Oliy ta’lim, fan va innovatsiyalar vazirligi innovatsion startaplarni qo‘llab-quvvatlash sohasida islohotlar loyihasini ishlab chiqdi. Hujjat normativ-huquqiy hujjatlar loyihalari muhokamasi portaliga joylashtirildi.
Loyiha startaplarni saralash va moliyalashtirish tizimini o‘zgartirishni nazarda tutadi. Unga ko‘ra, startaplarni xalqaro mezonlar asosida baholash, shuningdek, xalqaro tajriba asosida inkubatsiya va akseleratsiya dasturlarini joriy etish rejalashtirilmoqda.
Har yili kamida 50 ta startapga davlat mablag‘lari ajratilishi, ularni rivojlantirish uchun esa 40 mlrd so‘mdan ortiq mablag‘ yo‘naltirilishi kutilmoqda. Shuningdek, xususiy investorlar, kompaniyalar va venchur fondlardan yiliga $500 ming jalb qilish rejalashtirilgan.
2027-yil 1-yanvardan startap loyihalarini qabul qilish, saralash va moliyalashtirish jarayonlari to‘liq raqamlashtiriladi. Buning uchun innovatsion startaplar bilan ishlash platformasi hamda ilmiy va innovatsion faoliyat bilan shug‘ullanuvchi yuridik shaxslar reyestri yaratiladi.
Innovatsion startaplar uchun platformada moliyalashtirish manbalarini kengaytirish maqsadida kraudfanding funksiyasi yaratiladi.
Startaplarni moliyalashtirishni ISO mezonlari asosida texnologik tayyorgarlik darajasiga (TRL) bog‘lash rejalashtirilgan. Inkubator va akselerator tashkilotchilari har bir startap uchun quyidagi miqdorda pul oladilar:
- TRL 1 dan 3 gacha — BHMning 30 baravarigacha (13,2 mln so‘m);
- 4 dan 6 gacha — BHMning 50 baravarigacha (22 mln so‘m);
- 7 dan 9 gacha — BHMning 70 baravarigacha (30,8 mln so‘m).
Dasturlar natijalariga ko‘ra samarali deb topilgan 4 tadan 6 tagacha TRLga ega startaplar BHMning 485 baravarigacha (213,4 mln so‘m) moliyalashtirish imkoniyatiga ega bo‘ladilar. TRL 7 va undan yuqori bo‘lgan loyihalar uchun investitsiyalarning maksimal hajmi 4500 BHM (1,98 mlrd so‘m) ni tashkil etadi.
Bunda davlat tomonidan moliyalashtirish startap asoschisi xususiy investitsiya jalb qilishi sharti bilan amalga oshiriladi.
Startaplarni budjet mablag‘lari hisobidan moliyalashtirishni Innovatsiyalar va sanoat integratsiyasi kengashi ma’qullaydi. Kengash tarkibi Prezident Administratsiyasi rahbari tomonidan tasdiqlanadi.
Startaplarni qo‘llab-quvvatlash markazi akseleratsiya yoki inkubatsiyadan o‘tib, moliyalashtirilgan loyihalarga reklama va marketing bo‘yicha yordam beradi. Shuningdek, yiliga kamida ikki marta davlat organlari va tarmoq korxonalariga innovatsion ishlanmalarni joriy etish bo‘yicha takliflar yuboradi.
Qaror loyihasi muhokamasi 2-oktabrgacha davom etadi.
