Arizalarni davlat xizmatlari markazi yoki Yagona portal orqali jo‘natish mumkin bo‘ladi. Talabalarga 15 mln so‘mgacha qarz beriladi.
Hukumatning 2-maydagi qarori bilan Work and Travel dasturida ishtirok etuvchilarga ssuda ajratiladi. Bu haqda Adliya vazirligining Huquqiy axborot kanalida ma’lum qilindi.
Ushbu tartib 15-maydan joriy etilib, xalqaro dastur doirasida yoshlarga ishlash va sayohat qilish uchun xorijiy davlatlarga borish-kelish hamda boshqa xarajatlarini qoplashga ssuda beriladi.
Bunda mablag‘lar ajratiladigan davlatlar qatoriga AQSh, Kanada, Yevropa Ittifoqi, Buyuk Britaniya, Janubiy Koreya, Yaponiya, Avstraliya hamda Yangi Zelandiya kiritilgan.
Nomzodlar arizalarni davlat xizmatlari markazi yoki Yagona interaktiv davlat xizmatlari portali (my.gov.uz) orqali topshirishlari mumkin bo‘ladi.
Arizada quyidagi hujjatlarni ilova qilish kerak:
- xorijiy davlatdagi ish beruvchi bilan ariza beruvchi o‘rtasida tuzilgan mehnat shartnomasi;
- ariza beruvchi tomonidan ssuda qaytarilmaganda, ushbu mablag‘larni qaytarish majburiyatini o‘z zimmasiga oluvchi kafil jismoniy shaxsning so‘nggi 12 oylik ish haqi to‘g‘risida ma’lumot va qarz shartnomasi bo‘yicha kafil bo‘lishga rozilik arizasi — agar mavjud bo‘lsa;
- viza.
- Har yili 2 000 nafargacha talaba-yoshlarga BHMning 40 baravari (15 mln so‘m) miqdorida ssuda ajratiladi. 1 kalendar yil davomida ma’qullangan arizalar soni ushbu miqdorga yetgach, qabul to‘xtatiladi.
Talabalar ajratilgan ssudani chet eldan qaytgach, 1 oy ichida to‘lab berishi kerak. Ketma-ketligi bo‘yicha ssuda ajratilgan ariza beruvchilardan keyin ariza topshirganlar kelasi yil uchun ro‘yxatga qo‘yilmaydi. Bunda nomzodlar kelgusi yilda qaytadan murojaat qilishlari zarur.
2024-yilning dekabrida Shavkat Mirziyoyev raisligida o‘tkazilgan yig‘ilishda Work and Travel kabi dasturlardan foydalanish imkoniyatini oshirish uchun Yoshlar ishlari agentligi tomonidan talabalarning yo‘lkira xarajatlariga ssuda ajratish yo‘lga qo‘yilishi ma’lum qilingandi.
