Xizmatdan Yagona portal orqali bepul va hech qanday hujjatlarsiz foydalanish mumkin.
Yagona interaktiv davlat xizmatlari portalida jarima ballarini aniqlash imkoni yaratildi. Bu haqda portal matbuot xizmati xabar berdi.
1-iyundan boshlab yo‘l harakati qoidabuzarliklari uchun haydovchilarga jarima ballarini hisoblash tartibi kuchga kirdi. Ular faqat YPX xodimlari tomonidan rasmiylashtirilgan ma’muriy bayonnomalar asosida hisoblab boriladi.
Endilikda jarima ballari to‘g‘risidagi ma’lumotni Yagona portal orqali onlayn olish mumkin. Xizmatdan foydalanish bepul bo‘lib, buning uchun hech qanday hujjat talab etilmaydi.
Buning uchun arizachi portalda ro‘yxatdan yoki autentifikatsiyadan o‘tishi kerak, undan keyin tegishli xizmatni tanlab, so‘rov yuborish mumkin.
Taqdim etiligan ma’lumotda to‘plangan jarima bali, qabul qilingan qaror raqami va sanasi, shuningdek, jarima bali uchun Majburiy javobgarlik to‘g‘risidagi kodeksning asos bo‘luvchi moddasi va bandi keltiriladi.
Xizmatdan havola orqali foydalanish mumkin.
Bundan tashqari, YHXX matbuot xizmati haydovchilar jarima ballari to‘g‘risidagi ma’lumotlarni Road 24 ilovasi o‘rniga ishlab chiqilgan Safe ROAD YHXX ilovasi orqali kuzatib borishlari mumkinligini ma’lum qildi.
Jarima ballarini hisoblash tartibi
Agar haydovchi 12 oy ichida yo‘l harakati qoidalarini buzmasa, keyingi davrda birinchi marta sodir etilgan huquqbuzarlik uchun birinchi jarima bali hisoblanmaydi.
Oxirgi huquqbuzarlik uchun jarima bali hisoblangandan keyin 6 oy davomida qoidabuzarlik sodir etilmasa, umumiy jarima ballaridan 2 bali chegirib tashlanadi. Agar ballarning umumiy miqdori 2 balidan oshmasa, barcha ballar ayirib tashlanib, ularni hisoblash birinchi huquqbuzarlik sodir etilgan vaqtdan boshlanadi.
Haydovchilar o‘zlarining jarima ballari haqidagi ma’lumotlarni undan va maxsus mobil ilova hamda Yagona portal orqali olishlari mumkin bo‘ladi. To‘plangan har bir ball haqida haydovchilar SMS-xabar orqali ogohlantiriladi.
Jarima ballarining miqdorlari quyidagicha:
- nosoz yoxud tegishli ruxsatnomasiz qayta jihozlangan transport vositalarini boshqarish — 0,3;
- foydalanish taqiqlangan, davlat raqami bo‘lmagan avtomobillarni boshqarish — 1;
- belgilanmagan tartibda oynalar tusini o‘zgartirish, ko‘rishni cheklaydigan qo‘shimcha narsalar o‘rnatish (oynalarni qoraytirish uchun tegishli ruxsatnoma berilgan transport vositalari mustasno) — 0,5;
- xuddi shunday huquqbuzarlik ma’muriy jazodan keyin bir yilda takror sodir etilsa — 1;
- sababsiz signal chalish, belgilanmagan tovush chiqaruvchi va yorituvchi qurilmalarni o‘rnatish — 0,2;
- tezlikni soatiga 20 km.gacha oshirish — 0,5;
- tezlikni soatiga 20 km.dan 40 km.gacha oshirish — 1;
- tezlikni soatiga 40 km.dan 60 km.gacha oshirish — 1,5;
- tezlikni soatiga 60 km.dan ortiqqa oshirish — 2;
- svetoforning taqiqlovchi signali yoki yo‘l harakatini tartibga soluvchining taqiqlovchi ishorasiga bo‘ysunmaslik — 1;
- Tezkor va maxsus xizmatlarning to‘siqsiz o‘tib ketishiga xalaqit berish — 0,5
- yo‘lning qarama-qarshi tomoniga chiqish, fuqarolarning xavfsizligini ta’minlash uchun o‘zga choralarni ko‘rishga majbur qiluvchi huquqbuzarlikni sodir etish — 1;
- to‘xtash yoki to‘xtab turish qoidalarini buzish — 0,2;
- odam tashish qoidalarini buzish — 0,3;
- ichki ishlar organlarining hamrohligisiz odam tashish — 0,5;
- quvib o‘tish qoidalarini buzish — 1;
- avariya holatini keltirib chiqaruvchi guruh bo‘lib harakat qilish — 1,5;
- temir yo‘lning o‘tish joylaridan o‘tish qoidalarini buzish — 1;
- YTH qatnashchilarining hodisa joyidan ketib qolishi — 2.
