noyob mahsulot bo‘lib, asosan Shveysariyadan keltirilardi. Biroq qandolatchi Milton Hershi bu holatni butunlay o‘zgartirdi. U yigirma yil davomida shirinliklar ishlab chiqarish bilan shug‘ullandi va 1900-yilda yangi orzusi yo‘lida bor narsasini sotdi. Bir necha yil davomida Hershi sut fermalari bilan o‘ralgan zavodida tajribalar o‘tkazib, o‘zining shokolad formulasini yaratdi. Hershey’s bozorda paydo bo‘lgach, tadbirkor qisqa fursatda mamlakatdagi eng yirik shokolad sotuvchisiga aylandi.
Milton Hershi XX asr boshidayoq xodimlar farovonligi va rivojiga sarmoya kiritgan ilk tadbirkorlardan biri edi. O‘sha davrda bu bugungidek urf emasdi. U zavod atrofida chiroyli uylar, bank, mehmonxona, cherkovlar va do‘konlardan iborat butun bir shaharcha barpo etdi.
Shokoladdan tashqari, uning hayotidagi eng muhim ishlaridan biri sanoat maktabini tashkil etish bo‘ldi. Hershining o‘zi atigi to‘rt sinf ta’lim olgan edi va u ishchilar farzandlari ham uning yo‘lini takrorlamasligini istardi. U butun boyligini aynan shu maktabga vasiyat qilib qoldirdi.
